A CIG recorrerá os servizos mínimos do Concello de Betanzos da folga do 8 de marzo por abusivos e critica a discriminación das traballadoras municipais

O goberno municipal do PSOE, apoiado pola UGT, CSIF e CCOO, impídelles ás traballadoras da Escola Infantil Municipal facer folga cun servizos mínimos que obrigan a traballar a 5 das 7 traballadoras que ten a Escola. O acordo tomouse na Mesa Xeral de Negociación do pasado 28 de febreiro co voto en contra da CIG que anunciou que recorrería estes servizos en canto se publicase o decreto. A Sección sindical da CIG do Concello de Betanzos recorrerá estes servizos mínimos que son claramente abusivos e que van na contra nos dereitos das traballadoras dun servizo que na actualidade está composto na súa totalidade por traballadoras.

A gravidade desta decisión do Concello de Betanzos que impide o dereito á folga das traballadoras aumenta de termos en conta que o Concello incumpriu a ratio en moitísimas ocasións con denuncias das traballadoras e da CIG pola falta de persoal e coa intervención da propia inspección da Xunta, que lle requiriu ao Concello que solucionase a situación. Agora, e nunha folga de mulleres, o Concello impídelle a folga das traballadoras da Escola Infantil e desatende o significado dos servizos mínimos ampliándoo ata o máximo para que estas non poidan secundar a folga convocada con motivo do 8 de marzo.

A Sección sindical da CIG do Concello de Betanzos denuncia, a maiores, que nesta Administración local existe un teito de cristal xa que o 77% dos postos con responsabilidade están ocupados por homes, fronte a un escaso 33% que ocupan mulleres, así mesmo a maioría dos homes cobran por esa responsabilidade a maiores, mentres que no caso das mulleres, só se remunera esta nun posto. Por tanto, non só lles resulta ás mulleres case imposible ascender na carreira profesional, senón que cando se consegue un posto de maior responsabilidade, esta non adoita ser remunerada en igualdade de condicións que os homes.

Aínda máis grave resulta a fenda salarial existente entre homes e mulleres que ocupan o mesmo posto e realizan as mesmas funcións, xa que tanto entre o funcionariado como entre o persoal laboral existen graves discriminacións salariais que o Concello non foi quen de resolver co convenio colectivo do persoal laboral nin cunha Relación de Postos de Traballo que as solucione e que deixan patente que os postos ocupados por homes encabezan os salarios máis altos das distintas categorías profesionais.

Desde a CIG recorreremos os servizos mínimos por abusivos e por impedir o dereito á folga das traballadoras e seguiremos traballando pola igualdade a pesar de que o goberno municipal do PSOE teime en perpetuar discriminacións que afondan na situación de desigualdade das traballadoras.