O pasado martes algúns delegados da CIG asistimos ao pleno municipal porque se trataba un tema relativo ao cambio de horario por conciliación de varias traballadoras municipais. O BNG levou unha moción para que se lle concedese o cambio de horario por conciliación laboral e familiar a varias traballadores e que se corrixisen na próxima RPT algunhas das discriminacións salariais existentes. O Pleno ao completo, incluído o propio goberno municipal que hai un ano lle denegara, acordou concederlle a conciliación laboral e familiar a estas tres traballadoras.
A pesar de que isto acontece así resulta vergoñento que un tema que debería supor unha cuestión de trámite teña que chegar ao Pleno porque o Concello non foi quen de lle responder ás traballadoras afectadas. Igualmente non está de máis deixar claro que o argumento esgrimido pola concelleira de Servizos Sociais para xustificar a denegación do horario non se axusta para nada á realidade, posto que dúas das traballadoras tiñan a conciliación concedida polo goberno anterior e realizaban un horario diferente e foi o PSOE quen llo cambiou e lles denegou a realización dun horario que lles permitise a conciliación da vida laboral e familiar, por tanto sería demasiada casualidade que por motivos de servizo se puidese facer durante tres anos sen se resentir o servizo e do día para a mañá coa chegada do PSOE non.
A maiores consideramos completamente aberrante que a concelleira se Servizo Sociais xustificase a discriminación salarial existente entre as traballadoras de limpeza e os traballadores de limpeza posto que a Relación de Postos de Traballo é a que define os complementos específicos e na RPT as funcións asignadas son as mesmas para todo o servizo, é verdade que os varredores traballan na rúa mais non é que é menos certo que as traballadoras dos edificios tamén traballan con produtos tóxicos, teñen xornadas partidas nalgúns casos e unha maior dispoñibilidade ao longo de todo o día polos distintos horarios dos edificios municipais e maiores sempre que cubren as baixas ou vacacións de compañeiras o Concello as somete a modificacións de horario en función de a quen cubran, cambiándolles a xornada de xeito verbal nalgúns casos dun día para outro. Cada posto ten as súas especificidades mais a traballo semellante debe haber igual remuneración, do contrario prodúcese unha discriminación salarial, e este é só un exemplo mais neste Concello hai moitos máis.
A día de hoxe o Concello aínda non se puxo en contacto coas traballadoras afectadas para explicarlle cando , como e en que concidicións vai cumprir o acordo plenario mais agardamos que proximamente así o faga.
Ningún comentario:
Publicar un comentario