BOAS FESTAS!

DENDE A SECCIÓN SINDICAL DA CIG DO CONCELLO DE BETANZOS QUEREMOS ACHEGARVOS OS NOSOS MELLORES DESEXOS PARA UNHAS FELICES FESTAS E UN VENTUREIRO ANO 2013.

Paga extra e aplicación do Decreto 20/2012

Dende o pasado 15 de outubro, a través dunha instrución do Ministerio de Facenda, foi de coñecemento público que as Administracións locais tiñan unha ferramenta de aplicación deste decreto que dilucidaba o seu alcalce e botaba luz os límites do roubo da paga extra. O Concello de Betanzos en varias reunións cos representantes dos traballadores asegurou que neste Concello a aplicación do Decreto ía supor que practicamente ningún traballador tería a devandita paga mais finalmente tívose que desdicir posto se viu na obriga de lle pagar toda ou unha parte da paga a algo máis de vinte traballadores.

O Comité de Empresa, por iniciativa da CIG, solicitou unha reunión co concelleiro de Persoal para aclarar este e outros temas e rexistrou varios escritos para recompilar información aos que o Concello deu a calada por resposta ocultando unha vez máis datos que en realidade deberían ser de coñecemento público, principalmente porque amosan a miseria dos salarios do persoal laboral deste Concello, que non chega aos 13469 euros brutos anuais que marcaba a instrución de Facenda, é dicir, o cómputo anual de 1,5 veces o salario mínimo. Dende o momento que o decreto viu a luz en todas as administracións falouse de que practicamente era inexistente o persoal ao que non lle roubarían a paga extra mais o persoal laboral do Concello de Betanzos do grupo 5, mais tamén mesmo algún do grupo 4 e 3 resulta unha triste excepción debido aos baixísimos salarios dos laborais que demostran unha vez máis, as graves discriminacións perpetuadas ao longo de anos entre laborais e funcionarios neste Concello.

Igualmente logo de que o Comité de Empresa e varios compañeiros e compañeiras solicitasen por escrito a regularización do IRPF que se debería ter aplicado dende o momento que se publicou o decreto 20/2012 o Concello regularizou o IRPF na nómina do mes de novembro o que provocou as pertinentes consecuencias na nómina e que, nun principio, debería tamén aplicarse na nómina do mes de decembro.

Abrindo camiños n.º 22 decembro 2012

Voceiro n.º 22

Reunións de cara a comezar a negociación dunha nova Relación de Postos de Traballo

Dende o momento que o persoal deste Concello foi quen coas súas alegacións de paralizar a aprobación dunha Relación de Postos de Traballo inxusta, arbitraria e que non facía máis que ser debedora das irregularidades perpetuadas ao longo dos anos neste Concello en materia de persoal comezamos a reclamar dende a CIG o inicio dun verdadeiro proceso de negociación que tivese en conta a todos os axentes implicados e cunha verdadeira vontade de cambio e renovación das caducas políticas discriminatorias que non facían máis que afondar nas diferenzas entre laborais e funcionarios.

Nos pasados días o concelleiro de Persoal púxose en contacto connosco para que mantivésemos unha reunión os representantes dos sindicatos con representación de cara a achegarmos posturas para a negociación nunha Mesa Xeral. Dende a CIG xa acordamos a data da reunión e non temos problema ningún, como nunca o tivemos, en expor a nosa postura publicamente, non obstante, logo de manter unha reunión co concelleiro de Persoal parécenos que o Concello intenta escorrer o vulto e minimizar a súa responsabilidade nesta cuestión motivo polo que temos claro que podemos falar todo o que queiramos entre os representantes sindicais que mentres o Concello non caia da burra, tenda a man e teña unha verdadeira vontade de negociación todo seguirá inmóbil. Aínda se algo temos claro é que unha casa non se pode comezar polo tellado e rexeitamos de raíz a proposta de RPT que o Concello presentou hai meses agás que haxa unha vontade de mudanza de case a totalidade desta, porque non podemos aceptar algo que foi rexeitado pola maior parte do persoal deste Concello que amosou o seu descontento presentando as súas alegacións.

Unha RPT en condicións pasaría por un organigrama coa súa xerarquía, a clara definición das titulacións e as funcións e un sistema de valoración dos postos transparente que dese como resultado a valoración económica correspondente en cada caso e non como parece neste Concello, que primeiro se asignaron os complementos específicos e logo buscáronselle funcións a certo postos para intentar xustificaren os seus salarios, ou, cando menos, iso é o que parece á vista da RPT vixente e da que o Concello pretendía aprobar hai uns meses. En todo caso dende a CIG reiteramos a nosa vontade de negociación e a necesidade dunha nova Relación de Postos de Traballo mais isto non supón en ningún caso que haxa que dobregarse ante quen pretende coller a xustiza pola súa man e logo querer parecer a vítima aínda que en realidade sexa o verdugo.

Actualidade

Rajoy imita a Feijóo e endurece os recortes aos funcionarios que falten ao traballo

Nova tirada do xornal dixital Praza Pública

Os empregados públicos perderán a metade do soldo daqueles días soltos que non vaian traballar, aínda que sexa de maneira xustificada. Segundo adianta La Información, o Goberno vén de introducir no trámite de emendas do Senado ao proxecto de Orzamentos unhacláusula que permitirá ás Administracións reter aos funcionarios medio soldo de cada día que se ausenten do traballo por unha continxencia ou enfermidade que non se converta nunha incapacidade temporal e, polo tanto, que non supere os tres días de baixa. Deste xeito,o Executivo de Rajoy segue a senda marcada por Núñez Feijóo na Lei de Medidas Temporais en Determinadas Materias do Emprego Público de hai cinco meses.

Naquela reforma legal da Xunta, tramitada pola vía de urxencia, incluíuse unha forte rebaixa nas percepcións salariais dos funcionarios e empregados públicos cando se ven afectados por unha continxencia común que lles impide acudir ao seu posto de traballo con normalidade. Así, por exemplo, cando unha gripe ou outro tipo de enfermidade leve ou un accidente de tráfico sen consecuencias graves os obriga a coller unha baixa ven como entre o primeiro e o terceiro día o complemento por incapacidade queda no 50% se é a primeira baixa do ano, no 40% se é a segunda e, directamente, no 0% se é a terceira. Do cuarto ao vixésimo día este complemento sitúase no 75% tras o recortes e, de aí en diante, no 100%.

O Goberno central establecera uns límites segundo os cales do primeiro ao terceiro día de baixa o complemento de incapacidade ten que chegar ao "máximo do 50% das retribucións". Do cuarto ao vixésimo Rajoy outórgaballe liberdade a cada Administración, sempre e cando non superase o 75%. Dende o vixésimo día e ata o nonaxésimo -limiar a partir do cal entran en xogo outras normativas- "poderase recoñecer a totalidade das retribucións básicas, da prestación por fillo ao cargo, no seu caso, e das retribucións complementarias". A Xunta revelárase daquela como unha alumna aventaxada nesta materia, xa que o Estado non restrinxía nin chegaba a eliminar a retribución nos primeiros tres días de incapacidade se non se trata da primeira baixa do ano. Agora, o Goberno de Rajoy decide ir máis aló e copiar o modelo instaurado polo Executivo galego de Feijóo, nunha imitación que non é única. A reforma educativa que prepara o ministro Wert segue, no plano lingüístico, a vía marcada pola Administración galega co seu decreto do plurilingüismo.Actualmente, as baixas episódicas por un arrefriado, accidente doméstico ou causas persoais non supoñen unha redución da nómina dos funcionarios, xa que o custo é cuberto na súa totalidade polo pagador, a Administración, independentemente dos días de baixa que se xunten. Na empresa privada, agás excepcións, non adoita acontecer.

O Comité solicita unha vez máis que se retome a negociación do convenio de novo

Logo de que o Concello de Betanzos leve cinco meses sen convocar a Comisión Negociadora do Convenio colectivo do persoal laboral e que, por tanto, a negociación estea paralizada, o Comité de Empresa acordou na súa reunión ordinaria do mes de novembro instar ao Concello a que retomase a negociación e así o fixo a finais do pasado mes, a día de hoxe, seguimos sen resposta. 

O Comité, pois, solicitou por rexistro que se retome a negociación do convenio coa máxima brevidade posible logo de que a Comisión Negociadora leve dende o pasado mes de xuño sen reunirse e informou ao Concello de que mantén a proposta de Convenio presentada inicialmente polo Comité aínda que tendo en conta as posibles modificacións que esta pode sufrir ao abeiro das mudanzas lexislativas dos últimos meses e entendendo que as últimas propostas de modificación deste texto achegadas polo Concello débense negociar, como procede, na Comisión negociadora do convenio colectivo.

O certo é que coas últimas reformas lexislativas haberá que adaptar a proposta dos traballadores mais isto non é máis que froito do desdeixamento dun Concello que leva un ano adiando a negociación do convenio, denunciado xa o ano pasado e que podía estar xa máis que negociado, acordado e aprobado se houbese vontade para facelo, como sempre, parece que isto é o que falla neste Concello.

Falta de información: costumes que son difíciles de abandonar

A comezos deste mes o Concello distribuíu a información sobre as axudas sociais mais dun xeito bastante irregular posto que esta non chegou a todos os xentros de traballo. Esta falta de información que nos trasladaron varios traballadores motivou que o Comité de Empresa xa rexistrase dúas queixas para que o Concello subsanase estes erros coa maior brevidade posible. O certo é que ao Concello lle custa acostumarse a facer as cousas como debera e tratar a todo o persoal por igual, posto que se así fose non "esquecería" algúns centros de traballo cando ten a obriga de informar a todos os traballadores e traballadoras por igual.

Non hai que esquecer que non foi sen tempo nin traballo por parte do Comité de Empresa que o Concello por fin aplicase as bases vixentes dende había dez anos e publicase a convocatoria das axudas. Boa mostra de que a información non chegaba a todo o persoal foi que logo de informarmos publicamente e que días despois o Concello fixese o mesmo, as solicitudes do persoal laboral aumentaron de xeito considerable e por primeira vez a partida orzamentaria foi insuficiente a pesar de que nos últimos anos o Concello cada vez ten menos persoal por culpa das continuas privatizacións. A isto había que sumarlle a negación do dereito a solicitar axudas que moitos compañeiros e compañeiras que non ocupan postos na RPT padeceron dunrante anos por culpa dunha perversa interpretación do convenio colectivo que motivaba e aínda motivo múltiples discriminacións entre os traballadores tendo en conta o tipo de contrato e vulnerando abertamente o artigo 15.6 da Lei do Estatutodos Traballadores.

A maiores de que a información non foi distribuída en todos os centros de traballo, o Comité de Empresa tamén se viu na obriga de presentar unha queixa pola distribución, xunto coa solicitude e a convocatoria de axudas sociais, de publicidade dunha clínica privada que acompañaba a documentación. No escrito presentado por rexistro solicítase información con respecto ao acordo coa empresa privada Asisa da que o Concello distribuíu publicidade, xunto coa documentación correspondente á convocatoria de axudas sociais na maioría dos departamentos do Concello, posto que nos taboleiros municipais destinados á información dos traballadores estaba colgada a publicidade da devandita empresa cunha unha oferta especial para o Concello de Betanzos e que en ningún momento o Comité de Empresa nin a Mesa de Negociación tivo coñecemento da devandita oferta nin a valorou a fin de controlar a publicidade de empresas privadas que se expón nos taboleiros de información aos traballadores e que son o único espazo público que teñen os traballadores deste Concello para se informar. Ademais, o Comité solicitou que se retirase esta información da devandita empresa dos taboleiros de información dos empregados do Concello e que non se distribuíse xunto coas convocatorias públicas destinadas ao persoal do Concello de Betanzos ningunha información de empresas privadas en canto estas ofertas e posibilidades non sexan valoradas por todos os axentes implicados.

A Alianza Social Galega chama a cidadanía a concentrarse o 20 de decembro nas principais cidades e comarcas galegas

As máis de 60 entidades que conforman a Alianza Socia Galega fixeron esta mañá, en rolda de prensa, un chamamento a participar nas mobilizacións convocadas para o vindeiro xoves, día 20 de decembro, nas principais cidades e cabeceiras de comarca. Mobilizacións coas que se queren denunciar as políticas antisociais que está a adoptar o goberno do PP e entre as que salientaron a non revalorización das pensións, os recortes na sanidade e no ensino públicos e a contrarreforma ideolóxica que representan a LOMCE ou Lei de taxas xudiciais. Como parte das reivindicacións tamén estará a esixencia de reformar da normativa hipotecaria para pór fin ao drama dos desafiuzamentos e lograr a dación en pagamento.

A convocatoria foi presentada polos secretarios xerais da CIG, Suso Seixo; de UGT, José Antonio Gómez e CCOO, Xosé Manuel Sánchez Aguión, así como por representantes doutras organizacións integrantes na Alianza.

O secretario xeral da CIG, Suso Seixo denunciou que todas as medidas que se veñen impoñendo, lonxe de axudar a saír da crise, teñen provocado un incremento do desemprego, da precariedade e da exclusión social e lembrou que as previsións para os próximos anos non permiten tampouco ser moi optimistas.

Alén diso, subliñou que o PP está a proveitar a crise para introducir o modelo ideolóxico “da dereita máis reaccionaria do Partido Popular”. Un modelo que cualificou de “inxusto, clasista e centralista”.

A modo de exemplo, sinalou o Anteproxecto de Lei Orgánica de Mellora da Calidade Educativa (LOMCE), do que dixo que favorece o ensino privado-concertado mentres castiga o público, favorecendo a quen ten máis poder económico e co obxectivo de restar competencias ás comunidades autónomas.

Do mesmo xeito, subliñou que as reformas que se pretenden introducir na xustiza nada teñen que ver coa crise. “Teñen tamén o obxectivo de dificultar o acceso a ela por parte das persoas máis desfavorecidas, facendo a xustiza máis elitista e clasista”, dixo.

Ante esta situación, o secretario xeral da CIG denunciou o retroceso non só das condicións laborais e sociais da poboación, senón tamén dos dereitos e liberdades. Alertou de que se no estado español non medran as forzas de extrema dereita no estado español, como ocorre no resto dos países da periferia europea máis afectados pola crise, é porque “están dentro do PP” e apuntou os “tics típicos da época franquista” que se poden apreciar claramente na LOMCE: desde os ataques ás linguas propias até o relevante papel que se lle confire no ensino á igrexa católica, favorecendo ademais aos sectores económicos máis poderosos e acomentendo un proceso de recentralización sen precedentes nos últimos 30 anos.

As mobilizacións previstas son:

CONCENTRACIÓNS 20 DE DECEMBRO DE 2012
COMARCA	LOCALIDADE	LUGAR	HORA
A CORUÑA	A CORUÑA	Delegación do Goberno	19:30
FERROL	FERROL	Edificio da Xunta de Galicia	19:30
SANT-BARB	SANTIAGO	Praza de Galicia	19:30
LUGO	LUGO	Subdelegación do Goberno	20:00
A MARIÑA	BURELA	Praza da Mariña	20:00
OURENSE	OURENSE	Subdelegación do Goberno	19:30
PONTEVEDRA	PONTEVEDRA	Subdelegación do Goberno	19:30
AROUSA	VILAGARCÍA	Praza de Galicia	20:00
VIGO	VIGO	O Marco (rúa do Príncipe)	20:00

 Tes toda a informacion www.galizacig.com

APLICACIÓN DA INSTRUCIÓN DO MINISTERIO DE FACENDA CON RESPECTO AO DECRETO 20/2012 NO QUE TEN A VER CO ROUBO DA PAGA EXTRA

Moito se ten falado nos últimos tempos do que supón o roubo da paga extra para os empregados públicos que vén imposto polo Decreto 20/2012 de xullo e que está a ser interpretado na busca de solucións alternativas a esta perda de poder adquisitivo que supón dependendo da vontade dos distintos gobernos municipais e autonómicos.

O pasado 15 de outubro dende o Ministerio de Facenda emitiron unha “Instrución conxunta da Secretaría de Estado das Administracións Públicas e da Secretaría de Estado de orzamentos e gastos para a aplicación do Título I do Real decreto-Lei 20/2012, de 13 de xullo, de medidas para garantir a estabilidade orzamentaria e de fomento da competitividade no ámbito do sector público estatal.” que facilita a aplicación do devandito decreto nas administracións e que pretendía botar luz sobre algúns dos problemas que podían derivar da interpretación do propio decreto.

Dende ese momento foi de coñecemento público que as Administracións locais tiñan unha ferramenta de aplicación deste decreto que dilucidaba o seu alcalce e botaba luz os límites do roubo da paga extra. O Concello de Betanzos en varias reunións cos representantes dos traballadores asegurou que neste Concello a aplicación do Decreto ía supor que practicamente ningún traballador tería a devandita paga mais parece que nos vindeiros días se terá que desdicir se cumpre o que esta instrución indica. O Comité de Empresa xa solicitou unha reunión co concelleiro de Persoal para aclarar este e outros temas mais entre tanto dende o Departamento de Persoal indícase que parece que si que se vai aplicar esta instrución que suporá que algúns traballadores e traballadoras perciban unha parte desa paga por non superar o salario bruto máximo en cómputo anual que se indica; na práctica isto afectaralle en distinta medida a algún persoal laboral do grupo 5, sempre dependendo de factores como a antigüidade ou os complementos específicos que repercuten en maiores ou menores retribucións brutas anuais. Con respecto a isto o propio Decreto indica o seguinte:

“A única excepción que contén o Real-decreto lei á supresión da paga extraordinaria ou equivalente no mes de decembro de 2012, é a non aplicación da dita medida aos empregados citados nos apartados anteriores cuxas retribucións por xornada completa, excluídos incentivos ao rendemento, non acaden en cómputo annual 1,5 veces o salario mínimo interprofesional establecido no Real decreto 1888/2011, de 30 de decembro.

Por tanto, atendendo á finalidade da norma, a redución da paga extraordinaria do mes de decembro só se aplicará a aqueles empregados cuxo salario, referido a xornada completa e en cómputo annual, sexa de 13.469,4 euros (8979,70x1,5) ou superior, sen que, unha vez aplicada a devandita redución, o salario resultante poida ser inferior a eses 13.469,4 euros.”

Enténdese, pois, da devandita instrución, que haberá traballadores que cobren unha parte da paga extra ata acadar ese límite salarial marcado, mais o que non se entende é que o Concello a 13 de decembro siga coa boca calada sobre este tema, non informase aos representantes do persoal logo de afirmar en varias ocasións que lle afectaba a todo o persoal o roubo da paga polo límite imposto polo decreto e que mesmo se informe dun xeito bastante velado ao persoal que podería estar beneficiado pola aplicación do Decreto coas directrices desta instrución. É posible tamén que para o Concello isto careza de importancia porque, nun principio, o persoal funcionario non se vería afectado, mais o certo é que para algúns traballadores e traballadoras si que a ten, por iso agardamos que nos vindeiros días o Concello informe a todos os afectados, no caso de que os haxa, e tamén aos representantes do persoal sobre a posible execución desta instrución do Ministerio de Facenda no Concello de Betanzos

Podes consultar a instrución completa aquí:

Instrución Facenda aplicación Decreto 20/2012

Temas pendentes

Logo da readmisión da cinco compañeiros do GRUMIR após que a xustiza determinase que os despedimentos que o Concello efectuou no pasado mes de febreiro eran improcedentes o Concello aínda ten débedas pendentes neste caso. 

Por unha banda, a pesar de que o Concello se comprometeu a pagarlles os salarios de tramitación adebedados ao pouco da readmisións a día de hoxe, tres meses despois, isto aínda non aconteceu, e o que é peor, o Concello non foi quen de emendar os orzamentos que pesentou inicialmente cando xa tiña varias sentenzas enriba da Mesa e que foron aprobados de xeito definitivo cando estes traballadores xa estaban reincorporados. O Concello fixo moi mal o seu traballo en todo o que ten a ver coa readmisión deste persoal e a día de hoxe isto pode supor que se soliciten as execucións das sentenzas por vía xudicial xa que o Concello non é quen de amañar as súas propias desfeitas de motu propio.

Por outra banda, o Concello ten sobre a mesa xa hai un tempo unha outra sentenza doutro compañeiro que indica que o seu despedimento tamén foi improcedente, e que non foi recorrida pola Administración e, por tanto, enténdese que procede a readmisión, mais o certo é que os meses pasan, o traballador segue na casa e o Concello non fai máis que amorear débedas que antes ou despois terá que saldar.

A maiores de todo isto os orzamentos que se aprobaron hai uns días de xeito definitivo parecen non reservar ningunha partida específica para todo o que ten a ver con estas readmisións o que podería supor a presentación, no caso de que así sexa, dun recurso ante do Tribunal Superior de Xustiza de Galiza, tal e como indica a propia publicación do BOP, nos dous meses seguintes á publicación da aprobación definitiva dos orzamentos.

Aberto o prazo para solicitar as axudas sociais de 2012

Ata o vindeiro 31 de de decembro o persoal laboral e o funcionariado do Concello de Betanzos pode rexistrar as súas solicitudes de axudas socais 2012. A folla de solicitude e mais a convocatoria son as seguintes:

Solicitude Axudas 2012

Abrindo camiños n.º 21, novembro 2012

Voceiro Cig Betanzos 21 Novem..

A CIG denuncia que a lei 10/2012 pon prezo ao exercicio do dereito fundamental á tutela xudicial efectiva

A CIG denuncia que a lei 10/2012 pon en cuestión o Estado de Dereito, ao limitaren o acceso ao dereito fundamental á tutela xudicial efectiva. A central sindical considera que a pretensión de Gallardón e do Partido Popular é dificultar o recurso aos tribunais; recadar dúas veces, unha vía impostos e outra vía taxas (co-pago) e evitar facer os investimentos necesarios para dotar o sistema xudicial dos recursos materiais e humanos necesarios para garantir a mellor atención aos cidadáns.

Fronte á xustificación de Gallardón de que esta lei pretende ser disuasoria, a CIG denuncia que do que se trata é dunha lei excluínte que provocará a renuncia dos cidadáns a entaboar accións xudiciais en reclamación de dereitos individuais e colectivos, polo simple feito de non ter os cartos necesarios para pagar, por adiantado, as taxas xudiciais.

A central sindical considera que con esta medida ponse en cuestión o propio sistema democrático, ao pór prezo ao acceso a un dereito fundamental, como é o dereito á tutela xudicial efectiva, do que só quedarán excluídas as persoas con moi escasos recursos, que son as únicas que terán dereito á asistencia xurídica gratuíta.

Xunto a isto, en concreto o sector de Xustiza da CIG-Administración denuncia ademais que alén de impor esta inxusta medida, o PP aproveita a lei para “crucificar” máis ao persoal público ao exixírenlles a representación e defensa en todas as accións xudiciais en reclamación dos seus dereitos laborais e a imposición do dobre pagamento, en decembro das contías por dereitos pasivos e mutualidades, malia deixaren de percibir a paga extraordinaria.

A CIG rexeita, xa que logo, este e outros recortes de dereitos prantexados polo PP e defende o mantemento dos servizos públicos e dun sistema social e de dereitos cada vez máis en entredito por mor das medidas que se veñen adoptando só pretexto da crise económica.

www.galizacig.com

Lei 10/2012 de Taxas xudiciais

PUBLICADO NO BLOG DE XUSTIZA

Hoxe é un día triste de máis para a cidadanía galega, pois acaba de entrar en vigor a lei de taxas xudiciais que vai provocar a renuncia dos cidadáns a entaboar accións xudiciais en reclamación de dereitos persoais e colectivos polo simple feito de non ter os cartos necesarios para pagar, por adiantado, as taxas xudiciais hoxe fixadas na lei 10/2012.

Este é un novo ataque á cidadanía (e por desgraza non será o último) orquestado polo Partido do Poder (en abreviatura PP) que mellorando o eslogan empregado polo presidente dos EEUU Sr. Obama “Yes We Can” (Nós Podemos) acaba de conseguir o de Nos Podemos...estar, aínda se cabe, máis fodidos.

Estas taxas hoxe fixadas provocarán de feito unha renuncia por parte dos cidadáns a entaboar accións xudiciais de todo tipo en defensa dos seus intereses, polo mero feito de carecer dos cartos necesarios para afrontar o elevado custe das mesmas. O PP acaba de atacar a liña de flotación do estado de dereito ao limitar de xeito tal o acceso a administración de xustiza, un dos piares que mantén o equilibrio entre os tres poderes do estado, favorecendo coa súa actuación o reinado dos poderosos (economicamente falando). ¿Con que nos imos poder enfrontar a unha compañía de seguros, a un banco, etc. nunha reclamación que debería ser igualitaria pero que non o será porque eles terán o poder de “coacción” dos cartos para un arranxo que lles conveña fronte a falta de recursos económicos do reclamante para facer fronte ás taxas dun xuízo xusto.

Non contentos con isto se aproveita esta lei de taxas para crucificar máis aos empregados públicos ao esixírselles a representación e defensa en todas as accións xudiciais en reclamación dos seus dereitos laborais e a imposición do dobre pagamento en decembro das contías por dereitos pasivos e mutualidades, a pesares de deixarse de percibir a paga extraordinaria.

Dende a CIG-XUSTIZA rexeitamos dende fai tempo estes e outros recortes prantexados polo PP, defendendo o mantemento dos servizos públicos e, neste caso concreto, apoiamos e estivemos presentes naquelas concentracións e manifestacións que reivindicaron de xeito activo e expuxeron cara a cidadanía o abuso que se aveciñaba coa aprobación da lei de taxas que non só nos afectaría como cidadáns se non tamén como colectivo de traballadores da administración de xustiza. Por iso insistimos en que os traballadores e os cidadáns temos que lograr perder o medo e aunarnos nunha forza que consiga de xeito colectivo que as cousas muden pola presión popular porque por si soas non van a mudar e cada vez o PP verase con máis forza para para minorar os dereitos dos cidadáns e traballadores.

Axudas sociais 2012, convocatoria e prazos de solicitude

O Comité de Empresa solicitou hoxe por rexistro e logo persoalmente ao concelleiro de persoal que se publicase a convocatoria de axudas sociais do ano 2012, logo de ver que a negociación das bases se está a demorar máis do previsto e tendo en conta que aínda se estan a negociar agora cando o Comité de Empresa entregou a súa proposta no mes de marzo.

A negociación dunhas novas bases entendemos que é un procedemento diferente á convocatoria do ano 2012, posto que as novas bases deberían ser aprobadas en pleno e en ningún caso poderían ter efecto retroactivo se ata o día de hoxe seguen vixentes as bases de 2001, por iso, e ante as preguntas de moitos compañeiros urximos ao Concello a publicación da convocatoria deste ano coa solicitude de ampliación de praza ata finais de decembro para facilitar as xestións dos compañeiros e compañeiras. A maiores, solicitamos que independentemente desta convocatoria cumpría seguir coas negociacións das novas bases de cara a podelas aplicar xa no ano 2013.

Na reunión mantida hoxe mesmo o concelleiro de Persoal amosou a boa dispoñibilidade do Concello a chegar a un acordo con respecto a este tema que tantos problemas supuxo nos pasados meses e comprometeuse coa representación do Comité a que a vindeira semana se publicaría a convocatoria cos novos prazos e tendo en conta as bases vixentes e que nos vindeiros días continuaríase coa negociación das novas de cara a podelas aplicar na vindeira convocatoria a todos os efectos.

Agardamos que nos vindeiros días se achegue a convocatoria a todos os departamentos e que a resolución destas axudas sexa moito máis áxil que na última ocasión, e entre tanto seguiremos nas negociacións por unhas novas bases con criterio social que agardamos que se acorden canto antes.

Axudas Sociais Solicitude Convocatoria

Cadro de persoal de 2008

Se queredes consultar a RPT vixente publicada no 2008 no BOP, podédelo facer aquí:


Orzamento 2008 e RPT

E finalmente non se aprobou a nova Relación de Postos de Traballo

No Boletín Oficial da Provincia de hoxe publícase a aprobación definitiva do orzamento de 2012 nun edicto relativo á aprobación definitiva do orzamento xeral e o cadro de persoal do Concello de Betanzos para o exercicio económico de 2012. No caso da Relación de Postos de Traballo, como o propio edicto indica: 

"O cadro de persoal corresponde co aprobado no Presuposto do exercicio de 2008, que foi publicado no B.O.P. num. 235 de 11 de octubro de 2008"

Dende a Sección sindical da CIG entedemos como un avance que os traballadores e traballadoras desta Administración fósemos quen de parar unha Relación de Postos de Traballo que non facía máis que agravar e afondar en erros do pasado no canto de intentar buscar solucións pola vía do diálogo. Isto, sen dúbida, foi grazas a todos aqueles que por fin se decidiron a amosar abertamente o seu malestar coas políticas de discriminación en materia de persoal que se levan anos producindo neste Concello e a manifestalo cando era o momento. Os traballadores desta Administración exerceron os seus dereitos e puideron ver como realmente con vontade e determinación hai cousas que poden ir mudando, e por moi pequenos que parezan os cambios ou moi miúdos os logros, en Administracións locais como a de Betanzos totalmente enferruxadas no que ten que ver coa xestión do persoal, van abrindo camiños a marchas forzadas.

Igualmente, agardamos que o goberno local recapacite de cara á negociación dunha nova RPT para 2013 e abra canto antes o diálogo para buscar solucións conxuntas aos múltiples problemas que a xestión de persoal vén arrastrando dende hai tempo e intente poñer en práctica o que tanto predicou nos primeiros meses logo da chegada ao Concello.

BOP Orzamento

Unha norma á medida da banca: Real decreto contra os desafiuzamentos

desafiuzamentos-2

Comunicado da Sección sindical

Ante a nota de prensa enviada polo propio Concello con motivo da sentenza de tutela de liberdade fundamental dende a Sección sindical da CIG do Concello de Betanzos queremos deixar constar o seguinte:

1. A bolsa de horas simplemente era unha ferramenta administrativa para xestionar as horas sindicais e que supoñía que cando había unha reunión no canto de entrar cinco solicitudes por rexistro entraba unha soa asinada pola representante da Sección sindical da CIG en nome de todos os delegados correspondentes. Tendo en conta que non todos os delegados e delegadas traballan nas oficinas ata entedemos que era beneficioso para o Concello posto que os compañeiros non se tiñan que desprazar dende os seus postos de traballo ata o Rexistro municipal, só aberto en horario laboral de mañá.
   
   
2. Hai máis dun ano xa que os delegados sindicais da CIG non teñen esa bolsa de horas, dende o momento que a Alcaldía publicou a resolución, e a pesar de interpoñer unha demanda, decidimos non volver facer uso desa bolsa de horas e cada delegado e delegada solicita as súas horas sindicais individualmente, por tanto, a día de hoxe esa sentenza non cambia nada. Isto non impediu, e os feitos así o demostran, que se realice o traballo sindical e é máis, dende o momento que o Alcalde do Concello prohibiu utilizar esta ferramenta tivemos aínda moito máis claro que traballariamos arreo con ou sen dereitos sindicais.
   
   
3. O Concello minte descaradamente e con concoñecemento de causa cando indica que 100 horas desa bolsa recaerían nunha soa delegada porque nunca, en ningún dos meses que existiu a bolsa, as horas recaeron nunha soa delegada, é máis, a maioría dos meses sobraron máis da metade das horas posto que ningún delegado nin delegada as solicitaba todas, e todas e cada unha das solicitudes están rexistradas (non como as de compañeiros da UGT que afirmaban estar nas reunións do Comité de Empresa sen ter rexistradas as horas, así claro que non as gastaban...) e o Concello non pode demostrar documentalmente o que afirma. Ademais resultaría absolutamente imposible que só unha persoa desfrutase de todas as horas sindicais posto que entón o resto de delegados non poderían asistir ás asembleas e comisións do Comité de Empresa, atender o local sindical cando así lles correspondía e facer o seu traballo sindical cando era preciso; e un Comité de Empresa nin é válido nin pode funcionar cunha sóa persoa.
   
   
4. En todas as administracións e mesmo en empresas privadas existen bolsas de horas sindicais como ferramentas de xestión deste tempo e, tristemente, como puidemos observar nos últimos meses, logo de que seis sentenzas dos compañeiros do GRUMIR declarasen improcedentes os despedimentos e outras dúas non, a xustiza non sempre mide os mesmo casos coa igual vara de medir, e neste caso o alcalde do Concello de Betanzos decidiu que os delegados deste Concello non tivésemos os mesmos dereitos que os doutras administracións e demostrou que o “socialista” e “obreiro” lle vén moi pero moi grande ao goberno municipal.
   
   
5. Lamentamos profundamente que o Concello bula tanto para enviar unha nota de prensa por estes motivos e non para informar de cal é a situación con respecto á Relación de Postos de Traballo, porqué decidiron non negociar cos traballadores as propias modificacións dos seus postos ou explicar como é posible que a xestión do Concello sexa tan pésima en materia de persoal que teñan que preguntarlle á Deputación, a un mes do comezo de 2013, que pasa cos orzamentos de 2012. Igualmente, nótase demasiado que o goberno municipal ten diferentes varas de medir porque cando hai un ano a  presidenta do Comité comunicou por rexistro un episodio de violencia verbal acontecido co secretario municipal, e o único que fixo o Concello foi ocultarllo durante meses á oposición, non abrir o pertinente expediente informativo e nin sequera falar coa propia delegada ata meses despois e tan só a un día do pleno en que se viron obrigados a tratar o tema.
   
   
6. O certo é que tampouco é nova a estratexia de intentar descreditar aos delegados e delegadas da CIG que o único que pretende é ser unha última chamada de auxilio para que non se desmonte esta “chiringuitada” que sempre foi a xestión do persoal no Concello de Betanzos, mais estes feitos serven para dar máis azos e continuar traballando porque isto non acaba máis que de comezar e a pesar de que aínda nos sorprendemos día a día coas discriminacións practicadas polo goberno municipal, algo ao que nunca renunciaremos é a traballar polo persoal laboral e a mantelo informado de que todos os pasos que dá o Concello e que lle afectan aos traballadores e traballadoras.

Negociación dunhas novas bases de axudas sociais

Nos pasados días o Concello enviolle unha nova convocatoria de axudas sociais ao Comité de Empresa de cara a comezar un proceso de negociación e mesmo tivo unha reunión informal coa representación do Comité onde o Comité lle deixou claras as súas condicións para que houbese un acordo con respecto a este tema que tanto dano ten feito no último ano, logo de que o Concello lle pagase as axudas de 2011 ao funcionariado antes que ao persoal laboral.

O 21 do pasado mes de marzo o Comité de Empresa rexistrou a súa proposta de regulamento de axudas sociais, que foi aprobada por unanimidade no Comité de Empresa e que mesmo meses antes foi tratada nunha asemblea de persoal laboral. Se algo tiñamos claro dende a CIG é que o feito de que as axudas sociais fosen inversamente proporcionais aos ingresos familiares era unha cuestión de xustiza neste Concello e que non iamos renunciar á proposta do Comité e á que fixeron múltiples achegas os traballadores só porque o Concello no seu texto volvese, unha vez máis, a intentar facer un reparto lineal sen ter en conta para nada criterios sociais. Baixo esta premisa de mudanza do eixe que vertebra o texto das axudas presentámonos á reunión co Concello e cómpre dicir que ata o momento o Concello parece ser compresivo e está a estudar a proposta de axudas deste Comité de cara a acordarmos unhas novas bases o antes posible.

Resulta sumamente inxusto que as axudas se repartan por igual cando as situacións non son iguais, dende a CIG sempre defendemos que ten que levar máis axudas quen menos ten, e tendo en conta que o alcance destas axudas sempre foi a unidade familiar do traballadores, o criterio para as repartir por lóxica teñen que ser os ingresos da unidade tamén. Máis aínda nestes tempos que corren e logo de que o PP nos roubase a paga extra este tipo de axudas son máis necesarias ca nunca, sobre todo para a maioría do persoal laboral que é submileurista e ao que cada vez lle custa máis chegar a fin de mes por culpa das políticas de redución de poder adquisitivo dos traballadores da Administración pública que teñen practicado tanto o PP como o PSOE nos últimos anos.

O Comité de Empresa, debido a que a reunión mantida co Concello era a nivel informal, e tendo en conta que os delegados sindicais aínda non teñen nin unha soa das actas das Mesas Xerais de Negociación do último ano, decidiu rexistrar por escrito a súa postura con respecto á proposta de convocatoria que lle presentou o Concello, podédela consultar aquí.

Axudas sociais escrito Comité

Pechado por Folga Xeral

Preguntas frecuentes

Dende a Confederación Intersindical Galega tentamos responder ás principais dúbidas que xiran arredor da convocatoria da xornada de folga xeral do vindeiro 14 de novembro para que todos os traballadores e traballadoras poidan facer valer os seus dereitos e secundar as mobilizacións con liberdade

Cal é a miña situación laboral no día da Folga? 

Durante a xornada de folga, o contrato de traballo está suspendido, ficando sen efecto as obrigas recíprocas do traballador ou traballadora e a empresa: traballar e pagar o salario. Para os efectos de Seguridade Social, o traballador ou traballadora permanece nunha situación asimilada á alta.

Canto me poden descontar polo día da Folga?

No día de folga, descóntase a parte proporcional dos conceptos salariais e extrasalariais que correspondan a esa xornada, así como das partes proporcionais das pagas extraordinarias. O teu dereito ao desfrute de festivos e vacacións non se ve prexudicado polo feito de secundares a folga.

Teño a obriga de lle comunicar á empresa que vou á folga?

Non, o dereito á folga faise efectivo unha vez que esta comeza. Non tes a obriga de comunicares á empresa se vas facer folga ou non. É máis, pedir a un traballador que asine un escrito manifestando a súa intención de secundar ou non a folga é unha infracción administrativa e pódese denunciar perante a Inspección de Traballo.

Se lle asinei un papel ao empresario dicindo que non vou facer folga, podo cambiar de opinión?

Aínda que llo asinases con sangue. O dereito á folga é un dereito irrenunciábel e exércese no momento en que a folga comeza. O documento que asinaches non é vinculante porque vulnera un dereito fundamental.

Pódenme despedir ou sancionar por ir á Folga?

De ningunha maneira. O dereito á folga é un dereito fundamental. En caso de sanción ou despedimento, seria considerado nulo e o empresario tería que reincorporarte nas mesmas condicións que tiñas.

Pode calquera empresa fixar servizos mínimos?

Os servizos mínimos están destinados á estrita prestación dos «servizos esenciais para a comunidade» (sanidade, educación, hixiene pública, transportes públicos, etc.) durante a folga, polo que é a Autoridade Laboral a que estabelece en que empresas e administracións hai que facelos e en que consisten. As empresas que non prestan estes «servizos esenciais para a comunidade» só poden impor «servizos de mantemento», destinados a garantir a seguridade das persoas e locais e o seu mantemento (instalacións, maquinaria, materias primas, etc.) cando sexa necesario, mais nunca con carácter produtivo.

Se me designan para servizos mínimos, aínda que sexa abusivos, teño que ir traballar?

En principio, si. Non ires traballar cando es designado ou designada para os servizos mínimos pode ser motivo de sanción ou mesmo de despedimento disciplinario. Así pois, debes ir ao teu posto de traballo e recorrer xudicialmente os servizos mínimos impostos se entendes que son indebidos ou excesivos.

É delito que a empresa me diga que se non vou traballar o día da folga me ateña ás consecuencias?

Por suposto que o é. A folga é un dereito fundamental, polo que a coacción para evitar o seu exercicio está tipificada como delito. Se o empresario fai iso con testemuñas, debes comunicalo ao sindicato para presentarmos a correspondente denuncia.

Compútase o día da folga para os efectos de cálculo de absentismo laboral?

Non. Está expresamente excluído este suposto para os efectos de cálculo do absentismo laboral.

É legal ir nun piquete polas empresas falando cos traballadores e traballadoras para que secunden a folga?

 Totalmente legal. O dereito a informar os traballadores e traballadoras dos motivos da folga e da necesidade da súa participación fai parte do propio dereito de folga.

Lugares e horarios das manifestacións do 14-N

-Vigo: ás 11:30 horas, desde a Praza de España, até a Praza de América.

-Pontevedra: ás 12:30 h, desde a Praza da Ferrería, até a Subdelegación do Goberno.

-Vilagarcía: ás 12:00 horas, desde a Casa do Mar até a Praza Ravella

-Ourense: ás 12:00 horas, desde o Pavillón dos Remedios até a Subdelegación do Goberno.

-Compostela: ás 12:00 h, desde a Praza Roxa até a Praza de Praterías.

-Lugo: ás 12:00 horas, desde a Casa Sindical, na Ronda da Muralla, até a Praza de Santa María.

-A Coruña: ás 12:00 horas, desde a Praza da Palloza até a Praza de María Pita.

-Ferrol: ás 12:00 horas, desde a Praza do Inferniño até a Praza de Armas.

-Burela: ás 12:00 horas, desde a Estación de Servizo Vista Alegre, até a Praza do Concello

-Riberia: ás 12:00 horas, desde a Estación de Autobuses até a Praza do Concello.

-Monforte: ás 19:30 horas, desde a Praza de España até a Praza da Estación.

O secretario xeral da CIG explica os motivos da convocatoria de folga xeral do 14-N nunha vídeo-entrevista

A conversa con Suso Seixo é un dos principais contidos da nova páxina web sobre a xornada de paro que vén de estrear a CIG

O secretario xeral da CIG explica na entrevista as principais razóns da folga xeral do 14-N, unha convocatoria “fronte as intencións do capital de aproveitar a crise para someter e precarizar o mundo do traballo” coa intención inmediata de “rebaixar os salarios nun 20-25%”. A conversa con Suso Seixo é un dos principais contidos da web que o sindicato vén de poñer en marcha para centralizar toda a información sobre a xornada de paro, na que tamén se poden atopar as respostas ás preguntas máis frecuentes sobre o dereito a secundala ou un repaso polas 13 folgas xerais nas que participou o sindicalismo nacionalista.

Aínda que a convocatoria “chega tarde”, xa que a CIG pretendía anunciala para setembro, Seixo valora de forma positiva a unidade sindical coa que se afronta a convocatoria e que responde á crise do modelo sindical pactista de CCOO e UGT “que xa non funciona e que os obriga a adoptar unha actitude mobilizadora”.

Seixo lembra, ademais, que se até agora non foi posíbel esta unidade non foi por culpa da CIG, “xa que non podiamos mantela con organizacións que cos seus acordos desmobilizaban a clase traballadora en plena crise”.

O máximo responsábel da central nacionalista insiste na necesidade de conquistar maior soberanía política para que o pobo traballador galego poida combater “as agresións aos sectores básicos da nosa economía” por parte dun capital “en pleno proceso de concentración e centralización”. Nesta liña, valora como “moi positiva” a convocatoria simultánea en varios estados europeos, lembrando que a CIG “apostou dende hai tempo polas mobilizacións internacionais, xa que as contestacións individualizadas deben acadar un carácter global para seren efectivas”.

Finalmente, agarda que “o resto de centrais sindicais europeas entendan que isto é un conflito de clase, global” e se unan a futuras convocatorias de dimensión internacional, aínda que cada país “conta coas súas problemáticas específicas”.

Podes ver o vídeo da entrevista aquí. 

Preme aquí para acceder á páxina web da folga xeral do 14-N.

Convocada a Mesa Xeral de Negociación para os servizos mínimos da Folga Xeral do 14 de novembro

O venres 9 de novembro o Concello convocou aos representantes do traballadores a unha Mesa Xeral de Negociación para acordar os servizos mínimos de cara á vindeira Folga Xeral do próximo 14 de novembro, logo de que a CIG solicitase por rexistro que o Concello convocase a Mesa Xeral finalmente parece que comeza a utilizar os mecanismos de negociación co persoal creados para tal efecto.

Xunto con esta convocatoria o Concello achega a súa proposta de servizos mínimos coa designación dos traballadores e traballadoras afectadas por estes servizos mínimos. Dende a CIG xa acordamos a postura que defenderemos nesta Mesa Xeral e, en todo caso, se algún dos traballadores ou traballadoras afectadas por este servizos mínimos, unha vez que se acorden, se considera perxudicado/a pola resolución de servizos mínimos do Concello, pode achegarse a calquera dos delegados e estudaremos as posibilidades de recurso aos servizos. 

En todo caso, aos traballadores e traballadoras que sexan designados para os servizos mínimos o Concello terá que llo notificar por escrito no prazo pertinente e todo aquel que non sexa designado poderá asistir á folga.

Novas na prensa

La CIG solicita al Ayuntamiento que convoque al personal para acordar los servicios mínimos

El Ideal Gallego (08/11/2012)

La CIG (Confederación Intersindical Galega) ha solicitado al Ayuntamiento que convoque la mesa de negociación para acordar los servicios mínimos de cara a la huelga prevista para el 14-N. “Á vista de que van pasando os días e, unha vez máis, o concello non fai o seu traballo por conta propia, decidimos presentar esta solicitude”, indicaron desde el sindicato nacionalista.

Las mismas fuentes explicaron que varios compañeros se dirigieron a sus representantes para preguntar por los citados servicios mínimos, más aún cuando en la última huelga general la propuesta les llegase un día antes de su celebración, uy sin que hubiese convocado el organismo competente de negociación. “Desde a CIG –concluye el sindicato– esiximos que, dunha vez por todas, este concello utilice os mecanismos pertinentes para todas cantas medidas se teñan que tomar en materia de persoal” y, de la misma manera, siga los pasos de otras administraciones locales similares, que nunca mostraron problemas con este tipo de gestiones, reguladas por ley, pero que, según la CIG, “neste concello chegan con anos de retraso”.

El sindicato, que entiende la convocatoria de huelga general para el 14-N como “máis xustificada que nunca”, anuncia su intención de secundar el paro también en el Ayuntamiento de Betanzos, para denunciar que “roubáronnos parte dos nosos salarios, roubáronnos os nosos dereitos laborais, e agora queren roubarnos tamén o noso dereito a traballar”, y para luchar “contra a explotación e o empobrecemento”, tal como se rocoge en una nota publicada por el CIG del Ayuntamiento de Betanzos, donde es el sindicato mayoritario.

Mañá ás 20:00 h Asemblea aberta da CIG no Liceo

Solicitudes pendentes

Logo da reunión do pasado mércores co concelleiro de Persoal, o Comité achegoulle por rexistro unha listaxe con algunhas das solicitudes pendentes de resposta dende hai varios meses por parte do Concello de Betanzos. A listaxe que se achegou contempla algunhas das máis importantes mais son moitos máis os escritos que o Comité rexistrou e as peticións que verbalmente lle fixo ao concelleiro de Persoal.

A reunión da semana pasada puido ser un punto de inflexión pola suposta boa dispoñibilidade do Concello para achegar a documentación, mais como xa nos aconteceu noutras ocasións isto simplemente agardamos a que as boas palabras se convirtan en feitos nas próximas semanas e o Goberno municipal reflexione seriamente e reencamiñe o conflito laboral que provocou a intención de aprobación dunha nova Relación de Postos de Traballo por parte do Concello. 

Deixámosvos unha copia do documento rexistrado e agardamos que, como ata o momento, os traballadores e traballadoras deste Concello, sigan reclamando o que lles pertence e é xusto e nos transmitan os seus problemas de cara a lles buscarmos as posibles solucións, ben pola vía do diálogo se este existe ou recorrendo a outras fórmulas se é preciso.

Solicitude

A CIG solicítalle ao Concello que convoque a Mesa Xeral de Negociación para acordar os servizos mínimos de cara á folga do vindeiro 14 de novembro

Á vista de que van pasando os días e, unha vez máis, o Concello non faga o seu traballo por cobnta propia, dende a CIG do Concello de Betanzos instamos hoxe por rexistro a que se convoque a Mesa Xeral de Negociación de cara a acordar os servizos mínimos para a folga convocada para o vindeiro 14 de novembro.

Logo de que varios compañeiros e compañeiras nos preguntasen polos servizos mínimos, entedimos que xa que o Concello non daba o paso debiamos solicitar que se convocase a Mesa Xeral para a negociación destes, e máis aínda logo de que na ocasión a proposta chegase a pouco máis dun día para a Folga Xeral e non se convocase o organismo pertinente de negociación. Dende a CIG exiximos que dunha vez por todas este Concello utilice os mecanismos pertinentes para todas cantas medidas se teñan que tomar en materia de persoal e siga os pasos doutras administracións locais similares que non amosan ningún problema con este tipo de xestións que están reguladas dende hai moitos anos e que neste Concello chegan xa con moitos anos de atraso. Por iso, simplemente solicitamos que se convoque aos representantes dos traballadores para acordar os servizos mínimos de cara a unha Folga máis xustificada que nunca.

Roubáronnos parte dos nosos salarios, roubáronnos os nosos dereitos laborais e agora mesmo queren roubarnos o dereito a traballar, por iso o 14 de novembro iremos á Folga Xeral CONTRA A EXPLOTACIÓN E O EMPOBRECEMENTO!