O pasado 21 de xuño o Comité de
Empresa, tal e como acordou na reunión do mes anterior, remitiulle
un escrito a todos os partidos da oposición con representación no
Pleno de cara a solicitarlle o apoio ao texto do convenio colectivo
do persoal laboral que previsiblemente se someterá a aprobación
plenaria no próximo mes de xullo. Ademais, púxose a disposición
por se querían solventar calquera cuestión do proceso ou do texto e
achegoulles unha copia do documento aprobado. O texto enviado foi o
seguinte:
Boa tarde,
Quero informarvos de que onte mesmo, 20
de xuño, tivo lugar a Comisión Negociadora do convenio colectivo,
na que procedimos a ratificar o texto do novo convenio, logo da
adaptación á normativa vixente proposta pola Xefatura territorial
da Consellería de Traballo e Benestar.
Este texto que levamos anos negociando
co goberno municipal (foi denunciado a finais de 2011) supón unha
equiparación de dereitos do persoal laboral e funcionario, para alén
dunha equiparación retributiva entre o propio persoal laboral e que
entendemos que trae consigo o primeiro paso cara a unha equiparación
tamén salarial co funcionariado, é froito dun intenso traballo de
negociación por parte do Comité de Empresa e de cesións por ambas
as partes, Comité de Empresa e goberno municipal, como en calquera
proceso de negociación. Neste proceso quedaron no camiño propostas
dos representantes dos traballadores mais entendemos que o texto
final si que supón, en termos cuantitativos e cualitiativos, un
pequeno avance e abre o camiño que deberemos continuar nos vindeiros
anos ata conseguir a equiparación efectiva e real coas condicións
laborais do funcionariado.
Por todo o indicado, e tendo en conta
que o texto debe ser aprobado polo Pleno da corporación, logo de ser
aprobado pola Comisión Negociadora, poñémonos en contacto co
Partido Popular / Betanzos Novo / Bloque Nacionalista Galego /
Compromiso por Galicia de cara a solicitar o voso apoio ao texto
cando sexa sometido á consideración plenaria (previsiblemente no
pleno de xullo). Igualmente, enviámosvos no documento anexo o texto
aprobado onte na Comisión Negociadora e que será levado ao Pleno,
de cara a que poidades estudalo, de o considerardes necesario, con
máis demora. Tamén nos queremos poñer á vosa disposición para
solventar calquera dúbida ou cuestión relacionada co tema, para
aclararvos o que consideredes necesario, ben por este medio, por
teléfono ou mesmo acordando unha reunión se o estimades.
Agradecemos por anticipado a vosa
atención e seguimos en contacto para calquera cuestión relativa ao
persoal que consideredes necesaria.
Un saúdo cordial
Silvia Muíño Naveira
Presidenta do Comité de Empresa
Betanzos, 21 de xuño de 2016
Ningún comentario:
Publicar un comentario