Na Mesa Xeral de Negociación de hoxe e tratáronse por solicitude da CIG e acordáronse os seguintes servizos mínimos para a folga do 8 de marzo co acordo de UGT, CSIF, CCOO e o goberno municipal do PSOE:
Rexistro: 1 persoa
Escola Infantil Municipal Santiago de la Fuente: cumprir a ratio (entendemos que 5 persoas)
Axuda no fogar: segundo o informe de necesidade
Colexios: 1 conserxe
A CIG solicitou que nos postos que hai prazas ocupadas por mulleres e homes, se nomeen para os servizos mínimos homes, que o ano pasado se nomeou unha muller para rexistro cando tamén hai auxiliares administrativos homes. O concelleiro de Persoal retrucou que se falara expresamente coa traballadora e fixo público así un comportamento manifestamente irregular, posto que non se lle pode preguntar ás traballadoras se van facer folga, as traballadoras teñen dereito a facela, non teñen a obriga de comunicalo e se non lles chega unha notificación conforme forman parte dos servizos mínimos poden facela libremente.
A gravidade destes servizos mínimos acordados cos outros tres sindicatos vén motivada porque o Concello ten incumprido historicamente a ratio en moitas ocasións na Escola Infantil e as propias traballadoras llo teñen indicado tanto por escrito como verbalmente, facendo este caso omiso ata que aparecía a Inspección da Xunta de Galicia. Agora nunha folga, onde os servizos deben ser mínimos e calquera que non se preste en fin de semana non tería nin porqué abrir pretende que se cumpra tal ratio e impedirá o dereito á folga da maior parte das traballadoras da Escola Infantil, un sector totalmente feminizado, así como o dos Servizos Sociais, e que demostra claramente que o traballo dos coidados segue sendo desenvolvido en grande medida polas mulleres.
A CIG espera a que se publique o decreto de servizos mínimos para recorrelo por ser claramente abusivo e tentar vulnerar o dereito das traballadoras á folga o vindeiro 8 de marzo. Así mesmo, considera unha actitude claramente machista por parte do concelleiro de Persoal, Diego Fenández, que non acepte a proposta de que nos postos nos que hai homes non nomee a mulleres para servizos mínimos, e afonde na dificultade para facer folga das mulleres o vindeiro 8 de marzo. Entendemos que esta é unha petición lóxica que simplemente facilitaría a asistencia á folga das mulleres, polo visto, non pensan o mesmo nin o goberno do PSOE nin os sindicatos UGT, CSIF e CCOO que non se pronunciaron con respecto a esta proposta da CIG e, a maiores, votaron a favor dos servizos mínimos propostos polo goberno municipal.
Ningún comentario:
Publicar un comentario