Criterios distintos para casos semellantes=discriminación manifesta

Que o Concello de Betanzos non ten un criterio uniforme no que ten que ver con tratar casos semellantes de igual xeito non é nada novo, que as horas extraordinarias hai departamentos ás que se nega a pagarllas e outros que non teñen problema ningún tampouco é nada novo, que o Comité de Empresa lle preguntase en múltiples ocasión cales son os criterios na escolla de pagamento ou non e o Concello NUNCA lle dese unha resposta por escrito e comunicase verbalmente escusas moi pouco convincentes e axustadas á realidade tampouco é nada novo. 

O que si que nos estraña máis é que haxa un informe da asesoría xurídica do ano pasado que indica a obriga do Concello de Betanzos a lle entregar a relación mensual de horas extraordinarias ao Comité de Empresa e NUNCA o faga así e sempre o faga despois das solicitudes do propio Comité, con moitos meses e retraso e con información que o Comité xa lle ten manifestado como deficiente por non conter nin sequera o número de horas realizadas. Porqué nos estraña? Porque cando ao propio alcalde se lle enche a boca a dicir que se viron na obriga de lle abrir un expediente a un compañeiro readmitido do GRUMIR, pola existencia dun informe previo, non entendemos porqué neste caso se lle fai caso ao informe mais para lle facilitar a información ao Comité non ou, por exemplo, para lle pagar os trienios A TODO O PERSOAL tampouco, cando tamén tivemos acceso a un informe do mesmo departamento que lembra que non se pode discriminar en función da relación contractual como indica o propio Estatuto dos Traballadores e faise referencia expresa ao tema do recoñecemento da antigüidade. Isto só é unha mostra de que CRITERIO NINGÚN E COHERENCIA MÁIS BEN POUCA, iso si MEDIDAS? SEMPRE AS QUE MENOS FAVORECEN AO TRABALLADOR, todo o contrario do que prescribe o dereito como tal.

Para o caso, unha vez máis o Comité lle tivo que lembrar ao Concello que o incumprimento desta obriga de información aos representantes dos traballadores é calificado no artigo 7.7. da LISOS (Lei sobre infraccións e sancións na orde social) como unha infracción grave, xa que o Concello debe pensar que as sancións e infraccións só se lle impoñen ao persoal aínda que a xustiza xa lle lembrase en varias ocasións o mal que xestiona este Concello a área de Persoal.