Condenan o Concello de Verín a recoñecer a antigüidade de dous empregados da depuradora

Dende a CIG sinalan que hai máis de 70 empregados/as doutros servizos nas mesmas condicións

Dous traballadores subrogados polo Concello de Verín da antiga empresa adxudicataria da depuradora de augas municipal veñen de obter dúas sentenzas favorábeis dos Xulgados do Social número 1 e 2 de Ourense que lles recoñecen o dereito a percibir o complemento salarial de antigüidade, computando os anos de servizo prestados antes da subrogación.

Dende a CIG-Verín sinalan que a Concellaría de Persoal “suma e segue na súa actuación de aparentar, ficar ben e non gastar nada; primeiro decide a subrogación dos traballadores, cuestión coa que estamos de acordo, mais, unha vez subrogados, incumpre todas as normas derivadas destes procesos”. 

En concreto, denuncian que non se negociaron as subrogacións coas centrais sindicais do Concello, cuestión que é preceptiva segundo o disposto no artigo 44 do ET. Ademais, con esta decisión crea dúas clases de traballadores/as, incompatíbeis co principio de igualdade: os do Concello e os subrogados/as.

Unha vez establecida a discriminación, imponlles aos traballadores/as subrogados/as unhas condicións de traballo inferiores ás que teñen recoñecidas os empregados/as do Concello “para abaratar o seu custe”. Xa que, por exemplo, non lles recoñecen nin a mesma antigüidade nin o mesmo soldo que teñen os traballadores/as municipais.

Agora os Xulgados do Social de Ourense veñen de condenar o Concello de Verín a pagar a antigüidade aos traballadores/as subrogados/as, establecida nos convenios colectivos de orixe, dado que o Concello non negociou coas centrais sindicais do ente local a integración destes/as traballadores/as no convenio do Concello de Verín.

A punta do iceberg

“Saíulles o tiro pola culata, xa que pretendían privar os subrogados/as do complemento de antigüidade previsto no convenio non negociando coas centrais sindicais, e agora son condenados, por non negociar, a pagar a antigüidade polos convenios de orixe”.

Dende a CIG-Verín sosteñen que “isto é só a punta do iceberg”, porque hai máis de 70 traballadores/as subrogados/as dos servizos de axuda no fogar e recollida do lixo que está nas mesmas condicións. “Alguén neste Concello tería que deixar de vender fume e poñerse a planificar e dignificar as relacións laborais”, rematan.