Inspección de traballo require da Xunta que proporcione máscaras ao seu persoal

Desde a Xunta argüían que como non é un EPI non tiñan obriga de proporcionalas

A Inspección de Traballo e Seguridade Social da Coruña fai un requirimento agora á consellería de Emprego e Industria para que proporcione máscaras ao persoal das oficinas de emprego tras unha denuncia presentada no mes de xullo pola CIG. 

Neste requirimento a inspección de traballo insta á Xunta a proporcionar máscaras a todo o persoal incluído o administrativo e vén sumarse a outras resolucións e requirimentos que van nesta liña, como o das escolas infantís de Política Social.

“O interesante é que, desta vez, a inspectora aclara que, malia haber mamparas e metro e medio de distancia entre os postos, a administración esta obrigada a proporcionar as máscaras ao seu persoal. Unha resolución aclaratoria que elimina o custo da súa adquisición para as persoas traballadoras -xa que é obrigatorio o seu uso dentro dos centros administrativos- e garante a seguridade de todos/as dotando en número e calidade adecuada e responsabiliza a empresa do uso correcto deste medio de protección colectivo fronte o coronavirus”, matiza a responsable nacional da CIG-Administración Autonómica, Zeltia Burgos.

A Xunta vén facendo unha dotación desigual deste medio de protección empregando argumentos como “non é un EPI e polo tanto non estou obrigado a proporcionalo”. Neste sentido Burgos sinala que “se ben é certo que as máscaras cirúrxicas non son EPI porque non protexen ao portador/a senón que protexen ao resto das persoas traballadoras e usuarias,si son unha medida preventiva colectiva”.

Outras xefaturas afirman, segundo Zeltia Burgos, que non se lles informou ou que non se modificou o protocolo de reincorporación.Ante isto, a responsable nacional da CIG-Autonómica afirma  que “nós si que informamos e mesmo explicamos o Real Decreto que desde xullo obriga a todas as empresas a dotar de máscaras de protección ao seu persoal”. 

Burgos denuncia que “algunhas mesmo chegaron  a afirmar que había metro e medio entre postos e, polo tanto, non era necesario telas colocadas no traballo...pero esquecéronse que no centro de traballo dos corredores, servizos, fotocopiadoras, salas de reunión, accesos… e que non nos teletransportamos”.

Para a CIG, “é unha verdadeira mágoa que a Xunta siga a xogar coa saúde das persoas traballadoras e das usuarias dos edificios administrativos e que teñamos que facer denuncias masivas a inspección para que se recoñeza o noso dereito a un ambiente de traballo seguro”.

Lembran que desde a CIG-Administración Autonómica téñense presentado denuncias deste tipo en case todas as consellarías e en todo o país á espera de que a resolución sexa similar a esta. “Gustaríanos que non houbera que denunciar este tipo de cuestións e que a administración actuara con tanto “sentidiño” co seu persoal como pide que faga o conxunto da poboación en Galiza na súa propaganda institución”.

O Goberno volve prorrogar os ERTE incidindo nas condicións inxustas, recortando coberturas e sen dar solución ao persoal máis precarizado

Afóndase na desprotección da clase traballadora e négase unha saída xusta á crise

Unha vez máis o Goberno español, UGT, CCOO e a patronal pactan unha prórroga dos ERTE que incide nos aspectos máis inxustos desta medida: non hai garantías de mantemento dos postos de traballo, déixase toda a capacidade de decisión ás empresas, e segue sen achegarse solución aos traballadores e traballadoras temporais que perderon o seu emprego dende o 14 de marzo.

Dende o inicio da pandemia, transformada nunha enorme crise económica e social, as medidas adoptadas van na liña contraria do que a CIG entende resultaría máis beneficio e xusto para o conxunto da clase traballadora. "En cada acordo que sae do diálogo social afóndase na desprotección da clase traballadora e négase unha saída xusta á crise", alerta o secretario xeral, Paulo Carril. Neste senso, reitera que calquera medida para afrontar o crítico momento actual non pode manterse sobre a vixencia das políticas laborais e económicas aplicadas con dureza nestes anos, nomeadamente as reformas laborais e das prestacións por desemprego de 2010 e 2012.

Necesidade de derrogar as reformas laborais

"Anular estas reformas permitiría que a negociación dun ERTE ou ERE non estea en mans exclusivas da empresa, senón que requiriría do acordo coa representación sindical e recuperaríase o exercicio do control e, no seu caso, da autorización previa pola Administración", explica. Xunto a isto, Carril subliña que, para minimizar o impacto dos ERTE, débese prohibir  que se simultaneen con outras medidas lesivas como un descolgue salarial ou a inaplicación do convenio; e garantir de xeito xeral  para toda a clase traballadora que todo o tempo de regulación se considere como tempo de paro non consumido (o chamado contador a 0).

Tamén obrigar as empresas a completar até o 100% dos salarios; reincorporar progresivamente a todo o persoal temporal da empresa principal ou externas (ETTs , empresas multiservizos, etc.) que foi despedido e, como data límite, facelo no último mes de vixencia do ERTE.

Así mesmo, a CIG defende que estas coberturas sexan aplicábeis a todas as persoas traballadoras, incluíndo as que foron despedidas por causa desta situación ou que desde o 1 de xaneiro estiveran xa percibindo prestación por desemprego, tendo en conta que nesta nova prórroga redúcese o número de persoas traballadoras que poden acceder ás condicións máis beneficiosas, deixando fóra precisamente a aqueles colectivos máis precarizados e aos que o Salario Mínimo Vital non está dando resposta suficiente. "Estas persoas deben poder beneficiarse, cando menos, do "contador a cero" e ter garantido o cobro do 70% da base reguladora máis alá dos seis primeiros meses no desemprego".

Mánteñense as exoneracións pero non se muda a política fiscal

En relación con isto, Carril subliña á problemática de como afrontar o enorme gasto público xerado por esta situación extraordinaria, xa que a protección do capital prima sobre a protección social; é dicir, mantéñense as exoneracións abusivas das cotas empresariais (sendo as compañías de maior tamaño as grandes beneficiadas) mentres se desvían os fondos da Seguridade Social, do FOGASA e do SEPE.

"En vez de aplicar unha política fiscal progresiva ou recorrer a outras partidas (como os gastos militares ou os destinados á casa real), a solución que se ofrece pasa por reducir as coberturas e financiar estas medidas cos cartos de todos os traballadores e traballadoras", advirte.

A CIG pide habilitar un procedemento especial para o cobro do paro

Xunto a isto, a CIG demanda que se habilite un procedemento especial para o cobro puntual a día primeiro do mes das prestacións por desemprego e solucións aos problemas que o SEPE está xerando no recoñecemento da prestacións segundo as circunstancias persoais (fillos/as a cargo, etc.).

A Inspección de Traballo requírelle ao Concello de Betanzos que cumpra co artigo 34 do Estatuto dos Traballadores e negocie a implantación do rexistro da xornada

O requirimento vén motivado porque o Concello se nega a entregarlles aos representantes dos traballadores os rexistros da xornada, tal e como establece a lexislación vixente, non negociou a implantación do rexistro e implantou un sistema que afonda na discriminación entre o persoal.

As queixas do persoal veñen sendo múltiples pola aplicación discriminatoria deste rexistro que utiliza na actualidade unha ínfima parte dos traballadores e traballadoras. A falta duns criterios claros, da negociación na implantación do sistema, da negativa ao goberno municipal desde hai anos a negociar os horarios específicos e, a maiores, an pseudoimplantación dun sistema de teletraballo totalmente arbritario e que carece dun sistema de rexistro da xornada, afondaron nas discriminacións existentes desde mediados de 2018, momento no que se implantou un sistema temporal que ía ser de proba ata o sistema definitivo do que nunca máis se falou.

A maiores disto, o Concello de Betanzos ten a obriga de lle entregar esta información aos representantes dos traballadores, tal e como ratifica a Inspección de Traballo e vén incumprindo reiteradamente esta obriga de información nun claro exercicio de escurantismo e defensa de determinados privilexios dunha parte do persoal que non rexistra a xornada co consentimento do goberno municipal.

Desde ese mesmo ano a CIG, logo de queixas de diversos traballadores que advertían a discriminación da implantación dun sistema que non utilizaba a totalidade do persoal e que non fora negociado tal e como procede, advertíalle non só ao concelleiro de Persoal, Diego Fernández, en diversas ocasións, a necesidade de resolver esta situación, senón á propia María Barral, que era coñecedora do problema e que indicaba que se solucionaría en canto fose posible.

A maiores, a non implantación do rexistro da xornada leva anos sendo a escusa do goberno municipal para non implantar a flexibilidade da xornada que vén recoñecida como unha medida de de conciliación no propio Convenio colectivo e Acordo regulador. Esta queixa tamén se trasladou á Comisión Paritaria de Igualdade do pasado mes de febreiro, así como a necesidade de poder facer efectivo este dereito de flexibilización que debería poder exercitarse desde 2017, ano en que se aprobaron os novos marcos reguladores.

O inspector de traballo indica na resolución que existen limitacións no sistema de rexistro da xornada existente e falta a negociación para a implantación, e requírelle ao Concello que debe facilitar os rexistros de xornada solicitados tanto polos traballadores e traballadoras como polos representantes destes e debe negociar ou consultar coa representación legal dos traballadores con respecto ás modificacións que realice no sistema de rexistro da xornada.

A CIG vén de reiterarlle as solicitudes correspondentes ao Concello, á vista de que segue sen ningún tipo de información sobre esta cuestión e no caso de que o Concello non responda acudirá de novo á Inspección provincial para informala da reiteración no incumprimento, da persistencia nas discriminacións e da falta de negociación e consulta cos representantes dos traballadores e traballadoras.

Unha sentenza dálle a razón á CIG e o persoal dos obradoiros do Concello de Betanzos debe cobrar por Convenio colectivo

Desde hai anos a CIG do Concello de Betanzos víñalle advertindo ao goberno do PSOE que o persoal contratado para os obradoiros debía cobrar segundo os salarios do Convenio colectivo e non moi por baixo do estipulado, tal e como teimaba en facer o goberno de María Barral en detrimento dos dereitos dos traballadores e traballadoras dos obradoiros de emprego para aforrar uns cartiños e, de paso, recortar os seus dereitos retributivos.

A CIG denunciou esta situación en diversas ocasións publicamente, por rexistro, en reunións co concelleiro Diego Fernández e mesmo coa propia María Barral quen asina os contratos e, por tanto, decide as condicións laborais do persoal laboral do Concello de Betanzos.

Foi en plenas eleccións sindicais do ano 2019 nas que o sindicato dos funcionarios (CSIF) e os delegados da Policía Local en concreto, teimaban en lembrarlle ao persoal do obradoiro que a postura de quen informaba no Concello era contraria a esta reclamación e que, pouco máis, non había moito que facer. Nada nos sorprendía daquela que un sindicato se asesorase internamente no propio Concello, porque iso é algo que historicamente tamén fixera UGT en detrimento dos dereitos do persoal, e que a CIG nunca fixo posto que os delegados e as delegadas da CIG sempre se asesoraron no sindicato e non cos propios asesores do Concello que teñen informado contrariamente aos dereitos do persoal laboral en demasiadas ocasións. 

Naquel momento a CIG asesorou ao alumnado do obradoiro en múltiples reclamacións previas que o goberno local denegou tarde, mal e arrastro e despois de que as propias traballadoras chegaron a ter unha reunión con María Barral porque non lles daban respondido á reclamación. 

Varias traballadoras decidiron continuar con esta reclamación pola vía xudicial e na primeira das sentenzas o Xulgado do Social determina que non hai dúbida de que a demandante era traballadora laboral do Concello de Betanzos e de que o Convenio colectivo en vigor lle afecta á totalidade do persoal do Concello de Betanzos, xa que non contempla ningunha excepción contractual, por tanto, debía cobrar o estipulado no Convenio colectivo para a súa categoría profesional e condena ao Concello a pagarlle a diferenza e estima a demanda.

Desde a Sección sindical da CIG do Concello de Betanzos celebramos esta sentenza porque desde o inicio da negociación do Convenio colectivo en 2011 sempre defendemos que a totalidade do persoal laboral debía cobrar o que lle correspondía sen facer distinción entre o persoal cun contrato ao abeiro dunha subvención doutra Administración pública ou non. 

Sempre defendemos que igual traballo e igual salario e desa defensa saíu o acordo do Convenio colectivo de 2017. A pesar dese novo convenio o goberno do PSOE teimou desde 2017 en discriminar a unha parte do persoal, en concreto todo o persoal que pasou polos obradoiros de emprego, e pagarlle menos do que indicaba o Convenio colectivo e a CIG foi o único sindicato que defendeu o acordado no Convenio, mesmo a pesar de que outros sindicatos seguían defendendo a postura do goberno municipal e desanimando ao persoal a presentar reclamacións.

Agora, á espera do resto das sentenzas o único camiño é que o goberno de María Barral, rectifique, non reitere co persoal de futuros obradoiros esta discriminación, tendo en conta que xa foi condenado por ela e reflexione sobre a interpretación unilateral contraria ao acordado que vén realizando do Convenio colectivo en detrimento dos dereitos dos traballadores e traballadoras, agora mesmo coa complicidade da CSIF e da UGT que desde xuño de 2019 lle deron manga ampla ao goberno municipal para facer e desfacer o que lle pete sen dicir nin chío.

A propia CSIF na reunión do Comité de Empresa de xaneiro deste ano negouse a que o Comité de Empresa lle comunicase ao goberno municipal unha queixa por esta discriminación, tal e como propuxo a CIG, e demostrou  así a súa complicidade para que esta discriminación salarial non se solucionase e que o Comité de Empresa, o máximo organismo de representación do persoal laboral, amosase a súa conformidade co mal facer do goberno de María Barral e dese o visto bo ás discriminacións salariais existentes.

Agora que o xulgado determinou que a reclamación era pertinente e que condenou ao Concello a solucionar a situación, fica máis que nunca patente para a CIG a necesidade de defender os dereitos do persoal laboral xa non só ante o propio Concello senón ante unha maioría do Comité de Empresa que antepón os intereses do goberno municipal aos dos traballadores e traballadoras.

Hemeroteca

O Concello deberalle subir o SMI ao alumnado dos obradoiros logo da entrada en vigor do RD 231/2020

Reunión ordinaria do Comité de Empresa

A CIG solicitará unha reunión extraordinaria do Comité de Empresa para tratar os temas que CSIF e UGT se negaron a tratar na reunión de constitución

Reclamacións pola non aplicación do Convenio colectivo a unha parte dos traballadores do Concello de Betanzos

PROGRAMA DAS ELECCIÓNS SINDICAIS. CONVENIO COLECTIVO

A CIG denuncia que a lei do teletraballo non establece as bases para garantir unhas condicións laborais dignas

 O Goberno español interrompeu de maneira insólita a tramitación normativa para trasladar o debate ao marco do diálogo social

A CIG considera que o Real Decreto-lei aprobado hoxe no Consello de Ministros/as para regular o traballo a distancia nace con dous defectos insalvábeis: dunha banda é unha norma de mínimos que non dignifican a prestación do traballo neste modalidade e por outra banda, esta lei chega despois de terse interrompido o proxecto normativo que estaba en marcha, que se veu paralizada no CES "de maneira inaudita e sen antecedentes en favor do diálogo social".

Para o secretario xeral da CIG, Paulo Carril, segundo o que transcendeu nos medios xa que a central non dispón aínda do texto aprobado, este Real decreto non resolve a actual situación laboral derivada da pandemia da covid19 "na que se impuxo o teletraballo sen dereitos e que se mantén en vigor con carácter xeral". Carril critica que se obvien os trámites ordinarios e se menosprecen as institucións e organismos paritarios de representación, para levar a negociación desta lei ao marco do diálogo social.

Cómpre lembrar que o Goberno español abrira unha consulta pública para a elaboración da futura lei do teletraballo, na que a CIG presentou as súas achegas e consideracións a respecto da regulación desta modalidade de prestación do traballo. "Pero a tramitación da lei quedou suspendida de xeito insólito estando no CES, para pactar un acordo con UGT, CCOO e a patronal que non establece as bases para garantir unhas condicións dignas de teletraballo", asevera.

Inconcreción na cobertura dos gastos

Neste senso, Carril chama a atención sobre a inconcreción no relativo á cobertura dos gastos xerados por esta modalidade de traballo e como as empresas se farán cargo destes, "tendo en conta que non asumirán os custes na súa totalidade". Cuestiona tamén a consideración que se fai do traballo a distancia do punto de vista da prestación e da ordenación da xornada.

"Vincúlase a consideración do teletraballo ao número de horas en relación coa xornada laboral, facilitando a desregulación e que, polo tanto, o carácter voluntario e a revogabilidade que se me menciona no RD estean moi imposibilitadas na realidade", advirte. Considera o secretario xeral da CIG que as empresas pretenderán aproveitar esta circunstancia "para impor, cando o poidan prestar, unha flexibilización do teletraballo prexudicial e sen dereitos para os traballadores e traballadoras".

Ademais, tal e como está formulada, esta lei non significa un avance en termos de conciliación, senón un atraso, á vista de como se está a desenvolver esta modalidade de traballo no tempo que levamos de pandemia.

Atendendo a esta realidade, Carril amosa a preocupación porque as consideracións que aparecen na lei sobre o dereito á desconexión dixital, a intimidade e dignidade "quedan no enunciado, sen que isto realmente desenvolva ningún dereito neste eido". Xunto a isto, a CIG alerta que tampouco se avanza nas garantías dos dereitos sindicais do persoal que non traballe de xeito presencial.

Regulación de mínimos

Fica por comprobar o alcance que pode ter este texto xa que se trata dunha regulación de mínimos que empraza na negociación colectiva a concreción do resto de asuntos. "En todo caso, eses mínimos non son defensores dunha dignificación da prestación do traballo a distancia e terá que ser na negociación colectiva onde se conclúa a regulación, mais nunha dialéctica moi regresiva por parte da patronal".

A CIG mantén o seu rexeitamento a asinar á proposta de regulación do teletraballo do Ministerio

 Remataron xa as negociacións sen que se recolleran as aportacións da central sindical no EBEP

A Área Pública da CIG vén de manifestar a súa posición en relación coa negociación do grupo de traballo da mesa xeral de negociación das administracións públicas, creado para a regulación do traballo a distancia no EBEP. A central sindical mantén o rexeitamento a asinar a proposta porque a representación da administración do Estado non aceptou trasladar á parte dispositiva do EBEP (art.47 bis) a redacción aportada na última proposta da propia administración que figura na exposición de motivos.

Entre outras cuestións, a Área Pública da CIG defendía que se contemplara que a regulamentación do teletraballo non pode significar unha redución de dereitos das persoas administradas, nin das persoas empregadas públicas. Entende que “a modalidade de traballo en remoto non pode supor para a cidadanía unha brecha dixital coas administracións”, polo que demanda que estea garantida, en todo caso, a atención presencial permanente.

Por iso considera que a lei debe incluír a matización de que a modalidade de teletraballo non será considerada ordinaria, nin absoluta. Isto é, cada administración deberá analizar en cada ámbito e recoller na normativa reguladora, a porcentaxe de servizos que poden desenvolverse a distancia, combinando a presencialidade e o teletraballo.

Impacto de xénero

Advirte ademais que esta modificación no EBEP non pode ser utilizada para “afondar na privatización de servizos públicos” nin formularse como unha medida de conciliación, polo que “non pode substituír as medidas específicas de conciliación da vida laboral e familiar”.

De feito, a central sindical parte da necesidade de que se faga unha avaliación do impacto de xénero e que se inclúan medidas de perspectiva de xénero que garantan a “non feminización desta modalidade de traballo”.

Voluntario e con dereito a desconexión

Para a central sindical tamén é necesario que se inclúa expresamente que o traballo a distancia ten quer “voluntario e reversible” e que non debe comprender a totalidade do horario laboral. Isto xunto co recoñecemento do dereito á desconexión dixital, subliñándose que “en ningún caso a administración poderá exixir a realización de tarefas nin recepción de documentación fóra do horario laboral”.

Debe ser ademais, a administración, que facilite, instale e manteña os equipos, aplicacións e conexións asumindo o custo de pór á súa disposición un espazo na vivenda da persoa traballadora e a adquisición de mobiliario.

Inviolabilidade do domicilio

A Área Pública da CIG demanda tamén que os dispositivos facilitados garantan a inviolabilidade do domicilio, “quedando expresamente prohibidos o uso de videocámaras, micrófonos ou programas de control, seguimento e monitorización do traballo”.

En todo caso, as administración teñen que estar obrigadas a proporcionar formación previa e continua ás traballadoras nas competencias dixitais necesarias para a prestación do traballo remoto; ten que garantirse o cumprimento das medidas de prevención, con avaliación dos espazos e lugares nos que se vai desenvolver a actividade.

Canles de comunicación

Xunto a estas cuestión, a CIG defende o establecemento de canles de comunicación e participación coa representación do persoal, facilitando a administración sistemas de comunicación instantánea, así como medidas de control e seguimento específico desta actividade.

A administración debe estar obrigada ademais a contratar un seguro que cubra as posibles incidencias no relativo á lei de protección de datos.

A CIG-Administración acusa a presidenta da Deputación pontevedresa de mentir na xestión da covid

Dende a central reclaman información veraz e máis axilidade nas probas PCR

A CIG-Administración denuncia que a presidenta da Deputación de Pontevedra, Carmela Silva, minte cando afirma que o persoal que foi posto en corentena tras o positivo dun menor do centro Príncipe Felipe deu negativo nas probas PCR.

Dende a central critican que a máxima responsábel da institución provincial traslade aos medios de comunicación información non veraz, “xa que non é certo que todo o persoal pasase xa as probas cando o asegurou a presidenta; de feito, onte ao mediodía aínda había persoas ás que non se lle fixeran”.

Neste senso, reclaman máis axilidade coas probas ante un caso coma este, “pois entendemos que se lles deberan facer ao persoal e aos menores ao mesmo tempo e no propio centro, e non obrigar o persoal en corentena a ir ao hospital para realizalas”.

A CIG non asinará o acordo para regular o teletraballo nas administracións públicas

Rexeita que se formule como medida de conciliación e demanda evitar a súa feminización

A Área Pública da CIG non asinará o acordo co Ministerio de Administracións Públicas sobre traballo a distancia tras fracasar as negociacións na Mesa Xeral. O seu portavoz, Xabier Picón, explica que o Ministerio presentou unha proposta inicial “bastante cativa” á que a central sindical presentou unha serie de alegacións que “foron asumidas en boa parte” pero só para a súa inclusión na exposición de motivos, mais “sen carácter vinculante para as distintas administracións públicas”. Fronte a isto, a CIG demanda que se teñan en conta para a súa inclusión no articulado e que obriguen ás administracións ao seu cumprimento. Demanda coa que coinciden as outras organizacións sindicais presentes na mesa de negociación.

Entre outras cuestións, a Área Pública da CIG defende que a regulamentación do teletraballo non pode significar unha redución de dereitos das persoas administradas, nin das persoas empregadas públicas. Entende que “a modalidade de traballo en remoto non pode supor para a cidadanía unha brecha dixital coas administracións”, polo que demanda que estea garantida, en todo caso, a atención presencial permanente.

Por iso considera que a lei debe incluír a matización de que a modalidade de teletraballo non será considerada ordinaria, nin absoluta. Isto é, cada administración deberá analizar en cada ámbito e recoller na normativa reguladora, a porcentaxe de servizos que poden desenvolverse a distancia, combinando a presencialidade e o teletraballo.

Impacto de xénero

Advirte ademais que esta modificación no EBEP non pode ser utilizada para “afondar na privatización de servizos públicos” nin formularse como unha medida de conciliación, polo que “non pode substituír as medidas específicas de conciliación da vida laboral e familiar”.

De feito, a central sindical parte da necesidade de que se faga unha avaliación do impacto de xénero e que se inclúan medidas de perspectiva de xénero que garantan a “non feminización desta modalidade de traballo”.

Voluntario e con dereito a desconexión

Para a central sindical tamén é necesario que se inclúa expresamente que o traballo a distancia ten quer “voluntario e reversible” e que non debe comprender a totalidade do horario laboral. Isto xunto co recoñecemento do dereito á desconexión dixital, subliñándose que “en ningún caso a administración poderá exixir a realización de tarefas nin recepción de documentación fóra do horario laboral”.

Debe ser ademais, a administración, que facilite, instale e manteña os equipos, aplicacións e conexións asumindo o custo de pór á súa disposición un espazo na vivenda da persoa traballadora e a adquisición de mobiliario.

Inviolabilidade do domicilio

A Área Pública da CIG demanda tamén que os dispositivos facilitados garantan a inviolabilidade do domicilio, “quedando expresamente prohibidos o uso de videocámaras, micrófonos ou programas de control, seguimento e monitorización do traballo”.

En todo caso, as administración teñen que estar obrigadas a proporcionar formación previa e continua ás traballadoras nas competencias dixitais necesarias para a prestación do traballo remoto; ten que garantirse o cumprimento das medidas de prevención, con avaliación dos espazos e lugares nos que se vai desenvolver a actividade.

Canles de comunicación

Xunto a estas cuestión, a CIG defende o establecemento de canles de comunicación e participación coa representación do persoal, facilitando a administración sistemas de comunicación instantánea, así como medidas de control e seguimento específico desta actividade.

A administración debe estar obrigada ademais a contratar un seguro que cubra as posibles incidencias no relativo á lei de protección de datos.

A CIG no Concello de Santiago anuncia recurso e mobilizacións contra o acordo que 'repaga' o traballo en domingos e festivos

 Advirten que a decisión da Xunta de Goberno xera discriminacións retributivas entre o persoal municipal

A sección sindical da CIG no Concello de Santiago advirte que o acordo da Xunta de Goberno do pasado 22 de xullo, polo cal se duplica o pago da festividade ao persoal do servizo da Policía Local e de Bombeiros, establece unhas condicións laborais distintas ás pactadas na Mesa Xeral de Negociación e xera discriminacións retributivas entre o persoal municipal, en función do servizo ao que pertenzan.

Xabier Picón, delegado da sección sindical da CIG no Concello e secretario nacional da CIG-Administración, compareceu este mércores en rolda de prensa acompañado por delegados e delegadas da central para explicar o posicionamento da CIG con respecto a este acordo. Lembrou que o ano pasado se fixo unha modificación do convenio pactada coa representación sindical maioritaria na Mesa Xeral de Negociación, polo que se procedía a pagar os sábados como festivos á policías locais e bombeiros/as e a mellorarlles a compensación do traballo nocturno.

Agora, o acordo da Xunta de Goberno estende a compensación do pago da festividade pactada para os sábados tamén aos domingos e festivos. "É dicir, os servizos de policía e extinción de incendios, que viñan cobrando dende 1991 un complemento específico polo seu traballo en domingos e festivos, seguirán a cobrar ese complemento e ademais o novo complemento diferencial por traballar eses mesmos días, co que es producirá un “repago” do traballo en domingos e festivos", explica Picón.

Advirte que deste xeito se establece un tratamento discriminatorio entre o persoal, xa que mentres para estes dous colectivos se duplica a compensación, para o resto dos traballadores e das traballadoras mantense a mesma compensación por traballar en domingos e festivos.

Critica ademais que este "repago" se aprobe sen dar solución á escaseza efectivos nestes dous servizos, a causa da que se están a realizar centos de horas extraordinarias "e se chegan a duplicar os soldos". "Non é de recibo que se repartan estes sobresoldos cando se poderían crear no Concello máis de 40 postos de traballo" polo mesmo custe.

300.000 euros para o repago pero o complemento da carreira adiado en tres anualidades

Xunto a isto, Picón lembrou que en 2019 chegouse a un acordo co Goberno local para adiar en tres anualidades o pagamento do complemento de carreira de todo o persoal, xa que o Concello alegou imposibilidade para abonalo completo polos límites establecidos na Lei de Orzamentos. Mais agora, "si se poden aprobar 300.000 euros de repago da festividade".

A este respecto, a CIG teme que o acordo de Goberno teña o reparo suspensivo de intervención, pois adoptouse coa advertencia do secretario xeral do Pleno da ausencia de informes de fiscalización.

"Baixo a falsa aparencia de interpretar o pactado, na práctica este acordo da Xunta de Goberno agocha a modificación dos acordos colectivos e obvia, ademais, a negociación coa representación sindical maioritaria", xa que o Goberno municipal tratou este cambio cos sindicatos que non teñen representación na Mesa Xeral. Engade o representante da CIG que este acordo racha co carácter unitario do convenio colectivo e co equilibrio retributivo e non discriminatorio establecido neste.

De igual xeito, Picón criticou o "desprezo amosado polo Goberno de Sánchez Bugallo cara a representación maioritaria elixida polo persoal do Concello nas eleccións sindicais, para favorecer a sindicatos que non teñen representación na mesa xeral". Así mesmo valorou que este tipo de prácticas e decisións constitúen "un desprezo polo traballo da maioría dos e das profesionais municipais".

Por todas estas razóns, a sección sindical da CIG no Concello de Santiago presentará recurso contencioso-administrativo contra o acordo e anuncia a convocatoria de mobilizacións para o mes de setembro, esixindo que se anule este acordo "e se volva á negociación colectiva de boa fe".

Atinxido un acordo no SAF da Cañiza que recoñece a condición de persoal laboral ás traballadoras e garante a xestión pública do servizo

A CIG subliña que foi posíbel pola organización e a firmeza das compañeiras para esixir a dignificación do seu traballo

As traballadoras dos SAF da Cañiza, coa representación da CIG no Concello, asinaron hoxe un acordo co alcalde,  Luís Piña, que recoñece a condición de persoal laboral ás auxiliares de axuda do fogar e o compromiso do Goberno local de manter o servizo municipalizado.

Principais puntos do acordo

No acordo recóllense as seguintes cuestións moi elementais para o conxunto das traballadoras do SAF, que supoñen un paso de xigante sendo base do recoñecemento e dignificación do seu traballo:

- Inclusión na RPT da categoría de auxiliar de fogar cun salario base mensual por xornada completa de 1151,70 no ano 2019

- Incorporación no vindeiro convenio de persoal laboral da Cañiza das condicións particulares das traballadoras do SAF

- O pagamento da quilometraxe dende as instalacións de asuntos sociais do concello

- A procura dun sistema de rotación para o traballo en domingos e festivos

- A creación dun plus de domingos e festivos

- O establecemento dun criterio de reparto de traballo equitativo e a fixación dunha xornada máxima de 37,5 horas, tendo como obxectivo unha xornada mínima de 25 horas semanais

- O establecemento dun procedemento de seguimento de incidencias no servizo

- A negociación antes do remate do ano 2020 dun plan de prevención de riscos e dun protocolo de acoso laboral e sexual específicos para este servizo

Dos intentos de privatización a dar visibilidade a un sector esencial

A Unión Local da CIG do Porriño valora moi positivamente o acordo alcanzado, explicando que, hai ano e medio, cando as traballadoras contactaron coa CIG e comezaron as súas reivindicacións, sendo alcalde Miguel Domínguez do PP, "non contaban con roupa de traballo, non tiñan recoñecido un salario para a súa categoría, negándolle o edil do PP dereitos tan elementais como o goce das súas vacacións ou descansos en fin de semana".

De feito, explica Mercedes Domínguez, responsábel de Muller da CIG-Porriño, en varias reunións o anterior alcalde negou as traballadoras a condición de persoal do Concello, "malia que algunha leva traballando no servizo máis de dez anos". Neste sentido, hai que subliñar que a CIG xa ten gañadas catro sentenzas declarando as traballadoras persoal laboral indefinido do Concello da Cañiza.

Meses antes de perder a alcaldía, Domínguez intentou a privatización do servizo, que finalmente non foi efectiva debido a que a empresa adxudicataria "renunciou por non acadar o miserento prezo de saída ofrecido no prego os custes do persoal a subrogar".

A este respecto, Domínguez salienta que o cambio de escenario neste Concello foi posíbel grazas á organización das traballadoras, á súa firmeza en denunciar a súa precariedade e esixir da man da CIG a valorización do seu traballo, reclamando o recoñecemento da súa enorme responsabilidade, dando na Cañiza visibilidade a un sector esencial abandonado durante anos, que atende os coidados básicos da vida diaria de preto dun cento de maiores e dependentes do Concello.

Compromiso de manter municipalizado o servizo

Os servizos de axuda no fogar e as residencias foron entregados polo goberno da Xunta e dos concellos á empresas que sacan beneficio de cartos públicos a conta da precariedade de milleiros de mulleres no país, precariedade que necesariamente repercute na asistencia que ofrecen e da que tivemos bo exemplo na crise sanitaria que acabamos de sufrir.

Por esta razón a CIG agradece a decisión de cambio de rumbo do actual alcalde, "polo seu compromiso de manter municipalizado o servizo en contra das directrices da Xunta do PP, pola súa determinación de incrementar a calidade dos coidados ás persoas maiores, e polo recoñecemento ao traballo das súas veciñas como traballadoras esenciais que son".

O TSXG ratifícalle a condición de persoal laboral fixo a un traballador do GES da Pontevenova

Ao operario, que accedeu á praza tras un proceso público de selección, renovábanlle o contrato ano a ano

A sala do social do Tribunal Superior de Xustiza de Galiza vén de ratificar a sentenza do Xulgado do Social nº 3 de Lugo que decretou a condición de persoal laboral fixo dun operario do Grupo de Emerxencias Supramunicipal (GES) da Pontenova. O TXSG desestimou o recurso presentado polo Concello en outubro pasado, validando así o criterio adoptado polo xulgado do social que determinou a fraudulenta contratación deste traballador polo Concello da Pontenova, ao estárenlle renovando o contrato ano a ano desde o ano 2013.

Segundo o alto tribunal galego, a fraudulenta contratación, a realización de funcións estruturais e o cumprimento dos principios constitucionais de igualdade, mérito e capacidade no acceso á súa praza, tras superar un proceso público de selección, converte o traballador en persoal laboral fixo do Concello da Pontenova. Na mesma situación que este traballador están todos os operarios do GES deste municipio, habendo outro compañeiro que está á espera do fallo do TSXG despois que o xulgado do social 3 de Lugo tamén decretara no seu día a súa condición de persoal laboral fixo en base aos mesmos criterios.

Irresponsábel concepción destes servizos de emerxencias

O secretario de Organización da CIG de Lugo-A Mariña, Lois Neto, chama a atención sobre o feito de que esta situación fraudulenta da contratación do persoal dos GES "dáse de forma xeneralizada en todos os concellos que dispoñen destes grupos e deriva dunha concepción irresponsábel por parte das administracións implicadas, tanto da Xunta, como das deputacións provinciais, FGAMP e os Concellos sede, deste servizo de emerxencias".

Sinala que por unha banda o obxectivo da Xunta é dar unha suposta cobertura de servizos de emerxencias a zonas nas que non chegan os parques de bombeiros e, por outra,os concellos, co visto bo de deputacións e FGAMP, acollen estes grupos co obxectivo de dispor "de peóns baratos" para a realización de todo tipo de labores. En calquera caso, para todas estas administracións, advirte Neto, "o de menos é que a poboación conte cuns servizos de emerxencias eficientes, profesionais e correctamente equipados".

A situación dos contratos fraudulentos debe estar na axenda do comité

Para a CIG, a regularización dos contratos fraudulentos debe de estar na axenda do comité de empresa do Concello que se conforme a partir do vindeiro venres, cando se celebran as eleccións sindicais do persoal laboral do Concello da Pontenova, ás que a CIG presenta candidatura por vez primeira. Por iso, avanza, de obter representación, "a central levará a debate no seo do comité a situación tanto dos traballadores e traballadoras do GES coma do resto de persoal do Concello que puidera ter os seus contratos en situación fraudulenta".

O xulgado declara a condición de persoal laboral fixo de 9 traballadores/as do GES de Ponteceso

 A sentenza evidencia a precariedade e a fraude laboral nos servizos públicos que están a fomentar as distintas administracións

O xulgado do Social número 6 da Coruña vén de declarar como persoal laboral fixo do Concello de Ponteceso a nove traballadores e traballadoras do Grupo de Emerxencias Supramunicipal, recoñecéndolle unha antigüidade dende 31 de xullo de 2013, ano no que se asinou o primeiro convenio entre a administración local, a Xunta e a Deputación para a prestación deste servizo con base en Ponteceso.

O tribunal considera que a fraudulenta contratación á que estaba sometido este persoal, con contratos temporais por obra ou servizo que se renovan ano a ano dende 2013; xunto coa realización de funcións permanentes e o cumprimento dos principios constitucionais de igualdade, mérito e capacidade no acceso á súa praza, tras superar un proceso público de selección sen que consten nas bases da súa convocatoria referencia a temporalidade algunha, converten a estes traballadores/as en persoal laboral fixo do concello.

Precariedade dos servizos públicos

Para a CIG esta resolución é unha evidencia máis da irresponsábel concepción que as administracións (tanto a Xunta, como os concellos, a FGAMP e as deputacións) teñen destes grupos de emerxencias e o escaso interese por dotar dunha estrutura de persoal profesionalizada e estábel e con medios materiais suficientes a estes servizos públicos básicos que atenden, de xeito maioritario, ás zonas rurais.

Que esta situación de fraude na contratación dáse de forma xeneralizada nos GES reflícteo a propia sentenza cando recolle que diferentes xulgados do Social e o TSXG teñen ditado resolucións declarando a fixeza da relación laboral dos traballadores e traballadoras cos concellos que prestan o servizo.

Nesta situación de precariedade dos distintos GES mestúranse, por un lado, o obxectivo da Xunta de dar unha suposta cobertura de servizos de emerxencias a zonas ás que non chegan os parques de bombeiros; e por outra, os concellos, co visto bo das deputacións e FGAMP, acollen estes grupos co obxectivo de dispor de persoal barato para a realización de todo tipo de labores. Pois non cómpre perder de vista que, aínda que o GES está financiado ao 100% pola Xunta e as deputacións, quen xestiona o servizo e o persoal contratado par tal fin é o concello no que se localiza a base.

En calquera caso, a CIG denuncia que para todas estas administracións o de menos é ofrecerlle á poboación uns servizos de emerxencias eficientes, profesionais e correctamente equipados, sendo o persoal e a cidadanía quen paga os custes deste desleixo.

Por iso, dende a CIG tamén se anima a todo o persoal dos GES con contratos en fraude de lei a denunciar e reclamar nos xulgados que se lle recoñezan os dereitos laborais que as administracións lles denegan.

Ademais de Ponteceso, este GES tamén atende a zona de Bergantiños, prestando servizo aos concellos de Cabana, Laxe, Malpica e Coristanco.

Denuncian o caos existente no Rexistro da Xunta en Lugo por falta dun criterio único no protocolo Covid

Estanse a dar citas posteriores ao remate dos prazos para presentar solicitudes a bolsas de emprego

O sector de Autonómica da CIG-Administración denuncia o “caos” que se está a producir estes días no Rexistro Xeral do Edificio Administrativo da Xunta de Galiza en Lugo como consecuencia da falta dun criterio unificado na aplicación dos protocolos Covid-19.

Dende a central sinalan que aínda que a situación na que se atopa este departamento do edificio administrativo prodúcese por moitas razóns, “unha das fundamentais é a falta dun criterio minimamente unificado na aplicación dos protocolos Covid-19 por parte das Administracións”. 

Neste senso, lembran que o vindeiro venres 21 remata o prazo para a presentación de solicitudes para inscribirse nunha bolsa de emprego para substitucións en diferentes categorías profesionais, publicadas polo Concello de Lugo. “O elevado número de solicitudes para este trámite que se produciron e se seguen a producir a día de hoxe fai que os rexistros se vexan en moitos casos colapsados”.

O Concello de Lugo informa a cidadanía que ao Rexistro só se pode acceder con cita previa para poder cumprir cos protocolos esixidos polas autoridades sanitarias. “Estes protocolos fan que cando a cidadanía solicita cita previa, e debido á inxente cantidade de solicitudes, esta cita se conceda en datas posteriores ao peche do prazo de presentación de solicitudes das bolsas de traballo ofertadas”.

A partir de aí, e ante a imposibilidade de que as solicitudes entren dentro do prazo establecido polo Concello de Lugo, “a cidadanía desprázase en masa ao Rexistro e neste punto é onde se están a producir excesos de carga de traballo, colas sen fin e situacións de tensión entre cidadanía e persoal que atende o servizo”.

Por iso dende a CIG pregúntanse por que razón dúas Administracións actúan con criterios tan distintos sobre protocolos de saúde. “Cal é a razón de que o Concello só atenda con cita previa e a Xunta atenda con cita previa e sen ela? Quen actúa correctamente e quen non?”.

Un mínimo de organización

Ao mesmo tempo, sinalan que todo este volume de traballo asumido polo persoal do Rexistro non queda só nunha simple carga de traballo “senón que ademais teñen que tratar de calmar á cidadanía que, en non poucas ocasións, sente que están a desprezala e esíxelle responsabilidades ao persoal traballador e non aos verdadeiros/as responsábeis, as xefaturas que non asumen o feito de concretar como se deben de xestionar estas situacións e marcar inequívocos protocolos de actuación, como por exemplo a cantidade de documentos que pode presentar unha persoa”.

Por esta razón, e ante a situación rexistrada esta semana no edificio administrativo e na súa contorna, “solicitámoslles ás administracións que teñan un mínimo de sensibilidade coas persoas administradas que perden o seu tempo en ringleiras que son anacrónicas nunha administración do século XXI que presume de moderna e eficaz”.

Mais tamén lle reclaman á Xunta que respecte o traballo do seu persoal e garanta un mínimo de organización “sen caer sempre na improvisación coa tranquilidade de contar cun persoal tan competente e profesional que ten que sacarlle as castañas do lume á habitual incompetente xestión política”.

A CIG-Ourense reclama atención presencial nas Administracións ante o déficit de conexión á rede

A situación provoca “desatención e desprotección” da cidadanía

A Unión Comarcal da CIG de Ourense reclámalle ás Administracións que volvan á atención presencial unha vez finalizado o estado de alarma, sobre todo tendo en conta o déficit de conexión á rede existente na provincia, para rematar coa “desatención e desprotección” que padece a cidadanía que pretende realizar un trámite.

Dende a CIG-Ourense denuncian que esta situación está a provocar consecuencias moi negativas para as persoas traballadoras e a cidadanía, “xa que calquera que teña que realizar xestións ante o INSS, o SEPE ou a Xunta pasa por un auténtico calvario” porque non hai atención presencial e derivan todos os trámites á vía telemática ou á cita previa telefónica. 

“Se temos en conta o déficit estrutural que ha na provincia en materia de conexión á rede, a dificultade que esta alternativa ten para unha poboación moi avellentada e sen formación e o feito de que os teléfonos de contacto están colapsados ou quedan as chamadas sen atender, o resultado é a desprotección absoluta das persoas que solicitan a atención administrativa á que legalmente teñen dereito”.

A isto hai que sumar as citas que se concertan para dentro de tres meses, “cando os prazos de reclamación son notablemente máis curtos ou os trámites “imposíbeis de realizar” e que repercuten directamente nos ingresos económicos das persoas traballadoras, “como é o caso de quen quere informar ao SEPE do número de fillos/as que ten a efectos da prestación pola súa situación de ERTE”.

Privatización dos servizos públicos

En consecuencia, na CIG-Ourense consideran que “queda clara” a intención de seguir afondando na privatización de servizos públicos e na redución de persoal das Administracións. “Semella que os recortes viñeron para quedarse”, lamentan.

Neste senso, entenden que este tipo de políticos son “un novo golpe económico para unha provincia como a nosa, na que o emprego público representa unha parte moi importante dos salarios e das pensións que percibimos”.

Por todo isto, reclamanqueas Administracións volvan á atención presencial á cidadanía ao igual que seestá a facer no resto dos sectores edas actividadeseconómicas. “Máis aínda nesta situación de incertezae grave crise sanitaria, social e económica na que estamos e na que aínda está por vir”.

CIG-Administración -Presentada denuncia na Inspección pola falla de medidas preventivas para o persoal non docente

Denuncian a ausencia de negociación pola modificación de horarios, funcións e carga detraballo

A CIG-Administración vén de presentar denuncia perante a Inspección pola falta de avaliación de riscos laborais dos centros de educación e a falta de medidas preventivas previstas para os postos do persoal non docente. Denuncia a falla de negociación das súas condicións laborais pola modificación de horarios, funcións e ampliación da carga de traballo e que “tampouco se informou ao persoal do plan de acción, nin das medidas que deben tomar para protexerse do coronavirus e realizar as funcións con seguridade e eficacia”.

Na denuncia sublíñase que tampouco houbo formación e información das medidas de seguridade a adoptar nos postos de traballo, nin se informou á representación do persoal ou a delegadas e delegados de prevención de se se realizaron medidas preventivas. Non se trataron as medidas no Comité de Seguridade e Saúde Laboral Intercentros ou provinciais nin houbo convocatoria algunha da mesa xeral para a elaboración de ningún protocolo de reincorporación á actividade.

Por iso demanda a avaliación de riscos dos postos de persoal non docente; información e formación en materia de prevención; EPIs axeitados; negociación de carteleiras, ratios e cadro de persoal abondo para realizar as tarefas encomendadas e a supresión dos poderes ao equipo covid para a modificación de horarios e imposición de tarefas sen negociación previa previstos no documento de instrucións.

Persoal atinxido

O persoal atinxido é o de limpeza, de cociña, administrativo, coidador de alumnado con diversidade, intérprete de lingua de signos, subalterno e de mantemento. En centros residenciais, persoal médico ou de carpintaría; en centros de educación especial persoal educador e calquera outro que se vexa afectado polas instrucións da consellaría.

A CIG-Administración entende que no caso de persoal de limpeza e mantemento dependente dos concellos ou mesmo de cociña e comedores, están tamén incluídos na denuncia. O mesmo ocorre coas empresas que proporcionan servizos de comedor e limpeza, que deberan estar previstas nas avaliacións de riscos laborais para unha axeitada coordinación das actividades no referido á seguridade do alumnado e das traballadoras e traballadores.

Documento xeral e unilateral

A CIG-Administración asegura que a consellaría de Educación e a de Sanidade elaboraron un documento que permite modificar as condicións laborais do persoal non docente. Un conxunto de instrucións que, no caso de limpeza, son obrigatorias para todo o persoal de limpeza con independencia da súa dependencia orgánica, “polo que será de aplicación non só ás empresas externas senón tamén aos persoal dos concellos.

O documento sinala ademais que “nos supostos nos que existan varias persoas dedicadas as tarefas de limpeza, unha delas realizará total ou parcialmente a súa xornada na quenda de mañá, podendo realizarse rotacións no uso das quendas. Cando as tarefas de limpeza se realicen por unha única persoa, realizará parte da súa xornada, polo menos 1/3 en xornada de mañá”.

Por iso a CIG-administración entende que se modifica a xornada de traballo e a frecuencia das horas en que se teñen que realizar as tarefas “sen negociación previa”. Denuncia ademais que isto supón un considerable incremento da carga de traballo, sen negociación previa de ningún tipo.

Esta mesma situación repítese no caso do persoal de cociña ao que tamén se lle establecen quendas, novos espazos de traballo e modificacións que afectan a horarios e incrementan a carga de traballo.

O persoal non docente sen representación no “equipo formado na COVID”

Cada centro educativo debe contar cun “equipo formado na COVID” que será de referencia para a comunidade escolar e que, segundo especifica a instrución, estará formado pola persoa titular da dirección do centro e dous membros do profesorado, polo que non haberá representación do persoal non docente, nin de persoal técnico en materia de prevención de riscos laborais.

Para a CIG-Administración este equipo non está conformado por “persoal cualificado” para realizar os plans específicos no relativo a tarefas de limpeza e comedor, porque non coñecen nin as tarefas de limpeza, nin as tarefas de comedor. Fronte a isto, a CIG-Administración considera que quen o debe facer é o Servizo de Prevención ademais de ser tratado nos Comités de Seguridade e Saúde Laboral. “En todo caso, o quipo COVID será o encargado, cos medios materiais e humanos necesarios de poñelo en práctica”, matiza.

O mesmo ocorre cando se indica o momento no que se deben utilizar luvas, que segundo a instrución “limítase ao persoal de limpeza no momento de utilizar substancias abrasivas para a pel”. Denuncia que exclúe a outro persoal de usalas e a este persoal noutras tarefas e indica que, en todo caso, iso compete, novamente da Avaliación de Riscos Laborais.

Sen información sobre instrucións para Centros de Educación Especial

Nas instrucións da consellaría sinálase que os Centros de Educación Especial terán un protocolo propio, que a día de hoxe se descoñece.

Ademais, segundo denuncia a CIG-Administración, “nada se trata do persoal subalterno e de conserxería” que, advirte, “vai ver alteradas as súas funcións polas exixencias de control do alumnado nos accesos, saídas e apoio material e de mantemento do funcionamento do centro, do persoal de cociña, ao que non se refire ningunha protección específica, cando o seu contacto laboral vai ser intenso, ou coidados de necesidades especiais”, así como a outras categoría para as que nin fai referencia.

Documento sobre o USO DA MÁSCARA publicado pola Consellería de Sanidade

Segundo a normativa vixente, é obrigatorio o uso da máscara nos espazos pechados que se encontren abertos ao público, aínda que se poida garantir a distancia de seguridade interpersoal de 1,5 metros. A recomendación sanitaria en base á normativa vixente é que existan dous espazos debidamente delimitados que separen perfectamente aos traballadores/as con atención ao público daqueles traballadores/as que non a teñen. Non obstante o servizo de Prevención de riscos debería facer unha avaliación dos postos de traballo, co obxecto de previr a contaxios.

Consulta o documento aquí.