Persoal do sector público concéntrase na Delegación do Goberno na Coruña en defensa dos dereitos laborais

Organizacións sindicais da área pública entregaron na Delegación do Goberno na Coruña a súa demanda de que se convoquen as mesas para tratar os orzamentos 2015

Persoal das administracións públicas concentrouse esta mañá diante da Delegación do Goberno español para reclamar a recuperación de dereitos laborais e salariais e a inmediata convocatoria tanto da Mesa Xeral da Administración do Estado, como de Galiza, para comezar xa a negociar estes aspectos de cara á súa inclusión nos orzamentos de 2015. Con esta convocatoria as organizacións sindicais con representación nestas mesas poñen en marcha unha campaña na que, ademais, demandan a execución das sentenzas que obrigan ás administracións á devolución das pagas extra.

A estas demandas, a coordinadora da Área Pública da CIG (CIG-Ensino, CIG-Saúde e CIG-Administración), María Carme López Santamariña engadiu tamén a exixencia de que se recuperen os acordos que foron conxelados polo PP no ano 2009.

Neste sentido lembrou que tras da toma de posesión de Núñez Feijóo como Presidente da Xunta, unha das primeiras medidas adoptadas polo seu goberno foi a conxelación dos acordos acadados entre administración e organizacións sindicais. “Isto fíxose antes de se aprobar a Lei 1/2012 de Medidas temporais polas que se suprimiron moitos dos nosos dereitos laborais e salariais que agora teñen que ser repostos, xa que eles mesmos dixeron que o farían en canto mellorara a situación económica e están repetindo todos os días que estamos na senda do crecemento”.

Por iso, durante a concentración as e os representantes das diferentes organizacións sindicais presentaron na delegación do Goberno escritos dirixidos tanto a Xunta de Galiza como a administración do Estado a inmediata convocatoria das Mesas de negociación para que se proceda á revisión dos diversos Decretos Lei a través dos que se introduciron eses recortes que afectan ao conxunto do persoal.

López Santamariña subliñou que entre as súas demandas está tamén a recuperación das pagas extra completas, xa que a Xunta mantén aínda un recorte do 40% das mesmas, e que se negocie como se van enfocar as devolucións das pagas extra. “Están ademais pendentes de execución multitude de sentenzas que obrigan a pagar a extra de 2012, no caso da administración do Estado, e de 2012, 2013 e 2014 no caso da Xunta de Galiza”. Por iso considerou urxente que a Mesa Xeral da Función Pública en Galiza vaia traballando ao mesmo ritmo que se van elaborando os Orzamentos de 2015.

A concentración rematou coa lectura do manifesto conxunto que, de seguido reproducimos:

MANIFESTO  CONCENTRACIÓN 15 XULLO 2014

NEGOCIACIÓN XA!

POLA RECUPERACIÓN DE TODOS OS DEREITOS (SALARIAIS, XORNADA, VACACIÓNS, ETC.) RECORTADOS, TRANSITORIA E COXUNTURALMENTE  POLA CRISE.

POLA MELLORA DAS CONDICIÓNS DE TRABALLO DAS EMPREGADAS E EMPREGADOS PÚBLICOS

POLA XERACIÓN DE EMPREGO PÚBLICO NETO, ESTÁBEL E CON DEREITOS, QUE GARANTA O ESTADO DE BENESTAR

POR UNS SERVIZOS PÚBLICOS DE CALIDADE PARA A CIDADANÍA

 

Desde as organización sindicais, CCOO, CIG, CSI-F e UGT levamos anos reclamando medidas que atenúen a insoprotábel situación que padecen millóns de empregadas e empregados públicos. Situación que ten a súa máxima expresión nunha desmesurada destrución de emprego público, o empeoramento dos seus dereitos laborais, económicos e profisionais, e o progresivo deterioro dos servizos públicos.

Vulnera o dereito á negociación colectiva (esto recoñeceuno a propia OIT) que os gobernos español e galego apliquen unha política de feitos consumados ditando normas que prescinden de todo acordó e pretenden darle continuidade actualizando o plano de estabilidade (2014-2017), o plano nacional de reformas, modificacións pontuais e regresivas do Estatuto Básico do Empregado Público que seguen a insistir na teoría do sacrificio e dos recortes.

Por iso esiximos a recuperación da Negociación colectiva instando as urxentes convocatorias das Mesas Xerais de Negociación das Administracións Públicas, a española e a galega,  para cambiar a orientación das políticas públicas de persoal, outorgandolle a toda a estrutura negociadora o protagonismo que lle confere o EBEP.

As organización sindicais consideramos que as medidas aplicadas polos gobernos nos momentos de maior incidencia da crise económica eran coxunturais  e tiñan data de caducidade. E a data de caducidade é este  momento. Hai que reequilibrar as condicións de traballo mediante unha negociación colectiva capaz de acadar os resultados demandados polas empregadas e empregados públicos.

Temos que volver na contra dos gobernos as súas proprias afirmacións que pretenden trasladar á cidadanía que a situación económica está mellorando, que deben de ser consecuentes e retomar a negociación colectiva e o respeito á dignidade das traballadoras e traballadores da administración, en base ás seguintes premisas:

-Aumentar o volumen neto do emprego público estable cunha forte dimensión social eliminando as taxas de reposición, impedindo os ERES, detendo a amortización de prazas e desenvolvendo procesos de consolidación.

- Garantir o poder adquisitivo das traballadoras e traballadores, con incrementos salariais e a devolución íntegra da paga extraordinaria de decembro do 2012 xa neste mesmo ano. Abono da paga íntegra dos anos seguintes para o persoal da Xunta de Galiza.

- Adoptar medidas necesarias para que se desenvolva o EBEP coa negociación de todas as modificación practicadas ou que se intenten impor.

- A estabilidade no emprego e a carreira profesional como cuestión irrenunciábeis e a implantación inmediata da carreira profisional.

- A promoción, formación e profesionalización que cubran as expectativas das traballadoras e traballadores e unha promoción interna real e efectiva que aproveite o potencial formativo xa existente.

- A devolución dos dereitos recortados, como os días complementarios por antiguidade e o dereito para a xubilación parcial.

- Frenar a reforma laboral nas Administracións Públicas.

- Defender políticas públicas de iguladade de xénero e prevención de riscos. Que a crise non serva de excusa para o seu deterioro.

En definitiva, as organización sindicais, CCOO, CIG, CSI-F e UGT,  non imos retroceder no camiño que iniciamos ata obter unha satisfacción digna. As nosas reivindicacións son xustas e razonábeis. Nunca é tarde para o ben das traballadoras e traballadores públicos e para a prestación dos servizos básicos de calidade para toda a cidadanía sen discriminación