A CIG mobilízase no Mercadona de Betanzos contra a política de medo e represión

A sección sindical esixe o cese dos comportamentos irrespectuosos co persoal e condicións dignas

A sección sindical da CIG en Mercadona ten convocado un novo calendario de mobilizacións para denunciar os abusos de poder, a política de medo e represión e para esixir un traballo digno no que se respecten os dereitos laborais. Con estas accións quérese pór a atención nos compartamentos que se están a detectar nalgunhas tendas da provincia por parte dos mandos "que atentan contra a dignidade das traballadoras e dos traballadores". "Parece mentira que en pleno século XXI nos teñamos que mobilizar para esixir respecto e dignidade, pero así  é. Vendemos a nosa forza se traballo, nin a nosa dignidade, nin a nosa saúde fisica e mental, nin as nosas vidas están en venta. Iso é algo que Mercadona non entende", subliña André Abeledo, delegado da CIG no comité provincial da Coruña.

Neste senso, explica que o persoal está sometido a presións continuadas e a uns ritmos de traballo estresantes para cumprir cos tempos que lles marcan, "imposíbeis de cumprir pola enorme carga de traballo". Isto fai que o persoal estea sometido a unha elevada tensión que ao final acaba derivando en problemas para a súa saúde.

A isto hai que engadir ademais os compartamentos irrespectuosos por parte de determinados mandos "que son humana e laboralmente intolerábeis, pero que Mercadona obvia, consinte e encubre". Un posición patronal que contratasta coa imaxe de empresa modélica que Mercadona vende nos medios de comunicación, malia que a realidade laboral é ben distinta.

Próximas mobilizacións

Estas situacións afectan especialmente a tres tendas da provincia, nas que a sección sindical centrará nesta ocasións a resposta aos abusos laborais. A primeira das concentracións tivo lugar este venres no establecemento que Mercadona ten en Betanzos, para o mércores 23 de xuño está convocada protesta na tenda da Avda. de Oza da Coruña e o luns 28, as mobilizacións trasladaranse até o supermercado situado no Outlet de Culleredo.

Propostas da CIG con respecto á modificación da RPT presentada polo Concello de Betanzos

A CIG vén de achegar por rexistro as súas propostas con respecto á modificación da RPT que achegou o Concello de Betanzos á pasada Mesa Xeral de Negociación. A grandes trazos indicámoslle o seguinte ao Concello de Betanzos:

1. Coidamos que non é o momento máis adecuado para modificar a RPT cando está pendente de resolverse o recurso interposto e cuxo xuízo tivo lugar o pasado 15 de abril. Solicitamos que o Concello agarde esta sentenza e logo proceda á modificación da Relación de Postos de Traballo como corresponda.

2. Solicitámoslle ao Concello que inclúa nesta modificación a totalidade dos postos e prazas do persoal laboral que cumpren os requisitos de indefinición do Estatuto dos Traballadores e en cumprimento dos artigos 79 e 78 respectivamente do Convenio colectivo do persoal laboral e da Lei 2/2015 de emprego público de Galiza.

3. Continuamos a discrepar do sistema de valoración dos postos, discriminatorio para o persoal laboral e insistimos na necesidade de modificar por completo o manual da Relación de Postos de Traballo.

4. Consideramos inxustificada e subxectiva a suba salarial proposta para Secretaría e Intervención. Se estes postos están dotados con 100 puntos e non se propón unha suba do valor do punto non se pode realizar unha suba salarial por adscrición directa.

5. Discrepamos da escasa xustificación para singularizar dous postos de administrativo e un de oficial de Policía e do sistema de adxudicación directa a determinados traballadores/as. Propoñemos que se o Concello decide singularizar estes tres postos debe crealos e deben ser provisionados polos procedementos legamente establecidos entre o funcionariado correspondente.

6. Propoñemos a equiparación na valoración do complemento de destino dos postos de persoal laboral e funcionario para os postos de auxiliar de axuda no fogar, técnico/a especialista en xardín de infancia, limpador/a, electricista e profesores/as da Escola Municipal de Folclore, entre outros, e un incremento na valoración dos complementos específicos dos postos de persoal laboral que saen claramente prexudicados na proposta de valoración do Concello de Betanzos.

Podedes consultar polo miúdo as propostas presentadas aquí:

 

Protocolos de espectáculos musicais ao aire libre de gran afluencia, para facer fronte á crise sanitaria ocasionada pola COVID-19: Público sentado e Público de pé

A Xunta non informou do gromo de Covid-19 detectado no edificio administrativo de Monelos

A sección sindical da CIG do persoal funcionario pide a dimisión da Xefa Territorial da Coruña

Na reunión que a Xunta de Persoal Funcionario na provincia da Coruña tivo o pasado venres 3 de xuño coa Secretaria Territorial, a Xunta de Galiza non informou do gromo de Covid-19 detectado na planta baixa do Edificio Administrativo de Monelos. Ao contrario, foi a representación da CIG quen tivo que sacar este tema tras ter coñecemento da situación por unha traballadora.

Tras inquirir sobre a importancia do gromo, "a administración quitoulle ferro, coma se tivese unha importancia mínima, cando non é así, sen ofrecer máis explicacións", critican dende a sección sindical da CIG de persoal funcionario da Coruña. Denuncian "a burla da Xunta" no relativo á protección dos seus traballadores e das traballadoras e "o escandaloso que resulta" que na reunión se lle agochara á representación social información que foi feita pública a través dos medios de comunicación.

"Por estas noticias, enterámonos de que Sanidade aplica os protocolos de seguridade no edificio administrativo de Monelos despois de detectar tres positivos. Xa basta de desprezos, de desleixo e de preguiza na saúde laboral na Xunta". Para a sección sindical da CIG, despois do acontecido ao longo deste último ano, "a estas alturas non podemos seguir transixindo a improvisación, nin permitir a ocultación como xeito de solucionar ou atallar esta situación tan dramática".

E neste senso, esixen a dimisión das responsábeis da Delegación Territorial da Xunta na Coruña e da xefa territorial de presidencia, responsábel directa do servizo onde se deu o gromo, por non actuar coa dilixencia requirida, ocultar información e nin sequera reunir ao Comité de Saúde Laboral do Edificio para advertir dos contaxios e dar conta do alcance do gromo.

Solicitadas auditorías da Covid-19

"As persoas que traballan no edificio están preocupadas, alarmadas pola nula acción dos seus xefes e xefas directas, que como única medida preventiva tomaron a decisión de abrir unha porta. O que o persoal quere é traballar en confianza e con seguridade e non coa exposición ao perigo", conclúen. Por iso, a CIG reclama da Xunta que abandone a pasividade, traballe "decididamente na prevención" e teña en conta á representación do persoal para garantir a seguridade dos traballadores e das traballadoras.

A este respecto, sinalan que na reunión do venres, reiterouse que a CIG xa ten solicitado auditorías da Covid-19 nos centros administrativos da Xunta "para ir avaliando a situación e como método de traballo na prevención, sabendo da pouco marxe de manobra que nos deixa o virus. Nesta reunión, como nas reunións anteriores, volveron tomar nota, pero sen achegar darse ningún avance".

Nesta liña, salientan que a CIG tivo que recorrer á Inspección de Traballo para que se garantira a subministración de máscaras ao persoal, cuxa entrega ademais a administración galega demorou por poñerlles o logo do Xacobeo e da Xunta, "primando a publicidade institucional á saúde das traballadoras". Porén, advirten que a vida útil destas máscaras xa pasou "e levamos meses pedindo a súa renovación sen que se repartan novas máscaras".

O Xulgado anula o capítulo de persoal do orzamento 2020 do Concello de Ourense

A CIG presentara denuncia por vulneración do dereito de negociación colectiva

O Xulgado Contencioso Administrativo número 2 de Ourense vén de anular o capítulo I dos orzamentos do Concello de Ourense correspondentes ao ano 2020, contra o que a CIG presentara unha denuncia por vulneración do dereito de negociación colectiva.

A sentenza condena tamén o ente local a convocar, no prazo de 20 días, a mesa xeral de negociación coa finalidade de debater cos sindicatos os asuntos propostos con anterioridade. 

A resolución xudicial anulou así mesmo os actos e disposicións de aplicación dese orzamento, como a Oferta Pública de Emprego. Dende a CIG lembran que na mesa xeral de negociación celebrada o día 27 de novembro de 2019 propuxeran oito puntos de debate, todos incluídos no catálogo de materias negociábeis en base ao artigo 37 do EBEP, “mais o grupo de Goberno recusou e impediu o debate, vulnerando o dereito á negociación colectiva”.

Por iso consideran “difícil de entender” que o alcalde de Ourense poida impedir “tan felizmente” o exercicio de dereitos constitucionais como a negociación cos traballadores/as. “Estamos diante dun xeito de gobernar que reflicte un menosprezo absoluto por valores como a pluralidade e o diálogo”.

Instrumentalización das institucións públicas

Lembran que o rexedor presentábase hai un tempo como “o campión da transparencia e da liberdade, pero resultou ser o campión do de sempre: do ordeno e mando e da instrumentalización das institucións públicas”.

Finalmente, sinalan que nos vindeiros días Gonzalo Pérez Jácome está obrigado a convocar a mesa de negociación do Concello de Ourense para repor a legalidade que el mesmo incumpriu. “Estaremos moi atentos/as ao que faga e a nosa resposta será proporcional ás súas decisións”.

A área pública da CIG mobilízase pola retirada dunha reforma do EBEP que non dá solución ao persoal interino e temporal

A central reclama transparencia nas negociacións e que se eliminen as taxas de reposición

A área pública da CIG realizou concentracións este xoves diante da Delegación do Goberno na Coruña e nas Subdelegacións de Pontevedra, Lugo e Ourense en demanda da retirada da reforma que o Ministerio de Función Pública pretende introducir no Estatuto Básico do Empregado Público. Esta reforma do EBEP, sen procesos de consolidación e sen claros mecanismos de sanción, non soluciona o problema nin busca saída para o persoal interino ou temporal que durante anos foi vítima da temporalidade abusiva. "O Ministerio pretende resolver o problema da temporalidade no emprego público poñendo na rúa a todo o persoal temporal e interino. E isto non o imos permitir", subliñaba Xabier Picón, voceiro da área pública da CIG, advertindo ademais, que a proposta do equipo de Miquel Iceta, non só non atende á xurisprudencia emanada do Tribunal de Xustiza da Unión Europea senón que mesmo dá as costas, entre outras, a resolucións xudiciais da Sala do Social do TSXG.

Eliminar a taxa de reposición é fundamental

Para a CIG, non se pode abordar unha reforma do EBEP sen eliminar primeiro as taxas de reposición de efectivos, que impiden ás distintas administracións públicas poder dimensionar os seus cadros de persoal e decidir sobre a xestión dos servizos que presta, en función das súas propias capacidades orzamentarias.

"Estas limitacións están impostas por unha norma básica estatal que o goberno ten que retirar, e a partir de aí buscar unha solución ao problema de temporalidade, que foi fomentado precisamente por esas taxas de reposición que se manteñen dende hai máis de dez anos", sinalou.

A CIG insiste en que non se pode pretender liquidar esta problemática "simplemente deixando na rúa a todo este persoal que leva anos prestando servizos nas administracións públicas, e sen darlle antes unha solución ás preto de 300.000 persoas que están agora mesmo en situación de temporalidade". Un obxectivo que, criticou, non recolle a proposta que o ministro trasladou o pasado 24 de maio á Mesa Xeral das Administracións Públicas do Estado.

Neste senso, a CIG considera que debe articularse unha solución excepcional ao problema da temporalidade acumulada, apostando por uns verdadeiros procesos de consolidación de emprego, e na necesidade de respectar os ámbitos de negociación, tanto a nivel territorial como nos diferentes sectores que o propio EBEP recoñece a súa especificidade (educación, sanidade).

De igual xeito,  para a central nacionalista resulta fundamental fixar un marco sancionador moi estrito e contundente con aquelas administracións que incumpran a norma, identificando ás persoas responsábeis dos órganos que non cumpran. Mais tamén deben existir medidas reparadoras co persoal temporal que foi ou é vítima do abuso na contratación temporal.

Escurantismo nas negociacións

Xunto a isto, Picón criticou a falta de transparencia na negociación, pois malia o Ministerio asegurar que o 4 de xuño estarían pechadas as negociacións, "dende o momento no que a CIG fixo pública a proposta de reforma do EBEP, as reunións foron suspendidas".

Para a CIG isto é un indicio claro de que hai unha negociación na sombra cos sindicatos estatais (CCOO, UGT e CSIF) para logo presentar unha documento previamente “cociñado” e que volva a caer nos erros dos acordos de 2017 e 2018.

Por iso, o voceiro da área pública da CIG "esixiu que a negociación sexa totalmente transparente e que todas as centrais sindicais con representación na Mesa Xeral teñamos un coñecemento exacto do que se está a falar".

Mobilización na Xunta de Galiza

A área pública da CIG continuará co calendario de mobilizacións o vindeiro luns, 28 de xuño, cunha concentración diante do edificio da Xunta en San Caetano, xa que a elevada temporalidade, maioritariamente froito do abuso na contratación e claros exemplos de fraude, se dá en todas as administracións, "que están sacando ofertas de emprego público sen darlle solución ao persoal afectado".

A CIG comunícalle ao Concello a súa postura con respecto á proposta de axudas sociais ante a negativa de Santiago Ois a convocar o Comité de Empresa

Os catro delegados e delegadas da CIG veñen de comunicarlle ao Concello  que están de acordo coa proposta se reparto de axudas sociais do ano 2021, entendendo que se seguiu o procedemento establecidos e se facilitou a información ao persoal para as correspondentes reclamacións.

Esta semana o Concello enviou a información para que o Comité de Empresa emitise informe e, á vista desta situación, realizouse unha solicitude de reunión extraordinaria ao presidente do Comité da CSIF, Santiago Ois, para que reunise o organismo e elaborar o informe, entre outras cuestións. Por segunda vez consecutiva, Santiago Ois négase a convocar o Comité de Empresa, na primeira ocasión foi porque non recoñece ao novo delegado da UGT como membro do Comité independentemente do que acrediten as actas electorais das eleccións sindicais do 2019 e, destoutra volta porque volve entender que os delegados da CIG non teñen a maioría precisa que lle obrige a convocalo e para el, a emisión do informe preceptivo para que o Concello pague as axudas sociais do ano 2020 non é motivo necesario para reunir o organismo.

Ante esta situación os delegados e as delegadas da CIG decidimos comunicarlle a nosa postura con respecto a este tema ao Concello e comunicarlle que o presidente se negaba a reunir o Comité para emitir o informe, mais que independentemente disto entendemos que o Concello debía continuar coa tramitación e o pagamento das axudas para que o persoal non se vise afectado pola decisión do presidente do Comité de Empresa de faltar ás súas obrigas como máximo representante dos traballadores laborais.

A maiores, puxémonos en contacto co representante da UGT do Concello, que tamén entendía que debía convocar o Comité de Empresa e comentounos que este sindicato tamén lle comunicará a súa postura ao Concello con respecto a este tema para se axilice e que os atrancos de Santiago Ois non compliquen o pagamento das axudas.

Tendes aquí o documento rexistrado:

Proposta da CIG sobre a Oferta de Emprego Público 2021 e a proposta de consolidación do persoal laboral

A CIG do Concello de Betanzos achegoulle estes días por rexistro as súas propostas con respecto á reunión sobre a Oferta de Emprego Público e a proposta para a consolidación de emprego no Concello de Betanzos.

A grandes trazos as propostas da CIG con respecto a esta proposta son as seguintes:

A CIG entende que nesta negociación se someteu a debate un único punto da orde do día que se debería desagregar en tres diferentes. Por un lado, a Oferta de Emprego Público de postos puramente vacantes, é dicir, non ocupados provisionalmente por ningún tipo de persoal e que non sob obxecto dun proceso de consolidación e que entendemos como necesaria e urxente polas necesidades de persoal desta Administración local derivadas do sometemento durante os últimos anos á taxa de reposición; por outro lado, entendemos que se debera tratar a Oferta de Emprego Público que lle afecta aos postos obxecto de consolidación e que non van supor ningún incremento de efectivos no Concello, e, por tanto, non hai tanta premura coma nos do primeiro grupo, e finalmente, e por outro lado, deberan negociarse os criterios para os procesos de consolidación que veñen nun outro apartado.

A CIG está de acordo con que o Concello de Betanzos aprobe unha Oferta de Emprego Público para o ano 2021 de xeito urxente e que inclúa a totalidade dos postos vacantes e que na actualidade non están ocupados de xeito provisional por persoal laboral e que a proposta do Concello se incremente con varios postos que non aparecen incluídos mais que entendemos que deberan incluírse como as prazas de operario/a de limpeza viaria funcionario/a e mais laboral, outra de condutor/a laboral e unha de arquitecto/a. Tamén entendemos, tal e como explicamos, que debido á situación de falta de persoal no Concello é prioritaria a incorporación de novos efectivos e, a seguir, deberan realizarse os procesos de promoción que se propoñen para unha parte do funcionariado.

Con respecto á Oferta de Emprego Público para os postos ocupados provisionalmente por persoal laboral temporal e que non supoñen a incorporación de novo persoal a esta Administración local, a CIG solicita A PARALIZACIÓN DO PROCESO DE CONSOLIDACIÓN ata que se aclaren os cambios no Estatuto Básico do Empregado Público que se están negociando a nivel estatal e que o goberno do Estado pretende levar adiante proximamente. Entendemos que no momento actual, con traballadores que levan en fraude de lei máis de trinta anos e cunha normativa que desde o ano 2005 indicaba que tiñan que ser obxecto de proceso de consolidación non é tan urxente levar adiante este proceso nun momento de cambios a nivel estatal e que resulta máis axeitado agardar a que a Administración estatal aprobe as correspondentes directrices para os futuros procesos de consolidación. 

Consideramos que a Oferta de Emprego Público das prazas do persoal laboral obxecto de consolidación que presenta o Concello de Betanzos para a negociación é claramente inxusta e discriminatoria para unha parte do persoal laboral deste Concello, xa que por un lado recolle na documentación a totalidade das prazas que son susceptibles de consolidación ao abeiro da disposición transitoria 4.ª do RDL 5/2015 mais por outro lado selecciona con base a un criterio non recollido na lexislación os postos que decide ofertar primeiro.

A CIG entende que a RPT do Concello do Concello incumpre a Lei 2/2105 do emprego público de Galicia e mais o Convenio colectivo do persoal laboral ao non recoller a totalidade dos postos e prazas que na actualidade están orzamentadas no cadro de persoal do Concello de Betanzos (BOP n.º 61, do 5 de abril de 2021), e tamén que a disposición transitoria mencionada enriba non fai ningún tipo de exclusión relacionada coa Relación de Postos de Traballo e que, por tanto, a inclusión de certas prazas na Oferta de Emprego Público do ano 2021 é un criterio político de selección e discriminatorio e non legal.

Finalmente, e con respecto aos criterios propostos para a consolidación do emprego no Concello de Betanzos e, en concreto, canto aos criterios xerais de escolla dos postos que se deben ofertar na Oferta de Emprego Público discrepamos na distribución en grupos e, tal e como indicamos con anterioridade, entendemos que a totalidade dos postos do persoal laboral susceptibles de consolidación/estabilización deben ser obxeto de idéntico tratamento para evitar as discriminacións entre os traballadores e traballadoras. Así mesmo, e por outro lado, propoñemos que o tratamento da proposta para os postos distinguidos como obxecto de consolidación e o dos que aparecen como de estabilización sexa unitario e uniforme, en favor dos criterios recollidos para consolidación, máis beneficiosos para os traballadores e traballadoras que deben superar estes procesos.

Podedes consultar o documento presentado aquí:

Reunión de Negociación (08/06/2021): OEP 2021 e bases dos procesos de consolidación

 Convocatoria de reunión de negociación para o Comité de Empresa e delegados de persoal

Proposta de criterios de consolidación/estabilización de emprego do Concello de Betanzos

Mesa Xeral de Negociación (08/06/2021): modificación da RPT

Convocatoria da Mesa Xeral de Negociación

Proposta de modificación da RPT n.º 1

O Concello convoca a Mesa Xeral de Negociación para a modificación n.º 1 da RPT pendente da sentenza do recurso contencioso-administrativo interposto pola CIG.

Nesta modificación basicamente propón o seguinte, entre outras cousas:

-Incluír unha parte dos postos do persoal laboral temporal con sentenza xudicial firme e excluír outros na mesma situación.

- Aumentar funcións nos postos de Secretaría e Intervención cun incremento salarial de 7892,62 euros con respecto ao aprobado na RPT publicada en decembro con base a unha valoración técnica por adscrición directa.

- Subirlle o nivel, a puntuación e consecuentemente o complemento específico ao posto de administrativo da ficha 24, do Departamento de Contratación e Persoal a través dunha singularización non xustificada na documentación.

- Subirlle a puntuación e consecuentemente o complemento específico ao postos administrativo do Departamento de Urbanismo da ficha 21 (C1/C2) a través dunha singularización non xustificada na documentación.

- Reconverter o posto de arquitecta funcionaria en arquitecta laboral.

-Modificar un posto de oficial da Policía Local para subirlle a puntuación e consecuentemente o salario fronte ao resto de oficiais pola responsabilidade de munición que con anterioridade tiña un posto de Policía Local.

CIG-BOLETÍN SINDICAL N.º49

 

A CIG denuncia o funcionamento antidemocrático do Comité de Empresa presidido por Santiago Ois

A CIG vén de remitirlle a Santiago Ois unha denuncia de varios incumprimentos sistemáticos que os delegados da CSIF perpetúan nas reunións do Comité de Empresa relativos á obriga de recoller nas actas as intervencións dos delegados e delegadas. A denuncia explicita os artigos do regulamento que se incumpren, o incumprimento reiterado do presidente do deber de información ao todo o Comité de Empresa e mais solicítalle que corrixa a situación e senón tomará as medidas que procedan en dereito.

O certo é que este comportamento nin estraña vindo dos delegados dun sindicato de funcionarios que obviamente descoñece por completo o funcionamento democrático do máximo organismo de representación laboral e o que é un Comité de Empresa e cuxa única finalidade nestes dous anos con representación no persoal laboral foi aprobar unha RPT que beneficia fundamentalmente a unha parte do funcionariado grazas a excluír á maior parte do persoal laboral.

Tanto CIG como UGT solicitaron en reiteradas ocasións que se graven as reunións do Comité de Empresa para ademais, así, facilitar a redacción das actas, mais obviamente os catro delegados da CSIF néganse reiteradamente  a esta proposta, mesmo en contra da maioría dos delegados, porque é moi doado contar mentiras das que non hai probas e manipular o funcionamento democrático das reunións cando non fica constancia mais que do que lles peta.

A Sección sindical da CIG do Concello apoia aos traballadores e traballadoras da concesionaria do complexo deportivo Carregal nas súas reivindicacións

A Sección sindical da CIG do Concello de Betanzos quere amosar publicamente o apoio aos traballadores e traballadoras do complexo deportivo do Carregal nas súas reclamacións fronte á concesionaria Itude SL.

Tal e como se fixo público nos pasados días os traballadores e traballadoras que non están en ERTE do complexo polideportivo do Carregal que leva a concesionaria Itude SL levan dous meses sen cobrar e valoran iniciar accións de protesta ante o impagamento de salarios por conta de Itude S.L. , a concesionaria do complexo polideportivo do Carregal.

Segundo indican, o administrador da empresa está pendente de que o Concello resolva a indeminización pendente para poder solucionar os problemas económicos, polo que desde a CIG do Concello de Betanzos urximos ao Concello de Betanzos a que axilice de xeito inmediato os trámites necesarios para resolver esta tramitación e que o persoal tamén poida así cobrar os salarios adebedados e volver á normalidade.

A sección sindical da CIG ofreceulle o seu apoio ao persoal das instalacións, lamenta que teña chegado esta situación que acumula dos meses traballados sen cobrar e agarda que se solucione canto antes en beneficio do persoal da concesionaria do Concello.

Prevención e mitigación da Covid-19 no traballo. OIT.

Recoñecemento da COVID-19 como enfermidade profesional para todos os efectos

Por unha banda, no RD 1299/2006 recóllese ao persoal non sanitario, traballadores de centros asistenciais ou de coidados de enfermos, tanto en ambulatorios como en institucións pechadas ou a domicilio e, doutra banda, no Anexo II do RD 664/1997 recóllese o coronavirus da síndrome respiratoria aguda grave 2 ( SARS- Cov-2). Do exposto queda acreditado que o traballador sofre un primeiro proceso de IT con diagnóstico de síndrome respiratoria aguda asociado a coronavirus e, por tanto, sufriu unha enfermidade recollida na listaxe, que estivo exposto a un risco probado de exposición ao axente causal específico para esa enfermidade; e cando realizaba unha profesión con actividades na que se está exposto ao devandito risco, de modo que para o primeiro proceso de IT, do 13 de setembro ao 22 de outubro, opera a presunción iuris et de iure de enfermidade profesional

Respecto do segundo proceso, iniciado o 23 de outubro de 2020 e finalizado o 15 de xaneiro de 2021, non sendo recaída do anterior segundo partes médicos, co diagnóstico de  disnea e alteracións respiratorias, entende o  xulgador que sobre el non existe ningunha dúbida que trae lóxica consecuencia e son patoloxías derivadas do contaxio por  SARS-Cov-2, que deu lugar ao primeiro proceso de  IT (cualificado de enfermidade profesional), e, en consecuencia, debe considerase igualmente enfermidade profesional, dada a continuidade e sucesión inmediata entre o primeiro proceso de  IT e o segundo; todo iso aínda existindo PCR negativa, o que non evitou que o traballador seguise sufrindo as patoloxías derivadas do contaxio por exposición ao virus.

Ligazón á sentenza.

www.cigsaudelaboral.org

Condenan a Carrefour a pagar unha indemnización de máis de 6000 euros a un traballador

 A empresa ignorou as solicitudes do empregado para que se lle ampliara a xornada laboral

O xulgado do Social nº 2 Lugo vén de recoñecer o dereito dun traballador de Carrefour a ampliar a súa xornada laboral das 24 horas semanais ás 39 horas, e condena á empresa a abonarlle unha indemnización de máis de 6000 euros en concepto de lucro cesante, pola diferenza entre o que cobrou e o salario que cobraría se prestara o seus servizos a xornada completa.

O traballador afectado leva prestando servizos para o CC Carrefour Lugo a tempo parcial dende o ano 2004, cunha xornada semanal de 24 horas. Tomou a decisión de presentar denuncia en marzo de 2018, despois de terlle solicitado á empresa que se lle ampliara a xornada até en tres ocasións entre maio de 2016 e novembro de 2017. Non obstante, a cada unha das peticións, a compañía respondeu con silencio e iso a pesar de que nese período se produciran varias vacantes e novas contratacións neste centro de traballo.

Cómpre lembrar que o convenio colectivo de grandes almacéns establece no seu artigo 9 que, no caso de incremento do cadro de persoal ou de existir vacantes a cubrir, en similar función, a igualdade de condicións, os traballadores e as traballadoras con contratos a tempo parcial terán preferencia sobre as novas contratacións a tempo completo.

A empresa nin sequera contestou ás solicitudes

Porén, Carrefour non só non lle ofreceu a posibilidade de ampliar a súa xornada laboral ás 39 horas semanais, senón que nin sequera lle contestou ás solicitudes, nin tampouco xustificou a realización doutros contratos.

Por todo iso, o xulgado recoñece o dereito do traballador a ampliar a xornada de traballo con efectos económicos dende o 30 de novembro de 2017 (data na que presentou a última solicitude á empresa) e condena a Carrefour a abonarlle unha indemnización de case 6000 euros (máis os intereses xerados).

Este é un exemplo máis da política de precariedade e imposición que practica Carrefour nas súas relacións laborais, denegando de maneira sistemática melloras aos seus traballadores e traballadoras e obrigándoas a ter que acudir permanentemente aos xulgados para poder exercer os seus dereitos.

A CIG traslada a preocupación polo anuncio de Cambre de abandonar o Consorcio das Mariñas

 Demándanlle ao Concello da Coruña que lidere esta crise no ente

A sección sindical da CIG en Albada quere trasladar a súa preocupación polo anuncio do Concello de Cambre de  abandonar o Consorcio das Mariñas, sumándose así á decisión comunicada hai uns días polo Concello de Culleredo, e ás posibilidades neste sentido manifestadas tamén polo actual presidente do ente e alcalde de Abegondo, José Antonio Santiso.

Ante a incerteza de que non se sabe aínda onde van levar o lixo, dende a sección sindical da CIG solicítanlle a ambos Concellos que sigan tratando os residuos na planta de Nostián, "con independencia de que finalmente fagan efectiva a decisión de abandonar o Consorcio ou permanezan nel, e que teñan en conta que hai traballadoras e traballadores da planta que son veciños destes Concellos".

En risco a viabilidade da planta de Nostián

Así mesmo, demanda do Concello da Coruña "que lidere esta crise, xa que en parte é culpábel do que está a acontecer no seo da entidade", e sobre todo tendo en conta que a decisión de marchar ou non utilizar a planta por parte dos concellos da comarca "pon en risco a viabilidade das instalacións e do modelo Nostián".

Neste sentido, o goberno da Coruña tamén ten que aclarar se esta situación vai repercutir aínda máis no atraso na publicación dos pregos de condicións. "Ao noso entender se a planta estivera licitada, como no seu día afirmou a concelleira de Medio Ambiente que estaría antes do 31 de decembro de 2019, o que está a pasar hoxe no Consorcio non sucedería".

Ademais, non cómpre esquecer que a demora na licitación da nova concesión repercute no progresivo  deterioro das instalacións -pois Albada non fai o mantemento preventivo nin os investimentos necesarios-, no incremento dos riscos aos que se vén sometidos os traballadores e as traballadoras, na perda de dereitos laborais e na merma continuada dos niveis de reciclaxe e de recuperación de residuos.

Concentración o 3 de xuño en María Pita

Diante disto, os traballadores e as traballadoras de Albada continuarán co calendario de mobilizacións o próximo 3 de xuño, cunha concentración de 09:30 a 10:30h na Praza de María Pita, coincidindo coa celebración do pleno municipal.

As traballadoras de axuda a domicilio de Miño iniciarán mobilizacións se a empresa segue a incumprir o convenio

Reclaman a intervención do Concello e que garanta que FEPAS respecta os dereitos laborais

As traballadoras do servizo de axuda a domicilio do Concello de Miño, adxudicado a  FEPAS (Fundación para el Estudio y Promoción de la Acción Social ) dende marzo de 2020, acordaron iniciar mobilizacións se a empresa continúa a incumprir o convenio colectivo. No servizo traballan arredor de 30 traballadoras, a maior parte delas con contratos a tempo parcial.  

A empresa vén incumprindo sistematicamente o convenio colectivo, tanto no relacionado coa xornada de traballo, os descansos, a liquidación da bolsa de horas trimestrais e outras cuestións.  Ademais, explica o secretario confederal de Emprego da CIG, Francisco Xabier Cartelle, FEPAS "obriga as traballadoras a realizar servizos que non lles corresponden baixo a ameaza do despedimento e dispensando un trato ao persoal que se sitúa fóra do aceptábel, pois non se respecta debidamente a dignidade das persoas".

Todos estes feitos, que  xa foron postos en coñecemento da Inspección de Traballo e algúns van ser obxecto de denuncia diante dos tribunais de xustiza, teñen convertido o SAD do Concello de Miño "nun nicho de precariedade e explotación laboral".

Situación insostíbel

A representación sindical da CIG cualifica a situación de" insostíbel e intolerábel", polo que ten solicitado unha xuntanza coa dirección da empresa para esixirlle que se regularicen as relacións laborais e se cumpra escrupulosamente co convenio colectivo e tamén se pediu reunión co Concello para demandarlle que, como titular do servizo, garanta que a empresa adxudicataria cumpra a legalidade vixente. De non ser así, o persoal ten decidido emprender un calendario de mobilizacións e non se descarta a convocatoria de folga no servizo.

"Non imos permitir que esta empresa precarice as condicións do persoal dun servizo que é fundamental e que debe prestar a administración pública. Este é un claro exemplo de como a privatización dos servizos públicos provoca un deterioro destes e das condicións de traballo do persoal que o presta", denuncia Cartelle.

A xustiza obriga o Concello de Narón a reincorporar un traballador nas listas de contratacións de bombeiros

 Fora excluído por unha resolución da alcaldía que violaba os seus dereitos laborais

A CIG-Administración Pública de Ferrol tivo que recorrer á xustiza para que o Concello de Narón readmitira un traballador nas listas de contratación de bombeiros/as. Esta persoa, explica Carmem Viso, secretaria comarcal da CIG-Administración, fora expulsado das listas de contratación no mes de xuño do ano 2020 "por unha resolución da alcaldía que violaba os seus dereitos laborais, alegando unha suposta renuncia a un contrato".

Fronte a esta decisión, a CIG interpuxo un contencioso administrativo e a xustiza de Ferrol, en sentenza do 8 de abril, recoñece a non existencia da renuncia e a irregularidade da exclusión das listas, obrigando o Concello a incluílo coa orde de prelación que tiña.

Porén, a sentenza non se pronuncia sobre os chamamentos para vacantes que foron feitos durante o seu período de exclusión das listas e a posibilidade de que lle corresponderan pola orde de prelación que tiña nesa listaxe feita despois dun proceso selectivo.

O Concello de Narón fixo efectiva a sentenza e reincorporou o traballador ás listas neste mes de maio. Dende a CIG-Administración Pública de Ferrol sinalan que "seguiremos atentos na defensa dos dereitos do persoal empregado público utilizando todos os recursos que sexan necesarios para o seu respecto".

Condenan a residencia de Sarria a indemnizar unha traballadora por vulneración do dereito de conciliación

O centro comunicoulle de maneira unilateral a modificación do seu horario

O Xulgado do Social nº 2 de Lugo vén de condenar a Residencia Nosa Señora do Carme de Sarria por vulnerar o dereito de conciliación dunha traballadora, condenando ademais a a empresa a aboarlle a cantidade de 2500€ en concepto de indemnización polo danos causados.

No mes de xaneiro a residencia de Sarria, a través de escrito asinado polo seu presidente, o membro do Goberno municipal, Benjamín Escontrela, comunicoulle á traballadora a modificación do seu horario laboral, cando a empregada estaba desde o ano 2013 en situación de redución de xornada e gozaba dunha concreción horaria pactada co propio centro.

Tal e como reflexa a sentenza a modificación de horario feita de xeito unilateral pola residencia carecía de xustificación e ademais o horario que tiña a traballadora estaba suficientemente xustificado. Esta decisión obrigou a traballadora a ter que recorrer a unha excedencia para poder conciliar a súa vida laboral e familiar.

 Actuacións arbitrarias por parte do Concello

A CIG considera verdadeiramente lamentábel que un organismo público dependente dunha institución, como é o Concello de Sarria, "utilice prácticas laborais de vulneración de dereitos fundamentais, actuando de xeito absolutamente arbitrario e a capricho, neste caso, dun concelleiro".

A residencia de Sarria, sinala o secretario de Organización da CIG de Lugo-A Mariña, Lois Neto, é desde hai anos fonte de continuos conflitos "que nesta última lexislatura foron a máis, sendo claramente deficiente a súa xestión, co agravante de  ter sen cubrir o posto de dirección desde hai máis de ano e medio".

De xeito que estas funcións son asumidas "por unha traballadora afín a Escontrela, que non reúne nin requisitos nin coñecementos para xestionar o centro, e saltándose así desde o Concello os principios de mérito, igualdade e capacidade nunha responsabilidade da importancia como é a dirección dunha residencia de maiores".

A CIG pide a retirada da proposta de modificación do EBEP e que o Ministerio presente outra nova

Denuncia a suspensión da xuntanza que xa estaba prevista e teme que se estea negociando por detrás

A CIG solicita a retirada da proposta de modificación do Estatuto Básico do Empregado/a Público/ (EBEP) e que se presente unha nova proposta. Cuestiona ademais a xestión da negociación, para a que estaban comprometidas todas as xuntanzas necesarias, pero que foi suspendida de forma unilateral polo Ministerio.

A primeira xuntanza do grupo de traballo celebrárase o pasado día 24 de maio. Na mesma sinalábase como data da seguinte reunión o día 27 de maio. O propio secretario xeral do Ministerio afirmaba nesa xuntanza que tiña a axenda libre para reunirse todos os días que fixera falta para acelerar as negociacións. Porén, ao día seguinte, a central sindical recibía unha comunicación pola que se cancelaba a reunión prevista coa escusa de darlle prazo aos sindicatos para presentar alegacións, cando todos aceptaran a data proposta.

A CIG pon en cuestión a decisión de suspender as reunións e que se solicite agora que se remitan as alegacións por escrito. A central sindical témese que os sindicatos estatais, que mantiveron un hermetismo absoluto e para nada informaron desa xuntanza, estean negociando por detrás, como ten acontecido noutras ocasións, para chegar a un acordo.

A CIG xa adianta que promoverá mobilizacións no caso de que non se retire a proposta tal e como está.

Retirada da proposta

Función Pública afirmou na reunión do 24 de maio que a reforma sobre a temporalidade  descansaría sobre tres patas: modificación do EBEP; flexibilización da taxa de reposición (en ningún caso eliminación) e proceso de estabilización vinculado co compromiso expresado polo Estado no documento enviado á UE para os fondos europeos

Para a CIG non se pode chegar a acordos no ámbito da Mesa Xeral cando o único que se presentou foi unha das tres “patas”, a do EBEP. A posición da central sindical nun tema de relevancia como o das medidas para reducir a temporalidade é que se debe facer nun marco de respecto ás miles de persoas que veñen ocupando postos de traballo como persoal interino ou temporal, nun claro abuso da contratación temporal.

A reforma do EBEP, sen procesos de consolidación e sen claros mecanismos de sanción, non soluciona o problema nin busca saída para quen durante anos foron vítimas da temporalidade abusiva.

Nova proposta

Fronte a isto a posición da CIG descansa sobre tres eixos fundamentais e así foron trasladados nun escrito remitido ao Ministerio de Función Pública tras a cancelación unilateral da segunda reunión:

• ELIMINACIÓN DA TAXA DE REPOSICIÓN. Cada administración pública debe poder dimensionar os seus cadros de persoal e decidir sobre a xestión dos servizos que presta, en función das súas propias capacidades orzamentarias. Para isto, é imprescindíbel que desaparezan as taxas de reposición con carácter básico da lexislación do Estado.

• PROCESOS EXCEPCIONAIS. Debe articularse unha solución excepcional ao problema da temporalidade acumulada, apostando por uns verdadeiros procesos de consolidación de emprego, e na necesidade de respectar os ámbitos de negociación, tanto a nivel territorial como nos diferentes sectores que o propio EBEP recoñece a súa especificidade (educación, sanidade).

• RÉXIME SANCIONADOR E REPARADOR. É fundamental fixar un marco sancionador moi estrito e contundente con aquelas administracións que incumpran a norma, identificando ás persoas responsábeis dos órganos que non cumpran. Mais tamén deben existir medidas reparadoras co persoal temporal que foi ou é vítima do abuso na contratación temporal.

Canto ao texto presentado, a CIG considera que hai unha clara intencionalidade de incorporar medidas no EBEP para blindar e protexer as propias administracións diante dos bandazos que están a dar os tribunais de xustiza. Así se evidencia con estas incorporacións ao EBEP:

• que o nomeamento de interino non dá lugar a ningún tipo de recoñecemento de condición de funcionariado de carreira ou permanencia.

• que no caso de cese do persoal interino non se xera dereito á indemnización

Para a CIG o estabelecemento dun período de proba é innecesario e improcedente , xa que un dos motivos de cese xa é a falta de capacidade ou rendemento, o que levaría consigo un expediente disciplinario. Fixar o período de proba pode introducir arbitrariedade polo que a central sindical está en desacordo e demanda a retirada.

A medida de cesar ao persoal interino despois dos 3 anos, penalizando á persoa e o servizo público sen que se poida cubrir a vacante durante un ano é ademais “un despropósito”. Se queren evitar o abuso na contratación temporal que sancionen duramente á persoa ou persoas á fronte dos órganos de persoal que o permiten, mais que non fagan recaer a penalización no persoal interino e nos propios servizos públicos.

Outro dos apartados máis preocupantes da proposta do goberno estatal é a negación expresa do dereito á carreira profesional do persoal interino mentres no acade a condición de funcionariado de carreira. Estamos diante dunha medida impresentábel, que vai contra dereitos adquiridos en moitos casos grazas a sentenzas e conflitos xudiciais promovidos pola CIG (os sexenios docentes ou a carreira profesional na administración xeral da Xunta) e acordos que incorporan o persoal interino na carreira profesional (SERGAS). A CIG está totalmente en contra dunha medida que considera regresiva e que prexudicaría a miles de persoas polo mero feito de ser interinas malia realizar o mesmo traballo.

A CIG amosa a súa incredulidade diante das cifras de prazas a convocar e dos seus efectos

En diferentes declaracións do ministro Iceta e dos responsábeis do Ministerio na Mesa Xeral cifráronse nun mínimo de 300.000 as prazas que se deberán ofertar no presente ano 2021, nun calendario que se estendería para facer todos os procesos convocados até o 2024.

A certeza dos datos dos denominados “procesos de estabilización” vinculados cos pactos dos sindicatos estatais co goberno español non deixa lugar a dúbidas. Segundo datos do propio goberno (de abril de 2021) houbo un total de 218.671 prazas autorizadas para incorporar en ofertas de emprego público.

Porén, tan só se ofertaron 154.483 prazas (é dicir, non se ofertaron o 30% das prazas inicialmente previstas). Destas só se cubriron 56.236, o que implica que tan só o 25% das prazas que se venderon como de “estabilización” chegaron a se transformar en fixas no conxunto do Estado e no total dos sectores (ensino, sanidade, xustiza, administración xeral..). Con estes precedentes, a CIG amosa a súa incredulidade sobre se realmente se van cubrir as cifras anunciadas polo Ministerio. 

Listaxe de concesión das axudas sociais 2020

 Podedes consultar o anuncio aquí.

Aquí podedes consultar a listaxe da concesión: