CIG-Administración oponse frontalmente a que se elimine a paga extra do persoal do sector público

Lembra que é un dereito de todas as traballadoras e traballadores e denuncia que se lles está facendo pagar a mala xestión de gobernos irresponsábeis

Ante as informacións nas que se especula coa posibilidade de que o goberno tamén está barallando a posibilidade de eliminar a paga extra dos empregados e empregadas do sector público, a secretaria nacional de CIG-Administración, María Carme López Santamariña, manifesta a frontal oposición da federación a que, sequera se prantexe esta posibilidade que considera “inaceptábel” de todo punto de vista. Fronte a isto denuncia que se está intentando facer pagar ao persoal do sector público a nefasta xestión económica de gobernos irresponsábeis que favoreceron un modelo baseado na especulación e no enriquecemento duns poucos a custo da maioría da sociedade.

A secretaria nacional de CIG-Administración asegura que é un “insulto” a todas as traballadoras e traballadores das administracións públicas que se estea poñendo en cuestión un dereito, como o de cobrar pagas extra, que é común a toda a clase traballadora. “Custounos moitos anos conseguilo. O persoal das administracións públicas, até hai pouco non cobrabamos completas as nosas pagas extra. Foi unha loita de anos de negociación e de chegar a acordos nas mesas, porque só se nos abonaba soldo base e antigüidade”.

López Santamariña lembra que no ano 2010, cando se decretou o recorte salarial, as pagas extra das traballadoras e traballadores das administracións públicas xa sufriron un recorte dun 15%. “Neste intre xa non estamos cobrando as nosas pagas extra completas como lle correspondería a calquera traballador/a”.

Asegura que tocar de novo os salarios, xa mermados porque ao longo destes últimos anos xa se reduciron nun 23%, o que vai provocar é “un empobrecemento a pasos axigantados do persoal que neste momento traballa  nas administracións”. Xunto a iso, afirma que “se comezan a desaparecer postos de traballos das administracións e recortar salarios do persoal que queda, o noso futuro vai ser moi negro”. Neste sentido, considera que deste xeito o PP retrotraería ás empregadas e empregados do sector público ás condicións laborais e salariais que tiñan en tempos pasados nos que as condicións eran “tremendamente precarias”.

Responsabiliza da actual situación a gobernos irresponsábeis que fomentaron políticas que favoreceron un modelo de economía especulativa fronte á economía real. “Agora pretenden que paguemos a súa incompetencia as traballadoras e traballadores públicos cos nosos salarios ou cos nosos postos de traballo e iso non o podemos tolerar”.

Táboa cos recortes salarias dos últimos anos

Elaborada a partir de datos do INE e dos orzamentos xerais do Estado desde o ano 2002 até este.

ANO	IPC GALIZA	IPC ESTADO	SUBA SALARIAL	DIF GALIZA	DIF ESTADO
2002	3,8%	3,5%	2%	-1,8%	-1,5%
2003	3,1%	3,0%	2%	-1,1%	-1%
2004	3,0%	3,0%	2,7%	-0,3%	-0,3%
2005	3,4%	3,4%	2,6%	-0,8%	-0,8%
2006	3,5%	3,5%	2%	-1,5%	-1,5%
2007	5,3%	4,9%	2%	-3,3%	-2,9%
2008	2,1%	2,1%	2%	-0,1%	-0,1%
2009	2,6%	2,1%	2%	-0,6%	-0,1%
2010	4,5%	,0%	-5%	-9,5%	-9,0%
2011	3,6%	3,1%	0%	-3,6%	-3,1%
TOTAL	34,9%	32,6%	12,3%	-22,6%	-20,3%

De www.galizacig.com.