Solicitude de constitución do Comité de Seguridade e Saúde

Xa hai un tempo que dende a CIG do Concello de Betanzos nos vimos preocupando do tema da saúde laboral e así llo fixemos chegar ao concelleiro de Persoal nalgunha das reunións solicitadas por parte do Comité. Por iso, e logo de informarnos sobre o tema na asesoría da CIG entendimos que era necesario dar os pasos precisos para comezar a incidir no tema da saúde laboral, de aí que propuxemos no Comité de Empresa a necesidade de nomearmos os/as delegados de prevención en seguridade e saúde para así instar ao Concello a que crease o Comité de Seguridade e Saúde.

O certo é que ata o momento nunca o sindicato con maioría neste Concello ata as pasadas eleccións sindicais se preocupara polo tema da saúde e a seguridade no traballo, mais dende a CIG coidamos que é un tema de moita importancia e que é necesario que se comece a traballar nel dende o Comité de Empresa. Por iso, algúns dos representantes da CIG no Comité de Empresa van iniciar os cursos de formación en materia de prevención de riscos laborais, porque entenden que son necesarios para coñeceren máis polo miúdo a lexislación e analizaren cales son os problemas específicos do persoal laboral neste ámbito.

Na reunión extraordinaria do Comité de Empresa que tivo lugar onte, a representación da CIG explicou o número de delegados que se deberían nomear en función do número de traballadores, cal sería a súa función e propuxo que no nomeamento dos delegados houbese dous por parte da CIG e outro que o escollese a representación da UGT no Comité. Por tanto, e logo do acordo tomado na reunión do Comité de Empresa os delegados de prevención da CIG serán os compañeiros Jorge Amarante Rodríguez do GRUMIR e Raquel Rodríguez Fernández do servizo de Limpeza.

Hoxe mesmo comunicóuselle ao Concello por parte do Comité de Empresa o nomeamento dos delegados de prevención e instouse a que o Concello constitúa o Comité de Seguridade e Saúde coa maior brevidade posible a constitución do Comité de Seguridade e Saúde xa segundo o artigo 38 da Lei 31/1995 de prevención de riscos debe estar constituído en calquera centro de traballo con máis de cincuenta traballadores e estará formado polos delegados de Prevención, dunha parte, e polo empresario e/ou os seus representantes en número igual ao dos delegados de Prevención, da outra.