Segue a incrementarse o número de accidentes laborais

Sinistralidade

Os datos de sinistralidade laboral referidos a 2017, 583.425 accidentes laborais con baixa, representan o cuarto incremento consecutivo da sinistralidade. O primeiro trimestre do 2018 continúa coa tendencia á alza: 52 mortes en accidente laboral, 10 máis que no mesmo período do ano anterior o que significa un incremento do 23,8%.

Entre os principais motivos de sinistralidade están os accidentes de tráfico, tanto en itínere como in mision, e os choques e golpes contra obxectos inmóbiles,como as caídas ou tropezos que supuxeron 10.076 accidentes só no mes de xaneiro.

Os sectores con taxas máis elevadas de sinistralidade son os de comercio, industria ou construción.

Máis información sobre datos desinistralidade laboral.

Máis info en www.cigsaudelaboral.org.

Desestimado o recurso dun traballador por “exceso de celo”

SENTENZA

A Audiencia Provincial de Murcia desestimou o recurso dun traballador dunha fábrica de conservas contra o Auto dun Xulgado de Instrución que arquivou a denuncia que presentara contra a mesma tras un accidente, pois se considera que o mesmo se produciu por un exceso de celo.

O auto da Audiencia indica que o suceso se produciu cando o denunciante, en contra das indicacións que tiña, tentou desatascar unhas ventosas e sufriu o atrapamiento da man, con perda de varios dedos.

O denunciante asegurou que os feitos eran constitutivos dun delito contra os dereitos dos traballadores, pero o Xulgado ao que correspondeu a súa reclamación acordou o sobresemento das actuacións ao considerar que os mesmos non eran constitutivos de ningún ilícito penal.

Aquel recorreu a medida a través do recurso de apelación no que se queixou de que o Xulgado acordase o arquivo sen practicar as probas precisas para o esclarecemento dos feitos, polo que consideraba que a decisión era precipitada.

A Sala considera acertado o sobresemento acordado polo Xulgado de Instrución trala práctica de varias dilixencias; así, prestaron declaración durante a tramitación da causa a responsable da formación sobre prevención de riscos laborais ofrecida ao traballador, e o representante legal da empresa, que manifestou que o demandante non estaba autorizado para realizar funcións de mecánico, e que no seu momento quedara advertido diso. Tamén declarou un compañeiro de traballo do accidentado, que asegurou que presenciou como a xefa de quenda indicaba ao traballador que non tocase nada e que esperase á chegada do mecanico cando este lle dixo que se atascara unha ventosa.

A Sala da Audiencia, ao desestimar a súa apelación, sinala que o ocorrido hai que situalo nun exceso de celo, ao non constar que o traballador recibise ningunha orde expresa de solucionar o atasco nin que a empresa o consentise.

Máis info en www.cigsaudelaboral.org

Unha empresa condenada a indemnizar a unha traballadora que cobrou menos que os seus compañeiros homes por realizar o mesmo traballo

SENTENZA

A traballadora alegou unha vulneración do dereito de igualdade e non discriminación ao percibir retribucións inferiores ás que se lle abonan aos outros responsables de departamento da empresa demandada, todos eles homes, por realizar o mesmo traballo.

A Sala Social do Tribunal Superior de Xustiza de Andalucía confirmou integramente a sentenza dun Xulgado do Social que condenou a unha empresa para indemnizar con 35.000 euros a unha traballadora que a demandou por cobrar menos que os seus compañeiros homes polo mesmo traballo.

A traballadora alegou unha vulneración do dereito de igualdade e non discriminación ao percibir retribucións inferiores ás que se lle abonan aos outros responsables de departamento da empresa demandada, todos eles homes, por realizar o mesmo traballo.

O Xulgado do Social número 2 de Málaga condenou á empresa demandada a restituír o dereito da traballadora para percibir o salario do resto de responsables de departamento, e condenou á empresa para abonar a indemnización de 35.000 euros polo concepto dos danos e prexuízos sufridos como consecuencia dese ilegal comportamento empresarial.

A sentenza sinala que “non toda desigualdade de trato supón unha infracción do contido do artigo 14 da Constitución Española, senón tan só as que introduzan unha diferenza entre situacións que poidan considerarse iguais, sen que se ofreza e posúa unha xustificación obxectiva e razoable para iso, pois, como regra xeral, o principio de igualdade esixe que, a iguais supostos de feito, aplíquense iguais consecuencias xurídicas”.

Así, recóllese que a traballadora durante os anos 2014, 2015 e 2016 percibiu unhas retribucións substancialmente inferiores á dos outros catro responsables de departamento da empresa demandada, todos eles homes, pois no ano 2014 a demandante percibiu un total de 37.897, 60 euros, mentres que o resto dos seus compañeiros de idéntica categoría percibiron unha retribucións comprendidas entre os 39.622,56 euros e os 41.122,64 euros, incrementándose ditas diferenzas no ano 2015 (a  actora percibiu 37.897, 60 euros fronte aos 42.022 € dos seus compañeiros) e no ano 2016 (38.047 euros da  actora fronte a 43.650,04 euros dun dos seus compañeiros e 48.950,12 euros dos tres restantes).

Así mesmo, segundo a sentenza, “consta probado que a cantidade abonada á traballadora en concepto de incentivo era inferior á satisfeita ao resto dos responsables de departamento, existindo unhas diferencias que nos dous últimos anos chegaron a superar os 2.000 euros".

Fonte: RRHH press

PLAN DE FORMACIÓN CONTINUA FEGAMP 2018

INFORMACIÓN DO PLAN DE FORMACIÓN CONTINUA DA FEGAMP

Na páxina web da Fegamp está publicado o Plan de Formación Continua.

No seguinte enlace:  http://www.fegamp.gal/formacion/continua está toda a información necesaria: bases da convocatoria, ficha de inscrición, cadro das accións formativas, modelos de formularios e todas as fichas dos cursos con datas, horarios, formadores e programas.

A ficha de inscrición so poderá enviarse por correo electrónico, co selo da entidade local (obrigatorio) e a sinatura da persoa solicitante (obrigatoria), a seguinte dirección: formacion.continua@fegamp.gal

Prazo de inscrición do 15 ao 26 de maio de 2018

Unha vez rematado o prazo de presentación de solicitudes se algún curso non completou as prazas manterase aberto, no caso contrario pecharase o 26 de maio e así figurará na páxina web.

O Concello de Betanzos constitúe a Comisión Paritaria de Igualdade

O pasado 9 de maio o Concello constituíu a Comisión Paritaria de Igualdade que terá, entre outras finalidades, a elaboración e posta en marcha dun Plan de igualdade interno da Administración. Esta Comisión créase ao abeiro dunha cláusula do Convenio colectivo do Persoal Laboral e mas do Plan de Igualdade do Concello de Betanzos. O acordo do funcionariado, asinado por CCOO, CSIF e UGT non recolle nada con respecto a esta cuestión; non obstante, o Concello decidiu incluír nela tanto aos representantes do persoal laboral como aos do funcionariado.  

Na reunión de constitución acordouse a composición desta que será a seguinte:

Polo Concello: María Barral (presidenta), Diego Fernández(vogal), Andrés Hermida (vogal) e Marta Díaz (secretaria).

Pola parte sindical: un/ha representante de cada un dos sindicatos que compoñen a Mesa Xeral de Negociación coa representatividade que lle corresponde (CIG, UGT, CSIF e CCOO).

Así mesmo, nesta reunión de constitución, a CIG fixo unha proposta de regulamento  e reiterou a súa proposta de protocolo contra o acoso sexual, laboral, por razón de sexo e identidade no Concello de Betanzos. A Comisión de Igualdade acordou debater estes dous documentos na próxima reunión da Comisión, que se acordou que terá lugar en quince días.

En último lugar a CIG deulle a coñecer ao Concello e trasladoulle o informe sobre o Convenio colectivo desde unha perspectiva de xénero que elaborou o Servizo de Igualdade da Comisión Consultiva Autonómica para a igualdade entre mulleres e homes na negociación colectiva para que a Comisión de Igualdade o tivese en conta de cara a posibles futuras melloras do Convenio colectivo neste aspecto.

Aquí tendes  a proposta de regulamento da Comisión Paritaria da CIG:

Aquí tendes a proposta de protocolo contra o acoso presentada pola CIG:

Solicitada, de novo, a información sobre as horas extraordinarias

O Comité de Empresa solicitou hoxe, de novo, a información das horas extraordinarias realizadas polo persoal laboral nos mese de xaneiro, febreiro, marzo e abril. Ao se tratar da terceira solicitude sen resposta, de non lle entregar esta información o Concello durante este mes acudirá de novo á Inspección de Traballo, tal e como vén tendo que facer desde hai sete anos, posto que o goberno municipal sempre foi moi reaccio a entregarlle esta información aos representantes dos traballadores.

Hoxe mesmo presentouse na sede electrónica a petición de información, tendo en conta que para acudir á denuncia na Inspección, no caso de que sexa preciso, cumpriría acreditar a presentación efectiva da solicitude. No documento o Comité de Empresa indicoulle o seguinte ao Concello de Betanzos:

PRIMEIRO. Que o convenio colectivo no artigo 21.9.m indica o seguinte con respecto á información ao Comité de Empresa sobre as horas extraodinarias do persoal laboral:

“O Comité de Empresa será informado, cando menos mensualmente, da realización das horas extraordinarias do persoal laboral, a identificación dos/as traballadores/as, a data da súa realización e a cuantificación das horas realizadas en total.”

SEGUNDO. Que o Concello de Betanzos vén incumprindo sistematicamente este deber de información e non lle entrega información sobre as horas extraordinarias realizadas, senón que exclusivamente achega información sobre as horas extraordinarias pagadas. Así mesmo, e no caso das horas extras pagadas nunca llas achega puntualmente e sempre con varios meses de atraso.

TERCEIRO. Que o Concello de Betanzos non lle achegou a documentación correspondente ao Comité de Empresa das horas extraordinarias realizadas polo persoal laboral nos meses de xaneiro, febreiro, marzo e abril de 2018.

CUARTO. Que na última documentación sobre as horas extraordinarias entregada, relativa aos meses de outubro e novembro de 2018, non vén en todos os casos identificada a data de realización das horas, polo que entendemos que esta documentación foi entregada con eivas.

POLO EXPOSTO, SOLICITO:

PRIMEIRO. Que o Concello de Betanzos lle entregue ao Comité de Empresa a relación de horas extras realizadas con base ao deber de información recollido no artigo 21.9.m. e aos parámetros indicados neste.

SEGUNDO. Que o Concello lle entregue con puntualidade ao Comité de Empresa a información relativa ás horas extraordinarias do persoal labora de xeito mensual, tal e como procede. Así mesmo, comunico que de non entregalas en tempo e forma tomaremos as medidas oportunas.

TERCEIRO. Que o Concello de Betanzos lle entregue ao Comité de Empresa a información das horas extraordinarias realizadas polo persoal laboral nos meses de xaneiro, febreiro, marzo e abril coa identificación dos/as traballadores/as, a data da súa realización e a cuantificación das horas realizadas en total, tal e como indica o Convenio colectivo do persoal laboral e vigor.

Reunión extraordinaria da Comisión Paritaria do Convenio Colectivo

O pasado venres 11 de maio tivo lugar unha reunión extraordinaria da  da Comisión Paritaria do Convenio Colectivo, logo de que o concelleiro de Persoal advertise que era posible mellorar o texto acordado na anterior comisión e de cara a previr o menor número de reclamacións posible pola absorción dos novos trienios que o Concello de Betanzos lle vén facendo aos traballadores e traballadoras que teñen Complemento Persoal Transitorio desde a entrada en vigor do Convenio Colectivo, o pasado 7 de abril de 2017.

Con esta finalidade propuxo incluír o seguinte apartado relativo aos criterios de absorción nos acordos tomados uns días antes:

Os novos trienios cumpridos dende a entrada en vixencia do Convenio colectivo non serán absorbibles polo complemento persoal transitorio logo da entrada en vigor desta modificación.

A representante da CIG na Comisión Paritaria estivo de acordo, tendo en conta que varios traballadores xa estaban a dar os pasos para facer a reclamación deses trienios pola vía xudicial e entendendo que no caso de que quixesen continuala para reclamar os atrasos esta cláusula podería facilitar a interpretación favorable do convenio noutras instancias. Así pois, nesta reunión da Comisión acordouse incorporar este apartado aos acordados en días anteriores.

Ata o momento, e en espera de ver que informa o concelleiro na reunión pendente, a previsión é que esta modificación do Convenio colectivo vaia a pleno no mes de maio. Unha vez aprobada e que se saiba se os informes de Secretaría e Intervención son con carácter retroactivo ou non estariamos ante dous posibles escenarios nos que o persoal podería reclamar, no caso de que a cláusula non se aplique con carácter retroactivo, os atrasos absorbidos desde a entrada en vigor do convenio e ata que entre en vixencia esta modificación do Convenio colectivo.

Se algún compañeiro ou compañeira quere máis información sobre o tema pode poñerse en contacto cos delegados da CIG ou escribirnos a cigconcellobetanzos@gmail.com.

Solicitada unha reunión do concelleiro de Persoal

Hoxe mesmo, o Comité de Empresa, por iniciativa da CIG, e logo de falar con compañeiros sobre diversas cuestións laborais que lle preocupan ao persoal, solicitou unha reunión co concelleiro de Persoal a través da sede electrónica na que propón falar dos temas que se recollen abaixo. En canto teña lugar a reunión informarémosvos, coma sempre, das novidades.

1. Novo regulamento de axudas sociais.
2. Aplicación efectiva dos acordos da última reunión ordinaria e extraordinaria da Comisión Paritaria do Convenio Colectivo.
3. Prazos da implantación definitiva do sistema de control de presenza no traballo e discriminacións existentes na actualidade relacionadas cos horarios.
4. Atrasos no pagamento das horas extraordinarias do persoal laboral e problemas na tramitación.
5. Convocatoria do Comité de Seguridade e Saúde, plans de emerxencia dos edificios municipais e revisións médicas pendentes.
6. Reclamacións previas de indefinición do persoal laboral.
7. Información sobre as previsións relacionadas co persoal dos servizos de limpeza, obras, Escola Infantil Municipal, Conservatorio Municipal, Escola Municipal de Folclore e outros.
8. Outros temas laborais

Abrindo camiños n.º 62 abril 2018

Deixámosvos o número 62 do voceiro Abrindo camiños que repartimos o pasado mes entre o persoal laboral.

Día Mundial da Seguridade e a Saúde no Traballo. As reformas laborais matan

Gabinete Técnico Confederal de Saúde Laboral - CIG

A FOLGA XERAL DEBE SER A RESPOSTA CONTUNDENTE DA CLASE OBREIRA A UNHAS POLÍTICAS ECONÓMICAS DO PP QUE NOS EMPOBRECEN, PRECARIZAN E MENOSCABAN A NOSA SAÚDE. A enorme precarización das condicións de traballo derivadas das distintas reformas laborais dos gobernos do PSOE e do PP teñen provocado un aumento substancial da sinistralidade laboral, especialmente no noso País. En Galiza o índice de sinistralidade laboral duplica o do Estado español. O número de mortes por accidentes laborais medrou un 2% no ano 2017 e os accidentes con baixa un 5,6%.

O brutal aumento da temporalidade, dos contratos a tempo parcial, o aumento da subcontratación, ou a proliferación de empresas multiservizos, xunto co aumento dos ritmos de produción, teñen incidido de xeito directo no deterioro das condicións de traballo que teñen provocado á súa vez un grave prexuízo para a saúde dos traballadores e traballadoras do noso País.

O número de baixas derivadas de continxencias profesionais así como a súa duración ten aumentado de xeito alarmante nos últimos anos. Aumento que sen dúbida sería maior de non actuar as Mutuas de traballo como mercaderes da nosa saúde atendendo a cuestións puramente monetarias e raramente a criterios médicos á hora de emitir altas ou de determinar a duración dos procesos de curación. Por unha banda se escatiman recursos para a prevención por parte das empresas e medidas de control por parte do goberno e logo se escatiman novamente para mitigar os efectos na saúde desa grave falta de recursos preventivos. Evidénciase que a saúde da Clase Obreira continúa sen ser unha fonte de preocupación para a patronal nin para o goberno, tan só lles preocupa o gasto que supón. Leis como a das Mutuas ou o RD de control das baixas son boa proba de que para o capital o estado da nosa saúde segue a ter a mesma importancia que o estado de saúde de calquera outro elemento produtivo aínda sendo estes elementos inertes.

Por desgraza ese é o mundo laboral que soportamos. Ese é o mundo laboral que temos a necesidade de cambiar. Unha necesidade que xa se antolla unha necesidade vital pois vainos a saúde e mesmo a vida nelo.

É preciso eliminar as reformas laborais que nos últimos anos teñen empeorado de xeito substancial as nosas condicións de vida e recuperar os nosos dereitos de xeito que podamos contar con empregos estábeis e de calidade, con salarios decentes e con coberturas sociais axeitadas ás necesidades dos máis desprotexidos. Esa calidade do emprego xunto con políticas preventivas reais, con medidas de vixilancia da saúde serias, son o comezo dun camiño para que a nosa saúde, a nosa vida laboral sexa realmente digna.

O xeito de combater estas políticas dos gobernos antiobreiros, do PSOE no pasado e do PP na actualidade, por parte do movemento sindical, non pode ser outro que o da contestación contundente das mesmas a través da mobilización na rúa. Dunha mobilización do conxunto da Clase Obreira que, unida, demostre a súa capacidade de enfrontamento a este sistema social que nos condena a precariedade e á enfermidade.

A Folga xeral á que a CIG está a chamar é unha necesidade de Clase. É a necesidade de recuperar os nosos dereitos como traballadores e traballadoras, é a necesidade de dispor de mecanismos que protexan realmente a nosa saúde e a nosa vida nos postos de traballo.

Fran Cartelle Pérez

Secretario Confederal de Saúde Laboral

Considerado accidente laboral un caso de infarto ocorrido mentras facía deporte nun ximnasio

Segundo unha sentenza do Tribunal Supremo, a morte tras sufrir un infarto mentras se entrena no ximnasio, pode ser considerado accidente laboral no caso de que os síntomas teñan orixe no traballo.

A sentenza refírese ao caso dun home, que traballaba en Vigo como abogado para unha empresa pesqueira, falecido a consecuencia dunha cardiopatía isquémica en maio do 2009 mentras facía deporte no ximnasio. O traballador tiña diagnosticado un problema cardíaco.

Nun principio o ISM cualificou a morte como unha continxencia común, cualificación que foi recurrida pola viúva, que alegou que se trataba dun accidente laboral ante o Xulgado do Social de Vigo e posteriormente ante o Tribunal Superior de Xustiza de Galicia; ambos rexeitaron esta posiblidade.

Agora a Sala do Social do Supremo dalle a razón indicando que aínda que a morte tivera lugar fÓra do traballo, realizando unha actividade de ocio que podería estar contraindicada para os síntomas dun infarto, Iso non quere decir que o infarto non tivera a súa orixe no ámbito profesional.

Segundo sinala a sentenza “Repútase accidente laboral a enfermidade xurdida no tempo e lugar de traballo, e esa presunción non se destrúe polo simple feito de padecer molestias en momentos ou datas anteriores ao infarto”, e lembra que se ben o abogado morreu cando xa concluíra a súa xornada matinal de traballo, os primeiros síntomas apareceron precisamente mentres se desenvolvía o mesmo; o traballador estaba a tramitar unha operación de compra-venda dun buque para a súa empresa, e empezou a atoparse mal na notaría onde acudiu a formalizala e posteriormente nas oficinas da súa empresa, declarando os seus compañeiros que o viron “pálido e suorento”, e que lle recomendaron acudir ao ximnasio para que tentara recuperarse.

“Estamos ante un suposto de doenza arrastrada, que naceu con carácter profesional porque se detecta en lugar e tempo laborais”, conclúe o fallo.

 Fonte: elperiodico.com

En Navarra entre 2008 e 2012, un total de 841 casos de cancro poderían relacionarse coa actividade laboral

O Instituto de Saúde Pública e Laboral de Navarra (ISPLN) estima que no período 2008-2012 rexistráronse na Comunidade Foral un total de 841 casos de cancro de posible orixe laboral. Deles, 286 foron relativos a cancro de pel (non melanoma), 265 a cancro de pulmón, 60 a mesotelioma, 40 a carcinoma de vexiga e 10 a cancro de seos paranasais.

A pesares destas cifras, nese mesmo período tan só se declararon sete casos de cancros como enfermidades profesionais no Rexistro oficial correspondente, denominado CEPROSS (dous  mesoteliomas, dous cancro de pulmón, dous de seos  paranasais e outro de cavidade nasal).

A directora xerente do Instituto de Saúde Pública e Laboral de Navarra, María José Pérez  Jarauta, deu a coñecer estes datos durante a inauguración da xornada “Desvelando o cancro laboral”, dirixida a persoal técnico e sanitario dos Servizos de Prevención, profesionais sanitarios do Servizo Navarro de Saúde, mutuas, representantes sindicais e de organizacións empresariais.

Na súa intervención, Pérez Jarauta incidiu en que "a información que se dispón sobre a exposición a canceríxenos nos lugares de traballo por parte das Administracións Públicas é insuficiente, e que é preciso avanzar no seu coñecemento".

Estas xornadas realízanse en consonancia co Programa de Mellora da Xestión dos riscos hixiénicos, enmarcado no Plan de Acción 2017-2019 de Saúde Laboral de Navarra. Este programa recolle entre as súas principais accións: a abordaxe da subdeclaración das enfermidades derivadas da exposición a axentes químicos; a creación dun rexistro de traballadores/as expostos/as a axentes  canceríxenos ou  mutáxenos; a aplicación de métodos específicos de avaliación dos riscos hixiénicos e o impulso da substitución de axentes  canceríxenos,  mutáxenos e tóxicos para a reprodución (CMR), que tanto se utilizan como se xeran nos procesos produtivos.

A Axencia Europea estima que o cancro é a principal causa de morte relacionada co traballo na Unión Europea (UE). O Marco estratéxico da UE en materia de saúde e seguridade no traballo 2014-2020 pon de relevo a importancia que reviste a protección dos/as traballadores/as contra a exposición aos  carcinóxenos, os mutáxenos e as substancias tóxicas para a reprodución.

Máis info en www.cigsaudelaboral.org.

Boletín CIG Saúde laboral n.º 27

A miúdo os traballadores e traballadoras padecen as consecuencias derivadas dunha incorrecta determinación da continxencia que da lugar á incapacidade temporal; este feito ten consecuencias tanto económicas como médicas e de seguimento futuro da doenza. Neste número do Boletín repasamos os motivos polos que é tan importante a correcta determinación da continxencia, así como o procedemento administrativo a seguir en caso de desacordo coa continxencia determinada polo facultativo que expide o parte de baixa. *FE DE ERRATAS: observada unha errata no cadro da páxina 2 do boletín publicado, procedeuse á substitución da frase: "A prestación por IT, ten unha contía igual á prestación que te corresponde por desemprego" por "A prestación por IT ten unha contía igual á que tiveras recoñecida ata ese momento", atopándose neste momento xa modificado para a súa visualización e descarga.

Neste Nº 27 do Boletín CIG Saúde Laboral, o Gabinete Técnico Confederal de Saúde Laboral publica un total de  cinco artigos encadrados nas súas seccións: Sabías que...? A fondo; Documento-Análise; Opinión e Información Técnica.

O artigo que abre este Boletín, publicado no apartado Sabías que...?,  fai referencia á gran importancia que ten unha correcta determinación da continxencia causante dun proceso de incapacidade temporal.

Asemade atoparemos o texto, publicado baixo o epígrafe de A Fondo, sobre "A Inspección de Traballo e as políticas "laborais" do Goberno do PP: unha ecuación sen solución".Como  Documento - Análise traballamos  "A promoción da saúde no traballo (PST). Rede europea de promoción da saúde no traballo (ENWHP)".En Opinión aparece o artigo " A última irresponsabilidade do Goberno do PP da Xunta de Galicia en políticas de prevención de riscos laborais: Orde 2018 pola que se estabelecen as bases de axudas destinadas a accións de fomento da prevención de riscos laborais na Comunidade Autónima de Galicia no exercicio 2018".Para concluír, en Información Técnica "O que debes saber sobre a figura do recurso preventivo", que esperamos axude a esclarecer dúbidas sobre esta figura preventiva.

O Concello de Betanzos dálle tacitamente a razón á CIG coa convocatoria pública de varios postos de apoio a eventos no verán

Logo de moitos anos acudindo á Inspección de Traballo pola contratación de persoal a través de empresas para o apoio a eventos e que traballaban nas oficinas municipais da Casa do Concello, o Concello recúa e publica unha convocatoria para varios contratos con esta finalidade e con tarefas similares ás que anos anteriores realizaban traballadores sen contrato do Concello mais que tiñan despacho nas oficinas municipais.

Facemos un pequeno repaso do que foi este tema nestes anos pasados até chegar á situación actual:

Nova denuncia na Inspección de Traballo por un posible caso de cesión ilegal de traballadores

Un ano máis persoal sen contrato do Concello traballa nas oficinas da Casa Consistorial para a Feira Medieval

A paga sen pagar e para nobres e doncelas hai para contratar

Os delegados de prevención da CIG lémbranlle ao Concello que a empresa contratada para a Feira Medieval debe ter avaliados os riscos laborais do seu persoal

O apoio de 3 días da Feira Medieval a través dunha empresa privada custa máis que nove meses de salario dun traballador deste Concello

A CIG denuncia unha vez máis ao Concello de Betanzos ante a Inspección de Traballo por un caso de posible cesión ilegal de traballadores

A CIG denuncia ao Concello de Betanzos na Inspección de Traballo por un posible caso de cesión ilegal de traballadores

Empregados públicos... para que? Se a través dunha empresa privada doulle traballo a quen me pete!

Agora só queda QUE O GOBERNO MUNICIPAL SEXA COHERENTE COA POLÍTICA DE CONTRATACIÓN E NON DEIXE MORRER OS SERVIZOS BÁSICOS COMO LIMPEZA, XARDINARÍA OU OBRAS PARA LOGO PRIVATIZALOS E QUE CONTRATE EMPREGADOS/AS PÚBLICOS/AS TANTO PARA AS FESTAS COMO PARA OS SERVIZOS BÁSICOS, PORQUE O PÚBLICO É SERVIZO E O PRIVADO É BENEFICIO.

Xuntanza polo Plan de Igualdade Municipal: mércores 9 de maio

A pasada semana o concelleiro de Persoal, Diego Fernández, convocou aos delegados sindicais a unha xuntanza polo Plan de Igualdade Municipal coa seguinte comunicación:

No  III Plan de Igualdade do Concello de Betanzos 2017-2021, enmarcado na área de actuación 1: "Concienciación e sensibilización social", e dentro dela no obxectivo 1.5. "Promover os valores de Igualdade entre o persoal municipal, sensibilizar desde a Administración local con exemplos que clarifiquen boas prácticas" e máis concretamente na acción 1.5.1. "Elaboración dun Plan de igualdade interno de aplicación na Administración municipal" recóllese a creación dunha Comisión Paritaria de Igualdade, coa finalidade da elaboración do devandito plan interno.

Debido a isto, compráceme convocarte a unha xuntanza que terá lugar o mércores 9 de maio ás 11:00 horas na Sala de Xuntas do Edificio Liceo.

Hai que lembrar que está pendente de constituír a Comisión Paritaria de Igualdade derivada do Convenio Colectivo, que entre outras funcións tería a de elaborar o devandito plan. O Comité de  Empresa xa tratou este tema en diversas ocasións, como se pode comprobar aquí, aquí e aquí; leva máis dun ano solicitando que se constitúa a  Comisión tal e como indica e lembrándolle o artigo 75 do Convenio Colectivo que indica o seguinte con respecto ás medidas de acción positiva:

Artigo 76.º Medidas de acción positiva.

Co fin de contribuír a aplicación do principio de non discriminación, é preciso desenvolver unha acción positiva, particularmente nas condicións de contratación, formación e promoción, de xeito que en igualdade de condicións de idoneidade terán preferencia as persoas do xénero menos representado.

As organizacións asinantes do presente convenio consideran a formación continua como un dos elementos claves para rematar coa segregación laboral por sexos dentro da empresa. Por este motivo, organizaranse cursos de formación e perfeccionamento nos que se lles dará preferencia para o acceso a aquelas persoas do xénero menos representado nas actividades de formación. Poderanse tamén organizar cursos de formación destinados á mellora das condicións de traballo das mulleres dentro da empresa, dirixidos especificamente a este colectivo, e orientados cara a mellora das súas condicións laborais ou á incorporación en postos ou categorías nas que a súa presenza sexa considerabelmente menor á presenza masculina.

Organizaranse actividades formativas relacionadas coa igualdade de oportunidades dirixidas ao departamento de recursos humanos e delegados/as de persoal.

O Concello de Betanzos elaborará cun Plan de igualdade que será negociado co Comité de Empresa. As partes asinantes deste convenio comprométense a aprobar no prazo dun ano desde a entrada en vigor do convenio un informe da situación de mulleres e homes dentro da empresa, enumerando todas as desigualdades detectadas.

Para a elaboración deste informe crearase unha Comisión Paritaria de Igualdade, que terá unha composición equilibrada de mulleres e homes. Esta encargarase da elaboración dos cuestionarios, supervisión da recollida de dados, etc. Este informe será debatido e aprobado, se é o caso, por parte da representación sindical, coas emendas que considere oportunas. Unha vez aprobado, no prazo de 6 meses elaborarase por parte da Comisión de Igualdade un documento proposta de plan de igualdade que deberá conter unha relación de obxectivos concretos a cumprir derivados das situacións de desigualdade detectadas e tendentes a mellorar a conciliación da vida familiar, persoal e laboral; a protección fronte ao acoso sexual e por razón de sexo do persoa,; así como accións concretas destinadas á consecución dos obxectivos citados; prazos de implantación do plan; unha fórmula de avaliación deste.

Unha vez aprobado o documento distribuirase entre todo o persoal da empresa, debendo ser avaliado periodicamente para facer un seguimento dos resultados acadados.

Así mesmo, o pasado 5 de marzo a CIG instou ao Concello de Betanzos a que aprobase un protocolo contra o acoso sexual, laboral, por razón de sexo e identidade e seguirá insistindo na necesidade de que o Concello leve adiante medidas encamiñadas a garantir a igualdade e a non discriminación entre os traballadores e traballadoras.

Acordos definitivos de modificación do Convenio Colectivo do Persoal Laboral tomados na última Comisión Paritaria

AVISO: Este texto é o definitivo e acordado, o publicado aquí ten incorreccións.

O texto subliñado é que se modificará.

Artigo 22.º Xornada laboral.

2. A xornada ordinaria de traballo do Concello de Betanzos realizarase, con carácter xeral, nas mañás de luns a venres, entre as 09:00 h e as 14:30 h de cada día, agás modificacións ou flexibilidades negociadas coa representación sindical e con independencia dos horarios específicos que se estableza nos servizos con especiais características. O tempo de traballo restante ata completar a xornada semanal realizarase en horario flexible, entre as 07:30 h e as 15:30 h, ou as tardes dos luns, martes, mércores, xoves ou venres.

Cláusula transitoria primeira. Complemento persoal transitorio

Conforme establece o artigo 29 do presente convenio colectivo, aquel persoal que actualmente ten unha retribución anual superior á establecida no sistema retributivo transitorio do Anexo I, respectaráselle os seus dereitos económicos adquiridos e consolidados.

Por isto, aquel persoal que actualmente perciba unha retribución anual superior á establecida no referido Anexo I terá dereito á percepción dun complemento persoal de carácter transitorio e absorbible.

Este complemento persoal será transitorio e terá vixencia en tanto o sistema retributivo aplicable sexa o que se fixa no anexo I do convenio colectivo. É dicir, deberá aboarse en tanto non se teña aprobado a RPT ou instrumento organizativo similar. A contía do dito complemento será a diferenza, en cómputo anual, existente entre as retribucións que se perciben na actualidade e as retribucións que establece o Anexo I do presente convenio colectivo.

Este complemento persoal transitorio non poderá ser incrementado nin revalorizado e absoberase segundo os seguintes criterios:

a) A absorción operará sobre o importe total de calquera futura mellora retributiva que afecte ao complemento específico.

b) No caso de que o cambio de posto de traballo supoña unha diminución de retribucións, manterase o complemento persoal transitorio fixado, a cuxa absorción se imputará calquera mellora retributiva posterior, mesmo as que poidan derivarse dun novo posto de traballoque afecte ao complemento específico.

c) Non terán consideración de melloras retributivas as derivadas do perfeccionamento de novos trienios, a percepción de retribucións complementarias que non teñan carácter de fixas na súa contía nin periódicas no seu devengo, o incremento xeral das retribucións básicas que poidan establecer anualmente os correspondentes orzamentos.

d) Previamente pasarase a informe da Secretaría e da Intervención municipal. Os incrementos, sempre que os informes sexan favorables, aplicaranse con efectos retroactivos.

ANEXO I. Valor económico das horas extraordinarias

Estes importes experimentarán o incremento que determine, para cada exercicio, a Lei de orzamentos xerais do Estado e restante normativa de aplicación. Os incrementos, sempre que os informes sexan favorables, aplicaranse con efectos retroactivos.

ANEXO III

Os traballos realizados fóra da xornada de traballo na limpeza, apertura e peche de instalacións e notificacións, xunto coa gravación e cobertura dos plenos, así como os relacionados coas actividades de festas patronais e eventos organizados polo Concello (eventos consolidados dunha duración mínima de tres días e coincidindo en festivos ou sábado ou domingo dous dos días de celebración), a contía do complemento de funcións extraordinarias será a equivalente ao valor de 1,5 horas extras festivas.

O persoal encargado do mantemento da iluminación pública percibirá a cantidade de 1200 euros ao ano en concepto de dispoñibilidade. Cando sexan chamados para reparar unha avaría fóra do seu horario de traballo contabilizarán como horas extraordinarias as comprendidas entre a chamada e a resolución da avaría ou a determinación da incapacidade para resolvela. Estas horas serán retribuídas tal e como determina o Convenio para as horas extraordinarias. Esta dispoñibilidade cobrarase en doce mensualidades e distribuirase entre aqueles membros do servizo que sexan nomeados para tal cometido. No suposto de que só a teña un/ha traballador/a esta será cobrada en once mensualidades, quedando unha dispoñible para o/a traballador/a que obrigatoriamente deba substituílo no período vacacional.

Rectificación sobre os acordos tomados na Comisión Paritaria do Convenio Colectivo

Tal e como comentamos hai dúas semanas, pensabamos que houbera un problema con algún dos acordos adoptados na Comisión Paritaria do Convenio Colectivo que tivo lugar o pasado mes. Non obstante,  e logo de revisar a documentación e mais comprobar a acta do secretario da Comisión, decatámonos que o malentendido se debera a un erro na transcrión e na comunicación que dos acordos se lle transmitiu ao persoal. 

Por isto, a semana pasada, a CIG rexistrou un novo escrito no Departamento de Persoal onde comunicaba que detectara o erro e desistía da solicitude realizada o 20/04/2018 relativa á renegociación dos acordos tomados na última Comisión paritaria, así como lle comunicaba que mantiña os acordos porque puidera comprobar que na documentación que consta en persoal estaba o acordo de xeito correcto, tanto na acta como na documentación sobre a que se negociu

Independentemente disto a CIG insistiu na necesidade de facer efectivos canto antes os acordos tomados na Comisión Paritaria para que se solucionen os temas pendentes relacionados co Complemento Persoal Transitorio e de cara a que o persoal afectado teña a menor repercursión económica posible derivada da aplicación deste punto do Convenio.

Convocatoria de selección de persoal laboral temporal por acumulación de tarefas para apoiar á organización de eventos na tempada do verán