A Área Pública da CIG demanda a restitución de todos os dereitos das traballadoras/es da administración pública galega

Así o trasladou esta mañá na xuntanza convocada para presentar os orzamentos 2016 no relativo a empregados/as públicos/as

A Área Pública da CIG defendeu, na Mesa Xeral do persoal da Xunta de Galiza convocada este venres para tratar os aspectos referidos ao Capítulo de Persoal da Administración Pública Galega nos orzamentos para o ano 2016, a restitución de todos os dereitos dos traballadores da administración pública galega.

Segundo explicou ao seu remate María Carme López Santamariña, na Mesa explicouse que os orzamentos para 2016 contemplan unha suba nas retribucións do 1%. A este respecto, López Santamariña sinala que para a Área Pública da CIG “é absolutamente insuficiente”, tendo en conta que nestes anos as empregados e empregadas públicas “levan perdido un 30% do seu poder adquisitivo”.

Unha situación que a levou a concluír que “nin se roza a recuperación”, porque ademais sen manteñen os recortes nas pagas extra, que representan un 4% da súa masa salarial. A isto engadiu que tampouco se fala da recuperación do 100% das retribucións en situación de baixa; nin da restitución de xornada laboral en distintos sectores; nin da recuperación dos acordos que había no Sergas, nin do resto das cuestións recortadas.

A respecto das pagas extra, na Mesa tamén se asegurou –e así se consigna mediante unha partida orzamentaria- que se incluirá a devolución do 49,73 restante da paga extra do ano 2012, aínda que “non se especifica nin cando, nin como se efectivizará”, matizou.

Tal e como se adiantara na xuntanza de orzamentos celebrada na tarde de onte, contémplase a transposición do RD Lei 10/2015 polo que se inclúen dous días adicionais de permiso por asuntos propios ao cumprir o sexto trienio, que se incrementará nun día adicional por cada trienio cumprido a partir do oitavo. Porén, a Área Pública da CIG denuncia que “non se contempla a reposición dos tres días que tiña a Xunta de Galiza”.

A Xunta anuncia ademais que haberá unha OPE para cubrir o 100% das prazas de docentes, en hospitais e centros de saúde, fraude fiscal, prevención de incendios, asesorías xurídicas, persoal de universidades e dun 50% para o resto dos servizos.

Fronte a isto a CIG demandou un plan de recuperación do emprego en todos os servizos públicos considerando que esa cobertura prevista “non chega a nada” porque “ese 100% non é o emprego público que se destruíu en todos estes anos nos servizos públicos esenciais, senón só a cobertura das vacantes que se produciran en 2015”.

Nula vontade de negociación

Para a Área Pública nesta xuntanza quedou constatada a falta de vontade de negociación deste goberno, porque non se atendeu á batería de demandas que levaban as/os representantes da CIG, nin as relativas a garantir uns servizos públicos de calidade, nin para dotalos do persoal  necesario ou para recuperar os dereitos perdidos en todo este período.

Neste sentido, López Santamariña denunciou que máis unha vez chegaron á xuntanza da Mesa sen documentación algunha e que cando manifestaron a súa queixa por isto, “o Director Xeral de Función Pública xustificou a súa ausencia dicindo que aquí facíase igual que en Madrid”. Unha resposta que a portavoz da Área Pública lamentou porque “até nin niso se desvían do guión ditado desde a capital”.

Outra das demandas que tampouco foi escoitada polos representantes da administración foi a da derrogación do Decreto de Medidas Urxentes no Emprego Público e con el todos os recortes laborais e sociais que levan padecido as empregadas e empregados da administración pública galega.

Por iso a Área Pública da CIG considera que todos os anuncios que se están a facer desde o executivo galego son pura propaganda de cara ás vindeiras eleccións autonómicas que non van propiciar a recuperación nin a recuperación duns servizos públicos de calidade, nin frear o proceso de privatización emprendido polo PP, nin permitir que melloren realmente as condicións laborais, salariais e sociais do seu persoal.