Horario de verán

Segundo o establecido no artigo 9.2. do Convenio colectivo do persoal laboral do Concello de Betanzos o vindeiro 1 de xuño comeza a redución horaria correspondente aos meses de xuño, xullo e agosto e TODO O PERSOAL DESFRUTARÁ DUNHA REDUCIÓN DA XORNADA DE 1 HORA diaria que se establecerá segundo as necesidades do servizo. En moitos departamentos esta redución hai anos que se fai ao final da xornada, mais como sabemos, hai outros que por motivos de servizo non poden reducir unha hora diaria e desfrutan dunha compensación non recollida no convenio e que forma parte dun acordo non escrito entre o devandito departamento e o Concello. Realmente isto non tería porqué supor ningún prexuízo para os traballadores, mais o certo é que os criterios da compensación non son públicos e hai anos que son desiguais entre distintos departamentos cando a compensación horaria debería ser a mesma para todos os postos de traballo que non poden facer a redución diaria. A maiores, coma sempre están os casos que no pasado mesmo lle teñen denegado o dereito a redución nin a compensación, como é o caso do persoal pertencente ao GRUMIR.

Debido a que unha vez máis o convenio non especifica o horario de redución nos distintos departamentos e a posible compensación nos departamentos que por motivos de servizo non poden facer a devandita redución dende o Comité de Empresa solicitóuselle ao Concello que lle comunique a todos os departamentos o horario da redución dunha hora nos meses de verán, que especifique cal é a redución correspondente do persoal que ten un contrato a xornada parcial e que clarifique os criterios de compensación horaria para os postos de traballo que non poden facer a redución. O certo é que segundo para outros temas se aproban resolucións e se dá traslado aos departamentos entendemos que este é un tema urxente e agardamos que o Concello lle comunique aos traballadores canto antes o horario da redución. Independentemente disto e no que non sexa así, ao se tratar dun tema de horarios e xornadas intentarémolo levar a Mesa Xeral de Negociación para que, cando menos, o persoal dos departamentos que se ve obrigado a ter compensación horaria saiba canto antes cal é a compensación horaria correspondente a todo o período e non estea, como en anos anteriores, a este alturas, sen saber exactamente como vai ser o tema da redución horaria.

Voceiro especial "Un ano despois"

Voceiro Un Ano Despois-1

Abrindo camiños n.º 16 maio 2012

voceiro 16 cig betanzos

A CIG convoca concentracións nas cidades galegas coincidindo coa aprobación da reforma laboral no Congreso dos Deputados

Vigo, A Coruña, Santiago, Ferrol, Pontevedra, Ourense e Lugo acollerán mobilizacións para rexeitar os ataques do Goberno español do PP aos dereitos da maioría social.

 

A Confederación Intersindical Galega convoca concentracións nas sete cidades galegas este mércores 23 para rexeitar a reforma laboral que o Goberno español do Partido Popular ten previsto aprobar no Congreso dos Deputados ao día seguinte. A central nacionalista chama á clase traballadora galega a responder na rúa os ataques contra os dereitos da maioría social.

 

 A CIG considera que todas as medidas recollidas na reforma laboral van dirixidas a flexibilizar e abaratar o despedimento e as condicións laborais e proporcionar man de obra barata á patronal. A reforma pretende ademais debilitar a negociación colectiva, dividir os traballadores/as e individualizar as relacións laborais.O secretario xeral, Suso Seixo, afirma que “vai provocar unha caída xeneralizada dos salarios, o empobrecemento da clase traballadora, máis desigualdades e a exclusión social dos máis desfavorecidos”. Ante isto, dende a central nacionalista están convencidos de que a única resposta contra estas reformas pasa pola mobilización.

 Lugares e horarios das concentracións:
-Vigo: na Porta do Sol ás 20.00 horas.
-A Coruña: diante da Subdelegación do Goberno español ás 19.00 horas.
-Pontevedra: diante da Subdelegación do Goberno español ás 19.30 horas

-Ferrol: na Praza do Himno Galego ás 19.30 horas.

-Santiago: na Praza do Toural ás 20.00 horas.
-Lugo: diante da Subdelegación do Goberno español ás 20.00 horas.
-Ourense: diante do local da CEO (Praza das Damas) ás 20.00 horas.

Aviso: mañá 19 de maio, último día para solicitar as vacacións

Tal e como vos comentabamos hai uns días, segundo a última resolución da Alcaldía, mañá 19 de maio, finaliza o prazo para solicitar as vacacións do ano 2012. No caso de non facer a solicitude en prazo o Concello, segundo indica na devandita resolución, poderá decidir unilateralmente cando se poden desfrutar.

Lembrámosvos que o rexistro do Concello está aberto o sábado de 10:00 h a 13:00 h, e que no caso que alguén aínda non rexistrase a solicitude está a tempo. Ademais, podedes obter aquí  e aquí o novo modelo de solicitude de vacacións e permisos, ou solicitalo no propio Concello.

UN ANO DESPOIS

Por volta destes días hai un ano este blogue botaba a andar coa ilusión dun novo horizonte de defensa dos intereses do persoal laboral do Concello de Betanzos. Ata aquel momento a información para o común dos traballadores sempre fora máis ben escasa, o escurantismo era a estratexia seguida polos distintos gobernos municipais para unha doada manipulación do persoal, coa que tristemente en moitos casos colaboraban algúns compañeiros funcionarios ao ofrecer información inexacta, negar dereitos recoñecidos por lei e desinformar dependendo de quen solicitase información.

Daquela un grupo de compañeiros e compañeiras co apoio indispensable da CIG e dos seus asesores decidimos abrir un camiño no que non atopamos máis que pedras dende o comezo, o certo é que sabiamos que a tarefa non era doada mais tamén que o terreo non era ermo e que eran precisan moitas doses de ilusión, vontade e fortaleza para termar de todo o que viña enriba. Hai uns días, nunha xuntanza da sección sindical, botamos a ollada atrás e intentamos recompilar un pouco o traballo realizado e facer a oportuna análise á vez que falarmos sobre os principais obxectivos da CIG neste Concello unha vez iniciado este duro camiño.

A información e as canles de información da CIG do Concello téñense demostrado máis que útiles e por primeira vez a información sobre os temas laborais do Concello é de carácter público e de coñecemento para o persoal. Neste traballo xogou un papel fundamental a nosa páxina web www.cigconcellobetanzos.blogspot.com, que logo dun ano e con máis de 6000 visitas demostra que é un eixe fundamental de información, aínda así non menos importante é a difusión do noso voceiro "Abrindo camiños" que conta xa con 14 números e que sempre intentamos distribuír entre o máximo número de traballadores.

O 13 de xuño o Comité de Empresa actual cumpre un ano, por primeira vez na historia sindical do Concello o persoal laboral decidiu darlle a maioría á CIG que nunca antes tivera representación, e os delegados e delegadas da CIG intentamos dende ese momento amosar o noso agradecemento coa loita pola mellora da situación do persoal laboral. Daquela presentabamos uns compromisos de traballo que trataban temas como o acceso e provisión de postos, a promoción interna, a loita contra as discriminacións, un novo convenio, o fondo social, a xornada e calendarios, a prevención de riscos laborais e a loita contra a privatización dos servizos públicos. Hoxe decatámonos de que a pesar da dificultade da situación da Administración houbo algúns avances e o traballo comezou a dar os seus froitos, o persoal non permanente xa ten dereito a días de asuntos propios e accede ás axudas sociais, constituíuse a Mesa Xeral de Negociación, o Comité aprobou unha nova proposta de convenio que xa se está a negociar, intentamos que a información sobre o fondo de acción social fose de coñecemento para todo o persoal e presentamos unha proposta para un reparto deste fondo máis xusto, entre outras moitas reclamacións de problemas puntuais que se teñen feito nos últimos meses.

Fundamentalmente houbo un cambio no procedemento onde deixamos as negociacións a porta pechada a un lado e tentamos que todo o persoal teña coñecemento dos temas que lle afectan no traballo. No camiño descubrimos moitas eivas e problemas que o persoal laboral deste Concello arrastra dende hai tempo e que motivan as importantes diferenzas existentes fronte ao funcionariado, entre elas podemos destacar un goberno pouco sensible ás demandas do persoal laboral, a existencia de certos compañeiros funcionarios pouco proclives á colaboración cos laborais ou á consecución de melloras por parte do persoal laboral, un departamento de Persoal onde se ten ofrecido moita información errada, tendenciosa e discriminatoria dependendo de quen pregunte, un discurso moi forte en contra da CIG pola escasa predisposición aos cambios nunha Administración onde estatus entre laborais e funcionarios se pretendeu diferenciar dende as propias nóminas, e uns compañeiros do Comité de Empresa da UGT que en múltiples ocasións demostraron estar do lado do Concello no canto do dos traballadores e se cadra aínda dificultaron máis a solución nos conflitos laborais existentes.

Os delegados e as delegadas da CIG do Concello de Betanzos iniciamos o camiño con clara vontade de diálogo, vontade que en ningún momento apoucou a inciativa de empregar os procedementos administrativos como soporte aos primeiros encontros co delegado de Persoal e co propio alcalde, sempre lembrando que nunha administración o que non se rexistra e non está por escrito non existe tentamos acostumarnos a rexistrar todas as reclamacións, solicitudes, comunicacións ou peticións para poder ter un soporte documental no caso de que a vía do diálogo non fose frutífera.

Durante meses acudimos a reunións co concelleiro de Persoal de todo tipo, non se ofreceron explicacións de moitos conflitos postos sobre a mesa e mesmo nalgunha ocasión non houbo opción ao diálogo, por iso comezaron as actuacións, logo de observar que o Concello cada vez tiña unha actitude peor cara á representación legal do Comité de Empresa e os propios delegados sindicais, primeiro foi a demanda de tutela das liberdades sindicais, que a día de hoxe está recorrida, logo foron as demandas por despido improcedemente de oito compañeiros do GRUMIR que están pendentes do xuízo que ao longo de moitos anos o Concello non foi quen de regularizar a situación e nos últimos tempos mesmo houbo que recorrer á prensa que tristemente se demostrou como unha ferramenta eficaz, e dicimos tristemente porque iso demostra o único que lle importa a un Concello onde había un claro conflito con respecto ás axudas sociais que viña dende hai tempo mais que non se solucionaba é o que pensan os de fóra e non o que pensamos os traballadores.

Unha vez feita a reflexión cómpre mirar cara adiante, obviamente cunha experiencia que antes non tiñamos e cuns coñecementos moito maiores da situación do persoal mais tamén do xeito de proceder do propio Goberno municipal que de cara á galería di unha cousa e de portas para dentro adoita facer outra ben distinta. Agora que coñecemos o procedemento da patronal é cando realmente podemos loitar polas melloras, ben é certo que son tempos difíciles, mais tamén ben é certo que este Concello en materia de persoal está ancorado no pasado, a pouco que se mellore, haberá compañeiros e compañeiras que o noten, e sobre todo, o que é moi importante, é que todo o persoal teñan un coñecemento real da súa situación laboral mais tamén da dos compañeiros para que non enganen á xente con falsas promesas e todos e todas sexamos quen de defender os nosos dereitos en moitos casos descoñecidos mais que existen dende hai ben tempo.

 -----------------------------------------------------------------------------------------------------------------------------------
Raquel Fernández, Jorge Amarante, Marcos Dopico, Mónica Núñez e Silvia Muíño.

Solicitude de aclaración con respecto aos días de asuntos propios

Nos pasados días, o Concello, que parece non ter tempo para publicar a información sobre o reparto das axudas sociais 2011, comeza de novo coas resolucións de recorte de dereitos, desta volta tocoulle aos días adicionais de asuntos propios que ata o momento viña desfrutando o persoal laboral con máis de seis trienios traballados na Administración, xa que polo que parece, a omisión do dereito en función antigüidade é deliberado, xa que algún compañeiro xa comentou que dende o Departamento de Persoal están a dicir que agora o persoal laboral non ten dereito aos días adicionais ao cumprir o sexto trienio recollidos no artigo 48.2 do Estatuto Básico do Empregado Público.

Non é unha novidade que este Concello salte por riba da lexislación vixente, nin que intente vulnerar os dereitos do persoal laboral, o tema da antigüidade é algo que teima en non recoñecer cando mesmo hai mesmo moitos compañeiros que ocupan postos non permanentes aos que o Concello hai anos que non lles recoñece nin lles paga a antigüidade. 

Desta volta, e por parte da CIG, entendemos que este tema nin debería ser tema de Mesa Xeral de Negociación, posto que é unha mera aplicación da lexislación vixente, mais aínda trataremos de introducilo na convocatoria solicitada e no caso de que o Concello estime que non é oportuno tratalo, decidiremos os pasos a seguir ante a última das trapalladas dun Concello que de portas para dentro recorta dereitos ao persoal laboral e de portas para fóra amosa a súa discrepenacia con quen os recorta noutras administracións.

Aínda así, e a pesar das informacións que se están a dar dende o Concello, o Comité de Empresa solicitou o día 10 de maio unha aclaración con respecto aos días adicionais ao cumprir o sexto trienio e un día adicional máis por cada trienio cumprido a partir do oitavo por asuntos persoais sen xustificación do persoal laboral do Concello de Betanzos, posto que ata o momento viña desfrutándoos segundo indica no Estatuto Básico do Empregado Público e na Resolución sen número da alcaldía transcrita na comunicación a todo o persoal só se fai a aclaración con respecto ao persoal funcionario. Agárdase, pois, a resposta por escrito, aínda que da verbal xa temos coñecemento, e logo dende a CIG decidiremos os pasos a seguir con respecto a esta parece que manifesto recorte de dereitos do persoal laboral con máis antigüidade nesta Administración.

O Comité de Empresa solicita que se convoque Mesa Xeral de Negociación

Logo de que pasen as semanas e a Mesa Xeral de Negociación siga sen se constituír, ademais dos múltiples problemas que compañeiras e compañeiras de distintos departamentos están a padecer dende hai tempo, o Comité de Empresa, por iniciativa da CIG e logo de falar cos compañeiros da UGT, tomou a determinación de solicitar a convocatoria dunha Mesa Xeral de Negociación para tratar algunhas das materias que segundo o artigo 37 do Estatuto Básico do Empregado Público son obxecto de negociación: 

-A determinación e aplicación das retribucións complementarias

-As que afecten ás condicións de traballo e ás retribucións

-As referidas a calendario laboral, horarios, xornadas, vacacións, permisos, mobilidade funcional.

e xeográfica, así como os criterios xerais sobre a planificación estratéxica dos recursos humanos, naqueles aspectos que afecten a condicións de traballo dos empregados públicos. 

Debido a isto, hoxe mesmo solicitouse a convocatoria de Mesa Xeral de Negociación, logo de meses expóndolle os problemas tanto por escrito como verbalmente a esta Administración local e sen obter resposta nin solucións.

Os problemas atopados neste Concello son de moi diverso tipo mais agrávanse día a día pola teima do goberno municipal en tratar ao persoal de xeito diferente dependendo duns criterios ben descoñecidos. Todos os puntos indicados enriba son materias obxecto de negociación nas Mesas, un procedemento que ata o momento polo que nos comentan os compañeiros non se realizara e buscábanse reunións "informais" onde se poden amañar pola "porta de atrás" problemas que a día de hoxe se manifestan nun trato distinto canto a dereitos e mais nunhas retribucións complementarias non sempre xustificadas polas funcións dos distintos postos de traballo. Dende a CIG entendemos que as canles de negociación establecidas pola lei son ás que temos que acudir por contaren con moitas máis garantías de legalidade que as reunións que no tempo que levamos se veñen demostrando como pouco frutíferas.

Entre os múltiples problemas que cómpre pór sobre a mesa está a realización de horas extras, as dispoñibilidades non recoñecidas nin remuneradas, o horario dalgúns departamentos que realizan máis horas das contempladas no convenio, o problema do descoñecemento dos calendarios a longo prazo do persoal que traballa a quendas, os criterios de distribución das categorías nos complementos de posto e un longo etcétera que levamos meses expoñéndolle a un Concello que parece botar a vista atrás ante os problemas de organización que están a repercutir de xeito negativo nas condicións laborais de determinados postos de traballo. 

Aínda así, e a pesar de sermos coñecedores de moitos dos problemas do persoal laboral deste Concello, é posible que queden cousas no camiño que todos e cada un dos traballadores nos poden achegar, por iso sempre agradecemos os compañeiros e compañeiras que se achegan a nós para comentarnos as distintas problemáticas dos distintos departamentos porque ese é o noso labor e canto mellor coñezamos a situación mellor se poderán defender os intereses do colectivo. 

Compromisos incumpridos: o Concello falta á palabra nunha ocasión máis

Logo de que hai dúas semanas o conflito sobre a discriminación do persoal laboral aparece na prensa e mesmo chegase a tratarse no pleno do Concello, e que o Concello se comprometese coa representación do persoal laboral a abrir o camiño do diálogo e facer máis transparente a concesión das axudas sociais de xeito que a información fose pública, cumprise o recollido nas bases aprobadas no pleno e fose de coñecemento para todos os traballadores, o Concello volve aos erros do pasado non facilita a documentación das axudas nin ao Comité de Empresa nin informa ao persoal laboral, mentres si que ten tempo para recortarlle dereitos recollidos na lei.

Mentres que a representación do Comité foi clara ao dicir que se o Concello amosa dispoñibilidade á negociación e respecta a legalidade vixente non se terán que repetir conflitos coma os do pasado, o Concello volve a excluíla xa non só das decisións senón da propia información que lle afecta ao persoal laboral, pasando por riba dos propios compromisos adquiridos hai practicamente dous días e demostrando así que non é quen de manter a palabra nin de negociar coa representación escollida democraticamente polo persoal.

Debido a isto, o Comité de Empresa, unha vez máis rexistrou un escrito o 10 de maio onde incide sobre o incumprimento dos compromisos de hai apenas dúas semanas do Concello de Betanzos con respecto ás axudas sociais e solictítalle ao Concello o seguinte:

Que se fagan públicas as listaxes das axudas sociais concedidas, e que se indique, cando menos, o concepto e a contía concedidos, tal e como se recolle nas propias bases acordadas por acordo plenario e que se lle dea a transparencia acordadas aos criterios para que todo o persoal laboral teña o máximo coñecemento dos conceptos e contías que lle corresponden. 

Que o Concello lle dea traslado ao Comité de Empresa coa máxima brevidade posible dos acordos adoptados con respecto a este tema, os criterios establecidos e as listaxes do persoal solicitante.

Que o Concello pague canto antes as axudas ao persoal que este ano non está a traballar no Concello mais que ten solicitada e concedida, se é o caso, axuda social do ano 2011 e lle notifique a concesión da axuda con toda a información pertinente para un trámite administrativo desta índole. 

Que se teña por presentada unha queixa con respecto ao retraso no pagamento das axudas sociais segundo a propia convocatoria que o ano pasado o Concello publicaba ao abeiro dunha Resolución da Alcaldía, e onde, unha vez máis, o Concello incumpriu establecidos pola propia Administración. 

Parece que os vellos costumes nunca cambian, a este Concello tanto lle ten a opinión da representación legal dos traballadores, tanto lle teñen os acordos plenarios no que respecta ao tema de persoal ou mesmo non importa facer promesas en van, o caso é que a información só a teñan uns poucos e escollidos porque quen non ten información dificilmente pode reclamar nada, aínda así, dende a CIG seguiremos a dar os pasos oportunos sempre con vontade de diálogo mais nunca calando a boca ante os compromisos incumpridos e as ilegalidades manifestas.

Aviso importante: solicitude de vacacións

Con data do 7 de maio, a Alcaldía ditou unha Resolución con respecto á solicitude de vacacións onde se comunica o seguinte:

1. Que se amplía o prazo de solicitudes das vacacións marcado no convenio (31 de marzo) ata o vindeiro 19 de maio e que se deben solicitar as vacacións anuais e no caso de non facelo SERÁN ADXUDICADAS UNILATERALMENTE POR PARTE DA ADMINISTRACIÓN.

2. Que as vacacións anuais así como os distintos permisos a partir da data de resolución, 7 de maio, deberán solicitarse no modelo oficial que se aproba e achegarse a documentación xutificativa para cada permiso.

Traslado de domicilio: fotocopia do certificado de empadroamento.

Concorrencia a exames ou probas de aptitude: xustificante de asistencia do centro no que se realicen os exames.

Continxencias familiares

Nacemento ou adopción de fillos: fotocopia do certificado de nacemento ou adopción.

Enfermidade (grave) ou accidente ou falecemento dun familiar: certificado ou parte médico no que conste o carácter grave.

Por matrimonio: fotocopia do certificado de matrimonio

Acompañamento á consulta médica: certificado no que conste a persoa consultada.

Lembrade que no Convenio do persoal laboral podedes consultar os días que vos corresponden por cada tipo de permiso

MOI IMPORTANTE: O persoal laboral que non ten pedidas as vacacións que o faga antes do 19 de maio, senón o Concello poderá marcarllas cando lle veña en gana. O modelo de solicitude novo, nun principio deberíano achegar a todos os departamentos mais se alguén non dispón del que o solicite en persoal ou que se poña en contacto con calquera dos delegados da CIG.

Unhas 60.000 persoas maniféstanse coa CIG no Primeiro de Maio en contra dos recortes sociais e laborais do PP

 
De www.galizacig/avantar

A central chama a continuar no proceso de acumulación de forzas e de contestación para crear un escenario favorábel aos intereses da clase traballadora galega

 Unhas 60.000 persoas manifestáronse coa CIG neste Primeiro de Maio, Día Internacional da Clase Traballadora, para amosar na rúa o seu rexeitamento ás políticas laborais e económicas do PP e demandar outras medidas favorábeis aos intereses da clase obreira. A central nacionalista, que convocou as manifestacións baixo o lema “Por emprego digno, non á reforma laboral do PP” e “En defensa do ensino e da sanidade públicos”, reiterou o chamamento a seguir na contestación social e no proceso de acumulación de forzas para avanzar na consecución dun modelo económico e social máis xusto e solidario.

En total foron once as manifestacións organizadas polo sindicato nacionalista nas distintas comarcas do País para celebrar o Primeiro de Maio. Este ano o acto central tivo lugar na Coruña, que contou coa participación de arredor de 10.000 persoas, mentres á cidade de Vigo acudiron uns/has 35.000 manifestantes e a protesta de Ferrol, a terceira en número de participantes, contou con 7.000 persoas. En Pontevedra saíron á rúa convocadas pola CIG máis de 3.000 persoas, mentres que en Vilagarcía foron preto dun milleiro.

Ao remate da mobilización da Coruña, o Secretario Xeral da CIG, Suso Seixo, lembrou que, por cuarto ano consecutivo, a clase obreira afronta o Primeiro de Maio sendo vítima dunha profunda crise económica que non provocou e "sometidos, neste caso por un goberno do PP, a unha espiral permanente” de recorte de dereitos, redución dos salarios, desmantelamento e privatización dos servizos públicos en beneficio dos intereses do capital privado. 

“En definitiva”, denunciou, “un conxunto de medidas que buscan desmantelar o actual modelo de relacións laborais, de servizos públicos e de protección social, conquistados tras moitos anos de loita do movemento obreiro e das organizacións sociais e políticas de esquerda”. Precisamente, con tal motivo, a consigna baixo a que a CIG conmemorou este Primeiro de Maio é “Por emprego digno, non á reforma laboral do PP” e “En defensa do ensino e a sanidade”. 

Modelo económico fracasado

Seixo cargou contra unhas políticas de recorte “erradas” e “inxustas”, iniciadas polo Goberno do PSOE e agora continuadas con maior virulencia polo PP, que lonxe de favorecer a saída á crise afondan na destrución de emprego -en Galiza o número de persoas sen traballo acadou xa as 65.000-, o peche de empresas, o incremento das desigualdades sociais, ou a entrada nunha nova situación de recesión económica.

Medidas que xa amosaron a súa ineficacia pero que seguen a ser defendidas como as únicas alternativas posíbeis polo PP e promovidas por institucións internacionais como o FMI, BCE ou a Comisión Europea. “Todas estas institucións, e tamén o PP, son firmes defensores deste modelo de capitalismo neoliberal. Este modelo económico fracasado, que é o causante da crise económica que estamos a vivir, e que pretenden fortalecer con estas políticas tan antisociais e antiobreiras”, advertiu. 

O Secretario Xeral da CIG aseverou que estas políticas apuntalan un modelo económico inxusto, insolidario e antidemocrático, e por iso non se poden entender de xeito illado, senón enmarcado na loita de clases: na loita do poder entre o capital e o traballo, entre a oligarquía -por manter un modelo económico que garante os seus intereses- e as clases traballadoras -por conquistar un novo modelo económico-. 

Chamada á mobilización social 

Fronte a esta interese do capital e a dereita por implantar un modelo de relacións laborais fortemente desregularizado e individualista e un sistema de protección social precarizado e privatizado, a CIG chama á contestación e á mobilización social, porque “estamos nun momento político clave”. Tras do éxito da Folga do 29 de Marzo, a central nacionalista xa lle propuxo ás demais organizacións sindicais  a necesidade de promover unha nova xornada de folga xeral para a primeira quincena do mes de xuño, antes de que se aprobe definitivamente a reforma laboral e antes de que o goberno decrete “novos recortes nos dereitos e calidade de vida”. 

Se non hai unha resposta social contundente, adiantou Seixo, “o PP vai aproveitar a súa maioría absoluta e os primeiros meses da lexislatura para impor o seu programa ideolóxico neoliberal e ao servizo da banca e dos intereses da oligarquía española”. “Hai que seguir acumulando forzas para crear un escenario favorábel aos intereses da clase traballadora galega, na rúa, nos centros de traballo e tamén nas institucións. Con ese obxectivo temos que traballar”.

Así, anunciou que a CIG vai promover e colaborar nas diversas mobilizacións que van ter lugar en diferentes sectores nos vindeiros días, tais como a folga do estudantado do vindeiro 10 de maio, as mobilizacións en defensa dos servizos públicos ou a tradicional manifestación do 17 de maio.

Galería de imaxes das manifestacións