Dende
a CIG do Concello de Betanzos lamentamos profundamente o acontecido
no Centro de Formación Ocupacional onde un traballador dunha
subcontrata do Concello saiu ferido de gravidade logo dun accidente
laboral. E queremos lembrar a importancia da saúde e a seguridade no
traballo para ver se o Concello de Betanzos toma dunha vez por todas
conciencia con este tema, que ata a chegada da CIG a este Concello
fora inexistente e desprezado por esta Administración.
Obviamente
as responsabilidades xa se dirimirán onde sexa oportuno mais non se
pode obviar o papel do Concello no acontecido tendo en conta que se
trataba dun traballador subcontratado e a Administración era á vez
empresa titular e principal en materia de seguridade e como tal debía
velar polo cumprimento das medidas de seguridade por parte da empresa
que el mesmo contratou e, igualmente debe garantir a seguridade
estrutural do lugar de traballo do persoal subcontratado, que parece
que é o que fallou. A maiores, é posible que polas circunstancias e
o tipo de traballo fose necesaria a presenza dun recurso preventivo
que velaría polo cumprimento da legalidade vixente en materia de
prevencia de riscos, e que ten funcións de vixilancia, de avaliación
das medidas preventivas, e correctora se se observa un deficiente
cumprimento das actividades preventivas.
Logo
deste desgrazado incidente, que pon unha vez máis de manifesto o
deficiente estado das naves do Centro de Formación Ocupacional,
queremos reclamarlle ao Concello máxima preocupación no tema da
saúde laboral e cumprimento das medidas de seguridade, e igualmente,
hai que lembrar que ten pendente adoptar as medidas oportunas con
respecto a algúns dos temas tratados no Comité de Seguridade e
Saúde como o estado ruinoso dalgunha nave na que aínda traballan
compañeiros e que quedou de que o técnico da mutua pasaría a
valorar mais sobre o que aínda non teñen novas os delegados de
prevención do persoal laboral.
En
todo caso, dende a CIG témolo claro, no caso de que o Concello non
actúe ante situacións que poden poñer en perigo a compañeiros
acudiremos á Inspección de Traballo e tomaremos todas as medidas
que estean na nosa man para velar pola seguridade e saúde laboral do
persoal laboral do Concello de Betanzos.
Ningún comentario:
Publicar un comentario