CIG-INFORMA: 8 DE MARZO.FOLGA DE MULLERES
Na histórica xornada do 8 de marzo do
pasado ano, miles de galegas ateigamos as prazas e vilas do país
participando no Paro internacional de mulleres, conseguindo pór no
foco do debate social a problemática dos coidados e a discriminación
que sufrimos as mulleres tanto nos lugares de traballo como fóra
destes. Un ano despois, cómpre impulsarmos na Galiza un novo día de
loita, para que dunha vez por todas o poder entenda que as mulleres
estamos fartas da desigualdade e das agresións que sufrimos e porque
non imos permitir que nos fagan retroceder nos nosos dereitos, cando
aínda nos quedan moitos por conquistar.
A precariedade segue a definir o
emprego das galegas
A precariedade segue a ser a definición
da tipoloxía do emprego das galegas. Seguimos a sufrir fenda
salarial, traballando en categorías inferiores,
con peores retribucións polo mero feito de sermos
mulleres. Continuamos afastadas dos grupos de poder e de toma de
decisións por mor dun chan pegañento que nos impide promocionar.
Seguimos aturando acoso e agresións sexuais a
pesar da existencia de protocolos nas
empresas. Aínda somos despedidas a causa da nosa maternidade.
Continuamos realizando duplas e triplas xornadas
e con escasos dereitos laborais que
faciliten a conciliación, obrigándonos na
práctica a reducir horarios e ingresos.
Somos moitas as que
formamos parte da economía somerxida,
exercendo actividades laborais sen dereito a prestacións.
Seguimos a sufrir o impacto dos contratos a
tempo parcial e de curta duración... Vellas e novas
fórmulas de explotación laboral que derivan ao
final da nosa vida nunhas xubilacións miserentas,
agravadas por mor das lagoas de cotización
derivadas do coidado da familia. A isto hai que sumarlle o
enorme risco de empobrecemento que persiste entre as
desempregadas, xa que moitas delas
carecen de calquera tipo de prestación, e máis da metade perciben
subsidios de escasa contía.
Polas que estamos e polas que xa non
teñen voz, iremos á folga. O 8 de marzo na Galiza as
mulleres estamos chamadas a unha xornada de folga, unha folga
laboral, no ensino, de consumo, de coidados. Unha folga para
denunciar as discriminacións e o machismo que sufrimos, mais tamén
para desmontar e denunciar a hipocrisía e a falsidade coA que
se trata a problemática específica das mulleres tanto por parte da
patronal como por parte do poder político e do sistema.
Este 8 de marzo faremos folga de 24
horas por todas as mulleres que son agredidas polas súas
parellas, exparellas, xefes ou descoñecidos, insultadas,
perseguidas, cuestionadas, maltratadas, acosadas, violadas,
explotadas; aldraxadas pola xustiza patriarcal que dita sentenzas
machistas espallando a sensación de impunidade, multiplicando as
agresións; por todas as mulleres asasinadas polo mero feito de ser
mulleres.
ÁMBITO DA FOLGA DE MULLERES DO 8M
A convocatoria de folga, rexistrada o pasado día 6 de febreiro, afectará a todas as actividades e centros de traballo, tanto das empresas privadas como do sector público, con vínculo funcionarial, estatutario ou laboral, no ámbito territorial da Galiza. Comezará ás 00:00 horas e rematará ás 24 horas coas salvidades seguintes:
-Nas empresas, administracións e organismos que teñan varias quendas de traballo, o comezo da folga efectuarase na primeira quenda, aínda que comece antes das 00 horas do día 8 de marzo, e a súa finalización terá lugar unha vez rematada a última quenda, aínda que se prolongue despois das 24 horas do día 8 de marzo
- Naquelas empresas que teñan unha única quenda de traballo que comece antes das 00 horas do día 8 de marzo a folga iniciarase á hora de comezo da actividade laboral e finalizará o día 8 de marzo na hora que conclúa esta.
MOBILIZACIÓNS DA CIG O 8M
Podes consultar lugar e hora nesta ligazón https://www.cig.gal/especial-
MOBILIZACIÓNS CONVOCADAS POLO FEMINISMO GALEGO
Así mesmo, a CIG fai un chamamento a participar activamente na MANIFESTACIÓN NACIONAL que percorrerá as rúas de Lugo o vindeiro 3 de marzo, saíndo ás 12 horas da Porta Falsa, convocada pola Asemblea Galegas8M, da que a CIG forma parte. Para facilitar o desprazamento a Lugo desde varios puntos do país sairán buses organizados por distintos colectivos. Tedes toda a información sobre prezos, horarios e lugares de saída na seguinte ligazón: http://galegas8m.gal/
A CIG chama tamén a participar activamente nas mobilizacións convocadas por Galegas8m en varias cidades e vilas do país durante a folga do día 8 http://galegas8m.gal/
Tanto nas mobilizacións da CIG como nas convocadas polo feminismo galego as actoras principais, suxeitos activos das mobilizacións e da folga do 8 de marzo, son as mulleres.
O 8 de marzo participa na xornada de folga laboral, no ensino, de consumo, de coidados. Para denunciar as discriminacións e o machismo que sufrimos, mais tamén para desmontar e denunciar a hipocrisía e a falsidade coa que se trata a problemática específica das mulleres tanto por parte da patronal como por parte do poder político e do sistema.
Fai folga e súmate ás mobilizacións convocadas pola CIG e polo movemento feminista o vindeiro 8 de marzo!
Ningún comentario:
Publicar un comentario