Constitución do novo Comité de Empresa

O vindeiro venres 12 de xuño ás 12:30 h no Centro de Formación Ocupacional  terá lugar a constitución do novo Comité de Empresa, nesta reunión, convocada pola presidenta do Comité de Empresa en funcións, a CIG proporá unha candidatura para os cargos, un regulamento de funcionamento do Comité de Empresa e o nomeamento dos delegados de prevención, entre outros temas. A orde do día é a seguinte:

1. Disolución do Comité de Empresa actual
2. Constitución do Comité de Empresa entrante
3. Aprobación, se proceder, do Regulamento do Funcionamento do Comité de Empresa
4. Aprobación, se proceder, das normas de uso do local sindical.
5. Proposta de nomeamento de delegados de prevención.
6. Quenda de intervencións

A partir de aí agardaremos o nomeamento do/a concelleiro/a de Persoal e comezaremos a fixar as liñas de traballo para os vindeiros meses e sempre ao abeiro dos compromisos de traballo adquiridos. A Sección sindical da CIG decidirá nas vindeiras semanas as prioridades de traballo tendo en conta as demandas que nos trasladan os compañeiros e compañeiras e decidirá o cronograma de traballo e obxectivos para os vindeiros catro anos no Comité de Empresa.

O goberno municipal leva tres anos sen entregarlle a documentación relativa ás retribucións ao Comité de Empresa

Moita sorte debeu ter o Comité de Empresa anterior cando entre a súa documentación consta unha táboa de salarios brutos de todo o persoal laboral que lle entregara tamén o anterior goberno municipal, este Comité de Empresa leva tres anos e medio solicitándolle ao goberno municipal esta información sen obter un mísero papel, iso si, unha vez, o concelleiro de Persoal chegou a dicir que tal documento non existía, e o Comité tivo que lle levar unha copia das do ano 2010 que estaban en poder do Comité de Empresa anterior para demostrar que iso era mentira... mais nin así obtivemos tal documentación. Ao comezar o novo ano, para que non nos digan que as solicitudes están caducadas facemos unha nova solicitude desta documentación á que legalmente debe ter acceso o Comité de Empresa e como neste Nadal pedímoslle ao Apalpador que o Concello lle respondese ao Comité de Empresa a algunha solicitude, ao mellor, ata hai sorte... nunca se sabe! Non din ano novo vida nova.... a ver se desta volta é nova actitude!

Salarios Brutos Ano 2015 by cigconcellobetanzos

O goberno municipal leva tres anos negándolle ao Comité de Empresa a información sobre os salarios do persoal laboral

O Comité de Empresa do Concello de Betanzos leva tres anos solicitándolle ao Concello de Betanzos a información sobre as retribucións dos distintos postos do persoal laboral, a táboa dos salarios brutos e mais a información sobre as retribucións do persoal non permanente (contratado ao abeiro de subvención ou mesmo xa sen contrato nin subvención como o persoal do anterior GRUMIR que non despediron ao acabar a subvención).

A única táboa de retribucións que ten o Comité de Empresa é unha do ano 2010 que o anterior goberno lle entregou ao Comité de Empresa anterior e que se encontraba na documentación que o anterior secretario do Comité lle entregou ao actual. É dicir o goberno actual négalle información ao Comité de Empresa da que mesmo dispuñan Comités de Empresa anteriores, mais o peor son as escusas alegadas durante anos polo concelleiro de Persoal, Diego Fernández, que mesmo chegou a dicir que tal documentación non existía, o que resulta irrisorio, que o Concello non teña unha listaxe cos salarios dos/as traballadores/as, e a pesar de que en 2012 o Comité lle entregou unha copia da táboa que tiña de 2010 para demostrarlle que esa documentación tiña que existir en persoal non se volveu saber nada do tema, ou sexa, que non interesa entregar esa información á que os representantes dos traballadores temos dereito.

O peor é que tamén o Comité de Empresa entregoulle ao propio alcalde, Ramón García, en 2013, unha copia de todo o que o Comité levaba solicitado e sen resposta até ese momento e as boas palabras nunca se converteron en feitos e seguimos igual en decembro de 2014. Tanto a Relación de Postos de Traballo como a retribución de cada posto deberían ser públicas non entendemos a que se debe tanta opacidade durante anos con este tema cando logo o PSOE solicita transparencia  noutras instancias e noutros organismos con respecto aos salarios, todo isto non fai máis que converter a política laboral deste goberno municipal en esperpéntica e pouco coherente entre o que se di e o que se fai.

Documentación salarios

Recoñecemento de servizos previos do persoal laboral

O Comité de Empresa, por inicitiva da CIG, vén de solicitar unha listaxe do persoal ao que o Concello lle ten recoñecidos os servizos previos, esta solicitude vén na liña de reclamar este dereito para todo o persoal laboral unha vez que temos constancia documental de que a través dunha resolución da Alcaldía o Concello recoñeceulle este dereito a un determinado número de traballadores e traballadoras mais non a todo o persoal na mesma situación.

O recoñecemento dos servizos previos prestados tanto na propia Administración como noutras é un dereito de funcionarios e que vai recollido nese suposto novo convenio colectivo que non sabemos se o Concello terá a ben seguir negociando. Non obstante, o goberno municipal, se de verdade procura a igualdade entre persoal laboral e funcionario debería recoñecer de inmediato non só os servizos prestados nesta Administración senón en calquera outra pública como antigüidade e a efectos do cobro dos trienios correspondentes e o que en todo caso consideramos inxustificable é que no momento de recoñecer os servizos previos prestados neste Concello o fixese a uns traballadores si e a outros non  e haxa persoal que leva máis dun ano agardando resposta para que lle solucionen a situación e finalice esa discriminación.

Solicitude Información Persoal Recoñecemento Servizos Previos

O Regulamento esquecido... intencionadamente?

Na reunión do pasado mes do Comité de Empresa a CIG propuxo continuar instando ao goberno municipal a que negocie un novo Regulamento de Axudas Sociais, basicamente porque durante máis de dous anos o concelleiro de Persoal e mesmo nunha reunión o propio alcalde admitiron que non habería problema por aplicar uns criterios sociais que resultasen máis xustos no reparto das axudas, durante estes anos, a pesar de amosar esa actitude non foron quen de convocar por este tema nin unha soa vez a Mesa Xeral de Negociación, de aí que decidísemos volver a insistir para que o goberno municipal demostre dunha vez que de verdade lle interesa este tema ou que lle mentiu dun xeito descarado e unha vez máis aos representantes dos traballadores, de aí que o Comité lle comunicase por rexistro o seguinte:

Este Comité de Empresa amosou en múltiples ocasións a súa vontade negociadora para iniciar o proceso de cara a poder dotar ao persoal laboral deste Concello dunhas bases de axudas sociais cun reparto máis xusto e que se baseen en criterios verdadeiramente sociais, máis aínda tendo en conta os anos de recortes salariais que levamos anos padecendo os empregados públicos, primeiro coa baixada do 5% e logo coa supresión da paga extraordinaria do ano 2012 e máis aínda a situación salarial da maior parte do persoal laboral deste Concello con retribucións inferiores ás do funcionariado con similar categoría e posto mais, contrariamente, cun reparto igualitario deste tipo de axudas, que fan máis necesarias ca nunca este tipo de axudas. Por todo isto queremos solicitarlle ao goberno municipal que inicie as negociacións dun novo regulamento de axudas sociais de cara a poder aplicalo con plenos efectos para o ano 2015.

Regulamento de Axudas Sociais

Novas solicitudes con respecto aos contratos, desta volta sobre o Conservatorio e a Escola Municipal de Folclore

O Comité un ano máis, e xa van tres, pregúntalle ao Concello sobre estas novas contratacións sen proceso selectivo e á marxe da legalidade de contratación na Administración pública. 

A maiores durante anos o Concello leva incorrendo nun claro agravio discriminatorio dunha parte do persoal destes servizos, o que só está contratado durante o curso escolar, non só fronte a algúns dos propios compañeiros e compañeiras contratados ao longo de todo o ano nos mesmos departamentos senón  tamén con respecto ao resto de todo o persoal laboral deste Concello ao pagarlles unhas retribucións claramente moi superiores ás recollidas no convenio e descolgando deste o Concello de xeito unilateral a un colectivo de traballadores para beneficialos fronte a todo o resto.

O certo é que, a fin de contas, o Concello, con este tipo de decisións, distingue claramente entre o persoal que privilexia e o que discrimina, ignora abertamente o recollido na normativa aplicable aos laborais do Concello en materia de retribucións, é dicir o convenio colectivo, e vulnera o dereito de negociación cos representantes xa que aplica unhas retribucións decididas unilateralmente e en base a uns criterios descoñecidos e sobre os que nin informa aos representantes dos traballadores.

Descoñecemos quen informa positivamente a unhas contratacions á marxe da existencia de procesos selectivos na Administración pública, e quen informou sobre a pertinencia de descolgue das retribucións do convenio colectivo a determinados traballadores para que cobren o triplo que o resto, pero o que está claro é que quen contrata é o Concello e que asina é o alcalde, por tanto xa sabemos quen escolle o persoal de primeira e de segunda, porque a fin de contas esa é a elección. 

"Sempre se fixo así" é un frase moi escoitada neste Concello, mais non hai que esquecer que iso non implica que se fixese ben, simplemente que todo foi tirando mentres ninguén cambiou as cousas, mais se algo nos teñen ensinado estes anos de xente dicíndonos que aquí non había nada que facer é que non é que haxa moito, é que hai moitísimo que facer, só que é un traballo sindical a longo prazo e onde se tardan en ver os resultados, mais desistir desde o principio nunca foi a nosa opción.

Entendemos que esta mellora dunha parte do persoal con respecto ao resto é realizada polo alcalde ano tras ano porque é consciente de que os salarios do persoal laboral son moi baixos, e aí concordamos, por iso, o que debería facer é igualar os de todo o persoal para non discriminar e demostrar que o Concello tamén tenta dar os pasos necesarios para tratar a todos os traballadores e traballadoras por igual e mellorar a súa situación, que cada vez é peor ao agravarse polo proceso de privatización ao que os distintos gobernos veñen sometendo desde hai anos ás Administracións públicas.

Deixámosvos aquí a solicitude rexistrada con respecto a este tema, o certo é que o Concello nunca responde a este tipo de solicitudes de información, é curioso, así como entrega documentación doutros procesos cando se require neste caso nunca respondeu nin achegou nada, quizais é porque hai de razón en que as irregularidades rodean estes contratos, a fin de contas, como se ve, os empregados sempre somos os prexudicados e o Concello segue a facer o que lle peta.

Solicitude Información Contratos by cigconcellobetanzos

Novos contratos e solicitudes do Comité de Empresa

Achegámosvos as últimas solicitudes realizadas polo Comité de Empresa, por iniciativa da CIG, con respecto ás últimas contratacións que o Concello realizou. Os escritos e a discinformidade dos contratos sempre van na mesma liña, o descoñecemento dos procesos selectivos ou unhas retribucións que non se axustan ás do convenio colectivo, tendo en conta que neste Concello hai persoal subvencionado que cobra segundo convenio e outro segundo subvención se ningún criterio obxectivo, ao igual que o persoal contratado para substitucións que debería cobrar segundo os conceptos retributivos do convenio e as pagas completas dobres e non ser discriminado con respecto ao persoal ao que  substitúe no posto, ademais de que o Concello ten a obriga de ter informado ao Comité de Empresa das previsións de contratación deste Concello. Nalgúns casos, como nas últimas contratacións de limpeza, o Concello nin sequera cumpriu as bases que el mesmo aprobou e nin publicou o proceso selectivo na páxina web municipal

Queixa Non Publicación Contratos Limpeza by cigconcellobetanzos

Solicitude Información Contratos Limpeza Substitución by cigconcellobetanzos

Novos contratos en presunta fraude de lei e creación de novas prazas á marxe de toda legalidade

O goberno municipal do PSOE estase a converter en todo un especialista á hora de vulnerar a normativa vixente en materia de creación e provisión de postos na Administración pública. Á última modificación de posto que lle realizaron a unha traballadora de limpeza encomendándolle funcións non propias do seu posto e é posible que nin sequera poida realizar veñen a sumarse dous contratos en presunta fraude de lei que o Concello realizou ao contratar por obra ou servizo a dúas traballadoras de limpeza para o aulario.

O Comité de Empresa, por iniciativa da CIG, trasladoulle ao Concello tanto por escrito como verbalmente a súa preocupación por esta situación, tendo en conta que a limpeza dun colexio é algo que se debe manter no tempo e ata o momento o único que hai é dúas traballadoras contratadas ata decembro, igualmente preguntoulle ao Concello polas expectativas de modificación da RPT para a creación desas prazas ou cobertura de prazas vacantes por xubilacións mais a reposta do concelleiro de Persoal foi clara, ata decembro está amañado, logo non saben como se vai facer, o que demostra unha pésima xestión de persoal nun Concello que non ten nin sequera previsión de como cubrir os servizos básicos máis aló de tres meses vista.

Como podedes ver máis abaixo o Comité de Empresa indicoulle ao goberno municipal que "o contrato por obra ou servizo debe ter “autonomía e substantividade propia dentro da actividade da empresa” e neste caso as traballadoras foron contratadas para a “limpeza do aulario do colexio público Francisco Vales Villamarín”, cuxa prestación de servizo de limpeza depende, pois, directamente do Concello de Betanzos, e deberá realizarse con continuidade no tempo, non só durante os catro meses que estas traballadoras son contratadas, o que podería supor que estes contratos foron realizados en presunto fraude de lei tendo en conta o artigo 15.1 da Lei doEstatuto dos Traballadores da xurisprudencia consolidada que indica que non cabe acudir ao contrato por obra para cubrir necesidade propias ou permanentes da empresa; e tamén lle lembrou que "estas dúas prazas, correspondentes á limpeza do aulario do CEIP Francisco Vales Villamarín, non existen na vixente Relación de Postos de Traballo. O propio Concello de Betanzos aprobou en Xunta de Goberno Local o 24 de xullo de 2014 os orzamentos correspondentes a este ano e non presentou ningunha proposta de modificación da Relación de Postos de Traballo con respecto á creación de dúas novas prazas, que vén de crear o pasado 9 de setembro sen negociación cos representantes dos traballadores e sen a preceptiva aprobación polo Pleno da corporación local, incumprindo a legalidade vixente para as Administracións públicas en materia de creación de novos postos de traballo."

Sobre Os Contratos Do Aulario by cigconcellobetanzos

Advertencias

A maiores, o Comité trasladoulle ao goberno municipal a súa preocupación polas novas funcións encomendadas a unha traballadora de limpeza que redundan con moito a limpeza de edificios e instalacións propias deses postos e que segundo nos informaron en Educación deben ser realizadas por coidadores/as e/ou auxiliares tituladas/os. O Comité tentou explicarlle ao Concello que no momento que redefine funcións dos traballadores debe ter en conta os requerimentos para esas novas funcións e se exixen titulación polo delicado que pode resultar o traballo con nenos e que, a fin de contas, se algún día pasa algo, o propio traballador que non se negou a realizar un traballo para o que non estaba capacitado tamén podería ter algún tipo de responsabilidade. A preocupación por este tema trasladóuselle en concreto ao concelleiro de Persoal que admitiu que lle constaba a situación mais obviou poñerlle ningún tipo de remedio, aínda que xa sabemos que este goberno municipal o que quere son traballadores que lle solucionen os problemas e mentres non pase nada todo vai ben para o goberno... e o día que pase algo que cada quen se busque a vida.

Información pendente sobre o pagamento dos 14 días da extra de 2012

O Comité de Empresa vén de solicitarlle ao Concello información con respecto ao pagamento dos 14 días da paga extra de 2012 que o Concello realizou este mes logo de que diversos compañeiros nos estean a preguntar por este tema, e mesmo algúns traballadores que xa non están en activo, mais que o estaban no momento que lles roubaron a paga nos informasen de que non recibiran os cartos. Debido a isto solicitouse toda a información correspondente a este tema ao Concello para aclarar a situación.

Con respecto a este tema, recentemente o concelleiro de Persoal desvelou na propia Mesa Xeral de Negociación que a intervención municipal informou negativamente ao pagamento non de 14 senón de 45 días ao persoal funcionario e ese informe contrarrestouse con un feito por Galivalia, empresa contratada para a elaboración da Relación de Postos de Traballo sobre a que a día de hoxe aínda non temos nova ningunha. Este feito puntual fíxonos entender cal é o verdadeiro uso que o Concello lle pode dar a un contrato cunha empresa deste tipo, á vista de que estamos a xullo e seguimos sen convenio e sen RPT. O certo é que dende o principio entendimos que unha sentenza de laborais era inaplicable a funcionarios e menos cando a contía que se lle devolvía a este segundo colectivo ía ser maior por lle corresponder máis días, aínda hai dous anos, o Concello defendeu no xuízo da primeira demanda posta pola CIG nesta lexislatura que o persoal laboral non podía ter os mesmos dereitos que os funcionarios se non estaban recollidos en convenio, agora, dous anos despois, o propio concelleiro afirmou que botan man dos informes dunha empresa externa cando non convence o que informan os órganos municipais con respecto a un caso que lle afecta ao persoal funcionario, como cambian as cousas!

A cousa a partir de agora estará en saber cando convencerán ou non os informes da Intervención e Secretaría municipal e cando se recorrerá a informes externos, o que está claro é que visto así parece un choio para facer sempre o que peta, cando non me convence o da casa vou ao de fóra e amaño! Dende logo o que está claro é que os 21 000 euros da empresa, que dan así como arredor de 1750 euros ao mes, tendo en conta que o contrato é por doce meses, son cartos tirados se temos en conta o beneficio que vai ter para o persoal e que o Comité de Empresa e os sindicatos temos que estar continuamente enriba dos textos e as propostas con continuos erros, cartos tirados para os traballadores mais que sen dúbida ningunha deben beneficiar a alguén, e neste caso, coma no resto O PÚBLICO É SERVIZO E O PRIVADO É BENEFICIO, e consideramos inaceptable que as Administracións públicas tiren os nosos cartos para beneficiar a empresas privadas con traballos que podemos e debemos facer os empregados públicos.

Solicitude Información Pagamento Extra 2012 by cigconcellobetanzos

Comisión Negociadora do convenio colectivo, 18 de marzo de 2014

Onte tivo lugar a primeira reunión da Comisión Negociadora do convenio do ano 2014, xa que dende abril do ano 2013 esta Comisión levaba sen se reunir e, por tanto, a negociación do convenio estaba ata o momento paralizadísima.

Desta volta, de parte do Concello, asistiron Antonio Vara, en calidade de secretario, Diego Fernández, concelleiro de Persoal, e Javier Ferreira, como asesor do Concello, pola parte social asistiron, Marcos Dopico, Silvia Muíño e José Luis Sobrino como membros da Comisión Negociadora designados polo Comité de Empresa, e como asesores Roberto Tizón pola CIG e José Ángel Montes pola UGT. É significativo que os asesores funcionarios que asistían en anteriores ocasións por parte do Concello quedasen a un lado coa entrada en escena da empresa, e os que antes dicían si e non, agora nin sequera asisten ás mesas de negociación.

A actitude por parte da empresa foi significativamente mellor que en anteriores ocasións, e a idea principal da reunión foi a exposición da metodoloxía de traballo que tentan propoñer coa idea de chegar a un acordo e que no verán deste ano haxa un novo convenio, esa é a idea do Concello, o tempo desmostrará se as intencións desta volta son certeiras.

A principal novidade é que o Concello pretende, agora, negociar sobre un texto presentado pola empresa e que será entregado na vindeira semana á parte social da Comisión, baixo a premisa de que o texto presentado polo Comité de Empresa non está adecuado á lexislación laboral vixente porque foi presentado en xaneiro de 2012 e aprobado pola asemblea de traballadores en decembro de 2011. Certo é que o Comité de Empresa leva dous anos advertíndolle ao Concello que este era un dos riscos que corriamos por dilatar a negociación e o resultado final é que o texto que negociaremos finalmente non vai ser a proposta que o persoal laboral aprobou en asemblea, senón un novo que será achegado nos vindeiros días, e a única culpa disto tena o Concello de Betanzos por levar dous anos atrancando a negociación do convenio colectivo mais as consecuencias págaas todo o persoal laboral en canto tiña coñecemento do que se estaba a negociar e agora a negociación continuará cun texto diferente, para o propio Comité de Empresa este é un traballo a maiores, porque o texto anterior estaba consensuado polos dous sindicatos con representación neste, e aínda que a CIG ten a maioría no Comité e podería tomar as decisións que estime oportunas, o certo é que sempre é preferible chegar a acordos, por moi difícil que resulte, en ocasións, facelo con delegados sindicais instalados na defensa das irregularidades que a Administración comete.

En principio o bosquexo de información que o Concello nos ofreceu (sempre por boca do asesor da empresa, porque o concelleiro de Persoal non dixo nin chío), foi que negociaremos sobre o texto do Concello, modelo da empresa utilizado noutras administracións e que non difire en grande medida do presentado polo Comité de Empresa, aínda que o capítulo de retribucións deixarase para o final porque o Concello ten que facer "contas" e logo hase saber o que se pode amañar para tentar reestruturar algún dos desequilibrios retributivos existentes no persoal laboral. A idea do Concello é que en xuño estea acordado o convenio, e con cada texto que se presente haberá un sistema de funcionamento por escrito que tente facilitar  traballo nas Comisións Negociadoras de xeito que alí so se tratarán os puntos de discrepancia entre a parte social e o Concello. Paralelamente a esta negociación irán facendo un organigrama, a día de hoxe inexistente neste Concello, que se presentará en Mesa Xeral de Negociación mais nunha fase posterior á aprobación do convenio colectivo.

Algunhas das cuestións concretas que se exemplificaron e que a empresa proporá teñen que ver cunha xornada semanal de trinta e sete horas e media con certa felexibilidade que permitirá que non se desconten determinadas ausencias, unha vez instalados os reloxos de fichaxe; esta certa flexibilidade sempre terá un límite diario, semanal, mensual e un número de horas anual que non se poderá exceder. Preténdese facer unha homologación en permisos, licenzas e vacacións co funcionariado ao abeiro do Estatuto Básico do Empregado Público, tendo en conta sempre o principio de norma máis favorable. Canto ás horas extras, tal e como era a proposta de Comité, no caso de se cobrar será por categoría profesional, de xeito que todo o persoal dunha mesma categoría profesional cobre o mesmo e saiba o que lle corresponde por traballo extra realizado.

Unha outra proposta do Concello, que se negociará ao final por ser un tema de retribucións, é que o Concello pretende reformular os conceptos retributivos do persoal laboral sen redución salarial mais non para homologalos cos de funcionarios senón para refundilos e simplificar as nóminas, que é o certo é que esta é das ideas que nos suscita máis dúbidas e que haberá que estudar moi a fondo. A maiores, quérese engadir algunha previsión canto á consolidación de postos e funcionarización do persoal laboral mais pensando a longo prazo, non nun futuro inmediato, e que será pertinente ou non dependendo da vixencia que finalmente teña o convenio.

En conclusión, onte houbo unha declaración de intencións por parte do Concello que aínda é axiña para valorar se será positiva ou negativa para a mellora do conxunto do persoal laboral do Concello de Betanzos, iso haberá que ilo valorando segundo decorra o tempo e teñamos máis información sobre as intencións do Concello e como vai cambiar isto o marco no que traballamos, mais se algo hai que ter claro é que o convenio colectivo só se pode acordar se Concello e os traballadores están de acordo, non é, coma noutras decisións algo que unilateralmente pode acordar a Administración. 

A partir de agora e ata que finalice o proceso informarase puntualmente de todas as decisións, que nas primeiras reunións é posible que non sexan moi relevantes posto que temos un marco normativo que nos constrinxe en certos aspectos e simplemente constará no texto mais non hai moitas posibilidades de negociación, pola contra, é posible que cara ao final do proceso, cando se propoñan as maiores mudanzas que poidan afectar ao persoal laboral se convoquen novas asembleas para informar e tomar decisións, nomeadamente, a intención da CIG é, antes de asinar ningún acordo do Concello, que o texto finalmente acordado, no caso de que se chegue acordo será sometido á valoración da asemblea de traballadores, e será esta a que decida que é o que se debe facer, porque lle afecta a todo o persoal e é este o que debe decidir.

Informe do Comité de Empresa sobre as axudas sociais 2013

O pasado venres, o Concello achegoulle ao Comité de Empresa a información relativa ás axudas sociais do ano 2013 e indicoulle ao Comité que tiña dez días para emitir un informe sobre a devandita proposta. Hoxe mesmo, logo de reunir onte ao Comité de Empresa, este presentou por rexistro a súa proposta con respecto ao que se indicaba na información.

Para alén de todo  o que o Comité, coas propostas que a CIG fixo na reunión de onte, recolle no informe que tedes máis abaixo, cómpre destacar que este ano a partida orzamentaria foi insuficiente, o que supón que haberá unha redución dunha porcentaxe de arredor dun dez por cento nas axudas individuais de cara un dos traballadores, que o propio Comité lle solicitou ao Concello que en cumprimento das propias bases lle comunique ao persoal co obxecto de que cada quen saiba o que lle vai corresponder. A maiores, a proposta do Concello, foi establecer unha idade límite nos descendentes que sería a que a axencia tributaria ten de referencia, é dicir, os 25 anos; esta proposta xa o propio Comité a ten feito chegar de cara a que se recollese nunhas novas bases que leva tentando que se negocien dende o ano 2012, mais tamén lle fixo ver ao Concello que o feito de non indicar ese límite na propia convocatoria das axudas podería dar lugar a reclamacións por parte dos afectados e recomendoulle, como sería propio do procedemento administrativo, que denegase motivamente esas axudas e llo comunicase aos afectados, porque se quixesen reclamar, tendo en conta que ata este ano nunca houbo límite de idade, en contraposición ao que poñían as propias bases de 2001, consideramos que é discutible que teñan dereito ou non.

Igualmente, o Comité solicitoulle ao Concello a ampliación da partida orzamentaria porque é obvio que resulta insuficiente, que cumpra os prazos marcados na propia convocatoria, tal e como dixo o concelleiro de Persoal que farían e que retome dunha vez por todas a negociación dunhas bases que non haxa que estar interpretando continuamente, por obsoletas, hai que ter en conta que estas levas 13 anos en vigor, porque logo as consecuencias sempre as paga o persoal.

Hai que destacar que o espallamento da información que se produciu sobre estas axudas dende que comezou a traballar este Comité de Empresa actual foi notable en canto con máis traballadores no cadro de persoal sempre sobraran cartos e agora, que cada vez somos menos, non chegan, era obvio que había un problema, e só porque todo o persoal estea informado de todo o que lle atinxe pagan a pena as loitas dos dous primeiros anos con respecto ás axudas sociais cando o Concello estaba instalado na discriminación manifesta, e cando os representantes dos traballadores, nun informe do propio secretario municipal eramos cualificados como "colectivo axurídico sen capacidade de decisión" e dous anos despois é o mesmo organismo que nos excluía das decisións o que nos pide un informe de cara a resolver as axudas que dirán que non é vinculante, mais si que é preceptivo porque así o pon o convenio colectivo.

Canto ás axudas concedidas a cada quen, e tendo en conta que haberá unha redución, se calquera traballador ou traballadora, no caso de que o Concello non publique as listaxes que debería publicar indicando, como mínimo, a contía e o concepto, ten interese en saber o que lle corresponde antes de recibir a nómina pode poñerse en contacto con calquera dos delegados e delegadas da CIG, como sempre.

Informe Comité axudas sociais ano 2013 by cigconcellobetanzos

Horas extraordinarias, eterno problema, sobre o que agora nin se lle dá información ao Comité de Empresa

O problema das horas extras no Concello de Betanzos non é nada novo, en múltiples ocasións temos falado dos problemas que supón o sistema actual non só de compensación cando se realizan, senón que entendemos que o Concello obriga a facer horas extras con traballos que para nada son extraordinarios posto que se repiten mensual e anualmente de xeito reiterado e para nada extraordinario en determinados departamentos do Concello.

A pesar de todo isto, ata novembro do ano 2012 o Concello viña respondendo con carácter máis ou menos puntual ao Comité de Empresa e entregándolle a información correspondente ás horas extraordinarias realizadas polo persoal laboral, mais hoxe mesmo rexistrouse unha nova solicitude con respecto ás horas extraordinarias do mes de febreiro e lembrando que o Concello non respondeu as solicitudes correspondentes aos meses de decembro e xaneiro, a pesar de que temos constancia de que efectivamente se realizaron horas extraordinarias. Nesta solicitude, que podedes ver abaixo, lembrámoslle ao Concello a obriga de entregar esta documentación e máis aínda que temos un informe do asesor xurídico municipal que lle indica ao Concello que así o debería facer.

En todo caso, agardaremos unha semanas e cando o concelleiro de Persoal reciba á representación do Comité preguntaremos polo tema, mais no caso de esta sexa a nova actitude do Concello canto ao tema das horas extras dende a Sección sindical da CIG do Concello de Betanzos valoraremos a pertinencia de acudir de novo á Inspección de Traballo provincial para poñer no seu coñecemento que o Concello podería estar a incumprir o dereito de informacións aos representantes do traballadores que segundo o artigo 7.7. da LISOS (Lei sobre infraccións e sancións na orde social) e cualificado como infracción grave.

Solicitude información horas extras by cigconcellobetanzos

Unha espera que se volve eterna, pasan os anos e demóstrase a falta de vontade para que todos os traballadores sexamos tratados por igual

O Comité de Empresa vén de solicitar, como xa fixera en setembro de 2011 e o Concello ignorou, que se reúna a Comisión de Seguimento do Convenio colectivo, que é o órgano que ten a función de interpretación do convenio colectivo na súa aplicación práctica.

Esta Comisión, que como o propio convenio indica se debeu ter constituído aos 15 días da aprobación do convenio colectivo hai xa oito anos, non foi reunida en ningunha ocasión, cando menos, dende xuño de 2011 que é cando a CIG chegou ao Comité de Empresa. Xa daquela o Comité instou ao Concello a reunila porque estaba facendo unha interpretación unilateral do convenio  e hoxe, no 2014, o problema segue a ser o mesmo. A empresa pretende interpretar un convenio sen ter en conta á outra parte coa que o asinou e o que é peor, incumprindo o texto co que estaba de acordo, e que aínda ratificou recentemente no pleno neste pasado verán do ano 2013.

Nun principio, o concelleiro de Persoal indicoulle no 2011 ao Comité que non se reunía porque xa ía haber un novo convenio, mais dous anos despois e logo de que o Concello paralizase a negociación durante este pasado ano era necesario solicitar que se reunise este organismo. O problema é o de sempre, e vén derivado das cláusulas de varios dos contratos ao abeiro de subvención realizados nos pasados meses polo Concello de Betanzos, sobre os que o Comité xa rexistrou varias solicitudes que na actualidade están sen resposta, a día de hoxe a unha parte do persoal deste Concello non se lle recoñece o dereito ao cobro da paga extra completa, ou a parte proporcional segundo corresponda, parece que simplemente amparándose no tipo de contrato, o que non sería só manifestamente discriminatorio senón tamén contrario ao convenio que con respecto á paga extraordinaria recolle o seguinte:

"Art. 22.º.-Pagas extraordinarias.

Todo o persoal terá dereito a duas pagas extraordinarias que se abonarán co salario mensual de xuno e dicembro. 

A contía de cada unha das pagas será igual a unha mensualidade do salario segun o artigo anterior, prorrateado polo tempo de servicio prestado.

Recoñecese para o persoal laboral, o incremento nas pagas extraordinarias, previsto no Acordo de modernización e mellora Administración -Sindicatos, de 15 de novembro de 2002 (BOE do 18), na contía determinada no capitulo XIX, do titulo VI, adaptándose as categorías do presente convenio segun se dispon no anexo y. Este incremento verase incrementado anualmente segun corresponda na ley de presupostos."

Hai que lembrar tamén que a Lei do Estatuto de Traballadores no artigo 15.6 indica o seguinte, e coa discriminación que este concello perpetúa podería estar incumprindo esta Lei:

"Os traballadores con contratos temporais e de duración determinada terán os mesmos dereitos que os traballadores con contratos de duración indefinida, sen prexuízo das particularidades específicas de cada unha das modalidades contractuais en materia de extinción do contrato e daquelas expresamente previstas na Lei en relación cos contratos formativos. Cando corresponda en atención á súa natureza, tales dereitos serán recoñecidos nas disposicións legais e regulamentarias e nos convenios colectivos de xeito proporcional, en función do tempo traballado."

O Comité, por iniciativa da CIG, rexistrou a solicitude, agora está na man do Concello amosar a vontade de diálogo que tanto predican ou seguir impoñendo os seus criterios en detrimento dalgúns traballadores laborais deste Concello.

Solicitude Comisión de Seguimento do Convenio by cigconcellobetanzos

O Concello reparte calendarios laborais que non indican a xornada de traballo

Logo de que o Comité de Empresa solicitase por rexistro en decembro de 2013 que o Concello publicase en todas as dependencias municipais ou lugares onde traballa o persoal laboral a información da que xa dispoñía o persoal das Oficinas Xerais, relativa ao calendario laboral e a xornada laboral de horario e de inverno, o Concello vén de distribuír estes documentos polas distintas dependencias mais con falta de información con respecto á que se recollía no calendario que estaba no taboleiro das Oficinas Xerais no ano 2013.

O caso é que en xaneiro de 2014 o Concello envía a todos os departamentos o calendario laboral da mutua, mais desta volta nestes calendarios non consta nin o horario laboral de cada centro nin se fai ningunha referencia á diferenza entre o horario de verán e de inverno recollida no convenio colectivo, mentres que no calendario que hai menos dun mes figuraba nas oficinas xerais para información dos seus traballadores constaba que o horario laboral desas dependencias era de 08:00h a 15:00 h no inverno e de 08:30 h a 14:30 no horario de verán.

O feito de que se oculte esta información nos novos calendarios por parte do Concello non é máis que un feito que pretende ignorar unha realidade de discriminación nas horas semanalmente traballadas que xa puxo de manifesto nada máis chegou ao Comité e outra preocupante realidade sobre a posible eliminación do horario de verán, toda vez que no calendario do ano pasado indicaba un horario de entrada e saída diferente nestes meses e agora oculta posiblemente dun xeito deliberado esta información. 

Por este motivo, o Comité de Empresa, expúxolle ao Concello que considera que é necesario que esta información específica sobre o horario de traballo no inverno e no verán dos distintos centros de traballo sexa publicada en todos coa información completa, ao igual que se fixo para o persoal das Oficinas Xerais no ano 2013, para non incorrer en agravios discriminatorios do persoal destas oficinas con respecto a todo o restante persoal municipal no que se refire á información sobre xornada e horarios e solicitoulle ao Concello que especifique en todos os edificios municipais onde traballa persoal laboral e en todos os departamentos do Concello a información relativa aos horarios laborais dos distintos centros de traballo, así como os horarios da xornada laboral de inverno e de verán, tendo en conta que esta ata o momento era especificada neste calendario só para o persoal das Oficinas Xerais e considera isto unha discriminación con respecto ao resto do persoal que presta os seus servizos nas diferentes dependencias municipais.

Abrindo camiños n.º 30. Voceiro da Sección sindical da CIG do Concello de Betanzos

Voceiro Cig Betanzos 30 Decem.. by cigconcellobetanzos

O COMITÉ DE EMPRESA SOLICITA UNHA REUNIÓN CO ALCALDE ANTE A PREOCUPANTE SITUACIÓN DE PARALIZACIÓN DE TODA NEGOCIACIÓN COS REPRESENTANTES DO PERSOAL LABORAL

A CIG, ante os problemas cada vez maiores do persoal laboral do Concello de Betanzos e a actitude do concelleiro de Persoal que parece que nin está nin se lle espera, decidiu propor na última reunión ordinaria do Comité de Empresa a solicitude dunha reunión de urxencia co propio alcalde. 

Logo de acordalo por unanimidade na reunión ordinaria do Comité de Empresa do mes de outubro, e ante a situación de desinformación, paralización de todo tipo de negociación cos representantes do persoal laboral e ante a falta de solución a diversos problemas laborais que lle foron transmitidos ao concelleiro de Persoal e sobre os que nunca obtemos resposta o Comité de Empresa solicitou por rexistro o día 8 de novembro unha reunión co alcalde para tratar diversos temas relacionados coa situación do persoal laboral do Concello de Betanzos e sobre o estado das negociacións cos representantes dos traballadores, así como para achegarlle as propostas do Comité de Empresa de cara a intentar solucionar a situación de falta de diálogo do Concello cos delegados de persoal e instar ao Concello a que dea resposta e solución aos problemas laborais do persoal laboral. O Comité acordou que a esta reunión asistirán os membros da Comisión executiva do Comité de Empresa, Jorge Amarante, José Ángel Montes e Silvia Muíño.

Nesta reunión agardamos transmitirlle ao alcalde a nosa preocupación ante distintos temas laborais e buscarmos solucións conxuntas e que isto sirva para encamiñar de novo as negociacións cos representantes do persoal laboral abandonadas e adiadas  hai meses polo concelleiro de Persoal baixo promesas e mañá, pasadomañá, a semana que vén ou nos vindeiros quince días que nunca se materializan e que cada vez complican máis as situacións ás que non se dá resposta.

Dende a CIG agardamos que o alcalde teña a ben recibir aos representantes do persoal laboral de cara a poder iniciar unha etapa de diálogo co Comité de Empresa, e que a día de hoxe é inexistente co concelleiro de Persoal, e acceder ás demandas dos traballadores para poder buscar solucións a algúns dos conflitos laborais existentes neste Concello que cada vez son máis graves, entre outros motivos, pola falta de persoal e a falta de organización interna do propio Concello.

O Comité insta ao Concello a que publique a convocatoria de axudas sociais do ano 2013

Logo de agardar máis dun ano a negociación efectiva dunhas novas bases de axudas sociais, de que o Comité presentase por escrito a proposta de regulamento no mes de marzo de 2012 e que estea próximo o prazo de finalización de entrega das axudas e non haxa unha convocatoria pública con toda a información para realizar este trámite, o Comité instou ao Concello a que publique a convocatoria de axudas sociais de 2013 en todos os taboleiros dos edificios municipais e informe a todo o persoal dos prazos e as condicións de solicitude, a que amplíe o prazo estipulado nas bases vixentes, posto que indican que se presentarán nos 11 primeiros meses do ano e nas vindeiras semanas finalizaría o prazo oportuno, e debido a isto entendemos que o prazo debería ampliar o das bases aprobadas en pleno a través dunha resolución da Alcaldía para que o prazo sexa ata o último día hábil de decembro e facilitar as solicitudes por parte de todo o persoal. Ademais, solicitoulle que independentemente da convocatoria de axudas de 2013 se continúe coa negociación dunhas novas bases de cara a aplicalas en 2014, posto deben ser aprobadas polo pleno ao igual que as anteriores, e por moito que se acordasen na actualidade non se poderían aplicar con carácter retroactivo porque se o criterio é o reparto inversamente proporcional ás rendas familiares modificaría o criterio de reparto que se especifica nas bases de 2001 e isto podería supoñer que algúns traballadores afectados presentasen os oportunos recursos. e pediulle que se actúe coa máxima celeridade nesta cuestión polos prazos sinalados e porque segundo as bases aprobadas o prazo finalizaría o vindeiro sábado 30 de novembro e o persoal a día de hoxe non ten información ningunha sobre os prazos.

Resulta lamentable que un ano e medio despois de presentar a proposta de novas bases o Comité o Concello paralizase hai meses a negociación a pesar de que no propio pleno se comprometeu a seguir con ela hai case un ano. É obvio que o interese de que as novas bases beneficien a quen máis o necesita non son unha prioridade para o Concello que pretende seguir escondendo sobre o quere parecer un trato igual para todo o persoal o que na realidade é unha discriminación especialmente para o persoal laboral. Agardamos que cando menos o Concello sexa quen de informar ao Comité sobre todo o relativo ás axudas do ano 2013 e lle dea a publicidade pertinente á convocatoria. En todo caso, coma sempre, cando os representantes do persoal teñamos a información darémoslle toda a difusión necesaria, tal e como levamos facendo estes últimos dous anos de cara a que a todo o persoal se poida beneficiar deste dereito recollido no convenio colectivo vixente.

O Comité lémbralle ao Concello que está incumprindo o dereito de información aos representantes dos traballadores

Que o Concello de Betanzos lle oculta información ao Comité de Empresa non é nada novo, nin que hai documentación que non lle entrega dende o ano 2011. A fin de contas, con esta actitude o único que demostra é que non quere achegar a documentación que  informe sobre as irregularidades cometidas en materia de persoal polas consecuencias que esta poida ter, mais isto tampouco quita que o Comité continúe co seu traballo e desta volta lle veña de lembrar ao Concello que sistematicamente dende o ano 2011 leva sen entregarlle ningunha notificación das prórrogas dos contratos do persoal laboral contratado ao abeiro de subvención. 

Por isto, o Comité lembroulle que a Lei do Estatuto dos Traballadores no seu artigo 64 e no que ten que ver cos dereitos de información, consulta e competencias do Comité de Empresa indica o seguinte que o Comité de Empresa terá dereito a recibir copia básica dos contratos e notificación das prórrogas e das denuncias correspondentes a estes no prazo de dez días seguintes a que tivesen lugar”.Ademais, indicoulle que na actualidade, e dende xuño do ano 2011, o Concello nunca lle entregou a este Comité de Empresa notificación das prórrogas de ningún contrato, cando temos coñecemento de que hai persoal contratado ao abeiro de subvencións que anualmente debe asinar unha prórroga contractual e lembroulle que o Concello, ao non lle entregar esta información ao Comité de Empresa está a vulverar un dos dereitos de información do Comité de Empresa e o recollido na Lei do Estatuto dos Traballadores.

Esta solicitude de información sobre os contratos do persoal contratado ao abeiro de subvención, súmase ás veces que o Comité lle ten preguntado verbalmente ao concelleiro de Persoal por diversas situacións sobre as que o Concello non di nin chío e que nestes pasados días saíron publicadas na prensa (nova / nova) e que demostran que o Concello lle oculta deliberadamente información ao Comité de Empresa sobre a situación do persoal, posto que non só non lle achega a información cando este a solicita por escrito e verbalmente senón que esta información chega antes á prensa que ao propio persoal, o que di moito da situación de falta de diálogo co persoal laboral que existe a día de hoxe no Concello de Betanzos.

Bases xerais de selección de persoal laboral temporal mediante listaxes de substitución

O Concello de Betanzos vén de publicar no BOP, seis meses despois de levalas á Mesa Xeral de Negociación e catro meses despois de seren aprobadas en Pleno as bases xerais de selección de persoal laboral temporal mediante listaxes de substitución. Unha moi boa nova sería que estas bases se publicasen porque o Concello ten previsto crear listas de substitución para subsanar os graves problemas que está a crear a falta de persoal con motivo de distintas baixas mais ata o momento os representantes dos traballadores seguimos sen noticias ao respecto mentres a situación se complica día a día.

Bases xerais selección persoal laboral temporal mediante listaxes de susbtitución by cigconcellobetanzos

O Concello segue sen dar resposta aos problemas do persoal laboral

Os problemas aos que se ve sometido o persoal laboral amoréanse e o Concello non é quen de lle dar resposta, á parálise na negociación do convenio, das bases de axudas sociais, dunha necesaria e nova Relación de Postos de Traballo e as débedas que acumula dende hai case dous meses co persoal ao que lle notificou que lle pagaría unhas cantidades que lle adebedaba súmase o problema xeral de falta de persoal que en determinados departamentos é moi acusado e dificulta o traballo.

Hais listaxes de substitucións ás que o Concello leva anos sen botar man e das que debería tirar tanto para cubrir baixas como vacacións e moito máis nos departamentos que legalmente deben cubrir unha determinada ratio ao traballaren con nenos e nenas. Por iso o Comité de Empresa non perde ocasión de llo transmitir ao Concello por cantos medios pode para que quede constancia da situación do persoal e de que as boas formas do Concello non fan máis que agochar un grave problema de inoperancia na concellería de Persoal que está redundando de xeito moi negativo no traballo de todo o cadro de persoal laboral do Concello de Betanzos.

Solicitude Comité de Empresa by cigconcellobetanzos