Sobre o borrador da Relación de Postos de Traballo

A empresa adxudicataria do contrato para a elaboración dunha nova RPT e a reodenación dos recursos humanos do Concello de Betanzos tivo onte unha primeira reunión cos representantes das catro centrais sindicais deste Concello. Este reunión foi un primeiro encontro e o Concello amosouse disposto a outra posible xuntanza de cara a expór o que cada quen considerase oportuno.

A empresa comezou por un pequeno resumo de como se está levando a cabo este proceso e lembrou que se fixeron 140 entrevistas a traballadores/as e que este borrador que está a disposición do persoal é un primeiro borrador de RPT ideal, é dicir, na que aparecen postos que é posible que mesmo ao final non aparecen mais que o Concello son os que entende nunha estrutura ideal.

O borrador inclúe 17 postos de persoal laboral que na actualidade están fóra da RPT, por tanto, ao 100% do persoal que presta os seus servizos no Concello (non inclúe postos da actual RPT que considera que son para extinguir como albanel, monitor de xardinaría etc). Así mesmo fala da taxa de temporalidade do persoal laboral na actualidade, que é do 90%, nunha RPT actual onde o 33,8 % son funcionarios/as, o 54,7% son postos de laborais e outro 11,5% dos postos de laborais que nin sequera aparecen na RPT.

Hai unha intención de que a taxa de funcionarios/as se eleve nun 50% con respecto á actual RPT e outro dos obxectivos é a conversión do resto de laborais temporais en laborais fixos. Con respecto á RPT actual mantéñense 85 postos, reconvértense 21, créanse 18 e amortízanse 25.

Cando aos postos de traballo do persoal laboral proponse unha baixada de grupo A1 a A2, coa correspondente baixada de nivel  para os postos de arquitecto/a, arqueólogo/a, técnico/a de normalización lingüística, dous de arquiveiro/a bibliotecario/a,  dous/as psicólogos/as e director de Conservatorio. Unha baixada de grupo A1 a grupo B para o posto de técnico/a deportivo, e do grupo A2 ao B para os dous animadores socioculturais, así como do A2 ao C1 para o antigo posto de dirección do CFO. Tamén hai unha baixada de grupo III a IV do encargado de limpeza. Proponse, pois, unha baixada de grupo e nivel a 13 postos de laborais.

Por outro lado, proponse unha suba de grupo pola equivalencia de estudos coas novas titulacións para o posto de encargado/a dos electricistas, de grupo III a grupo B, a catro técnicas/as de xardín de infancia e a mesma suba de grupo para os dous/úas delineantes, así como unha suba de grupo VI a III para os dous electricistas. Así mesmo, hai unha suba de grupo para un novo posto de auxiliar de biblioteca / museo / arquivo de grupo V a IV e que deriva dun anterior posto de limpeza de edificios. Non se recolle unha suba de grupo V a VI das/os auxiliares de axuda no fogar que é unha reclamación xa case histórica e derivada dun requirimento de titulación que vén dado pola lexislación vixente. Proponse, pois, unha suba de grupo e nivel para 10 postos de laborais.

Canto ás xornadas, contémplase a ampliación a xornada completa de tres postos, o de técnico/a deportivo e dous de profesor/a da Escola de Folclore. Así mesmo, recoñécense dispoñibilidades aos postos de secretario/a xeral, arqueólogo/a (de 24 horas), encargado/a de servizos múltiples, encargado/a técnico/a especialista en electricidade e  ao/á inspector/a xefe/a da Policía Local

Canto ao persoal funcionario, só se observa unha baixada de grupo A1 a A2 no posto de director/a biblioteca /museo /arquivo.

Polo que respecta aos niveis do funcionariado proponse manterlle o nivel aos habilitados nacionais, reducir os niveis dos funcionarios do grupo 1 ao niveil 26, os do A2 ao nivel 24 e os C1 a nivel 18. Canto aos laborais indica que se manteñen no nivel actual no documento mais iso é incorrecto, posto que as propostas de baixadas de grupo mencionadas influirían na consecuente baixada de nivel, o que é máis grave se temos en conta que o persoal laboral na actualidade ten o nivel máis baixo de cada grupo e os funcionarios, en xeral, o máis alto. Tamén se propón unha suba de nivel dun inspector xefe ao 26 e do outro inspector xefe ao 24.

Neste primeiro encontro, a Sección sindical da CIG bosquexou algunhas das cuestións que van ser o cerne da posterior negociación co goberno municipal, para alén de non ter feita aínda unha valoración en conxunto do documento.

CRITERIOS DE ASIGNACIÓN DO COMPLEMENTO DE DESTINO

Enténdese que hai unha situación histórica de discriminación entre persoal laboral e funcionariado mais preguntouse polos criterios de asignación do nivel neste novo documento.

PROPOSTAS SOBRE O MÉTODO DE VALORACIÓN DO COMPLEMENTO ESPECÍFICO

Na proposta técnica presentada prímanse a titulación, o grupo, a xerarquía, a especial dificultade técnica, que representan o 66,5% dos factores, mentres que os factores ligados á prestación efectiva do traballo e as tarefas (dedicación, incompatibilidade, perigosidade, penosidade e tipo de horario)  supoñen o 33,5%. 

A CIG adiantou que fará propostas na liña de que o valor dos factores sexan semellantes de cara a unha RPT que valore os complementos específicos coa maior equidade posible para os diferentes postos, independentemente da titulación requirida para o acceso.

PROCESO DE CONSOLIDACIÓN DE POSTOS

O Concello contempla a provisión do posto o sistema de oposición libre para os postos actualmente ocupados por funcionarios/as, o concurso/oposición ou oposición libre para os postos que na actualidade son de laborais e pasarían a ser de funcionarios/as e o concurso-oposición que na actualidade están ocupados por persoal laboral temporal e se contemplan como de persoal laboral fixo. A CIG tamén xa comentou na Mesa algunha das súas propostas nesta liña e que as achegaría por rexistro nas vindeiras semanas.

Unha cuestión que non é para nada menor é que a proposta de baixada de nivel e/ou grupo de funcionarios/as non lles suporía mingua das retribucións a estes, mais no caso do persoal laboral só sería así ata que se accedese ao novo posto, ben de laboral, ben de funcionario no que as retribucións se percibirían segundo ese novo posto.

A Sección sindical da CIG xa está a traballar no documento que rexistrará con respecto a este borrador e que recollerá varias das cuestións faladas co persoal nestas semanas.

Comunicación da representación da CIG na Comisión Paritaria Mixta de seguimento do Acordo regulador de funcionarios do Concello de Betanzos

Hoxe mesmo a CIG comunicoulle ao Concello que a representación da CIG na Comisión Paritaria Mixta de Seguimento e Control do Acordo regulador das condicións do persoal laboral do Concello de Betanzos será a seguinte:

Titular: Silvia Muíño 

Primeiro suplente: Jorge Amarante

Segundo suplente: Manuel Román Castro

Lembrámosvos que se hai funcionarios/as que teñan algún tipo de proposta que queiran tratar nesta Comisión relacionadas co Acordo regulador das súas condicións poden transmitirlla aos delegados da CIG.

CONSULTAS SOBRE O BORRADOR DA RELACIÓN DE POSTOS DE TRABALLO

A RPT está en fase de consulta e participación e pódense presentar achegas, alegacións ou suxestións ata o vindeiro 25/08/2017.

En principio está accesible na intranet municipal e a CIG solicitou que estivese accesible para o todo persoal que ten acceso ao cartafol compartido na que está colgada. Así mesmo, o propio concelleiro de Persoal informou que calquera traballador que non teña acceso a este sistema e queira consultala pode ir ao Departamento de Persoal. Así mesmo, os/as traballadores/as que que queiran consultala poderán facelo no local sindical do Comité de Empresa os seguintes días:

31 de xullo (12:00 h - 14:00 h)

4 de agosto (12:00 h - 14:00 h)

Calquera traballador/a laboral que teña algunha dúbida sobre este tema pode achegarse eses días ou, se non puidese, poñerse en contacto con calquera dos delegados da CIG. Tamén podedes traslarnos as vosas consultas en cigconcellobetanzos@gmail.com.

Tal e como xa nos trasladou o goberno municipal este é un primeiro borrador, polo que entendemos que este é o momento de facer achegas, polo momento estamos estamos analizando polo miúdo o documento e tentaremos facer o máiximo número de achegas posible a comezos de agosto, como sempre fixemos ata o momento. Así mesmo, animamos a todos os traballadores a que fagan as achegas que estimen de cara a participar neste proceso.

COMISIÓN PARITARIA DO CONVENIO COLECTIVO (18/0/2017)

O pasado 18 de xullo constituise a Comisión Paritaria mixta de seguimento e control do convenio colectivo do persoal laboral, logo de varias solicitudes do Comité de Empresa e que está composta por dous membros do goberno municipal e un representante de cada un dos sindicatos con representación no Comité de Empresa coa representatividade que lles corresponde.Nesta reunión o goberno municipal demostrou que segue na liña da negociación e de consenso cos representantes do persoal laboral con respecto á interpretación do convenio colectivo vixente e aceptou varias das propostas presentadas pola Sección sindical da CIG. A UGT, pola súa parte, non presentou ningunha proposta con respecto aos puntos da orde do día.

INTERPRETACIÓN SOBRE A CLÁUSULA TRANSITORIA III DO CONVENIO

Adoptouse un acordo sobre os criterios de absorción do CPT (Complemento Persoal Transitorio), que suporá unha modificación de engadido ao convenio colectivo e que deberá ir ao pleno e publicarse con posterioridade. Fica pendente saber se se poderá aplicar con carácter retroactivo ou desde que se publique e entre en vigor. Esta modificación de engadido será a seguinte:

“O Complemento Persoal Transitorio do persoal laboral do Concello de Betanzos non poderá ser incrementado nin revalorizado e absoberase segundo os seguintes criterios:

a) A absorción operará sobre o importe total de calquera futura mellora retributiva que afecte ao complemento específico.

b) No caso de que o cambio de posto de traballo supoña unha diminución de retribucións, manterase o complemento persoal transitorio fixado, a cuxa absorción se imputará calquera mellora retributiva posterior, mesmo as que poidan derivarse dun novo posto de traballo que afecte ao complemento específico.

c) Non terán consideración de melloras retributivas as derivadas do perfeccionamento de novos trienios, a percepción de retribucións complementarias que non teñan carácter de fixas na súa contía nin periódicas no seu devengo, o incremento xeral das retribucións básicas que poidan establecer anualmente os correspondentes orzamentos.”

CRITERIOS PARA APLICAR NO RECOLLIDO NO ANEXO III DO CONVENIO

Adoptouse un acordo con respecto aos conceptos máis claros que veñen recollidos no anexo III do convenio colectivo e que se pagarán ao abeiro deste complemento os traballos realizados fóra de xornada na limpeza, apertura e peche de instalacións e notificacións, xunto coa gravación e cobertura dos plenos, así como os relacionados coas actividades das festas, recoñecéndose como festas a Feira Medieval e as Festas de San Roque. Ficou pendente o concepto “eventos” porque non se chegou a un acordo coa proposta presentada polo Concello, que non tiña un criterio claro no recoñecemento duns actos como eventos e outros non. Non obstante chegouse ao acordo de que os representantes sindicais presentasen unha proposta que o Concello cuantificaría economicamente para logo reunir outra vez a Comisión paritaria e adoptar un acordo. Así mesmo, ficou claro que o máximo anual de horas extraordinarias é o permitido pola lexislación vixente, que son 80 horas, independentemente de que se cobren a través deste complemento, que supón un incremento con respecto ao que se cobra pola horas normais.

MODIFICACIÓN DE ENGADIDO AO ANEXO I

Con respecto ás horas extraordinarias acordouse facer unha nova modificación de engadido ao Convenio colectivo para actualizar as táboas en función dos incrementos retributivos permitidos polas leis de orzamento estatais. Ficaría, pois, por tanto, pedente unha actualización das contías das horas extraordinarias coa suba do 1% do ano 2016 e pendente da aprobación dos orzamentos deste ano a suba do 1% relativa ao 2017.

SUBA DO 1%

Instouse ao Concello a que realizase canto antes a suba do 1% aprobada nos orzamentos estatais e o Concello dixo que se realizaría esta suba unha vez que os orzamentos do Concello de aprobasen de xeito definitivo, posto que contiñan a previsión orzamentaria para esta suba. Así mesmo, unha vez que se realizase esta suba o Concello debería devolver os atrasos desde o 1 de xaneiro da suba do 1%.

OUTROS

Interpretación dos criterios da compensación do horario de verán

Transmitiuse un problema con respecto á interpretación arbitraria da compensación / redución do horario de verán e solicitouse que en servizos que se requira haxa un criterio unitario para todo o persoal e non criterios diverxentes e arbitrarios que, ademais, se aplican de xeito indiscriminado. Fíxose alusión a este problema na Escola Infantil Municipal e a que o Concello utilizase criterios unitarios e non arbitrarios na aplicación dos dereitos.

Varios

Tamén se insistiu en que o Concello constitúa a Comisión Paritaria de Igualdade, que se elabore o novo regulamento de axudas sociais, que se negocien os horarios e calendarios especiais e que se habilite o sistema para a comunicación dos días de ausencia por indisposición.

Proposta realizada á Comisión Paritaria Mixta de Control e Seguimento do Convenio Colectivo

Hoxe, 27 de xullo, e logo do decidido na reunión da Comisión Paritaria Mixta de Seguimento e Control do Convenio Colectivo os representantes na Comisión Paritaria da CIG e da UGT chegaron a un acordo de proposta conxunta de definición de "evento" no relativo ao anexo III do Convenio colectivo do persoal laboral para o pagamento do Complemento de Funcións Extraordinarias que se presentou no rexistro de Persoal.

O documento rexistrado indicaba o seguinte:

COMUNÍCOLLE:

PRIMEIRO: Que na reunión enriba mencionada, logo de non chegar a un acordo para a definición e aplicación do Complemento de Funcións Extraordinarias, recollido no anexo III do Convenio colectivo do persoal laboral, acordouse que os representantes do persoal na devandita Comisión achegasen unha proposta de definición do concepto “eventos” para a aplicación deste complemento que o Concello estudaría e cuantificaría de cara a convocar unha nova reunión da Comisión Paritaria que resolvese esta cuestión.

SEGUNDO: Que a proposta de definición do concepto “evento” para o pagamento das horas realizadas como Complemento de Funcións Extraordinarias é a seguinte:

"Evento é todo aquel que o Concello de Betanzos realiza con carácter periódico e fixo na programación das actividades das diferentes área municipais. A contía indicada no Complemento de Funcións Extraordinarias aplicarase só ás horas extras necesarias para a execución da actividade correspondente no mesmo día en que está programada e que se realicen en día de non traballo ou día festivo."

POR TODO O EXPOSTO:

Solicitámoslle ao Concello que realice os trámites oportunos de cara a valorar a proposta realizada e convoque a Comisión Paritaria Mixta de Control e Seguimento do Convenio Colectivo para a resolución desta cuestión en canto sexa posible e a aplicación do anexo III do Convenio colectivo vixente na súa totalidade.

Nota informativa do Concello sobre as entrevistas da RPT

Estratexias sindicais para previr, xestionar e eliminar o acoso laboral e a violencia contra as mulleres

Informe elaborado como parte do Proxecto "Seguridade na casa, seguridade no traballo" da Confederación Europea de Sindicatos (CES); reúne as probas recollidas nas entrevistas realizadas como parte de 11 estudos detallados de casos a nivel europeo sobre desenvolvementos a nivel de xénero, A violencia e o acoso no traballo, incluída a violencia doméstica no traballo. A violencia e o acoso por razón de xénero é unha forma de discriminación que causa danos importantes para as mulleres, xa sexa no lugar de traballo, en lugares públicos, en transporte público, en escolas e colexios ou na familia. O informe amosa como os sindicatos e / ou socios sociais abordaron o tema nas negociacións, a negociación colectiva, a sensibilización sindical, a formación e as campañas e as asociacións con organizacións de mulleres que traballan para poñer fin á violencia de xénero. O informe sinala as boas prácticas no traballo e amosa o valor engadido das accións sindicais, as innovacións e as negociacións para apoiar ás vítimas e crear lugares de traballo libres de violencia e acoso.  

Enfermidade profesional. Valoración da sospeita

Sociedade Española de Traumatoloxía Laboral/Consellería de Saúde da Comunidade de Madrid Este documento xurde da necesidade de acordar criterios na sospeita, identificación, diagnóstico e a comunicación dos casos de sospeita de enfermidade profesiona, dado que son moitos os axentes implicados no proceso de recoñecemento dunha enfermidade profesional: facultativos do Sistema Público de Saúde, Mutuas, Servizos de Prevención, Instituto Nacional da Seguridade Social (INSS), Unidades de saúde laboral, autoridades sanitarias, etc. 

 A elaboración do manual correu a cargo dun grupo de expertos da Administración Autonómica da Comunidade de Madrid, nas Mutuas de Accidentesde traballo, en Saúde Laboral e o INSS. 

A partires deste grupo inicial creáronse subgrupos de traballo específicos para cada unha das seguintes especialidades: dermatoloxía, infecciosas, pneumoloxía, oncoloxía, traumatología, otorrinolaringología e toxicoloxía, que foron os encargados de elaborar os correspondentes capítulos. 

No manual atópanse seleccionadas só algunhas das enfermidades que se inclúen na relación do Real Decreto 1299/2006, de 10 de Noviembre, polo que se aproba o actual cadro de enfermidades profesionais (EEPP) no sistema da Seguridade Social. 

Como criterios de selección empregaron a frecuencia de aparición e aquelas que puidesen suscitar maior controversia ou dificultade diagnóstica; a información contida para cada unha foi estruturada nos seguintes epígrafes:- aspectos xerais;- anamnesis e exploración: breve descrición de síntomas e signos;- probas diagnósticas: divididas en básicas, considerando como tales aquelas que con carácter xeral resultan imprescindibles para a identificación e o diagnóstico, e especiais, cuxo propósito adoita ser a confirmación diagnóstica cando se precise, normalmente realizada polo especialista;- criterios de asociación clínico-laboral: de exposición, de temporalidade, factores extralaborales e actividades profesionais;- bibliografía.

Abrindo camiños n.º 58 Xullo 2017

Consultas sobre o expediente de modificación da Relación de Postos de Traballo

Tal e como informamos nestes  días ao persoal laboral o Concello inicia a fase de consultas do borrador inicial da RPT. Cómpre lembrar que os traballos de asistencia técnica e xurídica se iniciaron o día 26/01/2017 e desenvolveranse en dous anos e medio, cuxas dúas primeiras fases serán as seguintes:

1.ª fase: 26 de xaneiro de 2017-25 de xulllo de 2017

-Deseño e elaboración do borrador inicial da RPT e Organigrama municipal.

-Fase de información e consultas cos representantes dos traballadores.

-Elaboración do borrador provisional da RPT e do Organigrama municipal.

2.ª fase: 26 de xullo-25 de xaneiro de 2017

-Negociación colectiva da RPT e do Organigrama cos representantes sindicais.

-Elaboración da RPT e do organigrama definitivos.

-Aprobación dos documentos e entrada en vigor.

O Concello, pois, nesta semana, entregoulle unha copia do borrador da RPT aos representantes dos traballadores e puxo a disposición do persoal que conta con ordenador e está en rede unha copia, non obstante, tal e como xa informamos, o Comité de Empresa rexistrou unha solicitude para que habilite un sistema de información a todo o persoal que que non ten acceso á rede do Concello ou nin sequera computador, na maior parte persoal laboral e de servizos. Así mesmo, solicitoulle que corrixa esta situación de cara a evitar unha discriminación no acceso a esta información que resulta de especial interese para todo o persoal e agardamos que nos vindeiros días se corrixa esta situación.

A participación neste procedemento pode instrumentarse mediante consultas ou reunións coa Concellería de persoal, ou mediante a presentación de informes, suxestións ou alegacións por escrito (individuais ou colectivas) durante o prazo de trinta días hábiles (ata o 25 de agosto de 2017).

A Sección sindical da CIG estará dispoñible para consultas sobre esta cuestión no local sindical (situado na Alameda Veiga Roel) os seguintes días:

14 de xullo (12:00 h - 14:00 h)

19 de xullo (12:00 h - 14:00 h)

27 de xullo (12:00 h - 14:00 h)

Calquera traballador/a laboral que teña algunha dúbida sobre este tema pode achegarse eses días ou, se non puidese, poñerse en contacto con calquera dos delegados da CIG.

Tal e como xa nos trasladou o goberno municipal este é un primeiro borrador, polo que entendemos que este é o momento de facer achegas, polo momento estamos estamos analizando polo miúdo o documento e tentaremos facer o máiximo número de achegas posible a comezos de agosto, como sempre fixemos ata o momento.

Convocatoria de constitución da Comisión Paritaria Mixta de control e Seguimento do Convenio colectivo do persoal laboral

O Comité de Empresa solicítalle ao Concello que defina o procedemento para a comunicación das ausencias por indisposición recollidas no artigo 20 do Convenio colectivo

Criterios de absorción do Complemento Persoal Transitorio

O Complemento Persoal Transitorio vén definido no Convenio colectivo do seguinte xeito:

Cláusula transitoria primeira. Complemento persoal transitorio

Conforme establece o artigo 29 do presente convenio colectivo, aquel persoal que actualmente ten unha retribución anual superior á establecida no sistema retributivo transitorio do Anexo I, respectaráselle os seus dereitos económicos adquiridos e consolidados.

Por isto, aquel persoal que actualmente perciba unha retribución anual superior á establecida no referido Anexo I terá dereito á percepción dun complemento persoal de carácter transitorio e absorbible.

Este complemento persoal será transitorio e terá vixencia en tanto o sistema retributivo aplicable sexa o que se fixa no anexo I do convenio colectivo. É dicir, deberá aboarse en tanto non se teña aprobado a RPT ou instrumento organizativo similar. A contía do dito complemento será a diferenza, en cómputo anual, existente entre as retribucións que se perciben na actualidade e as retribucións que establece o Anexo I do presente convenio colectivo.

Na actualidade os delegados sindicais descoñecen o número de traballadores que dispoñen deste Complemento, porque o Concello non lle facilitou os datos ao Comité de Empresa, a pesar de que os solicitou nada máis entrou en vigor o convenio.


A única información que teñen sobre traballadores que o perciben na actualidade é un escrito asinado por dezaseis traballadores que lle achegaron ao Comité de Empresa transmitindo as súas inquedanzas con respecto á situación logo da entrada en vigor do Convenio colectivo, momento en que o Concello decidiu unilateralmente e sen negociación que todos os incrementos retributivos derivados non só da aplicación do convenio, senón tamén da aplicación das leis de orzamento estatais serían absorbidas por ese complemento.

O Comité de Empresa xa solicitou en diversas ocasións que se constitúa a Comisión Paritaria de cara a definir os criterios de absorción do Complemento Persoal, así como a aplicación do Complemento de Funcións Extraordinarias e o Complemento de Dispoñibilidade recollidos no convenio colectivo. Son varias máis as cuestións que haberá que tratar, posto que o Concello leva desde a entrada en vigor do convenio sen lle pagar horas extras ao persoal laboral (mes de abril) e está pendente o incremento do 1% de 2016 e do 1% de 2017 nas contías recollidas no convenio colectivo.

Nestes días desde a sección sindical da CIG están a achegarlle aos traballadores con complemento persoal unha proposta de criterios de absorción do devandito complemento que tentarán negociar co goberno municipal e que consideran menos lesiva para os intereses deste persoal, sempre tendo en conta que estamos falando de postos cuxas retribucións anuais son superiores ás do resto do persoal do mesmo grupo e que se entende que esta é unha situación temporal e pendente da valoración dos complementos específicos na nova Relación de Postos de Traballo, tal e como recolle, así mesmo, o propio convenio colectivo. Segundo os datos cos que conta o Comité de Empresa do persoal laboral sobre os complementos persoais e que veñen dunhas táboas salariais facilitadas no ano 2015 polo Concello de Betanzos, este tipo de complementos irían dos douscentos euros anuais aos trece mil euros anuais (CPT máis baixa e máis alta respectivamente) por riba dos salarios do convenio e que cobra o resto do persoal do mesmo grupo.

Hai que lembrar que o Convenio colectivo do persoal laboral foi aprobado polos traballadores sen ningún voto en contra na asemblea de traballadores reunida para o efecto o 19 de marzo de 2015 e que supuxo a equiparación das retribucións co funcionariado (coas diferenzas de complementos específicos e e de destino correspondentes) e unha suba de salario para a maioría do persoal laboral, a equiparación por categoría de todos os traballadores, a solución a discriminacións históricas no cobro de complementos e o mantemento dos salarios dos traballadores que coa aplicación da nova táboa salarial seguen tendo uns salarios anuais superiores aos marcados no convenio colectivo, a través da creación do complemento persoal transitorio e absorbible.

Lei 3/2017 de orzamentos do Estado

BOE-A-2017-7387 by cigconcellobetanzos on Scribd

A CIG solicítalle ao Concello a que axilice a aplicación do incremento retributivo contemplado na Lei 3/2017

A CIG solicitoulle esta semana ao Concello de Betanzos que aplique os incrementos retributivos contemplados na Lei 3/2007 nunha solicitude que explicaba o seguinte:

PRIMEIRO: Que o pasado mércores 28 de xuño de 2017 publicouse a Lei 3/2017, do 27 de xuño, de orzamentos xerais do Estado.

SEGUNDO: Que o capítulo I do título III sobre os gastos do persoal ao servizo do sector público especifica que para os efectos deste capítulo están comprendidas as corporacións locais e os organismos dependentes delas, e no punto 2 contempla o seguinte:

“No ano 2017, as retribucións do persoal ao servizo do sector público non poderán experimentar un incremento global superior ao 1% con respecto ás vixentes a 31 de decembro de 2016, en termos de homoxeneidade para os dous períodos de comparación, tanto polo que respecta a efectivos de persoal como á antigüidade deste”.

TERCEIRO: Que a cláusula adicional primeira do Convenio colectivo do persoal laboral do Concello de Betanzos recolle o seguinte:

“Durante o período de vixencia do presente Convenio, as retribucións establecidas neste experimentarán o incremento que determine, para cada exercicio, a Lei de orzamentos xerais do Estado e restante normativa de aplicación; todo isto sen prexuízo das adecuacións e revisións retributivas que, dentro dos límites legais fixados ao respecto, proceda realizar para garantir a adecuación destas ao contido e características dos postos de traballo, así como as que se deriven do grado de consecución dos obxectivos fixados e do resultado individual da súa aplicación.”

POR TODO O EXPOSTO:

Instamos ao Concello de Betanzos a que axilice a aplicación dos incrementos retributivos especificados na Lei 3/2007, así como o pagamento dos atrasos correspondentes relativos aos incrementos mencionados de cara a que poidan ser pagados na próxima nómina.

Nova queixa dos delegados de prevención pola utilización da Casa Consistorial como almacén

Hai xa varios anos e con motivo de diversos eventos os delegados de prevención de riscos laborais vense na obriga de presentar queixar porque o Concello teima en utilizar a Casa Consistorial como almacén, co que isto supón para os traballadores e para a cidadanía que accede ao edificio. Estas oficinas convértese nun almacén de instrumentos, cadeiras e estandartes varios, ademais o continuo trásito de trastes dificulta o traballo das oficinas e imposibilita que a actividade administrativa se poida desenvolver con normalidade.

A queixa vén dada porque este edificio non está avaliado como almacén e o Concello de Betanzos, no seu total desprezo polo traballo que desenvolve o persoal que traballa nestas oficinas, ignora as queixas dos delegados e do persoal afectado.

Provisión temporal do posto de traballo de arquitecto/a municipal do Concello de Betanzos mediante Comisión de servizos