Á espera dunha nova reunión co concelleiro de Persoal

O Comité de Empresa por inicitiva da CIG, logo de levar máis dunha semana sen saber nada da negociación do convenio colectivo nin ter información nin sequera sobre a última reunión que o Concello mantivo con Galivalia solicitou unha nova reunión co concelleiro de Persoal de cara a tratar este e outros temas laborais que están pendentes e que entende que deben ser solucionados por parte do goberno municipal canto antes.

O Comité de Empresa solicítalle ao Concello que resolva as axudas sociais

O prazo para as resolver é de tres meses, mais a día de hoxe, a finais do mes de xaneiro, o Comité de Empresa non ten nin sequera información sobre se é suficiente a partida orzamentaria, debido a isto, o Comité, por iniciativa da CIG, solicitou máxima celeridade para a súa resolución, tendo en conta que deben ser pagadas, como moi tarde, coa nómina do mes de marzo.

Solicitude Resolución Axudas Sociais

Recoñecemento de servizos previos do persoal laboral

O Comité de Empresa, por inicitiva da CIG, vén de solicitar unha listaxe do persoal ao que o Concello lle ten recoñecidos os servizos previos, esta solicitude vén na liña de reclamar este dereito para todo o persoal laboral unha vez que temos constancia documental de que a través dunha resolución da Alcaldía o Concello recoñeceulle este dereito a un determinado número de traballadores e traballadoras mais non a todo o persoal na mesma situación.

O recoñecemento dos servizos previos prestados tanto na propia Administración como noutras é un dereito de funcionarios e que vai recollido nese suposto novo convenio colectivo que non sabemos se o Concello terá a ben seguir negociando. Non obstante, o goberno municipal, se de verdade procura a igualdade entre persoal laboral e funcionario debería recoñecer de inmediato non só os servizos prestados nesta Administración senón en calquera outra pública como antigüidade e a efectos do cobro dos trienios correspondentes e o que en todo caso consideramos inxustificable é que no momento de recoñecer os servizos previos prestados neste Concello o fixese a uns traballadores si e a outros non  e haxa persoal que leva máis dun ano agardando resposta para que lle solucionen a situación e finalice esa discriminación.

Solicitude Información Persoal Recoñecemento Servizos Previos

Nota informativa: días adicionais de asuntos propios para o ano 2014

O Concello vén de informar que finalmente resolveu conceder dous días máis de asuntos propios, en compensación de dous festivos, para o ano 2014, ao abeiro das resolucións da Secretaría do Estado de Administracións públicas e mais da Dirección Xeral da Función pública, tal e como solicitara por rexistro a CIG no pasado mes de marzo.

Nota Informativa by cigconcellobetanzos

A CIG solicita a compensación dos festivos nacionais con dous días de asuntos propios máis para o ano 2014

A Sección sindical da CIG do Concello de Betanzos vén de solicitar a compensación dos sábados 1 de novembro e 6 de decembro de 2014 con dous días de asuntos propios máis ao abeiro  da Resolución do 12 de marzo de 2013, da Dirección Xeral da Función Pública, pola que se ditan instrucións sobre o réxime de vacacións, permisos e licenzas, e onde se recolle que: “se incorporará un día adicional de asuntos persoais por cada unha das festividades laborais de ámbito nacional de carácter retribuído, non recuperable e non substituíble pola Comunidade Autónoma, cando coincidan con sábado no dito ano”. Ademais, tal e como lle indica ao Concello, segundo o recollido no artigo 4 do propio Convenio colectivo do persoal laboral “as melloras establecidas noutras disposicións de calquera rango, que sexan recoñecidas con posterioridade, serán de aplicación segundo o principio de norma máis favorable”.

Debido a isto, a CIG solicitoulle ao Concello que tome o acordo de concederlle ao persoal laboral do Concello de Betanzos dous días adicionais de asuntos propios e que, en aplicación deste, se comunique a todo o persoal que serán seis os dias de asuntos propios para o ano 2014 para que os diferentes servizos se poidan ir organizando.

Agardamos que o Concello responda coa maior brevidade posible a esta solicitude e non faga como en anos anteriores que publicou as resolucións correspondentes a este tipo de temas a finais de ano e a última hora, indo en detrimento da propia organización interna dos servizos para o desfrute deste tipo de dereitos.

Solicitude días ano 2014 by cigconcellobetanzos

Un día máis de asuntos propios

Nove meses despois da solicitude da CIG o Concello vén de publicar unha circular informativa en todos os departamentos onde, ao igual que na Administración Xeral do Estados, concede un día máis de asuntos propios en compensación do 12 de outubro, que se poderá desfrutar acumulado ás vacacións ou ao resto de días libres que neste ano 2013 eran 3.

Resolución 12 de outubro by cigconcellobetanzos

Resumo da última reunión co concelleiro de Persoal

Logo de que o Comité de Empresa solicitase por escrito información durante varios meses e non recibise resposta, ao igual que ante a paralización por parte do Concello da negociación do convenio, das bases de axudas sociais e un longo etcétera de temas pendentes, unha vez máis, solicitou unha reunión co concelleiro onde lle expuxo varios dos problemas laborais existentes e solicitou unha resposta do Concello aos conflitos. A continuación achegámosvos un pequeno resumo da reunión mantida:

Convenio

O primeiro punto da reunión foi o convenio, pola importancia e premura e pola deixadez do Concello xusto nun tema tan importante. Preguntouse cando se retomarían as negociacións do convenio e o concelleiro indicou que a mediados de outubro, cousa, que o certo é dubidamos, simplemente porque leva un ano e medio dicíndonos que en quince días e logo nunca é así. O que si que sorprendeu foi un dato novo, que o Concello estaba a ultimar a contratación dunha asesoría extrena, é dicir, unha empresa, para asesoralos tanto na negociación do convenio como para elaborar unha nova Relación de Postos de Traballo; por tanto, logo de dous anos de negociacións do convenio muda a estratexia por completo e quere botar man dunha empresa externa para asesorar en temas que nos concernen aos traballadores municipais. Isto claramente tradúcese en que o Concello agora, logo de múltiples informes con diversas barbaridades, logo de ter que pagar dos petos dos betanceiros máis de 50 000 euros en concepto de salarios atrasados ao persoal readmitido e logo de todo o acontecido nos dous anos anteriores di que o persoal técnico municipal está desbordado (será por iso que o Comité de Empresa ten tantas solicitudes sen responder mesmo dende o ano 2011) e ten que recorrer tamén a empresa privada para se asesorar tomando nota da política dos gobernos de dereita. Con todo, independentemente de de onde veña o asesoramento, que toma as decisións é o goberno municipal, por iso consideramos que a negociación do convenio debe seguir o seu curso o máis axiña posible e así llo indicamos ao propio concelleiro de Persoal.

2. Axudas sociais

Unha vez máis o Comité expresoulle a súa preocupación polas promesas incumpridas sobre unhas novas bases de axudas sociais e lembroulle que o Comité xa fixo as súas achegas, e considera que as bases actuais deben ser obxecto dunha fonda revisión, tal e como indicou no escrito rexistrado, a maiores, quixo saber cando se vai convocar a Mesa Xeral de Negociación e solicitarlle ao Concello que informe en condicións e tempo sobre a convocatoria de axudas do ano 2013. Máis unha vez a resposta foi que agardaban chamar para a negociación este mesmo mes (a este paso en outubro segundo din se van amañar máis cousas que nos dous anos anteriores). Canto ás axudas correspondentes ao ano 2013 a convocatoria, nun principio, publicarase nos mesmos termos que en anos anteriores.

3. Atrasos non cobrados

O Comité solicitou información, tamén, sobre os atrasos do persoal ao que recentemente lle acaban de recoñecer a antigüidade no Concello, cuxa notificación chegou hai un mes e seguen a día de hoxe sen cobrar e parece ser que se debeu a un problema administrativo que estará solucionado nos vindeiros días (e pensamos nós, cando non hai problemas adminitrativos neste Concello se falamos en materia de persoal).

4. Solicitudes de traballadores

A maiores, comentáronselle varias solicitudes que transmitiron diversos compañeiros e mais incidiuse na importancia de que todo o persoal, independentemente do departamento ao que pertenza, debe ter o mesmo dereito á roupa de traballo que os outros compañeiros, e o Concello ten a obriga de pór a funcionar os mecanismos necesarios para que así sexa e que non aconteza que haxa compañeiros que leva máis dun ano sen recibir a roupa de traballo correspondente mentres que outros non teñen problema ningún coa equipación, trasmitímoslle que se o Concello tamén ten un problema de xestión neste tema debe solucionado para que non se vexan prexudicados sempre os mesmos traballadores.

6. 12 de outubro

En febreiro de 2013 tanto a CIG como o Comité de Empresa solicitaron a compensación do día 12 de outubro, a día de hoxe, case ás portas dese día entendíamos que a solicitude estaba denegada, por moito que ese tema se falase nunha Mesa Xeral de Negociación. O Concelleiro informounos de que nos vindeiros días sairá unha resolución da Alcaldía onde nos conceden un día de asuntos propios máis, logo da solicitude efectuada pola CIG, para o ano 2013. Dende o Comité, agardamos que isto se faga canto antes porque xa non está mal responder sete meses despois a unha petición dos delegados de traballadores. En canto estea publicada a Resolución todo o persoal tería dereito a un día libre máis a desfrutar antes do 15 de xaneiro de 2014.

7. Documentación non entregada ao Comité de Empresa

O Comité de Empresa volveu lembrarlle ao Concello que ten solicitada documentación que o Concello non lle dá entregado e non entendemos a que se debe, aínda que se nos poñemos a pensar mal nalgúns casos quizais sexa intencionado para tentar ocultar algunhas das irregularidades existentes. En primeiro lugar non se tivo resposta nin sequera á proposta de ultraactividade do convenio colectivo, solicitouse tamén unha táboa de salarios brutos de todo o persoal laboral, porque ademais lle entregaramos ao Concello unha copia das do 2010 para indicarlle que era o que solicitaba e o Concello segue sen lla entregar. Ademais, pediuse en múltiples ocasóns os cadros de valores das horas extras de cada traballador, que se entende que debe estar elaborado porque dubidamos que cada vez que alguén faga horas extras se poñan a calcular coa calculadora. Tampouco entregou o Concello o cadro coas retribucións do persoal readmitido onde se indique a categoría profesional, a denominación do posto e as funcións respectivas. O Comité está pendente tamén da relación actualizada de persoal co tipo de contrato de todo o persoal laboral e da relación de postos de traballo de carácter non permanente actualizada con toda a súa información.

A maiores, o Comité indicoulle ao concelleiro que observamos diferenzas na aplicación do recoñecemento da antigüidade, mentres que ao persoal que lle acaban de recoñecer os trienios recoñécenlle servizos previos ao últimos contrato, hai outro persoal que non lle aplicar o mesmo criterio e explicámoslle varios casos en concreto. O propio concelleiro indicou que o persoal que se vise nesta situación que o solicitase por escrito e o certo é que é unha mágoa que o Comité se teña que dedicar a mirar caso por caso os problemas retributivos de cada traballador mais só grazas a iso pódense observar os distintos problemas e facer as reclamacións pertinentes ante un Concello que pretende facerse o descoñecedor dos criterios desiguais que el mesmo leva aplicando anos.

8. Cobertura das baixas

Na última reunión que tivera o Comité de Empresa do concelleiro este indicáralle que o Concello ía cubrir a baixa de limpeza e a día de hoxe segue sen se facer, varios meses despois segue sen se facer, agora resulta que están pendentes dos informes dos técnicos, que deben ser os mesmos que din que non teñen a obriga de informar cando se contrata a persoal de empresas privadas para as oficinas municipais. Sábese o que supón neste Concello estar pendente dos informes do persoal técnicos, demorar as cousas ata que veña outra máis grave, porque cando se queren solucionar faise e punto, mais, polo visto, a limpeza dun colexio público non é prioritaria para o Concello de Betanzos.

A maiores, puxose ao concelleiro ao tanto da gravísima situación que está a padecer o persoal da Escola Infantil Municipal con motivo da diminución do número de traballadoras por diversas causas que está a redundar directamente neste servizo público e a provocar unha situación insostible no tempo e que o Comité, tal e como lle trasladou, considera que é de prioritaria resolución pola responsabilidade que supón o traballo das propias compañeiras e as circunstancias nas que se están vendo obrigadas a traballar e solicitámoslle ao Concello máxima urxencia na cobertura das baixas correspondentes relatándolle polo miúdo como está a afectar esta situación ao traballo diario da propia Escola Infantil Municipal. Agardamos, que o Concello recapacite tamén neste tema e lle dea solución pola vía da urxencia a pesar de levar xa moitos meses adiándoo.

Un paso máis: o Concello está a admitir os seus propios erros

Logo de que o Concello admitise a través dunha Resolución da Alcaldía que o persoal que non forma parte da RPT non pode ser discriminado na convocatoria das axudas sociais do ano 2011, O Comité de Empresa, por iniciativa da CIG, rexistrou un escritou onde ao abeiro da argumentación xurídica do propio Concello na Resolución da Alcaldía solicita o seguinte:

1. Que se lle recoñeza a todo persoal non permanente o dereito a cobrar as axudas sociais do ano 2010, xa que ao se recoñecer o dereito de acceso ás do ano 2011 en base á lexislación vixente, supón unha discriminación esta distinción do dereito en función do ano da solicitude.

2.Que se lle recoñeza a todo o persoal non permanente o dereito a desfrutar dos días de asuntos propios recollidos no artigo 11.6 do Convenio colectivo do persoal laboral do Concello de Betanzos.

3. Que se lle recoñeza a todo o persoal non permanente o dereito a cobrar os trienios correspondentes, recollidos no anexo I do Convenio colectivo do persoal laboral deste Concello, en función da antigüidade no Concello.

4. Ao abeiro da lexislación mencionada na resolución da Alcaldia só cabe interpretar o artigo 1 do conveno colectivo vixente no sentido de que o ámbito de aplicación do devandito convenio á totalidade do persoal laboral.

Esta solicitude fíxose ao abeiro desta resolución da Alcaldía con rexistro de saída do día 1 de decembro onde se recoñece o principio de non discriminación en función da relación contractual e tendo en conta que en diversos comunicados de resolucións da Alcaldía se discriminou a algúns traballadores do persoal laboral non permanente na proposta de concesión de axudas sociais do ano 2010, na concesión dos días de asuntos propios recollidos no convenio para o persoal laboral, e, igualmente, non se lle recoñece o dereito a cobrar os trienios recollidos no anexo I do Convenio do persoal laboral do Concello de Betanzos.

Na Resolución da Alcaldía utilizouse a argumentación xurídica que dende a CIG levamos meses en escritos e verbalmente nas reunións empregando e indicouse o seguinte:

“Fundamentos de dereito. Primeiro. O arto 15.6 do R.D. Lex. 1/1995, do 24 de marzo, polo que se aproba o texto refundido da Lei do Estatuto dos Traballadores, establece:

Os traballadores con contratos temporais e de duración determinada terán os mesmos dereitos que os traballadores con contratos de duración indefinida, sen prexuízo das particularidades específicas de cada unha das modalidades contractuais en materia de extinción do contrato e daquelas expresamente previstas na Lei en relación cos contratos formativos e co contrato de inserción. Cando corresponda en atención á súa natureza, tales dereitos serán recoñecidos en disposicións legais e regulamentarias nos convenios colectivos de maneira proporcional, en función do tempo traballado.

Cando un determinado dereito ou condición de traballo estea atribuído nas disposicións legais ou regulamentarias e nos convenios colectivos en función dunha previa antigüidade do traballador, esta deberá computarse segundo os mesmos criterios para todos os traballadores, calquera que sexa a súa modalidade de contratación.

Pola súa banda, a Directiva 1999/7/CE do Consello, de 28.06.1999, relativa ao Acordo Marco da CES, a UNICE e o CEEP sobre traballo de duración determinada (DOCE n.º L 175 do 10.07.1999-0048), establece:

Principio de non discriminación (clásula 4) 1. Polo que respecta ás condicións de traballo, non poderá tratarse aos traballadores cun contrato de duración determinada dunha maneira menos favorable que aos traballadores fixos cmparables polo mero feito de ter un contrato de duración determinada, a menos que se xustifique un trato diferente por razóns obxectivas. 4. Os criterios de antigüidade relativos a determinadas condicións de traballo serán os mesmos para os traballadores con contrato de duración determinada que para os traballadores fixos, agás que os criterios de antigüidade diferentes veñan xustificados por razóns obxectivas.

O Tribunal de Xustiza das Comunidades Europeas, do 22 de decembro de 2010, resolvendo unha cuestión de prexudicialidade plantexada polos órganos xurisdicionais españois, conclúe que a devandita directiva é de aplicación ás condicións económicas entre traballadores fixos e indefinidos e ás relacións de traballo de duración determinada ou interinos.

Por conseguinte tense que concluír que non hai razón obxectiva, para excluír da percepción das axudas sociais convocadas, ao persoal con vínculo temporal con esta Administración local. Axudas que se teñen que percibir de xeito proporcional ao tempo traballado, computando como tal ata a data da finalización do contrato se esta é anterior ao 31 de decembro de 2011, e esta última data para o caso de contratacións con vencimento posterior á mesma.”

Animamos aos compañeiros e compañeiras que levan anos sendo discriminados implícita e explícitamente a que reclamen tamén individualmente estes dereitos que o Concello leva anos negándolles, que no caso do non pagamento dos trienios supón a perda duns cartos que segundo a lei lles pertencen e moito máis agora que o Concello recoñeceu que non se pode discriminar ao persoal en función da súa relación contractual.