Os delegados de prevención do persoal laboral valoran volver á Inspección se o Concello non acomete proximamente as melloras requiridas pola Inspección de Traballo para a Oficina de Turismo

Do 18 de decembro data o requerimento que a Inspección de Traballo provincial lle fixo ao Concello de Betanzos logo dunha denuncia dos delegados de prevención da CIG polo mal estado da Oficina de Turismo.

O 1 de marzo, tal e como podedes ver no documento enviado pola Inspección de Traballo ao Comité de Empresa do Concello de Betanzos, finaliza o prazo para que o Concello acredite as medidas adoptadas para atallar as 13 deficiencias que a Inspección detectou logo de ser alertada polos delegados de prevención e a día de hoxe as paredes seguen verdes, hai vexetación de feito, e mesmo molladas en ocasións e moitas das deficiencias sinaladas seguen sen se resolver. Recentemente os delegados de prevención preguntaron por este tema ao presidente do Comité de Seguridade e Saúde, Diego Fernández, que comentou que estaba valorando a instalación dun sistema de climatización e mais intentando atallar as restantes deficiencias mais o certo é que desde setembro de 2015 houbo tempo e tempo para solucionar os problemas.

Debido a isto, e logo de comprobar o estado das instalacións, os delegados de prevención da CIG están valorando, no caso de que non se solucionen as deficiencias proximamente volver á Inspección para lle comunicar o incumprimento dos requerimentos por parte do Concello. Polo momento, é a propia Inspección a que debe actuar e presentarse no Concello para comprobar as actuacións levadas a cabo pola Administración local e en función das novidades que haxa con respecto a este tema tomaranse as decisións oportunas sobre os pasos a seguir para tentar solucionar dunha vez por todas os problemas de acondicionamento da Oficina de Turismo municipal.

Resposta Inspección Comité de Empresa

Constitución do Comité de Seguridade e Saúde: a presidencia para o Concello e a secretaría para a parte social

Por primeira vez o Concello e o persoal reparten cargos na Constitución do Comité de Seguridade e Saúde que tivo lugar o pasado 26 de novembro na Sala de Xuntas. A proposta partiu dos delegados de prevención do Comité de Empresa e a intención era ostentar a presidencia mais para o Concello isto era innegociable e para o delegado do CSIF tamén que se pretendía posicionar da parte do Concello, como xa vén sendo costume, sen entender que as decisións tomadas pola parte social son indivisibles e que a maioría está na man dos delegados de prevención do persoal laboral. Finalmente o Concello cedeu en que a secretaría fosepara o persoal, logo de entender que unha resolución da Alcadía designando os membros do Comité non era válida, porque eses cargos son escollidos entre o propio Comité de Seguridade e Saúde. Finalmente o Comité de Seguridade e Saúde ficará composto polos seguintes membros:

Diego Fernández López, presidente

Daniel Pereiro Cachaza, vogal

Verónica Chaves González, vogal

Silvia Muíño Naveira, secretaria

Jorge Amarante Rodríguez, vogal

Alberto Fernández Seijo, vogal

Nesta reunión acompañounos o compañeiro Ernesto López, como asesor da CIG no tema, que nos axudou  e asesorou de cara a poder darlle un novo e necesario pulo ao Comité de Seguridade e Saude e comezar a traballar para que o goberno comece a solucionar as cuestións máis urxentes para logo traballar nos obxectivos a longo prazo. Fixemos unha proposta para que o Comité se dote dun regulamento e acordamos envialo e facer unha reunión de urxencia para aprobalo e comezar a traballar canto antes.

Con respecto aos puntos da orde do día tratouse o tema das revisións médicas e os delegados de prevención do persoal laboral indicaron unha serie de apreciacións con respecto ás revisións, como que un ano máis seguen sen ser específicas, que no local en que se realizaban ía frío, que consideraban que hai deficiencias tendo en conta que se limitaban a preguntar que se todo era como o ano pasado cando deberían preguntar sobre todo de novo ao persoal, porque en ocasións mesmo nin se lembraría do que indicou o ano pasado. Finalmente tamén fixeron fincapé nos problemas coa máquina dos ruídos e das dúbidas de que os resultados fosen reais na medida en que se ouvía máis o balbordo dos traballadores que estaban fóra que a propia máquina.

Tamén o goberno municipal lle denegou unha adaptación de posto a unha compañeira de limpeza con informes médicos que acreditaban que non pode realizar as funcións que viña tendo encomenda, baseándose en que na Relación de Postos de Traballo non habería postos con este perfil. Os delegados de prevención preguntámoslle ao Concello se no caso da compañeira de limpeza que fai funcións de conserxe na biblioteca tamén se tramitara unha solicitude de adaptación de posto a través do Comité de Seguridade e Saúde e advertímoslle ao Concello que estaba incorrendo nun agravio discriminatorio, o concelleiro de Persoal, coma sempre, escusouse en que esa situación viña de antes mais que en todo caso solicitaría un informe para saber se nalgún momento se tramitou algo con respecto a ese tema.

Finalmente, e con respecto á actividade preventiva o concelleiro o presidente do Comité informou que no primeiro trimestre se procederá a mañar as deficiencias sinaladas pola Inspección de Traballo na Oficina de Turismo e mais se realizarán as avaliacións pendentes de diversos edificios municipais. Canto a este tema os delegados de prevención do persoal laboral lembráronlle que está pendente o simulacro da Escola Infantil Municipal e a necesidade de Plans de Evacuación en todos cantos edificios traballa persoal e accede a cidadanía.

Na quenda de intervencións a secretaria do Comité deu conta dunha serie de deficiencias e problemas nas instalacións da Escola Infantil Municipal Santiago de la Fuente que entende que é urxente reparar e solucionar posto que estamos a falar dun centro ao que acoden moitos nenos diariamente e fixo fincapé nos problemas concretos do edificio para pedirlle solucións inmediatas ao goberno municipal pola seguridade e saúde tamén das propias traballadoras que prestan os seus servizos no centro.

Convocatoria de Constitución do Comité de Seguridade e Saúde

5 meses despois seguimos sen Mesa Xeral de Negociación nin Comité de Seguridade e Saúde

O goberno local está tomando esta lexislatura aínda con máis calma que a anterior, as présas para asinar convenio e chegar a un acordo co persoal antes xusto das eleccións locais quedaron atrás e deron lugar a unha calma chicha na que parece que nada importa.

A Mesa Xeral de Negociación que a CIG solicitou que se convocase de urxencia, ata o momento descoñecemos se o resto dos sindicatos tamén ou a actitude de UGT, CCOO E CSIF é a mesma pasotista en connivencia co goberno local, segue sen se constituír cinco meses despois, o mesmo acontece co Comité de Seguridade e Saúde, xa solicitado tamén polos delegados de prevención da CIG.

De seguir así esta situación nas vindeiras semanas os delegados de prevención da CIG decidiron que acudirán á Inspección de Traballo a denunciar a unha Administración local que leva un ano sen reunir o Comité de Seguridade e Saúde que segundo a Lei de Prevención de Riscos Laborais ten que se reunir cada tres meses e do que os novos delegados mesmo descoñecen os compoñentes por parte do goberno local.

Desde a Sección sindical da CIG valoramos como nefasta a xestión en persoal dos primeiros cinco meses de goberno e lamentamos que poida ser a consecuencia directa dos intereses que o concelleiro de Persoal , Diego Fernández López, ten postos fóra de Betanzos e nas eleccións estatais e que dá como resultado unha nula xestión nos primeiros días de goberno á fronte de novo da área de Persoal. Entendemos que son moitos os méritos que fixo para continuar coa carreira política nos últimos catro anos coa lexislatura máis conflitiva na historia deste Concello cos traballadores e traballadoras mais non perdemos a esperanza de que volva a vista para o cargo que foi electo hai cinco meses e mude o rumbo da xestión, facendo caso ás demandas do persoal, aínda que non haxa fotos nin notas de prensa polo medio.

O Concello teima en converter en almacén municipal a entrada da Casa do Concello

Máis unha vez, e van varias nestes meses, o goberno municipal teima en converter a Casa Consistorial nun almacén, co risco que isto supón para os traballadores e traballadoras e a cidadanía que realiza as súas xestións no edificio.

A situación vense repetindo especialmente nos últimos meses ata o punto de que parece que o Concello ten interese de que as oficinas administrativas deixen de ser tal, se o que quere é pechar a Casa do Concello é responsabilidade súa mais o que é inconcebible é que utilice como almacén a entrada dunhas dependencias municipais nas que continuamente acoden persoas.

As queixas sucédense e a situación cada vez vai a peor pola desidia dun goberno ao que non lle importa nin o máis mínimo as condicións laborais do persoal. Tal é así que logo de falalo en varias ocasións e solicitalo por escrito o concelleiro de Persoal, Diego Fernández, mentiulles unha vez máis aos representantes dos traballadores ao asegurar no pasado mes de agosto que en setembro se convocaría o Comité de Seguridade e Saúde, que xa leva perto dun ano sen se convocar e no que aínda mesmo non se informaron das medidas tomadas logo do expediente aberto pola Inspección de Traballo provincial no caso da Oficina de Turismo.

Desde a CIG lamentamos esta actitude do goberno municipal en todo o que ten que ver coa seguridade e saúde laboral do seu persoal e no caso de que proximamente no convoque o Comité de Seguridade e Saúde verémonos na obriga de acudir de novo ante a Inspección de Traballo, ao non nos deixar máis opcións que recorrer a administracións de fóra cando nesta ignoran aos representantes dos traballadores.

O goberno segue utilizando de almacén a entrada da Casa do Concello: nova queixa dos delegados de prevención

Os delegados de prevención veñen de poñer unha nova queixa porque o Concello teima en utilizar a entrada da Casa Consistorial como almacén de enseres, engadíndolle riscos a un edificio que está avaliado como oficinas administrativas, coas consecuencias que isto supón non só para o propio persoal que traballa alí senón para a cidadanía que acode ás dependencias municipais. Xunto co documento rexistrado con data de onte achegan fotografías dos feitos descritos.

En principio, parece que o Comité de Seguridade e Saúde se constituirá o vindeiro mes de setembro, segundo indicou o concelleiro de Persoal. Cómpre sinalar que na actualidade non existe mais os delegados de prevención si que está nomeados porque é o Comité de Empresa os que nomea os do persoal laboral, canto ao delegado que lle corresponde ao persoal funcionario descoñecemos se xa está designado e de quen se trata.

Nova Queixa Casa Consistorial

Ruídos nas Oficinas Xerais

Os delegados de prevención do Comité de Empresa solicitáronlle ao Concello que tome as medidas oportunas de cara a solucionar un problema do que recibimos queixas nos pasados días relacionado cun exceso de ruído na planta baixa das Oficinas Xerais do Liceo. Hai que lembrar que a exposición é un risco laboral que pode desencadear problemas de saúde, aumento da tensión e producir estrés e dores de cabeza.

Ademais, lembráronlle que os riscos laborais derivados da exposición ao ruído deben eliminarse na súa orixe ou minimizar o risco e solicitóuselle ao goberno municipal que atalle este problema, reduza a exposición ao ruído do persoal, controle e revise os riscos e medidas prevetivas.

Deixámosvos abaixo o escrito presentado:

Queixa ruídos

Entre estardartes, pendóns e música. Queixa dos delegados de prevención

Os delegados de prevención de riscos laborais do Comité de Empresa veñen de pór en coñecemento do Concello que debe de tomar as medidas oportunas para solucionar unha situación que se vén repetindo ano tras ano cando con motivo de diversos eventos e a Feira Medieval o goberno municipal decide converter a entrada das Oficinas da Casa Consistorial nun almacén de instrumentos, estandartes e enseres diversos.

Esta situación dificulta non só a entrada e saída do propio persoal municipal senón tamén da cidadanía e advirten dos riscos existentes no caso de que haxa que realizar unha evacuación no edificio.

Este escrito rexistrouse logo das queixas de varios compañeiros polas incomodidades e riscos que esta situación que se vén repetindo no tempo supón.

A maiores, os delegados de prevención lembran que o edificio está avaliado como oficinas administrativas e en ningún caso destinado para almacén mais de pretender facer deste un almacén o Concello debería tomar as medidas oportunas.

Esta queixa trasladarase, no caso de que o Concello non adopte medidas, ao Comité de Seguridade e Saúde, que levamos meses á espera de que se reúna e que estamos valorando volver denunciar á Inspección de Traballo o incumprimento dos prazos de reunión no caso de que non se reúna proximamente.

Denuncia na Inspección por incumprimento na normativa sobre as condicións dos espazos de traballo

Os delegados de prevención da CIG presentaron nos pasados días unha denuncia na Inspección de Traballo polas condicións da Oficina de Turismo.

Este tema foi falado en diversas ocasións co goberno ao longo destes anos sen solución aos diversos problemas, ademais se a isto lle engadimos que logo de que o Concello de Betanzos leve desde outubro de 2014, é dicir, 8 meses, sen convocar a reunión do Comité de Seguridade e Saúde, que por lei debe reunirse trimestralmente, levaron a tomar a decisión de poñer en coñecemento da Inspección de Traballo da Coruña as condicións deste espazo de traballo que incumpren diversa normativa en materia de seguridade e saúde laboral.

En concreto, os compañeiros achegáronlle á Inspección fotografías do estado das paredes do devandito centro de traballo, que demostran que a humidade do lugar. A temperatura excesivamente alta deste centro tamén é algo que se nota nada máis entrar e se a isto lle sumamos problemas de ventilación, que non ten servizo hixiénico, unha iluminación escasa e que non dispón de saída de urxencia, os delegados de prevención da CIG non podían deixar correr esta situación á vista de que o goberno municipal pasa amplamente de convocar o Comité de Seguridade e Saúde e de que os compañeiros finalizan o mandato en calidade de delegados o vindeiro 2 de xuño e o novo Comité será o que escolla os novos delegados de prevención de riscos laborais.

A situación de varios centros municipais causou diversas denuncias nestes anos, mais no eido da seguridade e saúde laboral fica un traballo aínda moi grande á vista das deficiencias que demostran algúns centros de traballo, como é o caso do que se puxo en coñecemento nesta denuncia.

En concreto, no escrito presentado, faise referencia á seguinte lexislación:

Real Decreto 286/2006 de 10 de marzo sobre a protección da saúde e seguridade dos traballadores contra os riscos relacionados coa exposición ao ruído.

Convenio 148 da Organización Internacional do Traballo relativo ao medio ambiente no traballo 24 de novembro de 1980.

Directiva 89/654/CEE (30 de novembro) de 30 de novembro de 1989, relativa ás disposicións mínimas de seguridade e de saúde nos lugares de traballo 

Lei 31/1995, de 8 de novembro, de prevención de riscos laborais, artigo 20, sobre medidas de emerxencia.

Real Decreto 486/1997, de 14 de abril, polo que se establecen as disposicións mínimas de seguridade e saúde nos lugares de traballo, con respecto ao cal habería que lembrar especialmente os artigos 3, 5, 7, 8 e 9 e os anexos 1, 3, 4 e 5 que indican o seguinte:

3. "En calquera caso, os lugares de traballo deberán cumprir as disposicións mínimas establecidas no presente Real Decreto canto ás súas condicións construtivas, orde, limpeza e mantemento, sinalización, instalacións de servizo ou protección, condicións ambientais, iluminación, servizos hixiénicos e locais de descanso, e material e locais de primeiros auxilios"

5. "O orde, a limpeza e o mantemento dos lugares de traballo deberá axustarse ao disposto no anexo II".

7. "A exposición ás condicións ambientais dos lugares de traballo non deberá supor un risco para a seguridade e saúde dos traballadores. A tal fin, as ditas condicións ambientais e, en particular, as condicións termohigométricas dos lugares de traballo deberán axustarse ao anexo III"

8. "A iluminación dos lugares de traballo deberá permitir que os traballadores dispoñan de condicións de visibilidade adecuadas para poder circular por estes e desenvolveles neles as súas actividades sen risco para a súa seguridade e saúde."

9. "Os lugares de traballo deberán cumprir as disposicións do anexo V canto a servizos hixiénicos e locais de descanso".

Anexo 1. Condicións de seguridade nos lugares de traballo

"As vías e saídas de evacuación, así como as vías de circulación e as portas que dean acceso a elas, axustaranse ao disposto na súa normativa específica."

"En caso de perigo, os traballadores, os traballadores deberán poder evacuar todos os lugares de traballo rapidamente e en condicións de máxima seguridade. As portas de emerxencia deberán abrirse cara ao exterior e non deberán estar cerradas, de forma que calquera persoa que necesite utilizalas en caso de urxencia poida abrilas facilmente e inmediatamente."

Anexo 3. Condicións ambientais dos lugares de traballo.

"A exposición ás condicións ambientais dos lugares de traballo non debe supor un risco para a seguridade e a saúde dos traballadores. Nos locais de traballo cerrados deberán cumprirse, en particular, as seguintes condicións:

a) A temperatura dos locais onde se realicen traballos sedentarios propios de oficinas ou similares estará comprendida entre os 17 e os 27 ºC.

A humidade relativa estará comprendida entre o 30 e o 10 por 100, agás nos locais onde existan riscos por electricidade estática nos que o límite inferior será o 50 por 100"

"Anexo 4. Iluminación dos lugares de traballo.

"A iluminación de cada zona ou parte dun lugar de traballo deberá adaptarse ás características da actividade que se efectúe nela."

Anexo 5. Servicios hixiénicos e locais de descanso

"Os luagres de traballo disporán de retretes, dotados de lavabos, situados nas proximidades dos postos de traballo"

Real Decreto 488/1997 de 14 de abril sobre disposicións mínimas de seguridade e saúde relativas ao traballo con equipos que inclúen pantallas de visualización.

Comités de Seguridade e Saúde, tarde, mal e arrastro

A saúde e a seguridade laboral son unha das grandes materias pendentes deste Concello. O Comité de Seguridade e Saúde constituíse, entendemos que por primeira vez, nesta lexislatura logo dunha denuncia na Inspección de Traballo dos delegados de prevención laborais a instancias da CIG. Cada convocatoria que se fixo e cada tema que se tratou foi a instancias dos delegados de prevención, que mesmo tiveron que denunciar na Inspección provincial a nave ruinosa na que traballaban compañeiros como o pintor, que foi finalmente clausurada, ou a situación de inseguridade que padeceu o persoal laboral da Casa do Concello durante as obras de amaño do edificio.

Non hai que esquecer que este Concello nin contaba con plans de prevención de riscos laborais (obrigatorios por lei) nos diferentes edificios e nin sequera plan de emerxencia en lugares como a Escola Infantil Municipal que a mutua elaborou recentemente. Cando este Comité de Empresa comezou os traballadores e traballadoras levaban catro anos sen revisións médicas, que foron realizadas tempo despois e logo de moita insistencia, aínda que o que realmente fica pendente son as revisións específicas que valoren como o traballo dos distintos postos repercute no persoal correspondente.

Desde o Comité de Empresa  e desde a CIG sempre tentamos buscar vías de diálogo de cara a amañar as problemáticas relativas á seguridade e saúde laboral, sen deixar de lado a transcendencia deste tema e entendemos que é de máxima importancia especialmente para moitos compañeiros e compañeiras de servizo. Unha vez máis, foi un delegado de prevención da CIG o que solicitou xa hai máis dun mes a reunión trimestral do Comité de Seguridade e Saúde cuxo periodicidade non foi quen de cumprir este goberno municipal nin unha soa vez desde hai tres anos.

A día de hoxe os delegados de prevención aínda están á espera dos informes do técnico da mutua que pasou polos edificios (mutua que polo que parece levaba anos cobrando do Concello sen facer nin un só traballo, porque ata que todo isto botou a andar practicamente non había rastro dela) e de que o Concello convoque a primeira reunión do Comité de Seguridade e Saúde do ano 2015.

Solicitude CSS Marzo

Visitas aos centros de traballo

Tal e como vos comentabamos esta semana, e logo do falado na reunión do Comité de Seguridade e Saúde o técnico da Mutua comezará coas visitas aos centros de traballo nesta semana de cara a comprobar as medidas preventivas tomadas nos edificios logo das avaliacións de riscos laborais e facer as avaliacións pendentes. Estas visitas terán lugar, en principio os seguintes días:

Xoves 30 de outubro

Xoves 6 de novembro

Martes 11 de novembro

Martes 18 de novembro

O Concello, ademais, posibilitou de que os delegados de prevención acompañen ao técnico nas visitas.

Última reunión do Comité de Seguridade e Saúde

Tal e como vos contabamos logo de moitos meses e unha denuncia na Inspección de Traballo o Concello convocou o Comité de Seguridade e Saúde.

Nesta reunión, o representante da mutua coa que ten concerto o Concello informou de que se realizarán as avaliacións de riscos laborais pendentes e realizarase un seguimento con visitas nos centros nos que xa se realizou a avaliación de riscos para comprobar se se instalaron as medidas preventivas. Con respecto a este último punto temos serias dúbidas de que o Concello implantase nin unha soa das medidas preventivas que se contemplan nas avaliacións de riscos laborais realizadas pola mutua mais nas visitas comprobarase se foi así ou non.

A maiores o concelleiro de persoal, Diego Fernández, informou de que se ampliou o contrato de cara a seguir coas avaliacións e que tamén xa está concluído o Plan de autoprotección da Escola Infantil Municipal, tamén informaron que realizarán na gardería un simulacro e formarán ao persoal neste aspecto.

Polo que respecta ás deficiencias dalgunhas instalacións municipais, como é o caso da Oficina de Turismo, o concelleiro de Persoal apelou a que as medidas que se tomen serán sempre dentro do contexto do edificio Liceo coma un todo, e mesmo xustificou a non necesidade dun servizo na oficina por dispoñer o propio Liceo del. En todo caso, dende a CIG lembraronlle que as condicións de humidade e iluminación non son nada recomendables e insistiuse na necesidade dunha saída de urxencia e de que esa oficina se dote das medidas preventivas necesarias unha vez que os riscos están avaliados.

Outro dos temas recorrentes é o estado da nave de Obras, xa que na actualidade mesmo nos teñen informado que se utiliza de almacén por parte de persoal dunha empresa á que o Concello lle contrata ultimamente multitude de servizos relacionados coas obras e o mantementos, e se o local foi clausurado polo Concello logo dunha visita da Inspección de Traballo e o Concello o pretende utilizar de almacén debería avaliar os riscos como tal para tomar as medidas preventivas oportunas. Canto ao persoal do Concello o concelleiro de Persoal deixou claro que o persoal municipal non pode entrar nesa nave polo seu estado de posibles derrubamentos e dende a CIG solicitámoslle que colocasen un cartel na portal que informase de que o paso estaba prohibido porque entendiamos que o persoal está a recibir ordes contraditorias con respecto á posibilidade ou non de uso deste local que, insitimos, está en ruínas, e no que xa se produciu un derrubamento.

Outro tema importante é o estado do espazo do traballo de pintor, que traballa con produtos químicos canceríxenos e cuxo uso e almacenamento está regulado pola lei, e para nada debería traballar nun espazo onde pasen traballadores continuamente expostos a eses produtos e sen a existencia de medidas preventivas ningunhas. Dende a CIG trasladámoslle ao Concello a nosa preocupación por esta situación e porque o Concello tome cartas no asunto e se comece a preocuparse pola seguridade e saúde laboral do seu persoal.

Tamén se fixo unha solicitude explíticita da necesidade de que neste Concello se inicien as avaliacións psicosociais e propúxolle comezar polo persoal do CEIP Francisco Vales Villamarín á vista das últimas baixas por depresión que se están sucendendo, ademais de que se instou ao Concello a que fixese estas análises porque é posible que unha mala organización do traballo e un exceso de carga laboral sexan tamén desencadeantes deste tipo de situacións.

Finalmente a CIG expuxo a falta dalgúns Equipos de Protección Individual para realizar determinados traballos específicos e da necesidade de que todo o persoal que o necesitase tivese uns vestiarios en condicións e duchas de auga quente tal e como recolle especificamente a lexislación laboral vixente en materia de saúde laboral.  

Por fin, o Concello convoca o Comité de Seguridade e Saúde a petición da CIG

Segundo a Lei de Prevención de Riscos Laborais do ano 1995 o Comité de Seguridade e Saúde ten a obriga de reunirse, como mínimo, cada tres meses. Neste Concello e ata a chegada deste Comité de Empresa non hai constancia documental de que nunca se chegase a constituír nin de que os anteriores Comité tivesen, nin sequera, designados delegados de prevención de riscos laborais, tal e como era a súa obriga.

Logo dunha denuncia na Inspeccióndos delegados de prevención o Concello xa hai un tempo viuse naobriga de constituílo, dende aquela comezouse a tratar levemente estes temas máis importantes, aínda tendo en conta que son moi complicados e vai levar un tempo que todo se desenvolva con normalidade, tal e como sería de esperar nunha Administración pública. Neste ano 2014 o Comité levaba sen se reunir dende o mes de xaneiro, logo de que a Inspección o apercibira pola penosasituación das obras na Casa Consistorial e tanto dende o Comité de Empresa como os delegados de prevención da CIG solicitaron en diversas ocasións que así se fixese, mesmo se viron na obriga devolver á Inspección de Traballo para denunciar que este organismo non se reunía coa asiduiadade mínima a que obrigaba a lei. A propiaInspección respondeu indicando que o Concello admitía abertamentenon cumprir os prazos e lembroulle ao Concello as súas obrigas enmateria de prevención de riscos laborais.

Logo e todo este periplo para que o Concello cumpra a lei a semana pasada dende a CIG volveuse a insistir tanto verbalmente como por escrito en que había que convocar o Comité de Seguridade e Saúde e propúxoselle ao Concello unha serie de puntos na orde do día, aí tedes a solicitude realizada polo delegado de prevención da CIG:

Solicitude comité seguridade e saúde.pdf by cigconcellobetanzos

Onte mesmo e para mañá o Concello acaba de convocar o Comité de Seguridade e Saúde para tratar os temas solicitados por parte da CIG, ademais, de algún outro que xa levaba meses pendente. Para alén de que o Concello terá que dar conta das avaliacións de riscos laborais e os plans de prevención de riscos laborais pendentes, trataranse especialmente as deficiencias dalgúns centros de traballo, como nomeadamente as condicións infrasaudables da Oficina de Turismo, un espazo de traballo sen servizo, sen saída de urxencia, con escasa iluminación e uns niveis de humidade pouco recomendables para a saúde de calquera traballador. Outro tema fundamental será que no local de Obras clausurado  logo da visita da Inspección de Traballo segue entrando persoal e que temos serias dúbidas sobre que as condicións de traballo do pintor e da situación dos produtos tóxicos (hai que lembrar que o Concello tamén tivo que trasladar ao pintor logo de que Inspección visitase as instalacións de Bellavista) sexa a máis adecuada. Os vestiarios, ou máis ben, a falta deles en moitos servizos que o deberían ter será outra das reclamacións e a necesidade de comezar coas análise psicosociais, un tema sobre o que nunca se ten tratado neste Concello e que consideramos de máxima importancia tendo en conta como a mala organización do traballo, especialmente nalgúns departamentos, está a repercutir na saúde do persoal.

Convocatoria Comité de Seguridade e Saúde outubro 2014.pdf by cigconcellobetanzos

Se algo está claro é que neste ámbito aínda se están a dar os primeiros mais necesarios pasos, mais tamén está claro que ao resto dos sindicatos non lles debe interesar moito porque de non ter ido a CIG en varias ocasións á Inspección de Traballo hoxe nin estaría constituído o Comité de Seguridade e Saúde nin se estaría comezando a falar deste tema tan importante, porque a fin de contas, ninguén pode discutir a importancia da seguridade e a saúde no traballo.

Presentada unh nova denuncia na Inspección de Traballo

Logo de que o Comité de Seguridade e Saúde leve máis de tres meses sen reunirse, tal e como debería segundo indica a Lei 31/1995 de prevención de riscos laborais; logo tamén de que os delegados de prevención da CIG  solicitaran no pasado mes de abril que se reunise o devandito Comité sen éxito ningún e sen que nin sequera o Concello se puxese en contacto cos delegados de prevención desde hai case máis dun mes; nos pasados días decidiron acudir de novo á Inspección de Traballo.

Na denuncia presentada na Inspección Provincial infórmase ao ente de que os delegados de prevención da CIG do Concello de Betanzos denuncian ao responsable de recursos humanos e/ou de prevención de riscos laborais do Concello porque o Comité de Seguridade e Saúde, constituído xa o 26/04/2012 logo doutra denuncia na Inspección provincial, porque xa o goberno municipal teimaba en non constituílo daquela, debe reunirse, como mínimo, cada tres meses e de forma repetida dende o ano 2012 son os delegados de prevención os que instan ao Concello cada vez que é procedente para que reúna o devandito órgano e este faino moito tempo despois e case sempre fóra de prazo.

Parece que ao Concello tanto lle teñen os apercibimentos da Inspección provincial que avalan o traballo dos delegados de prevención da CIG, obviamente iso significa que tanto lle ten a seguridade e a saúde laboral do persoal, como sempre se di "ata que non pase nada" mais á CIG si que nos importa porque consideramos que é crucial que as condicións de traballo do persoal en materia de seguridade e saúde sexan as óptimas e o Concello tome conciencia disto, por iso, se ao goberno non lle importa, acudiremos as veces que sexa necesario á Inspección provincial para que teña coñecemento do que pasa nesta Administración local, que por moi forte que soe constituíu un Comité de Seguridade e Saúde por primeira vez no ano 2012 e a instancias da CIG, cando a Lei que obriga á existencia deste organismo encargado de velar pola seguridade e saúde do persoal é do ano 1995... coidamos que con este dato cómpre non dicir máis nada, fala por si só.

Solicitan que se reúna o Comité de Seguridade e Saúde, a obrigada reunión trimestral debeu realizarse no mes de abril

Máis unha vez, e xa por non perder os malos hábitos, pasou o mes de abril, onde tocaba reunión do Comité de Seguridade e Saúde e o Concello non o convocou, máis unha vez tamén os delegados de prevención da CIG víronse na obriga de rexistrar unha solicitude para que o Concello fixase a data da obrigada reunión.

No escrito proponse que os temas que se traten nesta reunión do Comité de Seguridade e Saúde sexan:

1. Avaliacións de riscos e plans de prevencón pendentes.
2. Condicións de certos locais.
3. Carga laboral
4. EPIS (Indumentaria para maquinaria perigosa)

E lémbraselle ao Concello que a última reunión tivo lugar o pasado 23 de xaneiro e que, como mínimo, o devandito Comité debe reunirse cada tres meses.

Igualmente, xa no mes pasado, os delegados de prevención da CIG informaron ao Concello de que a Oficina de Turismo non cumpre o establecido na Lei de Prevención de Riscos Laborais no relativo ás condicións de lugares de traballo, e, igualmente, nas oficinas de Servizos Sociais, facendo referencia específica ao problema do ruído que fai a calefacción e sobre o que teñen recibido queixas do persoal polas consecuencias que isto provoca. 

Os compañeiros de prevención están á espera de que se fixe a reunión do Comité de Seguridade e Saúde para poder ir avanzando neste e noutros temas relativos á saúde e a seguridade laboral do persoal do Concello de Betanzos.

A Inspección de Traballo apercibe ao Concello polas irregularidades das obras da Casa Consistorial

A Inspección de Traballo vén de lle responder aos delegados de prevención da CIG con respecto á denuncia realizada polas obras que se levaron a cabo hai uns meses na Casa Consistorial. No informe remitido a Inspección provincial constata o incumprimento da normativa vixente en materia de prevención de riscos laborais por parte do Concello e procede á requirir ao Concello para que non volva incorrer nestas irregularidades, e textualmente indica:

"O Concello non levou a cabo a o intercambio de información coa empresa subcontratada para a execución dos traballos de pintura, sen proceder, así mesmo, a avaliar os riscos que ditas actividades supoñían para os traballadores do Concello, que desenvolvían simultaneamente as súas actividades laborais neste. Sen que procedese tampouco a informar debidamente aos delegados de prevención sobre os riscos existentes e medidas correctoras a adoptar."

Recomendámoslle aos responsables da prevención de riscos laborais deste Concello algunhas lecturas sobre a coordinación de actividades empresariais como esta e estoutra, non estaría mal que no ano 2014 se comece a aplicar a Lei 31/1995 de prevención de riscos laborais case vinte anos despois.

Resposta IT Obras Casa Consistorial by cigconcellobetanzos

Convocatoria da Inspección de Traballo ao Comité de Seguridade: ausencia de UGT e CSIF e reproches á actuación do Concello por parte da autoridade laboral

O pasado venres a Inspección de Traballo provincial convocou a todo o Comité de Seguridade e Saúde do Concello de Betanzos con motivo da denuncia realizada polos delegados de prevención da CIG con respecto ás obras realizadas na Casa do Concello.

En primeiro lugar, o panorama que atopou a delegada de prevención da CIG pode considerarse unha imaxe do que está a acontecer a nivel sindical neste Concello, tanto UGT como CSIF ignoraron abertamente a convocatoria da Inspección de Traballo non asistindo e deixando co cú ao aire aos traballadores que supostamente representan, ademais a non asistencia é un apoio implícito á empresa, neste caso o Concello, e un aval á súa política en materia de seguridade e saúde, é dicir, case que escusan volver ás reunións do Comité de Seguridade e Saúde facer o paripé cando a máxima autoridade laboral no tema os convoca por un problema do Concello e deciden non asistir.

Se a isto lle sumamos que nin un só dos membros do Comité por parte do Concello se dignou asistir redondeamos o panorama ata caer na conta de que a saúde e a seguridade do persoal laboral do Concello non lle importa nin o máis mínimo a esta Administración local, nin ao concelleiro de Persoal nin ao propio alcalde. Por parte do Concello enviaron a un compañeiro funcionario que nin é do Comité de Seguridade e Saúde nin estaba informado sobre o tema, o que nos parece isto, se é posible, aínda máis vergoñento, é que o goberno municipal utilice aos traballadores públicos para dar a cara por eles cando non son quen de facer ben o seu traballo e se agoche nos seus despachos no canto de dar a cara diante da autoridade laboral.

Ante este panorama, a compañeira delegada de prevención e o asesor nesta materia da CIG asistiron a unha reunión onde o Concello tiña que presentar o libro de visitas, o Plan de Coordinación de prevención de riscos laborais coa empresa subcontratada e o informe de información presentado aos delegados de prevención antes de comezar a obra (nunca tal viron diante). Logo de que o Concello, a pesar de enviar un representante, nin sequera levase a documentación solicitada e á vista das fotos achegadas pola nosa delegada de prevención os métodos de seguridade e prevención non parecían ser os adecuados, a Inspección quedou con todas as probas gráficas que demostraban diversas eivas no desenvolvemento das obras e mais co informe elaborado por esta sección sindical con respecto a estas.

Á espera da resolución da Inspección de Traballo, nesta reunión o que quedou claro por parte da inspectora que levou o caso foi o seu rexeitamento á actuación do Concello con respecto a estas obras, e mesmo a súa advertencia sobre que no caso de que houbese algún accidente laboral nunha obra desas características este podería chegar a ter consecuencias penais para o goberno municipal.

Dende a Sección sindical da CIG temos claro que o tema da saúde e a seguridade laboral é crucial para os traballadores aínda que realmente en ocasións só se repare nel cando hai consecuencias logo de ter mal feitas as cousas, e por iso seguiremos dando todos os pasos necesarios nesta liña, porque neste Concello hai moitísimo traballo por facer, e queremos agraceder o traballo realizado polos delegados de prevención neste e noutros casos, porque é un traballo constante e onde os froitos se ven aos poucos, mais que en casos coma este, deixa claro que é un traballo moi necesario neste Concello.

A Inspección de Traballo convoca a todo o Comité de Seguridade e Saúde do Concello de Betanzos

Mañá, venres 10 de xaneiro, está convocado todo o Comité de Seguridade e Saúde do Concello de Betanzos na Inspección provincial de Traballo con motivo da denuncia dos delegados de prevención da CIG con respecto a realizar as obras na Casa Consistorial co persoal traballando nas oficinas, a maiores os delegados de prevención descoñecen o Plan de coordinación de actividades empresariais en materia de seguridade e saúde laboral para a prevención de riscos laborais que o Concello debe ter coas empresas que subcontrata.

Dende a Lei 31/1995 de prevención de riscos laborais ata o Real Decreto 171/2004 recóllense normas onde se tratan os supostos onde é necesaria a coordinación de actividades empresariais e os medios que deben establecerse con esta finalidade, buscando sempre un adecuado equilibrio entre a seguridade e a saúde dos traballadores e a flexibilidade na aplicación por parte das empresas que incida na redución dos indesexados índices de sinistralidade laboral, producidos pola carencia desta coordinación. Non é a primeira vez que neste Concello hai accidentes laborais de persoal subcontratado, hai que lembrar o episodio recente acontecido no Centro de Formación Ocupacional, de aí a importancia de que o Concello teña coordinada a prevención de riscos laborais coas empresas que subcontrata, cando en casos coma este, persoal doutra empresa traballa en edificios municipais.

A maiores, xa no mes de decembro debeu reunirse o Comité de Seguridade e Saúde e unha vez máis o Concello saltouse a reunión trimestral e os delegados de prevención da CIG víronse na obriga de solicitalo por escrito de novo, tal e como fixeron por rexistro hai unhas semanas e reunión pola que aínda están á espera, aínda que con expectativas de non ter que volver á Inspección de Traballo denunciar que o Comité de Seguridade e Saúde do Concello de Betanzos non se reúne trimestralmente e incumpre a Lei de prevención de riscos abertamente.

A CIG presenta unha denuncia da Inspección de Traballo pola situación do persoal da Casa Consistorial

A Confederación Intersindical Galega vén de presentar unha denuncia na Inspección de Traballo logo de que o Concello siga sen tomar ningunha decisión con respecto aos traballadores da Casa Consistorial, despois mesmo de presentar unha queixa por rexistro e achegarse un delegado de prevención a falar co concelleiro de Persoal.

A situación dende comezos desta semana foi a peor porque as obras cada vez comprenden unha maior parte do edificio e o traslado provisional dalgunha traballadora para o segundo andar non exime ao Concello de todos os atrancos para chegar aos postos de traballo que fan que andar pola Casa do Concello case sexa unha xincana. A maiores, o persoal ten que pasar por debaixo dun andamio e sortear os obstáculos e os perigos de caída de obxectos que supoñen unhas obras como as que se están a realizar, aínda por riba de que están a respirar o pó e os produtos tóxicos propios dunha obra destas características e todo isto sumado a que a negativa de cubrir as baixas en limpeza supón un estado de sucidade do edificio pola falta de persoal. O Concello nin sequera foi quen de acceder á proposta dos delegados de prevención de que as obras se realizasen fóra do horario laboral e acceder ao segundo andar está sendo un risco non só para o propio persoal senón tamén para a cidadanía que se achega a este edificio a realizar diversas xestións.

A maiores, o Concello ten a responsabilidade por velar que se cumpra a lexislación vixente en materia de prevención de riscos das empresas que contrata e temos serias dúbidas de que isto se estea a facer correctamente. Tampouco é a primeira vez que isto acontece, lamentablemente temos exemplos dabondos de como neste Concello a seguridade laboral dos seus traballadores é algo que non lle debe importa moito ao goberno local.

Por parte da CIG e, polo momento, tendo en conta que o Concello mantén a súa postura, demos todos os pasos que estaban na nosa man, agora só queda que a Inspección de Traballo actúe e tome cartas no asunto se considera que é necesario. En todo caso consideramos que o normal e razoable nun caso así sería que o Concello tivese unha previsión das obras, informase aos persoal do edificio e o trasladase provisionalmente mais o certo é que tendo en conta como traballan algúns compañeiros en naves que practicamente caen a cachos como é a do Centro de Formación Ocupacional na que traballa o pintor e que o Concello, logo de mesmo falalo no Comité de Seguridade e Saúde segue sen arranxar tampouco nos estraña nada que non tome cartas no asunto do persoal da Casa Consistorial, porque neste Concello parece que non se actúa ata que pasan as cousas.

Condenados cinco empresarios pola morte dun obreiro que caeu de 4 metros

Un xulgado de Palma condenou a cinco empresarios do sector da construción a un ano de prisión por un grave accidente laboral acontecido no verán de 2006 nun chalé en obras en Bendinat (Calvià) no que un obreiro sufriu unha caída dende catro metros de altura que lle custou a vida.

A vítima, un oficial de primeira de 49 anos, faleceu no hospital de Son Dureta pouco despois de ingresar en estado crítico. O operario precipitouse por un oco dende o primeiro piso ao chan da planta baixa da vivenda. Sufriu graves lesións como un traumatismo cranioencefálico e torácico que lle produciron a morte.

O burato non contaba coas medidas de protección e de seguridade pertinentes. Ademais, segundo o fiscal, non se utilizaron arneses ante o risco de caída, xa que non estaban a disposición dos empregados e tampouco existía un punto de ancoraxe fixa.

Os cinco imputados, dous construtores, dous promotores e un contratista dunha empresa de carpintaría, aceptaron onte ante o maxistrado do xulgado do penal 4 de Palma, Juan Manuel Sobrino, penas que suman un ano de cárcere por un homicidio imprudente e un delito contra os dereitos dos traballadores. Esta condena substitúese por unha multa. Ademais, os cinco empresarios foron inhabilitados para desempeñar a súa profesión durante o tempo da condena.

O xuíz apreciou as circunstancias atenuantes de dilacións indebidas, xa que o sinistro se produciu en 2006, e a de reparación do dano, xa que os familiares do falecido xa foron indemnizados.

Os feitos tiveron lugar o 7 de xullo de 2006 nun chalé en obras, situado na avenida Mallorca de Bendinat, en Calvià. Sobre as doce do mediodía, dous traballadores estaban sobre unha plataforma metálica de traballo e uns taboleiros, enriba dun oco, para observar a perspectiva da tarefa realizada, que consistía no revestimento con pranchas de madeira do oco do ascensor. Un dos operarios, de 49 anos, deu uns pasos atrás para mirar mellor o traballo efectuado, de costas a unha zona que quedara desprotexida. Así, precipitouse por un oco á planta baixa dende 4,20 metros de altura. Tras as graves lesións sufridas na caída, a vítima morreu. Os traballadores anteriormente desmontaran uns valos de seguridade para poder traballar no lugar.

Fonte:www.cigsaudelaboral.org