O prazo de alegacións está aberto durante quince días hábiles dende o pasado venres, a documentación correspondente, o capítulo I dos orzamentos, a Relación de Postos de Traballo e o Plan de Emprego está en exposición pública na Tesouraría municipal do Concello onde os traballadores e traballadoras poderán consultala e os motivos para presentar alegacións son múltiples e animamos a que cada traballador que vexa modificada a súa situación laboral e non fose informado previamente antes da aprobación provisional dos orzamentos, e son moitos, faga as alegacións correspondentes.
Dende a CIG do Concello de Betanzos solicitamos de novo toda a documentación correspondente porque antes de facer as alegacións cómpre comprobar a documentación que foi presentada no Pleno e que esta se corresponde coa que se achegou aos representantes dos traballadores no paripé de Mesa Xeral de Negociación que se lle deu por escenificar ao Concello un día antes do pleno de presentación, que non aprobación, de orzamentos. Agardamos que desta volta o Concello si que achegue a documentación en prazo e senón seguiremos sumando e seguindo para continuar cos pasos oportunos, aínda así varios delegados da CIG achegaranse persoalmente comprobar a documentación exposta publicamente e se esta contén algúns documentos relativos aos salarios do persoal laboral que faltaban na Mesa Xeral de Negociación do 30 de xullo e sobre o que xa se advertiu na devandita Mesa.
Igualmente, e tal e como informabamos, na semana que vén dende a CIG estaremos no Local do Comité de Empresa cun horario especial para que se poidan achegar os traballadores consultar todas as súas dúbidas con respecto á nova Relación de Postos de Traballo e como esta lle afecta a cada posto de traballo e as posibles alegacións que se poden presentar. O horario do Local do Comité de Empresa da semana que vén será o seguinte:
LUNS 24 DE SETEMBRO: de 17:00 h a 19:00 h
MARTES 25 DE SETEMBRO: de 13:00 h a 15:00 h e de 17:00 h a 19:00 h
MÉRCORES 26 DE SETEMBRO: de 17:00 h a 19:00 h
Para alén das alegacións a toda a RPT que a CIG vai presentar é importante que os traballadores afectados se impliquen e fagan as alegacións individuais oportunas e iso témolo claro logo de meses en xuízos onde o Concello defendeu a Relación de Postos de Traballo vixente e as súas irregularidades baseándose en que ninguén, nin os sindicatos con representación daquela nin os propios traballadores afectados polas discriminacións achegaran as súas alegacións no momento oportuno e, por tanto, defendeu a capa e espada a RPT de 2008 como aceptada polos traballadores e traballadoras do Concello.
As alegacións presentadas irán ao Pleno e o certo é que é triste estarmos unha ben máis para a súa resolución en mans dos políticos, e máis aínda cando sabemos que hai partidos políticos como Cidadáns por Betanzos que nos últimos tempos veñen escenificando a súa especial cruzada contra os traballadores municipais, mais logo, por moito que as alegacións fosen rexeitadas nesta primeira instancia sempre se poderá acudir ao xulgado e, como sempre, dende a CIG seguiremos ata as últimas consecuencias, e moito máis con este tema de crucial importancia para os traballadores e traballadoras do Concello de Betanzos, especialmente para o persoal laboral, o grande perxudicado en todo o que teña a ver co tema laboral nesta Administración.
Ningún comentario:
Publicar un comentario