O Comité de Empresa solicita o recoñecemento para o persoal laboral nos casos de desempeño temporal de funcións

A asignación temporal de funcións é un tema que xa vén recollido no propio Estatuto Básico do Empregado Público e no Real Decreto 364/1995 mais até o momento no Concello de Betanzos non se vén aplicando ao persoal laboral, de xeito que cando un traballador con responsabilidades, encargado, director etc non está temporalmente no servizo por vacacións ou baixa non hai constancia documental de quen é a persoa responsable do servizo neses momentos.

Por iso o Comité de Empresa, por iniciativa da CIG rexistrou un escrito no Concello onde lle indica que ten constancia de que o Concello realiza nomeamentos verbais nos distintos departamentos para o desempeño accidental de funcións superiores (encargados e directores/as) en caso de baixas, ausencias e vacacións e en ningún caso as persoas correspondentes perciben a gratificación correspondente pola diferenza de complementos, ademais indicoulle que os nomeamentos deste tipo deben realizarse por escrito e máis aínda cando nalgúns casos hai traballadores que levan realizando funcións de encargado sen ter un nomeamento por escrito nin cobrar as retribucións correspondentes.

Ademais, e logo de lle indicar ao Concello que no caso que ao funcionariado si que se lle estea aplicando o procedemento correspondente nos nomeamentos ocasionais e ao persoal laboral non o Concello pode estar incorrendo nun agravio comparativo, o Comité de Empresa solicitoulle ao Concello que realice os nomeamentos temporais polo procedemento regulado e que empregue o mesmo sistema no caso de delegación temporal de funcións para o persoal laboral e funcionario.

desempeño temporal funcións by cigconcellobetanzos

Asemblea de traballadores o próximo luns 10 de setembro

O vindeiro luns 10 de setembro a CIG convoca aos traballadores do Concello de Betanzos a unha asemblea informativa que tratará, principalmente, o tema da nova Relación de Postos de Traballo. Un mes despois de se presentar os orzamentos, ao non haber moción de censura, é previsible que proximamente sexan aprobados inicialmente e logo de se publicar no Boletín Oficial da Provincia haberá un prazo de quince días para presentar as alegacións pertinentes. Nese momento é cando dende a CIG se presentarán alegacións á Relación de Postos de Traballo e cada traballador poderá presentalas con respecto ao seu propio posto de traballo.

Debido a que os vindeiros días/semanas serán cruciais neste tema dende a CIG decidimos convocar unha asemblea aberta a todo o persoal para informar sobre a postura adoptada con respecto a esta Relación de Postos de Traballo non negociada e que afonda nas irregularidades entre os traballadores, as alegacións que se teñen previsto presentar e as posibilidades de alegar que ten o persoal que se ve afectado polas modificacións e que é moito máis do que nun principio "vendeu" o goberno municipal. Parece incrible que mesmo fosen quen de presentar unha Relación de Postos de Traballo "a medias" e na que non inclúen os cinco compañeiros do GRUMIR xa reincorporados este luns e cunha sentenza que os declara indefinidos, nin a praza de auxiliar administrativo que acaba de saír a concurso, cando a de técnico/a de orientación laboral, por exemplo, aínda en proceso, si que consta, e mesmo segundo esa Relación de Postos de Traballo nin sequera están orzamentadas as nove prazas de peóns e tres de capataces cuxas bases publicou onte mesmo o Concello e que ten previsto contratar proximamente.

Ademais, nesta asemblea que terá lugar o vindeiro luns 10 de setembro ás 19:30 h na biblioteca do Centro de Formación Ocupacional* informarase sobre a aplicación do Decreto 20/2012 no Concello e como afectará este ao persoal das Administracións públicas.

*O lugar está pendente de autorización por parte do Concello, mais se hai algunha modificación informarémosvos puntualmente.

Asemblea Luns