Hai
catro anos adquirimos un compromiso de traballo cos compañeiros e
compañeiras do Concello de Betanzos coa idea de irmos abrindo
camiños entre as silveiras. Esta metáfora servía principalmente
para pór de manifesto a falta de información e de transparencia
sobre o todo o que lle concernía ao persoal laboral e como os
distintos gobernos municipais utilizaron a falta de información
existente para negarlle dereitos aos traballadores e "negociar"
cos delegados sindicais á marxe dos organismos legalmente
habilitados para o efecto, as mesas xerais de negociación.
Desde
o momento que a CIG obtivo representación neste Concello a súa
máxima foi a homologación de condicións tanto laborais como
salariais entre persoal laboral e persoal funcionario, sempre
defendendo que con igual traballo, igual salario. Pola contra, con
anterioridade e durante moitos anos un mesmo sindicato tivo a maioría
tanto en laborais como en funcionarios e negociou de xeito diferente
e con claros beneficios para o segundo colectivo aínda recentemente.
A
CIG mantívose firme na defensa dos compañeiros despedidos de xeito
improcedente durante os pasados anos desde o primeiro momento,
defendeunos no Concello e mais nos xulgados, que nos deron a razón,
plantoulle cara ao goberno municipal e denunciou publicamente a
desmantelación do servizos públicos, informou puntualmente a todo o
persoal de todo o que lle afectaba e conseguiu que o goberno
municipal respecte aos representantes dos traballadores e por
extensión ao propio persoal e cumpra a lexislación vixente de
aplicación ao persoal da Administración pública.
O
noso camiño está iniciado, conseguimos un punto de partida que era
de xustiza, o vindeiro 2 de xuño do teu voto depende que poidamos
continuar abrindo camiños, informando, defendendo, dando a cara
polos traballadores, e ti, participando nas negociacións, acordos e
decisións dos temas laborais que che afectan.
O 2 DE XUÑO VOTA CIG, PARA QUE NON CHE MINTAN, PARA QUE NON TE ENGAIOLEN, PORQUE CON MÁIS CIG TI ES MÁIS FORTE!
Ningún comentario:
Publicar un comentario