O Concello de Betanzos teima en non negociar os criterios de produtividade

A CIG vén de lle reiterar ao Concello a solicitude de Mesa Xeral de Negociación para o acordo do reparto dos criterios de produtividade.

O pasado 15 de decembro finalizou o prazo de achega de proposta e desde ese día reiteramos tanto por escrito como verbalmente que o goberno municipal negocie dunha vez por todas a partida da produtividade e utilice eses cartos para o que están orzamentados. Descoñecemos se o goberno se nega a convocar a Mesa porque asignou algunha outra produtividade de costas á negociación colectiva, tal e como fixo no pasado mes de agosto, mais o que si que temos claro é a necesidade de negociar uns criterios obxectivos e públicos de reparto dos cartos que sexan de coñecemento para todos os traballadores e traballadoras e que se repartan consonte a uns criterios previamente establecidos e que non lle sirvan ao goberno municipal para discriminar ao persoal, tal e como xa teñen feito no pasado.