A CIG reitéralle ao Concello que reúna a Mesa Xeral de Negociación para que o persoal recupere o 100% das retribucións nos casos de Incapacidade Temporal

Tal e como xa fixemos o 6 de agosto, a Sección sindical da CIG vén de solicitarlle de novo ao Concello que reúna a Mesa Xeral de Negociación para que os traballadores municipais recuperen o 100% das retribucións en casos de incapacidade temporal, tal e como permite neste momento a lexislación estatal logo da publicación do Real decreto 956/2018, do 27 de xullo.

Ata o momento o Concello vén detraéndolle unha parte das retribucións ao persoal en situación de incapacidade temporal, tal e como indicaba o Real decreto Lei 20/2012, mais desde a aprobación do novo real decreto ten a posibilidade de que o persoal cobre o 100% do salario nesta situación, mais debe tomarse o acordo na Mesa Xeral de Negociación.

O feito de que o Concello non reúna a Mesa para tomar este acordo estalle supoñendo perda de cartos ao persoal en situación de incapacidade, que adoita ser maiormente persoal laboral, cuns salarios bastante máis baixos que o persoal funcionarios no Concello de Betanzos e maiormente de servizos, que tamén é o persoal máis afectado polas baixas, en casos mesmo derivadas da carga de traballa pola falta de persoal.

A CIG reiterou esta solicitude coa esperanza de que o Concello dea este paso en beneficio do dereitos dos traballadores, toda vez que a Administración local sempre berra aos catro ventos que ten superávit, e que o problema non son os cartos.

A solicitude indicaba o seguinte:

PROPOSTA PARA A MESA XERAL DE NEGOCIACIÓN DO CONCELLO DE BETANZOS

O Real decreto lei 20/2012 do 13 de xullo, de medidas para garantir a estabilidade orzamentaria e de fomento da competitividade, modificou temporalmente o réxime retributivo do persoal das administracións públicas incluído no Réxime Xeral da Seguridade Social durante a situación de incapacidade temporal.

O artigo 37 de Convenio colectivo do persoal laboral do Concello de Betanzos recolle o réxime de retribucións en procesos de baixa por incapacidade temporal ao abeiro do Real decreto mencionado.

Así mesmo, o artigo 7 do devandito Convenio recolle o seguinte con respecto ás condicións máis beneficiosas:

“As melloras establecidas noutras disposicións de carácter xeral aplicables a calquera empregado/ público/a, que se diten con posterioridade e que non se reflicten neste Convenio colectivo despois da súa aprobación, serán de aplicación, segundo o principio de norma máis favorable ou condicións máis beneficiosa para os/as traballadores/as.”

Igualmente, a disposición adicional quinquaséxima da Lei 6/2018, do 3 de xullo, de orzamentos xerais do Estado para o ano 2018, establece que cada Administración pública poderá determinar, previa negociación colectiva, as retribucións para percibir polo persoal ao seu servizo ou ao dos organismos autónomos e entidades dependentes, en situación de incapacidade persoal, e no caso do persoal funcionario ao que se lle expedise licenza por enfermidade e determínanse as regras do complemento retributivo que pode chegar ata un máximo do cento por cento das súas retribucións, básicas e complementarias, correspondentes ás retribucións fixas do mes de inicio da incapacidade temporal.

Esta disposición adicional ten carácter básico, tal e como se indica no seu apartado sete.

No que ten a ver co persoal ao servizo do Concello de Betanzos, tal disposición permite a recuperación do dereito ao cento por cento das retribucións mensuais ordinarias íntegras.

Ademais, a Real decreto 956/2018, do 27 de xullo, polo que se aproba e publica o Acordo adoptado pola Mesa Xeral de Negociación da Administración xeral do Estado do 23 de xullo de 2018, con relación ao réxime retributivo de situación de incapacidade do persoal ao servizo da Administración xeral do Estado e organismos ou entidades públicas dependentes, establece a plenitude retributiva para o persoal funcionario, estatutario ou laboral ao servzio da Administración xeral do Estado, que estea en situación legal de incapacidade temporal, garantindo, durante esta situación a percepción do cento por cento das retribucións ordinarias correspondentes ao mes de inicio da incapacidade temporal.

Polo exposto, PROPOÑEMOS:

Que o Concello de Betanzos reúna a Mesa Xeral de Negociación para acordar, con relación ao réxime retributivo do persoal laboral e funcionario que estea en situación legal de incapacidade temporal, a percepción do cento por cento das retribucións ordinarias correspondentes ao mes de inicio da incapacidade temporal.