Segundo un estudo realizado por investigadores do Instituto Nacional de Saúde e Investigación Médica en Francia (Inserm) as longas xornadas laborais poden pasarlle factura á saúde porque aumentan o risco de sufrir un accidente cerebrovascular, especialmente se esta situación prolóngase durante 10 anos ou máis e o traballador/a é menor de 50 anos.
En concreto, os resultados revelaron que as persoas que traballan máis de 10 horas diarias durante polo menos 50 días ao ano teñen un 29% máis probabilidades de sufrir un ictus, unha porcentaxe que pode chegar ata o 45% se o empregado/a continúa con este ritmo de traballo durante polo menos 10 anos.
O estudo, no que participaron 143.592 homes e mulleres franceses, con idades comprendidas entre os 18 e os 69 anos, e que se publicou en Stroke, a revista da Asociación Americana do Corazón, baseouse en datos procedentes do estudo CONSTANCE, e excluíron aos individuos que traballaban a tempo parcial e aos que xa sufriran un accidente cerebrovascular antes de traballar durante moitas horas.
Os participantes completaron cuestionarios nos que informaban sobre a cantidade de horas que traballaban e outros hábitos como o consumo de tabaco, e sometéronse a revisións médicas nas que se recolleu información sobre o seu índice de masa corporal, a súa presión arterial, se padecían diabetes ou tiveran un evento cerebrovascular previamente, así como os seus antecedentes familiares de enfermidades cardiovasculares.
O 29,6% destes voluntarios (42.542) recoñeceron que a súa xornada laboral era longa, e o 10,1% (14.481) asegurou que isto fora así durante 10 anos ou máis. A asociación entre traballar moitas horas e o risco de ictus era similar en homes e en mulleres, pero parecía ser máis estreita cando as persoas eran menores de 50 anos, un achado que sorprendeu aos científicos, que aseguran que é necesario seguir investigando para pescudar a razón.
www.cigsaudelaboral.org
Ningún comentario:
Publicar un comentario