Logo de que o Comité urxise a información sobre as axudas sociais do ano 2012, o Concello vén de entregar hoxe mesmo a documentación ao Comité de Empresa, que xa acordou reunir de urxencia a Comisión executiva para informar de inmediato ao Concello sobre a documentación entregada a fin de que o Concello non demore máis o pagamento das axudas sociais.
A primeira vista, e antes de analizar a documentación polo miúdo, consideramos que os pasos dados nestes dous últimos anos con respecto a este tema son de importancia, non só porque conseguimos que xa non haxa ningún conflito con respecto ao pagamento das devanditas axudas a todo o persoal independentemente do seu contrato, hai que lembrar que ata hai pouco o Concello lle denegaba o dereito ás axudas ao persoal subvencionado, senón tamén porque a pesar de ter aturar non hai tanto informes do secretario municipal que cualificaban o Comité de "colectivo axurídico sen capacidade de decisión" nesta cuestión ou que mesmo intentaban excluír a determinados membros do Comité de Empresa de toda decisión relativa ás axudas sociais, a día de hoxe o Concello recuou e actúa de xeito correcto ata o punto de que pon á disposición da consulta do Comité os expedientes correspondentes no Departamento de Persoal. Por este e outros motivos a priori, dende a CIG proporemos informar a conformidade con respecto á proposta de concesión de axudas achegada polo Concello, aínda lembrando algúns aspectos que canto a publicidade das listaxes e información sobre a concesión de axudas para todo o persoal se recollen nas bases aprobadas en pleno e que o Concello aínda non foi quen de corrixir, aínda que agardamos que si que o faga en vindeiras convocatorias ao igual que fixo con outros tantos aspectos que se corrixiron en todo o que ten a ver coas axudas sociais dende a concesión das do ano 2010.
Ningún comentario:
Publicar un comentario