"Reivindicar
unha tarifa propia é unha demanda de sentido común", aseverou
o Secretario Comarcal
A
Unión Comarcal da CIG da Coruña realizou este xoves unha
concentración diante da Delegación do Goberno en demanda dunha
Tarifa Eléctrica Galega. A protesta enmárcase na campaña de
recollida de apoios á Iniciativa Lexislativa Popular que impulsa a
central sindical de “Medidas para garantir a enerxía como un
servizo público e contra a pobreza enerxética”.
O
Secretario Comarcal da CIG da Coruña, Xabier Filgueira, explicaba ás
portas da Delegación que a reivindicación dunha tarifa propia parte
da consideración de que “somos un país produtor, excedentario e
exportador de enerxía. Pero á hora de estabelecer o prezo da
electricidade non se ten en conta esta singulariedade, posto que
existe un marco tarifario único para todo o estado”. "Reivindicar
unha tarifa propia é unha demanda de sentido común", afirmou.
O
marco regulatorio e tarifario único e as decisións adoptadas polas
empresas eléctricas que actúan en réxime de oligopolio a través
do seus centros de decisión afastados de Galiza, provocan que nunca
recibiramos vantaxes na nosa condicións de país produtor. Iso sen
perder de vista que o prezo da electricidade no Estado español é o
3º máis caro de Europa para o consumo doméstico e o 8º para o uso
industrial.
Neste
senso, Filgueira lembrou que a tarifa que pagamos está configurada
nun 45% polo custe da enerxía, mentres que o resto corresponde a
peaxes políticas (nas que intervén o goberno) que inclúen
conceptos como o custe de transporte, as primas ás renovábeis, as
axudas ao carbón español, a moratoria nuclear ou os custes da
extrapeninsulariedade. Custes que ascenden a miles de millóns anuais
e que os galegos e as galegas tamén abonamos aínda sendo produtores
e exportadores.
“É
dicir, somos solidarios con outros territorios e industrias, pero non
hai unha soa peaxe política que implique solidariedade con quen
produce, a pesares de termos que sufrir os custes sociais e
medioambientais da especialización neste sector á que se nos forzou
dende o Estado”, aseverou.
Isto
é un factor fundamental, engadiu Filgueira, polo que a CIG entende
que temos dereito a unha bonificación nas peaxes de acceso que
permita unha rebaixa no prezo da enerxía, tanto para o consumo
doméstico como para o industrial. A central sindical calcula esta
rebaixa nun 30% nas peaxes.
Garantía
de servizo público
Doutra
banda, o sistema de poxa para a subministración –que determina o
prezo das enerxías- provoca que permanentemente haxa enerxías
hiper-retribuídas e polo tanto, empresas privadas obtendo beneficios
millonarios a conta dun sector estratéxico para Galiza e que debería
ter un marcado carácter público e galego.
Neste
senso, a ILP promove a participación da Xunta de Galiza,
directamente ou a través de empresas mixtas, no aproveitamento
público de todos os recursos enerxéticos, así como de todas as
instalacións de produción, distribución e transporte existentes no
noso país.
É
fundamental que poidamos deseñar e aplicar unha estratexia
enerxética propia para o desenvolvemento económico e industrial de
Galiza e para garantir o dereito universal de toda a poboación ao
consumo enerxético. Non cómpre esquecer que hai máis de 100.000
fogares galegos que padecen pobreza enerxética, que teñen
dificultades para pagar o recibo a final de mes e que non poden
garantir unhas condicións mínimas de habitabilidade, sobre todo en
épocas de inverno.
Tarifa
industrial estábel
O
Secretario Comarcal da CIG da Coruña puntualizou que no texto da
proposta lexislativa tamén se recolle o estabelecemento dunha tarifa
industrial estábel para as empresas con grandes consumos capaces de
desconectarse, que substitúa ao actual sistema de poxa da
interrumpibilidade.
Unha
tarifa estábel, coñecida e predicíbel, ao mesmo xeito que funciona
no mercado internacional ou como xa está estabelecida en Francia,
Alemaña ou Canadá. “Este sistema evitaría definitivamente a
inseguridade que xera a poxa anual en industrias con grandes consumos
como Alcoa”, matizou.
A
ILP promovida pola CIG tamén recolle medidas sobre diversificación
das fontes de enerxía e o desenvolvemento das renovábeis, ou a
aprobación dun plan de medidas para o fomento do aforro e a
eficiencia no consumo enerxético.
Asemblea
informativa para os delegados e delegadas
Previamente
á concentración, as delegadas e os delegados da CIG da Coruña
asistiron a unha asemblea na que Fernando Branco se encargou de
debullar polo miúdo o funcionamento do sistema eléctrico español,
como se estabelece o prezo da enerxía no mercado e como se constrúe
a factura que pagamos as e os consumidores.
