Abrindo Camiños n.º 56 Maio 2017 by cigconcellobetanzos on Scribd
31/05/17
Axudas por redución de xornada para coidado de fillo/a
No DOG do 19/05/2017 publican
a convocatoria das axudas á conciliación da vida familiar e laboral
para os homes e familias monoparentais que, entre o 1 de maio de 2016
e 31 de maio de 2017 teñan unha situación de redución da súa
xornada de traballo para o coidado de fillos e fillas.
Poderán beneficiarse os homes e as
familias monoparentais que, como medida de fomento da
corresponsabilidade, se acollan á redución da xornada para
conciliación da vida familiar e laboral entre as referidas datas
para o coidado dun fillo ou filla menor de 3 anos (ou menor de 12
anos no suposto de que padeza unha discapacidade recoñecida superior
ou igual ao 33%).
Así mesmo poderán acollerse a esta
axuda os traballadores que adopten unha persoa menor ou a teñan en
situación de acollemento familiar, nas modalidades de acollemento
familiar permanente ou acollemento familiar preadoptivo. Nestes
supostos, para ter dereito á axuda non poderán ter transcorrido
máis de 3 anos desde a data da decisión administrativa ou xudicial
de acollemento ou da resolución xudicial pola cal se constitúe a
adopción. En calquera caso, a filla ou fillo por quen se solicita a
axuda terá que ser menor de 12 anos.
Prazo de presentación:
un mes dende o seguinte ao da publicación no DOG.
Paulo Carril, elixido novo secretario xeral da CIG
O Congreso Confederal escolleu tamén a
Executiva Confederal e a Comisión de Garantías
O VII Congreso Confederal remataba a
última hora da mañá deste domingo elixindo á nova Executiva
Confederal e a Paulo Carril Vázquez como novo secretario xeral da
CIG, en substitución de Xesús Seixo. Concluía así o proceso de
renovación de cargos e organismos confederais coa posta a punto do
ideario programático e no cal se definiron e aprobaron as liñas que
guiarán a acción sindical da CIG no vindeiro período.
Tanto para a Executiva Confederal como
para a Secretaría Xeral ou a Comisión de Garantías presentábase
unha única candidatura. A da Executiva Confederal foi referendada
por 506 congresistas (95%), 22 votaron en branco e 3 emitiron voto
nulo. Mentres, Paulo Carril Vázquez resultaba elixido novo
secretario xeral, con 511 votos (96%), 17 brancos e 3 nulos.
Reforzar a organización como mellor
defensa da clase obreira
O novo secretario xeral foi o
encargado de clausurar o VII Congreso cunha intervención na que
chamou a reforzar o asemblearismo, a participación, a construción
da organización, a seguir na contestación social permanente e no
compromiso constante "como mellor defensa dos intereses da clase
traballadora galega". Un propósito na liña do lema elixido
para este proceso congresual: "Coa CIG somos máis fortes".
Polo que, destacou, cómpre seguir traballando para que a CIG sexa un
instrumento reivindicativo útil e capaz, con competencia para
ofrecer alternativas e solucións para a clase obreira.
Por iso, enviou unha mensaxe a toda a
militancia: debemos ser colectivamente atrevidos/as á hora de lanzar
as nosas alternativas, para termos presenza nos centros de traballo e
pórse á fronte das loitas sociais. Este será o camiño para lograr
a toma de conciencia da nosa explotación de clase e nacional, "no
obxectivo da transformación revolucionaria que o noso proxecto
estratéxico defende dunha Galiza ceibe e sen explotación".
Un proxecto en confronto directo coa
ofensiva do capitalismo neoliberal, caracterizado pola inxente
concentración da riqueza e que pula por consolidar unhas relacións
laborais altamente precarizadas e individualizadas. Neste senso,
Carril foi moi crítico co papel xogado pola Unión Europa na
imposición deste sistema, coa "obediencia cega" do goberno
español ás instrucións ditadas pola troika e "co papel
servil" da Xunta de Feijoo "incapaz de tomar ningunha
iniciativa a favor do desenvolvemento económico e social de Galiza".
Neste contexto, defendeu que a CIG ten
que ser o principal activo para enfrontar esta situación, levando
aos centros de traballo unha mensaxe que transforme a resignación, o
individualismo, a pasividade e os medos, en afiliación,
organización, participación sindical e acción colectiva
organizada".
Acumular forzas de cara a unha folga
xeral
Lembrou que a central nacionalista leva
meses defendendo que é o momento de acumular forzas e mobilizármonos
para chegar á convocatoria dunha folga xeral que obrigue ao PP a
retroceder nas súas posicións antiobreiras e antisociais. "Unha
folga xeral para demostrar a nosa disposición á resistencia, á
loita pola recuperación dos nosos dereitos e como a mellor defensa
ante unha inminente e regresiva reforma das pensións",
aseverou.
Porén, censurou o "papel submiso"
das centrais UGT e CCOO co goberno español e a patronal, que nestes
momentos "cociñan un novo pacto social e un novo Acordo Estatal
de Negociación Colectiva", e colaborando deste xeito coa perda
de dereitos, a aplicación da reforma laboral e das novas formas de
empobrecemento da clase traballadora.
Tamén tivo palabras criticas o novo
secretario xeral da CIG coas forzas da oposición e da esquerda no
Parlamento español, incapaces até agora de aproveitar a perda da
maioría absoluta do PP para promover proxectos de lei encamiñados a
derrogar as contrarreformas laborais e as políticas austericidas.
Carril salientou a urxencia de
"rescatar" os nosos sectores produtivos básicos para crear
emprego digno e a "urxente necesidade" de pór o
desenvolvemento da economía ao servizo da maioría social.
Obxectivos para os que "precisamos ter capacidade de decidir.
Non queremos que sigan decidindo máis por nós nin os de fóra, nin
os banqueiros, nin os especuladores".
"Dende a CIG chamamos, aínda
nestes tempos duros, a participar nunha contestación social
permanente e dun compromiso constante para avanzar na conquista dun
sistema económico ao servizo da clase traballadora, sen explotación
e na que o pobo galego, a nación galega, poida existir en pé de
igualdade con todos os pobos e nacións do mundo", concluíu.
Delegacións convidadas
Ademais das/os congresistas, na
clausura do VII Congreso participaron numerosas delegacións
convidadas de organizacións políticas, sociais e culturais de
Galiza e de organizacións sindicais internacionais.
29/05/17
26/05/17
CIG- Informa retribucións persoal laboral ano 2017
Achegamos a información das retribucións do persoal laboral para este ano 2017, que comprenden a suba do 1% con respecto ao recollido no Convenio colectivo que entrou en vigor o pasado mes de abril.
Lembrade que todos aqueles traballadores que teñan unhas retribucións superiores anuais ás establecidas no anexo 1 terá dereito a unha percepción sun complemento persoal transitorio que terá vixencia en tanto o sistema retributivo aplicable sexa o que se fixa no anexo I do convenio colectivo, é dicir, deberá aboarse en tanto non se teña aprobado a RPT ou o instrumento organizativo similar. A contía deste complemento será a diferenza, en cómputo anula, existente entre as retribucións que perciben na actualidade e as retribucións que establece o anexo 1 do convenio colectivo.
A CIG celebra o seu VII Congreso os días 27 e 28 de maio en Compostela
Baixo
o lema “Coa CIG somos máis fortes”
A
Confederación Intersindical Galega celebra a vindeira fin de semana,
27 e 28 de maio, o seu VII Congreso, no Pazo de Congresos de
Santiago, baixo o lema “Coa CIG somos máis fortes”. Un Congreso
que foi presentado esta mañá en rolda de prensa e no que está
prevista a participación dun total de 706 delegados e delegadas que
elixirán á nova Executiva Confederal e acordarán as liñas de
traballo que rexerán a acción sindical no vindeiro período.
O
secretario xeral, Suso Seixo, anunciou ademais que está pactada unha
candidatura unitaria para a Executiva Confederal, encabezada por
Paulo Carril, ademais de todos os cargos. En todo caso matizou que o
Regulamento precongresual contempla a posibilidade de que se
presenten candidaturas até 48 horas antes de comezar o Congreso.
“Pensamos que non se van presentar pero, en calquera caso, hai que
agardar aos prazos que fixa a normativa que temos establecida para
ver se finalmente hai máis candidaturas que unha”, explicou.
Loita
de clases
Seixo
-que compareceu acompañado pola secretaria das Mulleres da CIG,
Margarida Corral, e o secretario confederal de Comunicación e
Propaganda, Francisco Miranda Vigo- sinalou que co lema escollido
para este Congreso, “Coa CIG somos máis fortes”, preténdese pór
en valor a importancia da organización sindical, fronte á idea que
transmite o neoliberalismo de que non hai clases sociais; que a loita
de clases está superada e que, polo tanto, “as organizacións
sindicais tradicionais non temos moita razón de existir porque todos
somos cidadanía, promovendo así o individualismo e a
insolidariedade”.
Lonxe
diso denunciou que realmente asistimos a un período no que se “está
agudizando a loita de clases” e que, polo tanto, é fundamental que
as traballadoras e traballadores estean organizados e “teñan
capacidade para defenderse de forma colectiva”.
Explicou
que para a CIG o actual modelo de sociedade camiña cara un recorte
importante de dereitos; unha distribución moi desigual da riqueza;
un incremento das diferenzas sociais e unha cada vez maior
acumulación da riqueza, do poder político e económico, en poucas
mans. “Un tipo de sociedade cada vez máis antidemocrático, no que
quen toma as decisións que realmente despois condicionan as nosas
vidas en todos os ámbitos son as institucións políticas e
financeiras que funcionan totalmente á marxe do control da
cidadanía”. Por iso asegurou que os sindicatos seguen estando
totalmente de actualidade, nomeadamente a CIG, entendendo que
“tampouco serve calquera tipo de sindicalismo”.
Fronte
o sindicalismo de pacto social
A
este respecto, e facendo un percorrido polos aspectos esenciais que
se recollen nos textos a debate no Congreso, valorou que nos últimos
anos asistimos a unha integración no sistema dos que practican un
sindicalismo de pacto social, un sindicalismo de colaboración que
“leva a desmotivar, desmobilizar e despolitizar á clase
traballadora”. E denunciou, en concreto, que CCOO e UGT “mesmo en
momentos tan difíciles como os que estamos a vivir seguen nesa
política de colaboración, de compadreo e de entreguismo ao poder
económico e político”.
Fronte
a iso, apostou polo modelo sindical, “completamente distinto”,
que representa a CIG, que entende que hai que debater, nos centros de
traballo, sobre se este modelo de sociedade no que vivimos está
realmente ao servizo da clase traballadora ou non, cando non garante
dereitos fundamentais como o dereito a vivenda, a un posto de
traballo, a unha pensión, a uns servizos públicos ou a un salario
digno.
Subliñou
ademais que é precisamente ese modelo o que levou á CIG a situarse
como primeira central sindical de Galiza en afiliación,
infraestrutura, capacidade mobilizadora e a unhas décimas de ser a
primeira forza sindical en canto a representación nos centros
de traballo. “Conseguímolo sen ceder para nada nos nosos
principios e na nosa acción sindical: de combate, de contrapoder e
contraria ao pacto social”.
Do
mesmo xeito considerou que coas circunstancias políticas que se dan
hoxe no Parlamento español, cun PP sen maioría absoluta, daríanse
as condicións para promover proxectos de lei que tiraran abaixo esas
políticas regresivas que se impuxeron. Porén, lamentou, “non está
presentando ningún proxecto nese camiño e entendemos que tiñamos,
as organizacións sociais e nomeadamente as sindicais, que
mobilizarnos e presionar ás forzas políticas, sobre todo ás da
esquerda, para que empecen a presentar proxectos que vaian no camiño
de recuperar dereitos perdidos”.
De
feito lembrou que neste período a CIG valorou, diante desta
situación, a necesidade de promover unha nova convocatoria de folga
xeral, pero que, porén, por parte do sindicalismo estatal “non se
fixo nada”.
Análise
crítica da UE
Nos
textos tamén se cuestiona o papel dunha Unión Europa que o
secretario xeral da CIG cualificou como “cada vez máis
antidemocrática e antisocial”. Unha UE ao servizo do capital
financeiro que impuxo políticas que provocaron, nos estados
periféricos de Europa en situación de profunda crise económica
“unha grave perda de dereitos e moita pobreza, mesmo favorecendo
claramente a especulación coa débeda pública en función dos
intereses do capital”.
Unha
UE da que denunciou o seu carácter “antihumanitario”, tal e como
está a actuar cos refuxiados que están chegando a Europa e aos que
se lles negan os seus dereitos humanos fundamentais.
Papel
marxinal de Galiza
O
secretario xeral da CIG denunciou ademais o papel cada vez máis
marxinal que ocupa Galiza por mor das políticas emanadas desa UE e
do estado español. “Unha Galiza máis dependente, onde hai unha
destrución importante do noso tecido produtivo que está provocando
que, de novo, moitos miles de galegos e galegas, sobre todo mozos e
mozas, teñan que marchar a buscarse a vida”.
Seixo
asegurou que todo isto estase a facer co consentimento e, en moitos
casos, coa colaboración da Xunta de Galiza, que “non está a
promover ningún proxecto alternativo para a sociedade galega que
permita que realmente todos os galegos/as poidan gozar dun posto de
traballo e dunha calidade de vida digna na nosa terra”.
Reforzo
organizativo
No
VII Congreso reitérase novamente a necesidade de mellorar nos
métodos de traballo e facer un sindicato cada vez máis
próximo, máis presente nos centros de traballo. Unha máxima que
Seixo entende que debe guiar a actuación de todos os cargos da
central sindical e dos liberados e liberadas. “Non se pode agardar
a que todos os traballadores e traballadoras veñan polo sindicato,
ten que ser o sindicato quen vaia aos centros de traballo, porque os
problemas están aí e nós temos que ser unha arma operativa clara
nas mans da clase traballadora para defenderse de tantas agresións”,
concluíu.
Actas dos Comités de Seguridade e Saúde
Acta Comité de Seguridade e Saúde (26/11/2015)
Acta Comité de Seguridade e Saúde (29/09/2016)
Acta do Comité de Seguridade e Saúde (08/02/2016)
Acta do Comité de Seguridade e Saúde (10/03/2016)
Nova solicitude dos itinerarios e protocolos das revisións médicas
Os delegados de prevención da CIG solicitaron, unha vez máis, os itinerarios e protocolos das revisións médicas que segundo o técnico da mutua asistente á reunión do Comité de Seguridade e Saúde deste mes de maio xa foron enviadas hai tempo ao Concello, mais que este non llas trasladou aos delegados de prevención de riscos laborais máis de sete meses despois, a pesar de existir un acordo en firme do Comité de Seguridade e Saúde.
Solicitude de reunión co concelleiro de persoal
Os representantes do persoal laboral solicitaron unha nova reunión co concelleiro de Persoal para solicitarlle información sobre diversos temas que levan tempo pendente, como a creación da Comisión Paritaria Mixta de Seguimento do Convenio Colectivo, información sobre a nova RPT agora que finalizou a fase de entrevistas ao persoal, a necesidade de resolución das axudas sociais do ano 2017, que en anos anteriores xa estaban resoltas e cobradas nesta altura e outros problemas e discriminacións laborais do persoal laboral.
O Comité de Empresa solicitálle ao Concello que solucione, tal e como se comprometeu, os problemas de persoal da Escola Infantil Municipal
Desde o pasado 19 de abril están publicadas as listaxes definitivas da bolsa de emprego de técnico/a de xardín de infancia e o persoal da Escola Infantil Municipal Santiago de la Fuente segue padecendo a falta de persoal motivada pola xubilación anticipada dunha traballadora. En varias ocasións o propio concelleiro de Persoal, Diego Fernández, comprometeuse a contratar persoal baixo a figura de acumulación de tarefas no momento en que as listaxes fosen definitivas e mesmo a propia concelleira de área comprometeuse a que esta situación se ía solucionar a comezos de maio e solicitoulle ao persoal que, mentres tanto, realizasen as horas extras necesarias.
O Comité de Empresa fixo esta solicitude a instancias das demandas do persoal que leva anos con problemas deste tipo de facendo moitas horas extras para suplir as faltas nun servizo onde a carga de horas pode ser esgotadora debido ao tipo de traballo. Esta situación complícase cando mesmo en ocasións o persoal vese obrigado a renunciar a dereitos como días libres pedidos en tempo e forma para manter o servizo nas condicións que procede.
O Comité de Empresa, a instancias da CIG, solicitoulle ao Concello que agora que a listaxe de substitucións
de técnico/a de xardín de infancia é definitiva cubra de inmediato
todas as prazas necesarias para ofrecer o servizo en condicións
óptimas, tal e como se comprometeu o goberno municipal, e que teña
constancia que a gravidade desta situación e as consecuencias que
poidan vir derivadas delas vén exclusivamente dada pola decisión do
Concello de Betanzos de non cubrir as baixas deste servizo e
sobrecargar ás traballadoras que o prestan.
A Inspección de Traballo faille un requirimento inmediato ao Concello de Betanzos
Logo da denuncia que os delegados da CIG do Concello de Betanzos se viron obrigados a facer no pasado mes de xaneiro ante a non resposta do goberno municipal con respecto á solicitude do Plan de Evacuación do Concello de Betanzos, a inspección de traballo vén de responder e requirirlle ao Concello o seguinte:
1. Elaborar un Plan de Emerxencia e evacuación para a biblioteca pública, Alfonso Rodríguez Castelao.
2. Implementar o referido plan, con especial atención ao nomeamento de equipos de intervención e arealización dun simulacro de evacuación.
Así mesmo lémbralle que "o presente requirimento será de cumprimento inmediato, sen prexuízo do establecido no Real decreto 70/202, do 19 de xullo, debendo acreditarse as medidas adoptadas antes de xullo de 2017. Para estes efectos, solicitará cita co actuante e comparecerá, a medio dun técnico do seu servizo de prevención de riscos, achegando o libro de visistas e a documentación que estime oportuna.
Logo da reunión do Comité de Seguridade e Saúde do Concello de Betanzos deste mes de maio, os delegados de prevención de riscos laborais, volveron solicitar información dos plans de evacuación dos diferentes edificios municipais que non se lles facilitou, polo que decidiron solicitar o Plan de evacuación e emerxencia do edificio Liceo, incluíndo as Oficinas Xerais, a Oficina de Turismo e as dependencias onde hai programación cultural, Aula Municipal de Cultura, Salón Azul, Sala de Usos Múltiples e Sala de Exposicións.
Hai que lembrar que non é a primeira vez que a Inspección de Traballo lle dá a razón aos delegados de prevención do persoal laboral.
08/05/17
O goberno municipal privatiza por primeira vez un posto de conserxe
A CIG vén de solicitarlle ao goberno municipal que aclare as condicións dun traballador que ocupa o posto vacante dunha da conserxaría do edificio Liceo, así mesmo, vén de solicitarlle que cubra o posto de conserxe polos procedementos legalmente establecidos e que teña por interposta unha queixa e tome as medidas oportunas.
Lémbralle, así mesmo, que este posto era ocupado por un traballador que xa estaba con prórroga de xubilación e desde o pasado mes de xaneiro quedou sen persoal mais con idéntica carga de traballo, asumida por outro persoal. Desde a pasada semana un traballador cuxo contrato descoñece o Comité de Empresa e cuxa existencia mesmo descoñecían no Departamento de Persoal do Concello ocupa o posto de conserxe antes ocupado por un empregado público.
Este tipo de postos son de carácter estrutural e organización e funcionamento do Concello, polo que deben ser desempeñados por empregados públicos, así mesmo a Sección sindical lembroulle ao goberno municipal que esta relación cun traballador dunha empresa privada podería dar lugar a un caso de cesión ilegal de traballadores, tal e como xa advertiu a Secretaría municipal nun informe de xuño de 2015 con respecto á contratación do persoal de apoio á Feira Franca Medieval.
O Concello xa non só privatiza o cemiterio, obras, xardinaría, limpeza de rúas e de edificios, persoal de apoio para eventos, agora, tamén as conserxarías, nunha carreira imparable que comezou, como mínimo, hai cinco anos e que resulta máis que preocupante especialmente para o persoal laboral, tendo en conta que unha grande inmensidade deste está nunha situación irregular e temporal. Descoñecemos cal será a próxima privatización mais, visto o visto, nunca se sabe.
Na CIG estamos valorando os pasos a seguir con respecto a este caso de posible cesión ilegal de traballadores, ao igual que temos actuado no pasado co persoal de apoio que ocupa un despacho municipal durante a organización da Feira Franca Medieval.
Comité de Seguridade e Saúde o vindeiro 10 de maio de 2017
O Concello de Betanzos, logo de moitos meses de atraso, e dunha denuncia dos delegados de prevención da CIG na Inspección de Traballo da Coruña, convocou para o vindeiro mércores o Comité de Seguridade e Saúde laboral.
O organismo, que segundo o propio regulamento, aprobado por unanimidade, debería reunirse cada tres meses, no último ano e medio só se reuniu de xeito ordinario en tres ocasións e todas cunha previa solicitude dos delegados de prevención da CIG. Os propios temas que se van tratar foron proposta destes, mais o certo é que resulta moi lamentable a postura do Concello ante os temas relacionados coa seguridade e a saúde laboral do seu persoal.