O Tribunal de Contas deu un tirón de
orellas á Seguridade Social. Nun dos seus últimos informes de
fiscalización detectou fallos e insuficiencias na xestión e o
control das recargas que deben pagar as empresas nas pensións que se
recoñecen aos traballadores/as que tiveron un accidente de traballo
ou unha enfermidade profesional, que estivesen provocados pola falta
de medidas de seguridade e hixiene no traballo.
Este informe de fiscalización, que se
coñeceu agora, realizouse sobre as contas e os procesos rexistrados
no ano 2016, cando esas recargas nas prestacións dos
traballadores/as que deben abonar as empresas infractoras ascendían
a uns 101 millóns de euros. Os fallos detectados afectan
practicamente a todas as entidades da Seguridade Social que
participan nestes procesos: ao Instituto Nacional da Seguridade
Social (INSS) e ao Instituto Social da Mariña (ISM), que son os que
recoñecen, xestionan e controlan estas recargas; á Inspección de
Traballo e Seguridade Social (ITSS), que é a responsable de
investigar os accidentes de traballo e enfermidades profesionais para
que se declare, en cada caso, a responsabilidade das empresas pola
falta de medidas de seguridade; e á Tesourería Xeral (TXSS), que
debe garantir que o sistema recada os ingresos que deben abonar as
empresas infractoras.
O organismo fiscalizador critica que
"non existe unha regulación normativa adecuada" acerca da
aplicación destas recargas --que aumentan as pensións dos
beneficiarios entre un 30% e un 50% dependendo da gravidade da falta
de medidas por parte da empresa--. Segundo as investigacións da
Inspección prodúcense estas recargas no o 34% dos accidentes
laborais.
Esta deficiencia regulatoria tradúcese
en atrasos na xestión destas prestacións para traballadores/as
accidentados. "Con carácter xeral observouse un período moi
dilatado de tramitación dos expedientes de recargas" quéixase
o Tribunal de Contas, que tamén afea ás entidades xestoras da
Seguridade Social, que incumpran o prazo de resolución destes
procesos, que a lei fixa en 135 días hábiles.
Así mesmo, o informe cre que a falta
de normativa obriga ao persoal que xestiona os expedientes para
"acudir á emisión de numerosos criterios, dificultando que
haxa un tratamento homoxéneo polas súas diferentes direccións
provinciais". De feito, unha das cuestións para a que se debe
recorrer a un criterio técnico interpretativo da Dirección Xeral da
Inspección, en ausencia de normativa, é o baremo para aplicar as
citadas recargas de entre o 30% e o 50%, segundo a gravidade da
infracción da empresa.
Ante isto, o Tribunal de Contas pídelle
á Inspección que inste o Ministerio de Traballo e Seguridade Social
que "estableza baremos máis axustados" que permitan aos
inspectores cualificar a gravidade da falta cometida pola empresa no
momento de fixar a porcentaxe de recarga a aplicar. A falta destes
baremos concretos podería provocar, segundo este organismo,
valoracións subxectivas "que poderían provocar consecuencias
económicas negativas nas empresas infractoras".
Esta fiscalización arroxa outros dous
fallos. Concretamente critica que a falta de actualización das
táboas de mortalidade e do tipo de interese técnico empregados para
o cálculo dos capitais "non permite alcanzar unha adecuada
valoración financeiro- actuarial das recargas aplicadas sobre as
pensións. Isto podería estar a provocar, segundo este organismo,
que o importe obtido no cálculo actuarial non garanta a cobertura do
importe da recarga ao longo de toda a vida do beneficiario. Isto xera
"desviacións negativas que haberían de ser asumidas pola
Seguridade Social".
E, finalmente, o Tribunal de Contas
reprocha á Seguridade Social que non inclúa na partida destas
recargas nos Orzamentos deste organismo, os aprazamentos de débeda
concedidos ás empresas declaradas responsables do pago destas
prestacións aos traballadores afectados.
Fonte: CincoDías
Ningún comentario:
Publicar un comentario